“Ninsaalbã maanda bũmb wʋsg sẽn na n wa ne yel-beedo. Na n kɩtame tɩ koomã wa lim tẽn-bɛd kẽere. Tʋʋlgã na n paama pãng wʋsgo. Sob-bɛd sẽn tar pãng wʋsg n na n zĩndi. Zĩis wʋsgo, koom pa na n le wa beẽ ye. Tɩɩs la rũms milyõ-rãmb n na n meneme. Woto pa gom-vɩɩd bɩ belgr ye. Yaa siansã rãmb sẽn wilg bũmb ning sẽn na n maane, d sã n pa toeem d sẽn dɩt tẽngã yõod to-to wã.”—A António Guterres sẽn yaa Nasiõzĩni wã sekertɛɛr zenerallã n yeel woto, yʋʋmd 2022 tʋʋl-nif kiuug rasem a naase, tẽns toɛy-toɛy sẽn tigim taab n gom tẽngã sãoongã yell sasa.

 “Siansã bãngdb yetame tɩ ka la yʋʋm a wãna, tẽngã sãoong na n sãama Etazĩni park nasional-rãmb kobs naas la pisi la tã wã fãa la bala, bala zĩigã sẽn wɩngdã pa sõma ne park-kãens ye. Yel-kãensã wõnda yel-beed nins yell b sẽn gomd Biiblã pʋgẽ wã: Yaa bugum, sa-bɛda, galaasã sẽn boogdã, mogrã koom sẽn paasdã ne zĩigã sẽn wɩngd wʋsgã.”—Yaa woto la b yeel The New York Times zʋrnallã pʋgẽ, yʋʋmd 2022 sigr kiuugã rasem piig la a nu wã.

 Tẽngã sẽn sãamdã tara tɩɩm bɩ? Tɩɩmã sã n beẽ, ãnd n na n wa ne-a? Ges-y Biiblã sẽn yete.

 Biiblã yeelame tɩ Wẽnnaaam na n “sãama neb nins sẽn sãamd tẽngã.” (Vẽnegre 11:18) Vɛrse-kãngã wilgda tõnd bũmb a tãabo:

1.  1. Ninsaalbã tʋʋmã na n sãama tẽngã wʋsgo.

2.  2. Tẽngã sãoong na n talla tɛka.

3.  3. Wẽnnaam n na n kɩt tɩ tẽngã sãoongã sa, pa ninsaalbã ye.

 Biiblã yetame tɩ “dũniyã paada woto wakat fãa.” (Koɛɛg soaba 1:4) Neb n na n zĩnd a zug wakat fãa.

•   “Nin-tɩrsã na n sooga tẽngã, la b na n paa beenẽ wakat sẽn kõn sa.”—Yɩɩn-sõamyã 37:29.

 B na na maanega tẽngã zãnga.

•   “We-raoogã ne tẽng ning sẽn kʋɩ wã na n maana sũ-noogo. Zĩ-koɛɛngã na n kɩdma ne sũ-noog n ning puud wa sõse.”—Ezayi 35:1.