NAND t’a Davɩɩd ki, a kõo a Salomo a Zeova roogã pãlã. Yaa a Zeova meng n da wilg a Davɩɩd a sẽn dat tɩ b me a roogã to-⁠to. A Salomo sẽn deeg naamã yʋʋm a naas-⁠n-​soabã pʋgẽ, a sɩnga wẽnd-​doogã meebo. Meebã rɩka yʋʋm a yopoe la pʋɩ-​sʋka. Yaa sẽn yɩɩd neb tus koabg la tus pis-​nii n me wẽnd-​doogã. Meebã rɩɩ ligd wʋsg me, bala sãnem la wanzuri wʋsg la b tall n me.

Wẽnd-​doogã ra tara ro-​pʋs wʋsgo, la a yiib n da yaa wala sɛk-​roogã ro-​pʋs a yiibã. La b bedrem ra taa sɛk-​roogã rẽnd naoor a yiibu. A Salomo kɩtame tɩ b ning kãabg koglgã wẽnd-​doogã pʋgẽ ro-​taoorã pʋgẽ, la b ning sɛk-​roogã teed a taabã ro-​pʋg a yembrẽ wã.

Wẽnd-​doogã sẽn wa n me n sa wã, b maana kibs kãsenga. Wa yãmb sẽn ne foto wã zugã, kibsã sasa, a Salomo yĩgimdame n tees wẽnd-​doogã n pʋʋs a Zeova n yeel yaa: ‘Gese, maam miime tɩ saasã sẽn ka tõe n sek foomã, yaa vẽeneg tɩ ro-​kãngã mam sẽn me wã me ka tõe n sek foo ye. La baasgo, m kot-⁠f lame tɩ f kelg neb nins sẽn na n tees zĩ-kãngã n pʋʋsã.’

A Salomo sẽn pʋʋs n sa wã, bugum n yi yĩngr n yõog rũms nins b sẽn da kʋ n na n maan maandã. A Zeova kɩtame tɩ vẽenem yãg wẽnd-​doogã pʋgẽ. Woto wilgame t’a Zeova reega a Salomo pʋʋsgã, la t’a sũurã nooma ne wẽnd-​doogã. Masã, nebã rebda wẽnd-​doogẽ wã n pʋʋsd a Zeova, pa le yaa sɛk-​roogẽ wã ye.

A Salomo rɩɩ a naamã ne yam yʋʋm wʋsgo, tɩ nebã me sũy ra noomẽ. La a Salomo kẽe kãadem ne pagb wʋsg sẽn da pa Israɛll neb la sẽn da pa tũud a Zeova ye. Yãmb pa ne a pag a ye sẽn be fotã zug n pʋʋsd bõn-​naandg sɩda? A Salomo pagbã wa n kɩtame tɩ yẽ me pʋʋsd wẽnnaam dãmb a taaba. Yãmb mii rẽ sẽn kɩt t’a maan bũmb ning bɩ? A ra pa le get nebã yell sõma ye. A lebga nin-​toaaga, la nebã sũy ra pa le noom ne-⁠a ye.

A Zeova sũurã puugame t’a yeel a Salomo yaa: ‘Mam na n deega fo rĩungã n kõ ned a to. La ka na n yɩ fo nifẽ ye. Na n yɩɩ f biigã naamẽ. La baasgo, mam ka na n deeg soolmã zãng n bas-⁠a ye.’ Bɩ d ges rẽnda sẽn yɩ to-⁠to.