NAND t’a Ɛsdras kẽng Zerizalɛm, bũmb n maan Pɛrs tẽngã pʋgẽ. Bɩ d ges bũmb ning sẽn maanã. A Mardose ne a Ɛstɛɛr ra yaa Israɛll neba. A Mardose ba wã ne a Ɛstɛɛr ba wã yaa saam-​biisi. A Ɛstɛɛr ra yaa na-​paga, t’a Mardose me ra tar naam. Rĩmã sẽn yãk a toogo, a Mardose n yɩɩd neb a taabã fãa. Bɩ d ges sẽn sɩng to-⁠to tɩ wa yaa woto.

A Ɛstɛɛr ba wã ne a ma wã kiime t’a ra ket n paoodẽ. Rẽ n so t’a Mardose reeg-⁠a n wubi. A Mardose ra tʋmda Pɛrs rĩm a Asierus zakẽ wã. Na-​zakã ra bee Suuzi. Raar a yembre, rĩmã pag a Vasti kɩɩsa rĩmã noore, tɩ rĩmã na n bao pag a to. Yãmb mii a sẽn yãk pag ning bɩ? Yaa pʋg-​sad-​neer a Ɛstɛɛr.

Yãmb nee rao ning sẽn be fotã zug tɩ nebã wõgemd n pʋʋsd-⁠a wã bɩ? Yaa a Haman. Yaa Pɛrs tẽngã nin-​kãseng a ye, la a yaa wuk-⁠m-​meng soaba. A ratame t’a Mardose sẽn zĩ wã me wõgemd n pʋʋs-⁠a. La a Mardose pa sak n na n maan dẽ, bala a tagsdame tɩ pa zems tɩ b wõgemd n pʋʋs nin-​wẽng a woto buud ye. A Haman sũurã puugame t’a baood n na n kʋ a Mardose ne a buudã neba.

A Haman kãnega Israɛll nebã ne rĩmã n yeel tɩ b yaa nin-​wẽns sẽn pa rat n tũ rĩmã noyã, la tɩ b segd n kʋ-⁠b lame. La rĩm a Asierus ra pa mi t’a pag a Ɛstɛɛr yaa Israɛll ned ye. Rẽ n so t’a kelg a Haman goamã n yiis noor n wilg tɩ b yãka daar n na n kʋ Israɛll nebã fãa.

A Mardose sẽn wʋm dẽ wã, a sũurã sãama wʋsgo. A toolame tɩ b yeel a Ɛstɛɛr t’a yõk rĩmã sɛɛg tɩ b ra kʋ-⁠b ye. Pɛrs rãmbã nengẽ, fo sã n da kẽ n na n yã rĩmã t’a pa bool foo, a sã n pa dɩk a dasaarã n tees-⁠fo, b kʋʋd-⁠f lame. La a Ɛstɛɛr kẽ n yãa rĩmã tɩ b pa bool-⁠a ye. La rĩmã rɩka a sãnem dasaarã n tees a Ɛstɛɛr n wilg tɩ b pa segd n kʋ-⁠a ye. A Ɛstɛɛr maana kibs n bool rĩmã ne a Haman. Kibsã daare, rĩmã soka a Ɛstɛɛr tɩ bõe la a rata. A Ɛstɛɛr yeela rĩmã tɩ yẽ ne a Haman wa kibs ning a sẽn na n maan vẽkembeoogã, t’a na n togs-⁠a lame.

Vẽkembeoogã, kibsã sasa, a Ɛstɛɛr yeela rĩmã yaa: ‘B rat n kʋʋ maam ne m buudã neba.’ Rĩmã sũur puugame t’a sok tɩ yaa ãnda soab la sẽn dat n maan dẽ wã.

A Ɛstɛɛr leokame yaa: ‘Yaa nin-​wẽng a Haman sẽn zĩ ka wã n dat n maan yel-​kãngã.’

Rĩmã sũur puugame n paas t’a yeel tɩ b kʋ a Haman. Yaa rẽ poor la rĩmã kõ a Mardose naamã. A Mardose kɩtame tɩ b yiis noor a to sẽn kõt Israɛll nebã sor tɩ daar ning b sẽn yãk n na n kʋ-​bã sã n ta, bɩ b zab n fãag b mense. Sẽn mik t’a Mardose lebga nin-​kãsengã yĩnga, neb wʋsg n wa n sõng Israɛll nebã tɩ b zab n tõog b bɛɛbã n paam n põse.