GES-⁠Y rap a yiibã sẽn zãad bũmb ninsã. Yaa sib-​gĩnd sẽn yaa bedre, kankama la grenadinni. Da yaa zɩsgo, hal tɩ yɩ tɩlae tɩ b yagl raoog zugu, tɩ rap a yiib rɩk n palg b bãgdẽ. La woto fãa yii yɛ? Yii Kanaã. Tẽeg-⁠y t’a Abrahaam, a Izaak la a Zakoob ra zĩnda Kanaã. La komã yĩng n kɩt t’a Zakoob ne a zakã rãmb yik n kẽng Ezipti. Wakat kãng n tãag masã yaa yʋʋm kobs-⁠yi la piig la a yoobe. A Moiiz peegda Israɛll nebã masã n debd Kanaã. B taa rasempʋɩɩgã zĩig ning b sẽn boond tɩ Kadɛsã.

Nin-​wẽns n vɩ Kanaã tẽngã pʋgẽ. Rẽ n so t’a Moiiz tʋm rap 12 tɩ b tɩ soos n ges tẽngã. A yeel-⁠b-⁠la woto: ‘Kẽng-⁠y n tɩ ges-⁠y neb nins sẽn vɩ be wã sã n yaa wʋsgo, la b sã n tara pãnga. Ges-⁠y tẽngã sã n sakda koodo, la y zã tɩɩsã biis n wa.’

Rapã sẽn kẽng n lebg n wa, b yeela a Moiiz tɩ tẽngã yaa sõma hal wʋsgo. B zãa tɩɩsã biisã meng n wa wilg a Moiizi. La rap piig la a yiibã sʋka, bãmb 10 n baas n yeel woto: ‘Tẽngã nebã yaa nin-​wogdo, la b tara pãng me. Tõnd sã n mak n na n deeg tẽngã, b na n kʋʋ tõndo.’

Israɛll neb a taabã sẽn wʋm woto wã, b yɛɛsame n yeel yaa: ‘Tõnd fãa sã n da ki Ezipti, bɩ d sã n da ki weoogã pʋgẽ ka n são. Tẽngã neb na n kʋʋ tõndo, la b yõg d pagbã ne d kambã n looge. Bɩ d bas a Moiiz la d yãk ned a to t’a lʋɩ d taoore, tɩ d leb Ezipti.’

La rap 12 wã sʋka, a yiib n da teeg a Zeova. Yaa a Zozue ne a Kalɛɛb. B yeela Israɛll nebã yaa: ‘Ra zoe-⁠y rabeem ye. A Zeova bee ne tõndo. D na n deega tẽngã nana-​nana.’ La nebã pa kelg-⁠b ye. B ra rat n kʋʋ a Zozue ne a Kalɛɛb menga.

A Zeova sũurã puuga wʋsgo, t’a yeel a Moiiz yaa: ‘Israɛll neb nins sẽn tar yʋʋm pisi la sẽn yɩɩd woto wã baa a ye ka na n kẽ Kanaã tẽngã pʋgẽ ye. B yãa bõn-​bãn nins mam sẽn maan Ezipt ne weoogã pʋgẽ wã, la b baas n ket n pa tẽed maam ye. B fãa na n yeeba rasempʋɩɩgã pʋgẽ yʋʋm 40 n wa ki. Yaa a Zozue ne a Kalɛɛb bal n na n kẽ Kanaã.’