BƖ Y KELL N GŨ!
Politikã sẽn wat ne yɛl ninsã: Bõe la Biiblã yet rẽ wɛɛngẽ?
Politikã wata ne gudgr wʋsgo, tɩ kɩt tɩ dũniyã nebã fãa la bal maand yɩɩre.
Megsik tẽngẽ wã, b kʋʋ politikã taoor dãmb bãmb 39. A buud ra zɩ n zĩnd ye. Rẽ, n paas politikã sẽn wat ne gudgr ninsã sãama nebã sũyã, la kɩt tɩ b pa kẽes b toog wʋsg yʋʋmd 2023-2024 vot-rãmbã pʋgẽ ye.
Sẽn nan pa kaoose Erop soolmẽ wã, politikã waa ne gudgr wʋsgo. Wala makre yʋʋmd 2024 sig-noy kiuug rasem 15 wã, b makame n na n kʋ Solovakɩ peremiye ministrã.
B sẽn mak n na n kʋ Etazĩni perzidã-kʋdr a Donald Trump yʋʋmd 2024 sẽoog kiuug rasem 13 kẽesa tẽngã neb wʋsg rabeem.
Bõe yĩng tɩ politikã wat ne gudgr wʋsgo? Na n wa saame bɩ? Bõe la Biiblã yeta?
Biiblã ra pĩnd n togsame tɩ politikã na n waa ne welsgo
Biiblã ra pĩnd n togsame tɩ tõnd wakatã b sẽn bool tɩ “yaoolem wakatã,” neb wʋsg na n talla manesem sẽn wat ne gudgr la nen-kɛglem tʋʋma.
“Yaoolem wakatã, yɛlã na n yɩɩ kãn-kãe hal tɩ vɩɩmã lebg toogo. Bala nebã na n yɩɩ . . . sõm-zɩtba, neb sẽn pa maand sɩda, . . . neb sẽn pa baood laafɩ, . . . nen-kɛglem dãmba, . . . zãmb dãmba, tʋb-pa-wʋmdba, neb sẽn pid ne wuk-m-menga.”—2 Tɩmote 3:1-4.
Biiblã ra pĩnd n togsame me tɩ tẽn-dãmbg na n zĩndame. Wala makre, neb sẽn kɩɩsd goosneema wã, la politikã poorẽ gudgri. (Luk 21:9) La politikã sẽn wat ne gudgr la welsg ninsã pa na n pa wakat fãa yĩng ye.
Politikã sẽn wat ne gudgr ninsã saabo
Biiblã wilgame tɩ Wẽnnaam na n ledga ninsaalbã goosneema-rãmbã fãa ne a mengã goosneema wã sẽn be saasẽ wã.
“Saasẽ Wẽnnaamã na n lugla rĩungu. . . . A na n wãa rĩun-kãensã [rat n yeel tɩ rĩmd a taabã] fãa, n kɩt tɩ b meneme, tɩ yẽ a ye pa wakat fãa.”—Dãniyɛll 2:44.
Wẽnnaam Rĩungã na n sɩd waa ne zems-n-taar nebã sʋka, la a kɩt tɩ laafɩ zĩnd dũniyã gill zugu.
B boonda Rĩungã Rĩm a Zeezi Kirist tɩ “Laafɩ naaba.” A na n gesame tɩ ‘laafɩ me pa tall saab’ ye.—Ezayi 9:6, 7.
Baa masã menga, Rĩungã poorẽ dãmbã zãmsda b sẽn tõe n vɩɩmd ne laafɩ to-to. Rẽ n so tɩ Biiblã yeel yaa: “B na n dɩka b sʋʋsã n kud wãgse, la b rɩk b kãnã n kud goeto. Buud pa na n zẽk sʋʋg n zab ne buud a to, la b kõn le zãms zabr me ye.”—Ezayi 2:3, 4.
Y sã n dat n bãng n paas bɩ y karem sõsg ning gom-zug sẽn yaa: “Bõe la Wẽnnaam Rĩungã na n maane?” la y ges video ning gom-zug sẽn yaa: Wẽnnaam Rĩungã yaa bõe?