Kiuug fãa, tõnd gũuda sõss la video nins b sẽn yiisd JW Teledifiziyõ wã pʋgẽ wã ne d sũur fãa. La tẽed-n-taas wʋsg sẽn be Afirik pa tõe n paam rẽ n ges ne ẽntɛrnetã maasem ye. Bõe yĩnga?

 Ẽntɛrnetã pa tat Afirik zĩis wʋsg ye. Zĩis nins a sẽn tatã me, a wae n yaa maasga, t’a ligdã me leb n yaa toogo. Wala makre, daar a ye, tigims sull yel-gɛt sẽn be Madagaskaar telesarza JW Teledifiziyõ wã video sibɛɛrkafe pʋgẽ, tɩ b kɩt t’a yao sẽn yɩɩd tusr la kobs-yoobe. Woto yɩɩda neb kẽer semen fãa yaoodo!

 Baa ne zu-loe-kãensã, neb milyõ-rãmb sẽn be Afirik tõe n paam n gesa JW Teledifiziyõ wã tɩ pa tũ ne ẽntɛrnetã maasem ye. Wãn to?

 Yʋʋmd 2017 tɛkã, Afirik nen-taoor tẽnsã neb tõe n paam n gesa JW Teledifiziyõ wã ne televiziyõ roog maasem. Semennã tõre, daar fãa, b yiisda bũmb toor-toor ne buud-goam piig la a yoobe, wĩndg la yʋngo.

 Sẽn na yɩl n tõog n maan rẽ, a Zeova Kaset rãmbã yaooda televiziyõ rotã n paamd n yiisd b sẽn datã ne satelit maasem. Satelit-kãng tata na maan Afirik nen-taoor tẽns bãmb pis-tã la a nu pʋgẽ. D yaooda sẽn yɩɩd milyõ a yoob kiuug fãa rẽ yĩnga. Wakat-wakate, b mi n yaooda sẽn yɩɩd woto n na n paam n maan bũmb a taab televiziyõ roog a to pʋgẽ tɩ nebã gese. Rẽ sõngda neb tusa tɩ b paamd n maand tigis-kãsemse, wall b paam n kelgd sõss filiyall-rãmb kaagr sasa.

 A Zeova Kaset rãmb wʋsgo, la baa neb a taab paamd n geta JW televiziyõ wã roog ne satelitã maasmã b zagsẽ. La tõnd saam-biis wʋsg pa tõe n da teed nins sẽn yaa tɩlɛ sẽn na yɩl n tõog n ges satelitã televiziyõ wã roog ye. Sẽn na yɩl n sõng-ba, b ninga teed Rĩungã rot sẽn yɩɩd bãmb 3 670 pʋsẽ tɩ saam-biis la saam-bi-pogs tõe n kẽnd be n get JW Teledifiziyõ wã. Teedã ligdi, n paas ligd ning b sẽn na n yao tɩ b tall n wa ne wã sẽn naag taabã yɩɩda tus a yopoe. La woto yaa Rĩungã roog sã n da zoe n tara tele wall porzɛktɛɛre. Sã n pa rẽ, teedã fãa ligd tõe n yɩɩda tus kobs-yi la pis-yoob la a nu.

 Tõnd tẽed-n-taasã sũy nooma wʋsg ne JW tele wã. Kamerun kãsem soab a yembr yeelame: “Ne tõnd zakã rãmba, a yaa wa mannã b sẽn kõ rasempʋɩɩgẽ wã.” A Odebode sẽn yaa Nizeria saam-biigã yeelame: “Semen fãa, tõnd zakã rãmb geta JW tele wã naoor a tãabo. Wakat fãa, mam kambã gũuda sasa-kãens ne yãgbo. Tõnd sã n wa get bũmb tele roog a to pʋgẽ, b pʋd n mi n kosame tɩ d bas rẽ la d pak JW tele wã.” A Rooz sẽn be Nizeria me wã yeelame: “Mam sũur nooma hal wʋsg ne JW satelitã tele. Bala a sõnga maam tɩ m pa le pakd tele rot a taabã n kelgd kibayã tɩ loog nug ye. Mam sã n da kelgd kiba-kãense, sãamda m sũur hal tɩ m tãnsiyõ wã rʋʋda. La JW Teledifiziyõ wã yẽ kengda raood la a gãnegd yam! Yaa tele roog ning mam sẽn nong n tɩ yɩɩdã. Yaa kũun-kãseng a Zeova sẽn kõ-do.”

 Mozãmbik tigims sull yel-gɛt a ye yeelame tɩ yẽ tigims sullẽ wã, b ninga teed Rĩungã rot kẽer pʋsẽ tɩ b tõe n paam JW satelitã tele. Saam-biis nins sẽn be tigim-kãens pʋsẽ wã wata lɛɛr a ye bɩ sẽn yɩɩd rẽ, nand tɩ tigsgã sɩnge, n paamd n get JW Teledifiziyõ wã ne satelitã maasem.

 Yʋʋmd 2019 tẽns toɛy-toɛy tigis-kãsengã sẽn zĩnd Zoanesburg Afirikdisiid soolmẽ wã, b yiisa sõss kẽer sẽn tar pãngã, la siglgã taoor lʋɩtb sull neb sõss meng JW satelitã tele wã pʋgẽ zĩis a wɛ. A Fumelele sẽn tʋmd Afirikdisiid filiyallã JW Teledifiziyõ wã zĩigẽ wã yeelame: “Pĩndã, ra yaa ne ẽntɛrnetã maasem la tõnd yiisd sõssã. La rẽ ra baoodame tɩ ẽntɛrnetã sakd sõma, la ra baood ligd me. JW satelitã tele wã roog ligd pa toog woto, n leb n sakd sõma.”

 Kũunã yãmb sẽn kõt ne yamleoog n teend tʋmdã dũni gill zugã maasem yĩnga, d tẽed-n-taas wʋsg sẽn be Afirik tõe n paama JW Teledifiziyõ wã n ges ne satelitã sõngre. D sũur nooma wʋsg ne kũunã yãmb sẽn kõt ne manesem buud toor-toor donate.pr418.com pʋgẽ wã.