Ne sɛbã la video-rãmbã b sẽn yiisd tɩ d tõe n telesarzã maasem, a Zeova Kaset rãmbã paamda bũmb nins sẽn yaa tɩlɛ b tẽebã kẽngr yĩngã n yɩɩd pĩnda. La zĩis wʋsg dũniyã gill zugu, d tẽed-n-taasã pa tõe n paam ẽnternetã ye. Kẽer bee zĩis ẽntɛrnetã sẽn pa be wakat fãa, wall pa kẽnd tʋll-tʋlle, pa rẽ bɩ pʋd n kãe meng ye.

 La masã d tẽed-n-taas wʋsg tõe n telesarza sɛbã la video-rãmbã d sẽn yiisdã, baa b pa tar ẽntɛrnete. Wãn to?

 JW Bogsã yaa tʋʋm-teoog sẽn yaa kɩdga, b sẽn kõt tigims nins sẽn be zĩis nins ẽntɛrnetã paoongã sẽn yaa toogã. B raa b sẽn boond a soab tɩ rutɛɛr (routeur) n ning a pʋgẽ wã, n paas lozisɩyɛll Betɛllã biru ning sẽn get ordinatɛɛr-dãmbã yellã sẽn maane, la b ning sɛb la video-rãmb b sẽn yiis tɩ be jw.org pʋgẽ tɩ b tõe n telesarzã. Bogs fãa ligd kolga tus a nii.

 Rĩungã roogẽ, d tẽed-n-taasã konegtda b portaabl-dãmbã bɩ b tablɛt-rãmbã JW Bogsã wifi zugu, tɩ rẽ poor bɩ b telesarz sɛbã la video-rãmbã. Baa b rãmb nins sẽn tar portaabl bɩ tablɛt-rãmb sẽn yaa kʋdã, pa rẽ bɩ ligd sẽn pa toogã tõe n konegtame. La tigingã neb sã n pa tar ẽntɛrnet, b maanda a wãn n paam tɩ seb-paalã la video-paalã be JW Bogsa pʋgẽ? Filiyallã na n toonda kɩle USB rãmb sẽn tar bõn-paal nins b sẽn ning jw.org pʋgẽ wã, tɩ b tõe n dɩk n ning JW Bogsã pʋgẽ. Kɩle USB fãa ligd kolga wakɩr kobs-yoobe.

 Wãn to la JW Bogsã nafd d tẽed-n-taasã? A Nathan Adruandra sẽn yaa rao sẽn tar kambã, n be Repiblik Demokartik di Kõngo wã yeelame yaa: “Mam maka naoor wʋsg n na n telesarz ‘Zeova, mam teega yãmba’ video wã, la Tẽeg a Lot pagã yell video wã, la m zɩ n tõog ye. Rẽ komsa mam raoodo. Masã, m tõe n telesarza video-kãens m portaablã pʋgẽ. Rẽ sõngda tõnd a roagdbã tɩ d tõe n zãms d kambã tɩ yɩ sõma n paase.”

 Saam-biig a ye sẽn sõngd tigims sẽn be Nizeriya tɩ b tõogd n ningd JW Bogsã b Rĩungã rotẽ yeelame yaa: “Saam-biisã getame tɩ JW Bogsã yaa kũun sẽn ka to a Zeova sẽn kõ-ba. B sũur yaa noogo, b sẽn paam masã n tõe n telesarz sɛb la video-rãmb nins sẽn naag tõnd koe-moonegã tʋʋm-teedã pʋgẽ wã.”

 Sẽn yɩɩd JW Bogs bãmb 1 700 la b tool d tẽed-n-taasã sẽn be Afiriki, Oseyaani, la Amerikdisiidi. B magdame n na n tool tigims a taab me. Ligd ning b sẽn yãk n maan JW Bogs rãmbã yita yɛɛnẽ? Yita ligdã d sẽn kõt dũni gill tʋʋmdã yĩngã pʋgẽ. Neb wʋsg kõta ligdã ne donate.pr418.com maasem. D pʋʋsd-y-la bark ne y kũunã y sẽn kõt ne yamleoogã.