A Zeova Kaset rãmbã maanda bũmb toor-toor sẽn tar yõod wʋsgo, n na n sõng neb sẽn be sẽn yɩɩd tẽns 200 pʋgẽ. La tẽn-kãens sʋka, yaa bãmb 35 pʋgẽ bal la d tẽed-n-taasã kũunã sekd depãens-rãmbã. Tẽns nins sẽn pa yidg laogã wɛɛngẽ wã maanda wãn to ne b depãens-rãmbã?

 A Zeova Kaset rãmbã siglgã taoor lʋɩtb sullã neb geta bũmb nins b tẽed-n-taasã sẽn be dũniyã gill zugã sẽn maand koɛɛgã mooneg pʋgẽ wã, la b baood n bãngd bũmb nins sẽn yaa tɩlɛ ne-b sẽn na yɩl n tõog n kell n tũ a Zeova wã. B maagda b yĩng n geel ligd ning sõor b sẽn na n yiisã, la b tall n tʋm tɩ zemse. Filiyall pʋgẽ, d tẽed-n-taasã yamleoog kũunã sã n sek depãens-rãmbã tɩ kelle, b rɩkda sẽn kellã n sõng tẽns nins pʋsẽ kũunã sẽn pa sekdã. B sẽn maand woto wã zemsa ne pipi kiris-nebã sẽn da maand to-to wã. B ra sõngda taab “tɩ zeng-taab zĩndi.” (2 Korẽnt rãmbã 8:14) Kiris-neb nins sẽn da tar wʋsgã kũunã ra lekda b rãmb nins sẽn pa tar tɩ sekã.

 Filiyall nins sẽn paamd tɩ filiyall-dãmb a taab toond-b b ligd ning sẽn kellã tagsg yaa wãna? Wala makre, Tãnzani soolmẽ wã, b sã n pʋɩ nin-buiidã sõor zĩis a yiibu, sẽn yɩɩd pʋɩ-sʋkã fãa pa tõe n paam kobs-yi daarã pʋgẽ ye. Beenẽ, b yãka ligd filiyall-dãmb a taab sẽn kõ n lebs n maneg Mafinga tigingã Rĩungã roogo. Tigingã nebã gʋlsame n yeel yaa: “Rĩungã roog manegrã tɛka, sẽn wat-b tigissã sõorã paasa wʋsgo. D pʋʋsda a Zeova siglgã bark wʋsgo, la d tẽed-n-taas nins sẽn be dũniyã gill zugã me bark wʋsgo, b yamleoog kũunã yĩnga. Rẽ sõngame tɩ d tõog n paam zĩ-neer woto n pʋʋsd a Zeova.”

 Koronavirisã yĩnga, d tẽed-n-taas kẽer sẽn be Sirlãnka ra pa tõe n paam rɩɩb n dɩ ye. A Imara Fernando ne a bi-ribl a Enosh naaga nin-kãens sʋka. La tẽns a taabã kũunã maasem yĩnga, b tõog n paama sõngre. B gʋlsa kart bãmb meng sẽn maan zug yaa: “Tõnd pʋʋsda d tẽed-n-taasã barka, b sẽn wilg tɩ b nonga tõnd sasa-kãngã sẽn yaa toog wakatã. D sũy yaa noogo, d sẽn paam n naag yãmb tɩ d yaa wa zak a ye rãmbã. Sẽn paase, d ket n pʋʋsda a Zeova n kot-a t’a sõng d tẽed-n-taasã fãa yaoolem wakatã-kãngã fãa sasa.”

 Sãmbg sẽn kãe, d tẽed-n-taasã sẽn beẽ fãa, b sakd n pʋɩta bũmb nins b sẽn tarã ne b taabã. Wala makre, a Enos maana koglg n ningd ligdi. Woto, yẽ me tõe n kõ kũun n sõng zags a taab neb sẽn dat sõngre. A Guadalupe Álvarez talla yam-sõng a woto buud me. A bee Megsiko tẽng a yembr pʋgẽ. Beenẽ wã, sẽn deegd-b kiuug yaoodã sõor paoodame, la baa b reegd kiuug yaood me, pa zem baa fʋɩ ye. La ne rẽ fãa, a kõta kũun wa a sẽn tõe tɛka. A gʋlsame n yeel yaa: “M pʋʋsda a Zeova bark a maan-neerã la a nonglem hakɩɩkã yĩnga. M miime tɩ b na n dɩka m sẽn kõtã n paas neb a taab rẽnda, tɩ tõog n sõng m tẽed-n-taasã sẽn dat sõngrã.”

 Filiyall-dãmb nins sẽn toond ligdã zĩis nins d tẽed-n-taasã sẽn dat sõngrã maanda rẽ ne sũ-noogo. A Anthony Carvalho sẽn yaa Berzill filiyallã taoor lʋɩtb sull nedã yeelame yaa: “Na maan yʋʋm wʋsgo, yaa tẽns a taabã sẽn da kõt ligd ningã n sõng tɩ d tõog n tʋm Rĩungã tʋʋmdã d tẽngã pʋgẽ. Ne sõngrã maasem, d yãa fɩɩgr sẽn yɩ kãsenga. Masã, tõnd tẽngã yɛlã toeemame. Tõnd paamd n sõngda tẽns a taaba. D tẽed-n-taasã geta koe-moonegã tʋʋmd sẽn tʋmd to-to dũniyã gill zugã, la b sẽn tõe n maan n sõnge.”

 Bõe la a Zeova Kaset rãmbã tõe n maane, n tõog n sõng b tẽed-n-taas nins sẽn dat sõngrã sõma n tɩ yɩɩda? Yaa b sẽn na n kõt ligd dũniyã gill tʋʋmdã yĩnga. La b pa segd n tool tẽng a to filiyall ligd ye. B tõe n ninga b kũunã tigingã koglg ning zug b sẽn gʋls tɩ “Dũniyã gill tʋʋmdã yĩngã” pa rẽ bɩ n tũnug ne donate.pr418.com n toole. D pʋʋsda yãmb barka, y kũun toor-toorã yĩnga.