GES-⁠Y Israɛll nebã sẽn tʋmde. Yaa Zerizalɛm lalgã la b sẽn met woto wã. Yaa yʋʋm koabg la pis-⁠nu la a yiib masã la rĩm a Nebukadnezaar sẽn wa n sãam Zerizalɛmmã. A kɩtame tɩ b pãb lalsã n siig la b yõog kʋɩlensã. Israɛll nebã sẽn wa n yi Babilon n lebg n wa wã, b pa reng n me lalsã ye.

La nebã sẽn da vɩ tɩ lals pa gũbg b tẽngã, b ra yɛɛsdame tɩ b bɛɛbã na n wa kẽ nana-​nana n zab ne-⁠ba. La a Nehemi waame n na n sõng-⁠b tɩ b lebs n me lalsã. Yãmb mii a Nehemi sẽn yaa ned ning bɩ?

A Nehemi yaa Israɛll ned sẽn vɩ Suuz. A Mardose ne a Ɛstɛɛr me vɩɩ be. A Nehemi tʋmda na-​yirã. Dẽnd tõe tɩ yẽ ne a Mardose la na-​pag a Ɛstɛɛr mii taab sõma. La Biiblã pa wilgd a Nehemi sã n tʋm n kõo a Ɛstɛɛr sɩd a Asierus ye. A tʋmdame n kõt rĩm ning sẽn pʋgl a Asierusã. Yaa rĩm a Artazɛgzɛs.

Tẽeg-⁠y tɩ yaa rĩm-sõng a Artazɛgzɛs n da kõ a Ɛsdras ligd wʋsg t’a kẽng Zerizalɛm n tɩ maneg a Zeova roogã. La a Ɛsdras ra pa maneg lalsã sẽn da lʋɩyã ye. Bɩ d ges sẽn sɩng to-⁠to t’a Nehemi wa sõngd n met lalsã.

Yaa yʋʋm 13 masã la a Artazɛgzɛs sẽn kõ a Ɛsdras ligd t’a tɩ maneg wẽnd-​doogã. A Nehemi n lebg rĩm a Artazɛgzɛs rã-kɩta. Rat n yeelame tɩ yẽ n kõt rĩmã rãam, la a gũusdẽ tɩ ned ra wa ning tɩɩm rĩmã rãam pʋgẽ ye. Ad ra pa tʋʋm bil ye!

Raar a yembre, a Nehemi ma-​biig a Hanani ne rap a taab yii Israɛll tẽngã n na n tɩ ges a Nehemi. B togs-⁠a-⁠la Israɛll nebã zu-​loeese, la b yeel-⁠a me tɩ Zerizalɛm lalsã ket n nan pa me ye. A Nehemi sũurã sãama wʋsg t’a pʋʋs a Zeova n togs-⁠a yellã.

Daar a yembre, rĩmã gũus n gesame t’a Nehemi nengã gãnemame t’a sok-⁠a yaa: ‘Bõe n tar foo tɩ f sũurã pa noomẽ?’ A Nehemi yeelame tɩ yaa Zerizalɛm sẽn sãam tɩ lalsã lʋɩyã yĩng n kɩt t’a sũurã pa noomẽ wã. Rĩmã sok-⁠a lame tɩ bõe la a rata.

A yeela rĩmã t’a bas t’a kẽng Zerizalɛm n tɩ lebs n me lalsã. Rĩm a Artazɛgzɛs yaa nin-​sõngo. A yeela a Nehemi t’a kẽnge, la a sõng-⁠a lame meng t’a paam raad sẽn na yɩl n tɩ tʋm tʋʋmdã. A Nehemi sẽn ta Zerizalɛmmã bala, a togsa nebã yẽ sẽn wa n na n maan bũmb ninga. Nebã sũy yɩɩ noog tɩ b yeel tɩ b na n sɩnga tʋʋmdã tao-​tao.

Israɛll nebã bɛɛb sẽn yã tɩ b sɩnga lalsã meebã, b yeelame tɩ b na n tɩ kʋ-⁠b lame tɩ tʋʋmdã yalse. La a Nehemi sẽn wʋm dẽ wã, a kõo tʋm-​tʋmdbã sʋʋs ne kãn la a yeel-⁠b yaa: ‘Bɩ y ra zoe bãmb ye. Zab-⁠y n fãag y saam-​biisã ne y kambã la y pagbã ne y tẽngã.’

Nebã talla raoodo. B ra zãada b zab-​teedã wakat fãa la b tʋmdẽ. Lalsã meeme n sa rasem 52 pʋgẽ bala. Masã, nebã pa le zoet rabeem ye. A Nehemi ne a Ɛsdras zãmsa nebã Wẽnnaam noyã. Nebã sũur yɩɩ noogo.

La baa ne rẽ fãa, yɛlã ra pa sõma zãng wa Israɛll nebã sẽn da nan pa kẽng yembd Babilonnã ye. Yaa Pɛrs rĩmã n da so Israɛll nebã, la b ra segd n sak-⁠a lame. La a Zeova kãabame t’a na n tʋma rĩm a to sẽn na n kɩt tɩ nebã zĩnd ne laafɩ. Rĩm-kãng yaa ãnda? Wãn to la a na n kɩt tɩ laafɩ zĩnd tẽngã zugu? Yaa yʋʋm kobs-​naas la pis-⁠nu loogr poor la b yaool n bãng rẽ fãa. Wakat kãngã, bi-​pɛɛlg n doge. La a rogmã na n waa ne bark wʋsgo. D na n wa yãa rẽ taoore.