Ad Nations unies wã sẽn yeele:

•   Yʋʋmd 2023 zĩ-likr kiuugã rasem a 7 n tãag rasem 27 wã, neb tus a yoob la kobs-naas n ki Israyɛll ne Gaza zabrã pʋgẽ, tɩ sẽn ta neb tus piig la a nu la neb kobs-yi pogle. B wʋsgã fãa yaa neb sẽn pa sodaase. Sẽn paase, neb tusa n zoe n bas b zagse.

•   Yʋʋmd 2023, bõn-bɩʋʋng kiuugã rasem 24 tɩ Risi ne Ikrɛn zabrã kʋʋ neb tus a wɛ la kobs-yopoe la a ye, tɩ neb tus piig la a yopoe la neb kobs-yopoe la pis-naas la a nii pogl Ikrɛn.

 Bõe la Biiblã yeta, tɩ kɩt tɩ neb nins zabã sẽn namsdã tõe n bas b yam tɩ manegr n wate?

 Biiblã pĩnd n togsame tɩ Wẽnnaam na n kɩtame tɩ “zab sa dũniyã gill fãa.” (Yɩɩn-sõamyã 46:9) A na n kɩtame tɩ rĩung bɩ goosneema sẽn be saasẽ ledg ãdem-biisã goosneema-rãmbã zĩiga. (Dãniyɛll 2:44) Wẽnnaam Rĩungã na n waa ne yolsg ãdem-biisã yĩnga.

 Ges-y-yã a Zeezi Kirist sẽn yaa Wẽnnaam Rĩungã Rĩmã sẽn na n wa maane:

•   “A na n fãaga naong soab sẽn kelemd n kot sõngre, n paas nimbãan-ned la ned ning fãa sẽn pa tar sõangda. A na n zoee nimbãan-ned la naong soab nimbãanega. A na n fãaga naong rãmbã vɩɩm. A na n fãag-b-la neb nins sẽn weoogd-bã, la nen-kɛglem dãmbã nusẽ.”—Yɩɩn-sõamyã 72:12-14.

 Ne Rĩungã maasem, Wẽnnaam na n kɩtame tɩ zabã la nen-kɛglem tʋʋmã sẽn wa ne yɛl ninsã fãa sa fasɩ.

•   “Wẽnnaam na n yẽesa nintãm fãa ninsaalbã ninẽ, la kũum pa na n le zĩndi, sũ-sãanga, yãbr wall toog pa na n le zĩnd ye. Bũmb nins sẽn da be pĩndã loogame.”—Vẽnegre 21:4.

 Ka la bilfu, Wẽnnaam Rĩungã na n toeema bũmb wʋsg dũniyã gill zugu. Biiblã ra pĩnd n togsame tɩ d na n wʋma “zab rãamde,” la d “wʋm tɩ b gomd zab yelle.” (Matiye 24:6) Yel-kãensã la yɛl a taab wilgdame tɩ d vɩɩ ninsaalbã naamã rɩɩb “yaoolem wakatã”.— 2 Tɩmote 3:1.