GES-⁠Y bũmb ning sẽn maand masã! Ned ning sẽn dɩk a rasaarã n tees Mog-​miuugã yaa a Moiizi. Neb nins sẽn be ne-⁠a wã yaa Israɛll nebã. La yaa a Faraõ ne a sodaasã fãa la sẽn pa koomã pʋgẽ tɩ koomã rat n dɩ-​bã. D ges sẽn yɩ to-⁠to.

Wa d sẽn zoe n yã wã, yel-​beed piigã poore, a Faraõ basa Israɛll nebã tɩ b looge. Yaa Israɛll rap sẽn ta tus kobs-​yoob n paas pagb la kamb n tũ taab n yi Eziptã. Buud a taab neb wʋsg me sẽn tẽed a Zeova n tũ Israɛll nebã. B fãa zãa b piisã, b bʋʋsã, b niisã la b bõensã n looge.

Nand tɩ Israɛll nebã looge, b kosa Ezipt nebã futu, la nag-​teed sẽn maan ne wanzuri la sãnem. Yel-​beed piig soabã yɛɛsa Ezipt nebã wʋsg tɩ b kõ Israɛll nebã b sẽn da ratã fãa.

Rasem a wãn poore, Israɛll nebã taa Mog-​miuugẽ wã. B yalsa be n na n vʋʋse. La a Faraõ ne a nebã yõdg n maana b bãngẽ, b sẽn bas Israɛll nebã tɩ b loogã. B yeelame yaa: ‘Ges-⁠y tõnd sẽn bas d yembsã tɩ b looge!’

A Faraõ le toeema yam, n kɩt t’a sodaasã na n bob zab-​teed n babs Israɛll nebã. Yaa saar dãmb sẽn zoet sõma bãmb kobs-​yoobe, n paas saar dãmb a taab la b zomb n na n babs Israɛll nebã.

Israɛll nebã sẽn wẽneg n yã t’a Faraõ ne a sodaasã watẽ wã, rabeem yõk-⁠b-⁠la wʋsgo. B ra yasa Mog-​miuugã taoor tɩ Ezipt nebã yaool n da wat b poorẽ wã. B pa tar zĩig n na n kẽng ye. La a Zeova ninga sawadg Israɛll nebã ne Ezipt nebã sʋka, tɩ Ezipt nebã pa tõe n le yã Israɛll nebã n zab ne-⁠b ye.

A Zeova yeela a Moiiz t’a rɩk a rasaarã n tees Mog-​miuugã. A Moiiz sẽn tees a rasaarã, a Zeova kɩtame tɩ seb-​kẽeng fugi, tɩ koomã welg zĩis a yiibu, n leb goabg la rɩtg n bas sʋkã vɩʋʋgo.

Dẽ, Israɛll nebã tũu mogrã sʋk sẽn lebg koɛɛngã n looge. Bãmb ne b rũmsã fãa rɩka sẽk wʋsg n na n dʋʋg mogrã. Israɛll nebã sẽn paam n dʋʋg n sa wã, sawadgã loogame tɩ Ezipt nebã yã b yembsã sẽn loogde. Bãmb me kẽe mogrã pʋgẽ n na n bʋʋg-⁠b n yõge.

B sẽn kẽ mogrã pʋgẽ wã, a Zeova kɩtame tɩ b saar dãmbã nao baase. Rabeemã yõk-⁠b lame tɩ b kelemdẽ n yetẽ yaa: ‘Wa-⁠y tɩ d zoe n bas Israɛll nebã t’a Zeova zabda ne tõnd n sõngd bãmba.’ La b ra pa tõe n le zoe ye.

Wa yãmb sẽn ne fotã zugã, a Zeova yeela a Moiiz t’a rɩk a rasaarã n tees Mog-​miuugã. Koomã sẽn da welg zĩis a yiibã lebg n naaga taab n lim Ezipt nebã ne b saar dãmbã. Yaa sodaasã fãa n da kẽ mogrã pʋgẽ n na n bʋʋg Israɛll nebã. Ezipt sodaag baa a ye ka põs ye.

La Wẽnnaam nin-​buiidã fãa põsame. B sũyã ra noomame! Rapã yɩɩla yɩɩll n na n pẽg a Zeova. B yɩɩla woto: ‘A Zeova yaa gãndaoog zabr pʋgẽ. A luba wiid ne wed-​rʋʋdb mogrã pʋgẽ.’ A Moiiz kẽem a Miryam la pagb a taabã fãa rɩka b gãngão-​gilsã n wẽed n saoodẽ la b naagd rapã n yɩɩnd woto: ‘A Zeova yaa gãndaoog zabr pʋgẽ. A luba wiid ne wed-​rʋʋdb mogrã pʋgẽ.’