Yʋʋmd fãa, tẽn-digimds tusa n maande. Baa ne wʋsgã sẽn yaa tẽn-digimds pãng sẽn pa waoogã, tẽn-digimd-kãsems tõe n waa ne sãoongo, namsgo, la b kʋ neba. Wakat ninga, tẽn-digimdg tõe n waa ne sunami n sãam tẽns nins sẽn be mogrã noorã, la a kʋ neb wʋsgo. Biiblã pĩnd n togsame tɩ tẽn-digimd-kãsems a woto n na n zĩnd bɩ?

Ad bũmb kẽer yell d sẽn na n gom sõs-kãngã pʋgẽ:

•  Biiblã pĩnd n togsame tɩ tẽn-digimds n na n zĩnd bɩ?

•  Tẽn-digimds nins sẽn maand rũndã-rũndã wã pidsda Biiblã bãngr-gomd bɩ?

•  Biiblã sẽn gomd tẽn-digimds yellã sõngda tõnd tɩ d bãng bõe?

•  Tags-kɛg nebã sẽn tar Biiblã bãngr-goamã wɛɛngẽ, la tẽn-digimdsã wɛɛngẽ

 A Zeezi togsa bãngr-gomd n gom tẽn-digimds yelle. Bãngr-gom-kãng bee Biiblã sɛb a tãab pʋsẽ. Ad a sẽn yeele:

 “Bala buud na n yika zabr ne buud a to, tɩ rĩung me yik zabr ne rĩung a to. Kom la tẽn-digimdg na n zĩnda zĩig-zĩiga.”—Matiye 24:7.

 “Bala, buud na n yika zabr ne buud a to, tɩ rĩung me yik zabr ne rĩung a to. Tẽn-digimdg na n zĩnda zĩig-zĩiga. Sẽn paase, kom na n zĩndame.”—Mark 13:8.

 “Tẽn-digimd-kãsems na n zĩndame, tɩ kom la bã-longds me zĩnd zĩig-zĩiga.”—Luk 21:11.

 A Zeezi pĩnd n togsame tɩ “tẽn-digimd-kãsems” na n zĩnda “zĩig-zĩiga,” wakat ning zaba, kom la bã-longds me sẽn na n zĩndã. Bõn-kãensa fãa sã n wa maandẽ, yaa bãnd sẽn wilgd tɩ d vɩɩ “dũniyã saab wakate,” bɩ “yaoolem wakatã.” (Matiye 24:3; 2 Tɩmote 3:1) D sã n tik Biiblã bãngr-goamã n geele, d bãngdame tɩ “yaoolem wakatã” sɩnga yʋʋmd 1914, la a nan pa ta a tɛk ye.

 N-ye. A Zeezi bãngr-gomdã sẽn gom tẽn-digimds la yɛl a taab yellã zemsa ne bũmb ning sẽn maand rũndã-rũndã wã. Yʋʋmd 1914 tɛka, tẽn-digimd-kãsems bãmb 1 950 la zak n zĩndi. Tẽn-digimd-kãens sẽn kʋ b rãmbã yɩɩda neb milyõ a yiibu. a Ad makr a wãn sẽn zĩnd yʋʋmd 2000 wã poore:

 Yʋʋmd 2004—Oseyã ẽndiyẽ mogrã pʋgẽ: Tẽn-digimd-kãseng (magnitude 9.1) n kɩt tɩ sunami zẽk koomã n ta tẽns piig la zaka, n kʋ neb tus kobsi la pisi la nu.

 Yʋʋmd 2008—Sin: Tẽn-digimd-kãseng (magnitude 7.9) n sãam tẽn-bɛd la tẽn-bõonese. B tagsdame t’a kʋʋ neb tus pis-wɛ, n pogl neb tus kobs-tã la pis-yopoe la nu, la a sãam neb milyõ-rãmb zagse.

 Yʋʋmd 2010—Haiti: Tẽn-digimd-kãseng (magnitude 7.0) n maane, tɩ tẽn-digimd-bõones pʋgle. B kʋʋ neb tus kobs-tã la zaka, la b sãam neb milyõ-rãmb zagse.

 Yʋʋmd 2011—Zapõ: Tẽn-digimd-kãseng (magnitude 9.0) n maane, n paas sunami. B tagsdame tɩ b kʋʋ neb tus-piig la a nii la kobs-nu, la b kɩt tɩ neb tus-kobs yik n bas b zagse. Fukusima kuura wã masĩn sãamame, tɩ iraniyommã sãeege. Yʋʋm piig poore, na maan neb tus pis-naas n ket n pa tõe n wa b zagsẽ, iraniyommã sẽn sãeegã sẽn tõe n maan-b yellã yĩnga.

 Biiblã sẽn gomd tẽn-digimds yellã wilgda tõnd bũmb ning sẽn na n maan ka la bilfã. A Zeezi yeelame: “Yãmb sã n wa yã tɩ bõn-kãensã maandame, bɩ y bãng tɩ Wẽnnaam Rĩungã kolgame.”—Luk 21:31.

 Biiblã wilgdame tɩ Wẽnnaam Rĩungã yaa goosneema sɩd-sɩd sẽn be saasẽ, t’a Zeezi yaa a Rĩma. Yaa Rĩung-kãng la a Zeezi sẽn yeel a karen-biisã tɩ b pʋʋs n kos tɩ wa wã.—Matiye 6:10.

 Wẽnnaam Rĩungã sã n wa rɩt naam tẽngã zugu, Wẽnnaam na n kɩtame tɩ sabab-wẽnse, wala makre tẽn-digimdsã ra le nams ninsaalbã ye. (Ezayi 32:18) Sẽn paase, a na n manega bũmb nins fãa tẽn-digimdsã sẽn sãamã, la a kɩt tɩ d yĩm bõn-kãens yelle. (Ezayi 65:17; Vẽnegre 21:3, 4) Sẽn na yɩl n bãng n paase, bɩ y ges sõsg ning gom-zug sẽn yaa: “Bõe la Wẽnnaam Rĩungã na n maane?”