A LOT ne a zaka rãmb ra vɩɩ ne a Abrahaam Kanaã. Raar a yembre, a Abrahaam yeela a Lot yaa: ‘Tẽngã yamdã pa le sekd tõnd d yiiba fãa rũmsã ye. Bɩ d welg taaba. Fo sã n kẽng rɩtgo, mam na n kẽnga goabga. La fo sã n kẽng goabga, mam na n kẽnga rɩtgo.’

A Lot zẽka a neng n ges tẽngã, n yã tɩ Zʋrdẽ babgã yaa zĩ-neer sẽn tar koom la yamd sõma sẽn sekd a rũmsã. A yika ne a zaka rãmb la a rũmsã n kẽng be. B tɩ zĩnda Sodom tẽngã pʋgẽ.

Sodom nebã ra yaa wẽns wʋsgo. Woto ra sãamda a Lot sũurã wʋsgo, bala a ra yaa nin-​sõngo. Wẽnnaam me sũur da puuda ne-⁠ba. Wẽnnaam wa n tʋma malɛgs a yiib tɩ b tɩ yeel a Lot t’a na n sãama Sodom la a sãam Gomoor sẽn yaa tẽng sẽn pẽ be wã me, bala b nebã yaa nin-​wẽnse.

Malɛgsã yeela a Lot yaa: ‘Yik tao-​tao n peeg f paga ne f kom-​pugli a yiibã n zoe n yi tẽngã.’ La malɛgsã mikame t’a Lot ne a zaka rãmb maasame, tɩ b gãd b nusã n tall-⁠b n yiis tẽngã kɩrenga. Beenẽ, malɛk a ye n yeel-⁠b woto: ‘Zoe-⁠y n põs-⁠y-​yã. Ra wẽneg-⁠y n ges y poorẽ ye. Zoe-⁠y n kẽng-⁠y tãensẽ wã, n da wa ki ye.’

A Lot ne a kom-​pugli wã kelga malɛkã goamã n zoe n yi Sodom. B pa yaas zĩig baa a yembre, b pa wẽneg n ges b poorẽ me ye. La a Lot pagã yẽ kɩɩsame. B sẽn wa n yi Sodom tẽngã n zãag bilfã, a yalsame n wẽneg n ges a poorẽ, t’a mengã fãa lebg yamsem. Yãmb pa ne-⁠a fotã zug sɩda?

Tõnd tõe n dɩka yam ne kiba-​kãngã. A wilgda tõnd tɩ Wẽnnaam fãagda neb nins sẽn kelgd a goamã. La a na n sãama neb nins fãa sẽn kɩɩsd yẽ wã.