BI-​BƖƖG ning sẽn yas ne tʋm-​tʋmd a Pollã yʋʋr la a Tɩmote. A Tɩmote ne a zakã rãmb vɩɩ Listri. A ma wã yʋʋr la a Eniis t’a yaab-​poakã yʋʋr la a Loyiis.

Yaa naoor a tãab-⁠n-​soab la woto a Poll sẽn tɩ ges Listr nebã. Yẽ ne a Barnabas da reng n wa moona koe-​noogã be sẽn na maan yʋʋmd masã. La so-​kãngã wã, yaa yẽ ne a zoa a Sɩlas n lebg n wa.

Yãmb mii a Poll sẽn yet a Tɩmote bũmb ningã bɩ? A sok-⁠a lame yaa: ‘Fo rat n tũu maam ne a Sɩlas bɩ?’ La a yeel-⁠a woto: ‘Fo tõe n sõnga tõnd tɩ d moon neb nins sẽn be zĩ-zãrsã.’

A Tɩmote yeelame tɩ yẽ rat n tũ-b lame. A sɩd basa a zakã rãmb n tũ a Poll ne a Sɩlas. La nand tɩ d gom rẽ yelle, bɩ d reng n gom a Poll yelle. Rat n taa yʋʋm 17 masã la a Zezi sẽn gom ne a Poll Damas sorã zugã.

D tẽeg t’a Poll da rebda Damas n na n tɩ nams a Zezi karen-​biisã, la masã yẽ mengã lebga a Zezi karen-​biiga. Bɛɛb n mak n na n kʋ-⁠a, bala b pa nong a sẽn gomd a Zezi yellã ye. La karen-​biis a taabã sõnga a Poll t’a põse. B kɩtame t’a kẽ peoog pʋgẽ tɩ b sik-⁠a tẽngã lalgã poore.

Dẽ, a Poll kẽngã Ãntios n tɩ moon koɛɛgã. Yaa be la b bool a Zezi karen-​biisã pipi tɩ kiris-​neba. Be, b tʋma a Poll ne a Barnabas tɩ b gilg n moon koɛɛgã zĩ-zãrsẽ. Wala makre, b tũu taab n kẽng a Tɩmote ba-​yirã Listri.

B sẽn yi Listrã tɩ yʋʋmde, a Poll lebg n waa be. Yaa wakat kãng la a Tɩmote sẽn sak n na n tũ a Poll ne a Sɩlasã. Yãmb mii b sẽn tũ taab n kẽng zĩis ninsã bɩ? Ges-⁠y kartã zugu.

Pipi, b reng n kẽnga Ikoniyom sẽn pa zãr ne Listrã, n yaool n kẽng Ãntios. Rẽ poore, b kẽnga Torwas, Filipi, Tesalonik la Beere. Yãmb nee Atɛn kartã zug bɩ? A Poll moona koɛɛgã be me. Rẽ poore, b kẽnga Korẽnt n tɩ moon koɛɛgã yʋʋmd a ye la pʋɩ-​sʋka. B sẽn yi Korẽntã b kẽnga Efɛɛz la b pa kaoos be ye. B sẽn yi Efɛɛzã b kẽe batayo n lebg n wa Sezaare, n yi be n kẽng Ãntiose, t’a Poll tɩ pa be.

Dẽnd a Tɩmote toga sor kɩlometr ka tɛk n sõng a Poll tɩ b moon koe-​noogã la b lugl tigimsi. Yãmb sã n wa lebg bedre, yãmb me na n tʋma Wẽnnaam tʋʋmdã sõma wa a Tɩmote bɩ?