Yʋʋmd 2022 sẽoog kiuugã pʋgẽ, dũniyã gill zugu, neb n tall bug-raad n tʋm nen-kɛglem tʋʋma:

•   “B sẽn kʋ Zapõ politik taoor soab a ye yʋʋr sẽn yi wʋsgã, [b pĩnd peremiye ministr a Shinzo Abe] sãama tẽngã neb sũya, la ling dũniyã neb wʋsgo, sẽn yɩɩd fãa nen-kɛglem tʋʋm sẽn pa wae Zapõ wã, la b sẽn tar noy sẽn yaa dem-dem bug-raadã tall n tʋmã wɛɛngẽ wã yĩnga.”—Yʋʋmd 2022, sẽoog kiuug rasem 10, The Japan Times.

•   “Danemark nebã sũy sãama wʋsgo, rao a ye sẽn kẽ koosem zĩigẽ n kʋ neb a tãab ne bug-raoog Kopenaag sẽn yaa b na-tẽngẽ wã.”—Yʋʋmd 2022, sẽoog kiuug rasem a 4, Reuters.

•   “Afirikdisiidi: Bi-bees n yaas n tão bug-raado, n kʋ neb 15 Soweto baar a ye pʋgẽ.”—Yʋʋmd 2022, sẽoog kiuug rasem 10, The Guardian.

•   “Neb 220 la zak la b tão ne bug-raad n kʋ Etazĩni, sẽoog kiuug rasem a 4 semennã vʋʋsg rayã.”—Yʋʋmd 2022, sẽoog kiuug rasem a 5, CBS News.

 D tõe n tẽeme tɩ nen-kɛglem tʋʋm a woto na n wa saame bɩ? Bõe la Biiblã yeta?

 Biiblã wilgame tɩ tõnd vɩɩ “yaoolem wakatã.” Yaa wakat nebã sẽn na n tʋmd nen-kɛglem tʋʋm la wẽnem buud fãa. (2 Tɩmote 3:1, 3) Nen-kɛglem tʋʋmã kɩtame tɩ nebã vɩ ne rabeem. (Luk 21:11) La Biiblã wilgame tɩ wakat n wat tɩ nen-kɛglem tʋʋmã na n sa, la tɩ “nebã na n zĩnda vɩ-bãan zĩig pʋga, n vɩɩmd rot sẽn tar gũudum pʋga, n zĩnd zĩis sẽn tar vʋʋsgo, la yĩn-maasem pʋga.” (Ezayi 32:18) Wãn to la nen-kɛglem tʋʋmã na n sa?

 Wẽnnaam na n menesa nin-wẽnsã, la a sãam zab-teedã fãa.

•   “B na n menesa nin-wẽnsã tẽngã pʋga.”—Yel-bũnã 2:22.

•   “[Wẽnnaam] n kɩtd tɩ zabã sẽn be dũniyã tɛk fãa wã sɛ. Bãmb kaooda tãbd ne kãna, la b yõogd saar-dãmb bugum.”—Yɩɩn-sõamyã 46:10.

 Wẽnnaam na n zãmsa ninsaalbã tɩ b bãng n vɩɩmd ne laafɩ, tɩ wẽng buud fãa sa.

•   “Mam tãn-sõngã fãa zugu, bãmb ka na n maan to bũmb ye, sãoong buud kõn tol n leb n zĩnd ye. Bala, dũniyã gill na n pida ne Sẽn-Ka-Saab bãngre, wa ko-kãsengã sẽn pidã.”—Ezayi 11:9.

•   Baa rũndã-rũndã menga, Wẽnnaam zãmsda nebã sẽn na yɩl tɩ b bas nen-kɛglem tʋʋmã ne b zab-teedã, la b ‘rɩk b zabr sʋʋsã n kud wãgse, la b rɩk b kãnã n kud goeto.’—Mise 4:3.

 Y sã n dat n bãng n paas Biiblã sẽn yet tɩ d na n wa vɩɩmda dũniyã zug tɩ rabeem pa tar-dã wɛɛngẽ, bɩ y karem sõsg ning gom-zug sẽn yaa: “Affranchis de la peur : est-​ce possible ?”

 Y sã n dat n bãng n paas nen-kɛglem tʋʋmã sẽn na n sa wakat fãa yĩngã wɛɛngẽ, bɩ y karem sõsg ning gom-zug sẽn yaa: “Enfin la paix sur la terre !”