Yʋʋmd 2023 yʋʋm-vẽkr kiuugã rasem 24, bãngdbã yẽrga dũniyã saab lɛɛrã a n kolg yʋng wakat piig la yiibã zĩigẽ. Rat n yeelame tɩ dũniyã saabã lɛɛr taame n sa la bala.

•   “Dũniyã saab lɛɛrã makda bũmb nins ãdem-biisã sẽn maand tɩ na n wa ne sãoongã. Ikrɛn zabrã yĩnga, tẽnsã sẽn yɛɛsd zab-zabdbã na n wa lob bom nikleyɛɛr zabr sasa wã, la tẽn-gãongã sẽn tar wĩngrã kɩtame tɩ Talaatã daare, bãngdbã yẽrg dũniyã saab lɛɛrã n kolg yʋng wakat piig la yiibã zĩigẽ n yɩɩd pĩndã.”—(AFP International Text Wire)

•   “Talaatã daare, bãngdbã wilgame tɩ b yẽrga ‘dũniyã saab lɛɛrã’ n kolg yʋng wakat piig la yiibã zĩigẽ. Keta segõnd pis-wɛ bal tɩ Armagedõ ta.”—(ABC News).

•   “Bãndgb sẽn yit tẽns toor-toor tigsg sasa, b wilgame tɩ ãdem-biisã sẽn na n sãam b mens to-to wã buud zɩ n zĩnd ye.”—(The Guardian).

 B na n sãama ãdem-biisã la tẽn-gãongã ka la bilf bɩ? Bũmb nins sẽn wat beoog-daarã segd n kẽesa tõnd rabeem bɩ? Bõe la Biiblã yet rẽ wɛɛngẽ?

 Biiblã wilgdame tɩ “tẽngã paada wakat sẽn kõn sa” la tɩ nebã “na n vɩɩmda a zug wakat sẽn kõn sa.” (Koɛɛg soaba 1:4; Yɩɩn-sõamyã 37:29) Dẽnd ninsaalbã pa na n sãam tẽngã wall n kɩt tɩ ned pa le tõe n vɩɩmd a zug ye.

 La Biiblã gomda saab yelle. Wala makre, Biiblã yetame tɩ “dũniyã loogdame.”—1 Zã 2:17.

•   Y sã n dat n bãng Biiblã sẽn dat n yɛɛlga, a sã n wa gomd dũniyã saab yellã, bɩ y karem sõsg ning gom-zug sẽn yaa: “La fin du monde est-elle proche ? Qu’est-ce que l’apocalypse ?”

•   Y sã n dat n bãng Biiblã sẽn yet bũmb toor-toor sẽn na n wa maan dũniyã zugã wɛɛngẽ, bɩ y karem sõsg ning gom-zug sẽn yaa: “Quand la fin du monde viendra-t-elle ?”

 Biiblã sõngda tõnd tɩ d kell n tall yam-sõngo, baa ne yɛl nins sẽn maand rũndã-rũndã dũniyã zugã. Wãn to?

•   Biiblã kõta tõnd sagls sẽn tõe n sõng tõnd d daar fãa vɩɩmã pʋgẽ. (2 Tɩmote 3:16, 17) Wala makre, karm-y sõsg ning gom-zug sẽn yaa: “Comment ne pas vous laisser submerger par l’inquiétude ,” n bãng Biiblã sẽn tõe n sõng-y to-to tɩ y kell n tall yam-sõngo, baa ne vɩɩmã zu-loeesã.

•   Biiblã sõngda tõnd tɩ d tẽed tɩ manegr n wate. (Rom dãmbã 15:4) A wilgda bũmb nins sẽn maand masã wã vẽenega, la bũmb nins sẽn na n wa maan beoog-daarã. Rẽ sõngda tõnd tɩ d kell n tall bas-m-yam zãng-zãnga, baa ne yɛl nins sẽn maand rũndã-rũndã wã.

 Y sã n dat n dɩ bũmb nins sẽn be Biiblã pʋgẽ wã yõodo, d sagend-y lame tɩ y modg n kos tɩ ned wa zãms-y Biiblã zaalem rũndã menga.