A ZEZI zĩi Galile tãng a ye zug n zãmsd nebã. Neb nins sẽn zĩ a sɛɛgẽ wã yaa a karen-​biisi. A yãka bãmb 12 b sʋk n boond t’a tʋm-​tʋmdba. Yãmb mii a tʋm-​tʋmdbã yʋy bɩ?

Yaa a Sɩmo Pɩɛɛr ne a ma-​biig a Ãndere, a Zak ne a ma-​biig a Zã. Tʋm-​tʋmd a to me n be t’a yʋʋr yaa a Zake, t’a to me yʋʋr yaa a Sɩmo. Zida rãmbã me ra yaa b yiibu. A ye wã yaa a Zida Iskariote, la b boonda Zida a to wã t’a Taade. Sẽn kell-​bã yaa a Filipi, a Natanayɛlle, a Matɩe, la a Toma. A Natanayɛll yʋʋr a to me la a Bartelemi.

A Zezi sẽn yi Samari n ta Galile wã, a sɩngame n moondẽ n yetẽ tɩ saasẽ rĩungã kolgame. Yãmb mii saasẽ rĩungã sẽn yaa bũmb ning bɩ? Yaa Wẽnnaam goosneema. Wẽnnaam yãka a Zezi t’a yaa a goosneema wã naaba. A na n zĩnda saasẽ n dɩ naam tẽngã zugu, n kɩt tɩ laafɩ zĩndi. Wẽnnaam rĩungã na n kɩtame tɩ tẽngã fãa lebg arzãna.

A Zezi zĩ n gomda Wẽnnaam rĩungã yell ne nebã. A yeela nebã tɩ b pʋʋs woto: ‘Tõnd Ba sẽn be saasẽ, bɩ f yʋʋrã yɩ ne waoogre. Bɩ f soolem wa, tɩ f raabã maan dũniyã zug wa sẽn maand saasẽ wã.’ Neb wʋsg boonda pʋʋs-​kãngã tɩ ‘Tõnd Ba sẽn be saasẽ wã’ pʋʋsgo. Yãmb mii pʋʋsgã ne zug bɩ?

A Zezi leb n wilga ned kam fãa sẽn segd n maan bũmb ninga. A yeelame yaa: ‘Yãmb sẽn dat tɩ nebã maan yãmb bũmb ningã, bɩ yãmb me maan bãmb woto.’ Neb a taabã sã n maand yãmb neere, pa noom yãmb sɩda? Dẽnd a Zezi rat n wilgame tɩ d segd n maana neb a taabã me neere. Nebã fãa sẽn na n wa maand woto arzãnã pʋgẽ wã na n kɩtame tɩ vɩɩmã yɩ noogo. Ka sɩda?