Yʋʋmd 2024 ze olẽmpikã sasa, yaa yĩn-wɩsgdb sẽn yit tẽns 206 pʋsẽ n na n wags taaba, tɩ na maan neb milyaar a nu gese. A Thomas Bach sẽn yaa sull ning sẽn get tẽns toɛy-toɛy ze olẽmpik-rãmbã yellã taoor soab goma ze olẽmpikã yell yeel yaa: “Ze olẽmpikã wata ne zems-n-taar dũniyã neb sʋka. Bɩ d teel ze olẽmpikã bõn-daabã sẽn yaa tɩ dũniyã nebã fãa zĩnd ne taab ne laafɩ la ne zems-n-taarã, baa b sẽn yaa toor-toorã.”

 Ze olẽmpik-rãmbã tõe n pidsa bõn-daab-kãngã sɩda? Laafɩ la zems-n-taar na n sɩd wa zĩndame bɩ?

 Rõandã ze olẽmpikã pa tek wags-taabã bal ye. B goma politikã la yɛl a taab sẽn kɩtd tɩ nebã welgd taabã yelle. Wala makre, ninsaalbã dʋrwa-rãmbã, bu-welsgã, tũudmã la wẽgbã.

 Yĩn-wɩsgrã wags-taab b sẽn maand dũniyã gill zug wa ze olẽmpik-rãmbã kõta nebã sũ-noogo. La wags-taab a woto sasa, nebã manesmã la b tʋʋm-tʋmdɩ wã wilgda vẽeneg tɩ b nonga welsgo. A kɩtdame tɩ nebã wɩngd ne rẽ, n pa baood laafɩ la zems-n-taar hakɩɩk ye.

 Biiblã ra pĩnd n togsame tɩ nebã na n talla manesem sẽn na n kɩt tɩ yɩ toog tɩ zems-n-taar zĩndi. (2 Tɩmote 3:1-5) Y sã n dat n bãng bũmb a taab n paas Biiblã bãngr-gom-kãngã wɛɛngẽ, bɩ y karem sõsg ning gom-zug sẽn yaa: “Biiblã ra pĩnd n wilga nebã tagsa la b tʋʋm-tʋmdɩ sẽn na n yɩ to-to rũndã-rũndã wã bɩ?”

 Biiblã sẽn togs tɩ laafɩ la zems-n-taar na n wa zĩnda dũniyã gill zugã yaa sɩda. A pʋlmame tɩ tẽngã neb fãa na n wa zemsa taaba, tɩ goosneema sẽn be saasẽ, rat n yeel tɩ “Wẽnnaam Rĩungã” rɩ naam b zugu.—Luk 4:43; Matiye 6:10.

 A Zeezi Kirist sẽn yaa Rĩun-kãng Rĩmã na n kɩtame tɩ laafɩ zĩnd dũniyã gill zugu. Biiblã yetame:

•   “Nin-tɩrsã na n ninga puudu, tɩ laafɩ yɩ wʋsgo.”—Yɩɩn-sõamyã 72:7.

•   “A na n fãaga naong soab sẽn kelemd n kot sõngre . . . A na n fãag-b-la neb nins sẽn weoogd-bã, la nen-kɛglem dãmbã nusẽ.”—Yɩɩn-sõamyã 72:12, 14.

 Rũndã-rũndã menga, a Zeezi zãmsgã kɩtame tɩ neb milyõ-rãmb sẽn yit tẽns 239 pʋgẽ zemsd taaba. A Zeova Kaset rãmbã sẽn yaa kiris-nebã zãmsa b sẽn tõe n zĩnd ne taab ne laafɩ to-to. Y sã n dat n bãng b sẽn maan to-to, bɩ y karem Gũusg Gasgã sõsg ning gom-zug sẽn yaa: “Y sẽn tõe n maan n da le kisg y taabã.”