Zabrã sẽn yik Ikrɛnnã wilga vẽeneg tɩ kiris-neb ne yʋʋrã tũudmã taoor dãmb wʋsg teenda zabrã ne manesem toor-toore. Ad bũmb kẽer b sẽn yeele, sẽn na yɩl n keng zabd-n-taasã raoodo:

•   “Sodaas nins fãa sẽn zabd Ikrɛn sẽn yaa tõnd tẽngã koglg yĩngã toga ne pẽgr la waoogr wʋsgo . . . Tõnd bee ne yãmba. D pʋʋsda ne d sũur fãa yãmb yĩng la d teend-y wakat fãa.”—A Épiphane pipi soabã sẽn yaa Kiɛv Evɛkã goam b sẽn yiis The Jerusalem Post, yʋʋmd 2022 tʋʋlg kiuug rasem 16.

•   “Risi Egiliiz Ortodogsã taoor soabã maana tigsg Hatã sẽn loogã Risi sodaasã yĩnga, n keng b raood sẽn na yɩl tɩ b zab n kogl b tẽngã, ‘wa Risi nebã bal sẽn tõe n maan to-to wã.’ Wakat kãng tɩ Risi pãn-soaadbã sẽn be Mosku wã ra tʋmda sodaas tɩ b na n tɩ zab ne Ikrɛn.”—Reuters, yʋʋmd 2022 tʋʋl-nif kiuug rasem a 3.

 Kiris-nebã segd n kẽesa b toog zabã pʋsẽ bɩ? Bõe la Biiblã yeta?

 Biiblã wilgdame t’a Zeezi karen-biis hakɩɩkã pa segd n kẽesd b toog zab pʋsẽ ye.

•   “Lebs n sui f sʋʋgã a zĩigẽ, bala, neb nins fãa sẽn zabd ne sʋʋsã, sʋʋs n na n kʋ-ba.”—Matiye 26:52.

   Rẽ yĩnga ned sã n teel zabr wall a kẽng zabre, a tũuda a Zeezi gom-kãensã sɩda?

•   “Mam kõta yãmb tõ-paalga: Bɩ y nong taaba. Nong-y taaba, wa mam sẽn nong yãmb to-to wã. Yãmb sã n nong taaba, nebã fãa na n bãngame tɩ yãmb yaa mam karen-biisi.”—Zã 13:34, 35.

   Rẽ yĩnga ned sã n kẽesda a toog zab pʋsẽ, a wilgdame t’a tara nonglem ning sẽn na n kɩt tɩ b bãng a Zeezi karen-biisã n bakã bɩ?

 Y sã n dat kibay a taab n paas bɩ y karem sõsg ning gom-zug sẽn yaa: “Peut-​on concilier guerre et christianisme?”

 Zemsame tɩ kiris-nebã ra kẽes b toog zabã pʋsẽ rũndã-rũndã bɩ? N-ye. Biiblã pĩnd n togsame tɩ tõnd wakatã b sẽn boond tɩ “yaoolem wakatã” sasa, neb sẽn yit buud toɛy-toɛy pʋsẽ n pa na n “leb n zãms zabr sẽn zabd to-to ye.” Woto, b na n wilgame tɩ b tũuda a Zeezi sẽn zãms-b bũmb ninsã.—Ezayi 2:2, 4.

•   Y sã n dat kibay n paas bɩ y karem Gũus Gasgã sõsg ning gom-zug sẽn yaa: “Wãn to la Wẽnnaam get zabã?”

 Ka la bilfu, a Zeova a sẽn yaa “laafɩ Wẽnnaamã,” na n tũnuga ne a goosnema wã sẽn be saasẽ wã n fãag ninsaalbã ‘ne namsg la ne wẽnga.’—Filip dãmb 4:9; Yɩɩn-sõamyã 72:14.

•   Y sã n dat n bãng rẽ sẽn na n yɩ to-to wã, bɩ y ges video ning gom-zug sẽn yaa: Wẽnnaam Rĩungã yaa bõe?