YƖƖDA yʋʋm 10 masã la rĩm a Nebukadnezaar sẽn tall Israɛll neb nins fãa sẽn karem n zãagã n kẽng Babilonnã. La ges-⁠y foto wã zugu! Zerizalɛm la sẽn dɩt bugmã. B tallda Israɛll neb nins sẽn pa ki wã n debd yembd Babilon.

A Zeova no-​rɛɛsdbã ra pĩnd n yeelame tɩ nebã sã n pa bas b tʋʋm-​wẽnsã, yel-​kãngã n da na n paam-⁠ba. La Israɛll nebã pa kelg ye. B kell n basa a Zeova n pʋʋsd wẽnnaam dãmb a taaba. Dẽnd bũmb ning sẽn paam-​bã yaa bãmb n bao. No-​rɛɛs a Ezekɩɛll wilgda bõn-​wẽns nins b sẽn da maandã.

Yãmb mii a Ezekɩɛll bɩ? A ra bee Israɛll kom-​bɩɩs nins rĩm a Nebukadnezaar sẽn da tall n kẽng Babilonnã sʋka. Yaa wakat kãng la b sẽn tall a Daniɛll, a Sadrak, a Mesak la a Abɛdnego n kẽng Babilonnã. Yɩɩda yʋʋm 10 masã, la rẽ tɩ Zerizalɛm nan pa sãam ye.

A Ezekɩɛll sẽn da ket n be Babilonnã, a Zeova maana yel-​solemd n kɩt t’a yã Israɛll nebã sẽn da maand bõn-​wẽns nins Zerizalɛm wẽnd-​doogã pʋgẽ wã. A sɩd ra bee Babilon, la a Zeova kɩtame t’a yã bũmb ning sẽn maand wẽnd-​doogã pʋgẽ wã. Nebã sẽn da maand bũmb ningã ra yaa wẽng wʋsgo!

A Zeova yeela a Ezekɩɛll yaa: ‘Fo nee Israɛll nebã sẽn maand bõn-​dẽgd nins wẽnd-​doogã pʋgẽ wã bɩ? Ges b sẽn gʋl wiis ne rũms a taab lalsã zugu, la f ges Israɛll nebã sẽn waoogd-⁠b to-⁠to.’ Wẽnnaam kɩtame t’a Ezekɩɛll yã rẽ fãa n gʋlse.

A Zeova soka a Ezekɩɛll yaa: ‘Fo nee bũmb ninga Israɛll nebã kãsem dãmbã sẽn soos n maandẽ wã bɩ?’ A Ezekɩɛll sɩd yãa rap 70 sẽn pʋʋsd ziri wẽnnaam dãmba. Rapã yeta woto menga: ‘A Zeova ka ne tõnd ye, a basa tẽngã.’

Rẽ poore, a Zeova kɩtame t’a Ezekɩɛll yã pagb sẽn zĩ wẽnd-​doogã zak noor ningã sẽn teesd rɩtgã. B zĩi be n pʋʋsd wẽnnaam a Tamuuz. A Ezekɩɛll leb n yãa rap sẽn na ta 25 sẽn be a Zeova roogã noor n wõgemd n pʋʋsd wĩndgã.

A Zeova yeelame yaa: ‘Nin-​kãensã paooga maam. B waa hal mam doogẽ wã n maand b tʋʋm-​wẽnsã. B yika mam sũurã, la b sãoongã wakate, m ka na n zoe b nimbãaneg ye.’

A Zeova sẽn kɩt t’a Ezekɩɛll yã bõn-​kãensã wã yʋʋm a tãab poore, Israɛll nebã yikame n kɩɩs rĩm a Nebukadnezaar. Rẽ n so t’a Nebukadnezaar yik n na n zab ne-⁠ba. Yʋʋmd a ye la pʋɩ-​sʋk poore, Babilon nebã tõog n wãa Zerizalɛm lalsã n kẽ n yõog tẽngã. Neb wʋsg kiime, tɩ b tall kẽer n kẽng yembd Babilon.

La bõe yĩng t’a Zeova bas tɩ b wa sãam Zerizalɛm, n kʋ neb kẽer la b tall neb a taab n kẽng yembdo? Yaa Israɛll nebã sẽn pa kelg a Zeova la b pa sak n tũ a noyã yĩnga. Woto zãmsda tõnd tɩ d segd n maanda Wẽnnaam raabã wakat fãa.

Babilon nebã basa neb bilf bal tɩ b pa Israɛll tẽngẽ wã. Rĩm a Nebukadnezaar yãka a Gedaliya sẽn yaa Zʋɩfã t’a ges neb nins sẽn pa wã yelle. La Israɛll neb n kʋ a Gedaliya. Rẽ kɩtame tɩ nebã ra yɛɛsdẽ tɩ Babilon nebã na n wa sãam-⁠b lame. Dẽnd b modga a Zeremi t’a na n tũ-b tɩ b zoe n kẽng Ezipti.

Ned baa a ye ra pa le be Israɛll tẽngẽ wã ye. Tẽngã kell n paa vɩʋʋg yʋʋm 70. La a Zeova kãabame tɩ yʋʋm 70 wã poore, a na n kɩtame t’a nebã lebg n wa Israɛll tẽngẽ wã. La bõe n paam neb nins b sẽn tall n kẽng Babilonnã? Bɩ d ges bũmb ning sẽn paam-​bã.