KIBAR 93
A Zezi rɩlga neb wʋsgo
YEL-BEED n maane. B kʋʋ a Zãmbatiisi. Rĩm a Herood pag a Herodiaad ra pa nong a Zãmbatiis ye. A maana a sẽn tõe fãa tɩ rĩmã kɩt tɩ b fiuug a Zã zugã.
A Zezi sẽn wʋm dẽ wã, a sũurã sãama wʋsg t’a kẽng weoogẽ wã n tɩ zĩ be a yembre. La neb kʋʋng bʋʋg-a–la be. A Zezi sẽn yã kʋʋngã, b nimbãanegã yõk-a lame t’a gom Wẽnnaam rĩungã yell ne-b la a sãoog bãad dãmbã.
Zĩ-sobd sẽn wa n ta, a Zezi karen-biisã kolgame n yeel-a yaa: ‘Zĩ-kãngã yaa weoogo, la zĩigã zoe n zʋʋgame. Bɩ f bas nebã tɩ b loog n kẽng tẽnsã pʋsẽ n tɩ ra rɩɩbo.’
La a Zezi yeel-b lame yaa: ‘Ka tɩlae tɩ b loog ye. Bɩ yãmb mens bao rɩɩb n kõ-b tɩ b rɩ.’ A Zezi wẽnegame n sok a Filip yaa: ‘Yɛ la d tõe n da rɩɩb tɩ sek nin-kãensã fãa?’
La a Filip leokame yaa: ‘Tõnd sã n dat n da rɩɩb tɩ ned kam fãa tõog n paam baa yaa bilf menga, rẽndame tɩ d yiis ligd wʋsgo.’ T’a Ãndere yeel yaa: ‘Biig n be ka n tar bur a nu ne zĩm a yiib bala. La pa tõe n sek nebã fãa ye.’
La a Zezi yeelame tɩ b kɩt tɩ nebã zĩnd moodẽ wã. A pʋʋsa Wẽnnaam, la a sɩng burã kaoobo. Rẽ poore, a karen-biisã pʋɩya burã ne zĩmã tɩ nebã fãa paame. Nebã ra yaa rap tus a nu, la pagb ne kamb wʋsgo. B fãa rɩɩme n tɩge, la karen-biisã wʋka rɩ-kɛlã n pids pet 12!
A Zezi kɩtame t’a karen-biisã kẽ koom koglg n na n dʋʋg Galile mogrã. La seb-kẽeng n yik ne yʋngã tɩ mogrã koom lengd koglgã, tɩ karen-biisã yɛɛse. Yʋn-sʋkã sẽn ta, b wa n nee ned sẽn kẽnd koomã zug n watẽ. B sẽn da ka mi sẽn yaa ned ningã yĩnga, b yɛɛsame n kelme.
La a Zezi yeel-b lame yaa: ‘Da zoe-y rabeem ye. Yaa maam.’ La b ket n da pa tẽed ye. Rẽ n so t’a Pɩɛɛr yeel yaa: ‘Zusoaba, sã n sɩd yaa foo, bɩ f kõ maam noor tɩ m kẽn koomã zug n wa fo nengẽ.’ A Zezi yeel-a lame t’a wa. A Pɩɛɛr sɩd yii koglgẽ wã n sɩng koomã zug kẽna. La a wa n yɛɛsame n sɩng bõrbo, t’a Zezi fãag-a.
Daar a to me, a Zezi kõo neb tusa rɩɩb tɩ b rɩ. Baraarã yɩɩ ne bur a yopoe ne zĩm bõones a wãn bala. La seka nebã fãa. A Zezi sẽn da get nebã yell to-to wã pa noom-d sɩda? A sã n wa rɩt a naamã, baa fʋɩ pa na n paoog-d ye.