YAA sẽn ta neb tus pis-⁠nu n yi Babilon n na n leb Zerizalɛmmã. La b ta n mikame tɩ Zerizalɛm ra sãama zãnga. Ned baa a ye ra pa ket be ye. Israɛll nebã ra segd n lebs n manega bũmba fãa.

B sẽn ta wã, b pipi tʋʋmd yɩɩ tẽn-​kugrã meebo. Yaa tẽn-​kugrã zug la b yõogd rũmsã n kõt a Zeova. Kiis a wãn poore, Israɛll nebã sɩnga wẽnd-​doogã meebo. La tẽn-​yagsã neb ra pa rat tɩ b me wẽnd-​doogã ye. Rẽ n so tɩ b mak n na n yɛɛs-⁠b tɩ b yals meebã. B kɩtame meng tɩ Pɛrs rĩm-paalgã yiis noor n gɩdg Israɛll nebã tɩ b ra le me ye.

Yʋʋm 17 masã la Israɛll nebã sẽn yi Babilon n kẽng b ba-​yirã. A Zeova tʋma no-​rɛɛs a Aaze la no-​rɛɛs a Zakari tɩ b tɩ yeel nebã tɩ b lebs n sɩng wẽnd-​doogã meebo. Nebã teega Wẽnnaam n sak n maan no-​rɛɛsdbã sẽn yeelã. Baa Pɛrs rĩmã sẽn yiis noor n gɩdg tɩ b ra me wã, b lebs n sɩnga wẽnd-​doogã meebo.

La Pɛrs kug-​zĩid a ye yʋʋr sẽn boond t’a Tatenayi wa n soka Israɛll nebã tɩ ãnd n kõ-b sor tɩ b me wẽnd-​doogã. Israɛll nebã yeel-⁠a lame tɩ bãmb sẽn wa n be Babilonnã, rĩm a Sirus yeel-⁠b lame tɩ b leb Zerizalɛm n tɩ me b Wẽnnaam a Zeova roogã.

A Tatenayi toola sebr Babilon n na n sok n ges a Sirus sã n sɩd ra yeela Israɛll nebã tɩ b tɩ me wẽnd-​doogã. Rẽ poor bilfu, Pɛrs rĩm-paalgã toola sebr n wilg t’a Sirus sɩd ra yeela woto. Rẽ n so tɩ rĩm-paalgã yeel a Tatenayi t’a bas Israɛll nebã tɩ b me b wẽnd-​doogã, la a yeel t’a sõng-⁠b menga. Yʋʋm a naas loogr poore, wẽnd-​doogã me n saame tɩ Israɛll nebã sũy yaa noog wʋsgo.

B sẽn me wẽnd-​doogã n sa kaoosame masã. A rat n taa yʋʋm 48. Zerizalɛm nebã ra yaa talse, tẽngã ne wẽnd-​doogã me ra pa le yaa neer ye. A Ɛsdras zĩnda Babilon n wʋm tɩ wẽnd-​doogã rata manegre. Yãmb mii a sẽn maan bũmb ning bɩ?

A Ɛsdras tɩ goma ne a Artazɛgzɛs sẽn da yaa Pɛrs rĩm wakat kãnga wã, tɩ rĩmã sẽn da yaa rĩm-​sõngã kõ-a teed wʋsg t’a na n tall n kẽng Zerizalɛm. A Ɛsdras bõosa Israɛll neb nins sẽn da be Babilonnã tɩ b sõng-⁠a t’a tall kũunã n kẽng Zerizalɛm. Yaa sẽn na ta neb tus a yoob n yeel tɩ b na n tũ n kẽngame. B talla wanzuri ne sãnem la teed a taab wʋsg n looge.

La a Ɛsdras ra yɛɛsdame, bala bi-​bees n da gɩt nebã soyã zutu. B ra tõe n yõk-⁠b lame n deeg b wanzuri wã ne b sãnemã, la b kʋ-⁠ba. Rẽ n so t’a Ɛsdras tigim neba n pʋʋs a Zeova t’a kogl-⁠b tɩ b ta Zerizalɛm ne laafɩ. Yaa rẽ yĩng la yãmb sẽn ne fotã zug tɩ b pʋʋsdẽ wã.

A Zeova sɩd kogl-⁠b lame. Kiis a naas poore, b taa Zerizalɛm tɩ bũmb ka maan-⁠b ye. Woto wilgdame tɩ ned sã n kos a Zeova t’a kogl-⁠a, a tõe n sɩd kogl-⁠a lame.