Yʋʋmd 2023 yʋʋm-vẽkr kiuugã rasem 27 wã daare, dũniyã gill zugu, neb wʋsg n na n maan bũmb toor-toor n lebg n tẽeg Nazi-rãmbã sẽn da varg Zʋɩf-rãmb wʋsgã yelle. Nen-kɛglem tʋʋm-kãngã sẽn zĩnd na maan yʋʋm 75 woto wã tõe n kɩtame tɩ y sokd y meng bõe yĩng tɩ Wẽnnaam bas tɩ bũmb a woto maane.

•   Sẽn na yɩl n bãng Biiblã sẽn yet rẽ wɛɛngẽ, bɩ y karem sõsg ning gom-zug sẽn yaa: “Bõe yĩng tɩ Nazi-rãmbã kʋ Zʋɩf-rãmb wʋsgo? Bõe yĩng tɩ Wẽnnaam pa gɩdg rẽ?”

 Zʋɩf-rãmbã namsa wʋsgo, b sẽn varg b neb wʋsgã yĩnga. Yɩɩ neb milyõ-rãmb la b kʋ zaalem yĩnga. Sull a taab neb me la b nams nams-toaaga, la b kʋ-b wakat kãnga. B sʋkã neb kẽer da yaa a Zeova Kaset rãmba. B sẽn nams-bã yaa b sẽn da tũud Biiblã sẽn yet bũmb ningã yĩnga.

•   Y sã n dat n bãng bũmb a taab rẽ wɛɛngẽ n paase, bɩ y karem sõsg ning gom-zug sẽn yet tɩ “Bõe la b maan a Zeova Kaset rãmbã, Nazi-rãmbã sẽn wa n kʋʋd Zʋɩf-rãmbã sasa wã?”

 Neb wʋsg yɛɛsda yell ning sẽn paam Zʋɩf-rãmbã buud na n le wa maane. La Biiblã wilgdame tɩ wakat n wate, tɩ yel-beed a woto pa na n le zĩnd ye.

•   “‘Bala mam mii magb ning mam sẽn magd yãmb wɛɛngẽ wã sõma.’ Yaa a Zeova n yeele. ‘Mam dat n kɩtame tɩ y zĩnd bãane. Pa yel-beed la m dat tɩ y paam ye. Yaa sẽn na yɩl tɩ y tõog n bas y yam tɩ beoog na n yɩɩ neere.’”—Zeremi 29:11. a

 Gom-kãngã na n pidsame, Wẽnnaam a Zeova sã n wa kɩt tɩ wẽnem buud fãa sa, la a welg zu-loees nins fãa wẽnemã sẽn wa ne wã. Ka la bilfu, Wẽnnaam na n:

•   yiisa nin-wẽnsã sẽn namsd b taabã tẽngã zugu.—Yel-bũnã 2:22.

•   kɩtame tɩ neb nins sẽn namsdã paam yolsgo.—Vẽnegre 21:4.

•   vʋʋga neb nins sẽn ki wã tɩ b vɩɩmd tẽngã zugu.—Zã 5:28, 29.

 Y tõe n kɩsa sɩd ne Biiblã sẽn pʋlem bũmb nins tɩ kengd raood la kõt belsgã. Y sã n dat n bãng bũmb ning sẽn kɩt tɩ y tõe n kɩs sɩd ne Biiblã sẽn yet bũmb ninsã, d kot-y lame tɩ y kos tɩ d wa zãms-y Biiblã. Pa yaood ligd ye.