DŨNIYÃ tara neb wʋsg yʋy sẽn yi. B mii kẽer yʋy sõma b buudã sʋka, bɩ b tẽngã pʋgẽ. B mii a taab dũniyã gill zugu. La bãng ned b sẽn mi zĩig fãa yʋʋr bal pa wilgd tɩ f sɩd mii a soabã ye. Rẽ pa rat n yeel tɩ f mii a sẽn da reng n yɩ ned ning buudu, la a zʋgã sẽn sɩd yaa a soab ye.

1, 2. a) Bõe yĩng tɩ f sã n mi ned b sẽn mi zĩig fãa yʋʋr bala, pa rat n yeel tɩ f sɩd mii a soabã sõma? b) Bõe la neba pa mi vẽeneg a Zezi zugu?

² Baa ne a Zezi Kirist sẽn vɩɩmd tẽng zug sẽn kolg yʋʋm 2000 sẽn loog masã wã, dũniyã gill zugu, nebã wʋma a kibare. La neb wʋsg pa mi a Zezi sẽn sɩd yaa ned ningã vẽeneg ye. Neb kẽer yetame t’a ra yaa nin-sõng bala. Tɩ neb a taab yetẽ t’a ra yaa Wẽnnaam tʋm-tʋmd bala, tɩ sãnda me tẽed t’a Zezi yaa Wẽnnaam tɩ b tog n balm-a wa Wẽnde. Sɩd yaa woto bɩ?

3. Bõe yĩng tɩ tar yõod tɩ yãmb menga bãng sɩdã a Zezi zugu?

³ Tara yõod tɩ yãmb menga bãng a Zezi sẽn sɩd yaa ned ninga. Bõe yĩnga? Bala Biiblã yetame: ‘Vɩɩm sẽn ka sɛta yaa woto, tɩ bãmb na bãng yãmb sẽn yaa sɩd Wẽnnaam sẽn ka to la a Zezi Kirist yãmb sẽn tʋm a soabã.’ (Zã 17:3) N-ye, bãng sɩdã Wẽnnaam a Zeova la a Zezi Kirist zug sõma tõe n kɩtame tɩ ned paam vɩɩm sẽn pa sat tẽng zug arzãnã pʋgẽ. (Zã 14:6) Sẽn paase,  a Zezi kõo tõnd mak-sõng sẽn ka to, sã n yaa ne d sẽn segd n vɩɩmd to-to la d sẽn segd n tall manesem ning ne neb a taabã. (Zã 13:34, 35) Seb-kãngã pipi sakã pʋgẽ, d goma sɩdã Wẽnnaamã zugã yelle. Masã, bɩ d ges Biiblã sẽn sɩd yet bũmb ning a Zezi Kirist zugu.

4. “Mesi” la “Kirist” rat n yeelame tɩ bõe?

⁴ Hal sẽn kaoos t’a Zezi nan pa roge, Biiblã reng n togsa Wẽnnaam sẽn da na n tʋm a soab t’a yɩ Mesi bɩ Kiristã waoongo. Waoogr yʋy nins sẽn yaa “Mesi” (sẽn yit hebre gom-biig a ye pʋgẽ wã) la “Kirist” (sẽn yit gɛrk gom-biig a ye pʋgẽ wã) fãa rat n  yeelame tɩ “b sẽn zae a soaba.” Wẽnnaam da na n zaeya nin-kãngã b sẽn kãab t’a watame wã ne vʋʋsem sõngo, sẽn dat n yeel tɩ Wẽnnaam yãk-a lame n kõ naam sẽn pa wõnd a taaba. Seb-kãngã sags nins sẽn pʋgdã pʋsẽ, d na n bãnga Mesi wã tʋʋmd yõod sẽn ta zĩig ning Wẽnnaam kãabsã pidsg pʋgẽ. D na n leb n bãnga bark nins a Zezi sẽn tõe n kõ-d masã menga. La nand t’a Zezi roge, sãmbg sẽn ka be, neb wʋsg soka b mens woto: ‘Ãnd n na n yɩ Mesi wã?’

5. A Zezi karen-biisã ra kɩsa sɩd t’a yaa ãnda?

⁵ Nazarɛt rao a Zezi sẽn da wa n be tẽng zugu, a karen-biisã ra kɩsa sɩd fasɩ t’a yaa Mesi ning b sẽn da kãab t’a na n waame wã. (Zã 1:41) Karen-biig a yembr yʋʋr sẽn boond t’a Sɩmo Pɩɛɛr yeela a Zezi woto vẽenega: “Yãmb yaa Kirist.” (Matɩe 16:16) Wãn to la karen-bi-kãensã ra tõe n kɩs sɩd t’a Zezi sɩd yaa Mesi ning b sẽn da kãab t’a na n waame wã, la wãn to la tõnd me tõe n kɩs sɩd ne rẽ?

6. Rɩk-y makr n wilg a Zeova sẽn sõng wẽn-sakdbã to-to sẽn na yɩl tɩ b bãng Mesi wã n welge.

⁶ Wẽnnaam no-rɛɛsdb nins sẽn vɩɩmd sẽn deng a Zezi waoongã ra pĩnd n togsa yɛl wʋsg Mesi wã zugu. Yel-kãens ra na n sõnga neb a taabã tɩ b bãng-a n welge. Wala makre, b tõe n yeela yãmb tɩ y kẽng mobill bɩ tẽr gaarẽ wall sɩlg yir n tɩ rɩk ned y sẽn zɩ n yã. Rẽ yĩnga ned sã n bilg yãmb a soabã sẽn yaa to-to, kõn sõng-y sɩda? Wala woto me, ne a no-rɛɛsdbã maasem, Biiblã pʋgẽ a Zeova bilga Mesi wã sẽn da na n maan bũmb ninsã, la a sẽn da na n seg yɛl ninsi. Bãngr-gom-kãensã wʋsg pidsgã ra na n sõnga wẽn-sakdbã tɩ b bãng Mesi wã n welg vẽenega.

7. Bãngr-gom-bʋs a yiib sẽn gomd a Zezi yell n pidsi?

⁷ Ges-y makr a yiibu. Pipi, sẽn yɩɩd yʋʋm 700 sẽn  deng Mesi wã waoongo, no-rɛɛs a Miise ra togsame tɩ Mesi ning b sẽn kãab t’a watame wã ra na n doga Betlehɛm, sẽn yaa tẽn-bil Zida soolmẽ wã. (Miise 5:1) A Zezi sɩd roga yɛ? Yaa tẽn-kãng pʋgẽ bal kɛpɩ. (Matɩe 2:1, 3-9) Yiib-n-soaba, yʋʋm kobs sẽn denge, bãngr-gomd ning sẽn be Daniɛll 9:25 pʋgẽ wã wilga yʋʋmd ning Mesi wã sẽn da na n pukã. Yaa yʋʋmd 29 wã. * Bãngr-gom-kãensã la a taab sẽn pidsã wilgdame t’a Zezi ra yaa Mesi ning b sẽn kãab t’a watame wã.

8, 9. Kaset bʋg n puk vẽeneg a Zezi lisgã wakat n wilg t’a yaa Mesi wã?

⁸ Yʋʋmd 29 wã sẽn wa n kolg saabo, bũmb a to n wilg vẽeneg t’a Zezi ra yaa Mesi wã. Yaa yʋʋm-kãng la a Zezi kẽng Lisd a Zã nengẽ n na n deeg lisg Zʋrdẽ Kʋɩlgẽ wã. A Zeova ra yeela a Zã t’a na n yãa bãnd sẽn na n sõng-a t’a bãng Mesi wã n welge. A Zã sɩd yãa bãn-kãng a Zezi lisgẽ wã. Biiblã yetame tɩ yɩɩ woto: “A Zezi sẽn paam lisgu, b yii koomẽ wã, la gese, yĩngr pakame, la b yãa Wẽnnaam Sɩɩg sẽn wẽnd walle sẽn sigd bãmb zugu. La gese, koɛɛg yii yĩngri n yeele: ‘Ad-a yaa mam Bi-nongre, mam sẽn nong ne m sũur fãa zãnga.’” (Matɩe 3:16, 17) A Zã sẽn yã la a wʋm bũmb ningã kɩtame t’a bãng vẽeneg tɩ yaa Wẽnnaam n tʋm a Zezi. (Zã 1:32-34) Wakat ning Wẽnnaam vʋʋsem sõngã bɩ a pãngã sẽn sig a Zezi zug baraarã, a lebga Mesi wã bɩ Kirist, ned ning b sẽn yãk t’a na n wa yɩ taoor Soab la Rĩmã.—Ezai 55:4.

⁹ Biiblã bãngr-goam pidsgu, n paas Wẽnnaam a Zeova mengã kaset wilgda vẽeneg t’a Zezi yaa Mesi ning b sẽn da kãab t’a watame wã. La Biiblã leokda sogsg a yiib a taab sẽn tar yõod a Zezi Kirist zugu: A yii yɛ? La a ra yaa nin-bʋg buudu?

10. Bõe la Biiblã wilgd a Zezi belmã sẽn deng t’a wa tẽng zugã wɛɛngẽ?

¹⁰ Biiblã wilgdame t’a Zezi reng n vɩɩmda saasẽ n yaool n wa tẽng zugu. A Miise togsa bãngr-gomd n wilg tɩ Mesi wã ra na n doga Betlehɛm la t’a yaa “kʋdemd wẽndẽ neda.” (Miise 5:1, Sebr Sõngo) Naoor wʋsgo, a Zezi mengã yeelame tɩ yẽ reng n vɩɩmda saasẽ n yaool n na n yɩ ninsaala. (Zã 3:13; 6:38, 62; 17:4, 5) A sẽn da wa n yaa malɛk n be saasẽ wã, a ra tara zood sẽn pa tar to ne a Zeova.

11. Wãn to la Biiblã wilgd t’a Zezi la Biribl ning a Zeova sẽn nong n yɩɩdã?

¹¹ A Zezi yaa a Zeova Biribl ning a sẽn nong n yɩɩdã, la pa zaalem yĩng ye. B boond-a lame tɩ “Bi-kãseng sẽn yɩɩd bõn-naandsa fãa,” bala yaa yẽ la Wẽnnaam naan pipi. * (Kolos rãmba 1:15) Bũmb a to me n kɩt tɩ Biribl kãngã ra pa wõnd a taabã ye. A yaa ‘Biribl sẽn ka to.’ (Zã 3:16) Woto rat n yeelame tɩ yaa a Zezi bal la Wẽnnaam naan a toore. Leb n yaa ne a Zezi maasem bal la Wẽnnaam maan bũmb a taabã fãa. (Kolos rãmba 1:16, Sebr Sõngo) Sẽn paas me, b boonda a Zezi tɩ ‘Gomdã.’ (Zã 1:14) Woto rat n yeelame t’a goma Wẽnnaam yʋʋr yĩnga, la sãmbg sẽn ka be, a taasa a Ba wã koees la a noy a kamb a taabã sẽn yaa malɛgsã la ninsaalbã.

12. Wãn to la d mi tɩ Biribl kãsengã pa zem Wẽnnaam?

¹² Rẽ yĩnga Biribl kãsengã ne Wẽnnaam zema taab wa neb kẽer sẽn tẽeda bɩ? Pa woto la Biiblã wilgd ye. Wa d sẽn yã sull ning sẽn loogã pʋgẽ wã, b naana Biriblã. Rẽnd vẽenega a talla sɩngre, tɩ Wẽnnaam a Zeova yaool  n pa tall sɩngre, la a ka saabo. (Yɩɩl Sõamyã 90:2) Biribl yendã Wẽnnaam sẽn naan a toorã zɩ n bao n na n zeng a Ba wã ye. Biiblã wilgda vẽeneg tɩ Ba wã yaa kãseng n yɩɩd Biriblã. (Zã 14:28; 1 Korẽnt dãmba 11:3) Yaa a Zeova bal n yaa “Wẽnnaam sẽn-tõe-fãa.” (Sɩngre 17:1) Woto yĩnga, a ka to ye. *

13. Biiblã rat n yeelame tɩ bõe, a sẽn yet tɩ Biriblã yaa ‘Wẽnnaam sẽn ka tõe n yã wẽnegã’?

¹³ A Zeova ne a Biribl kãsengã zĩnda ne taab yʋʋm milyaar dãmba, sẽn deng meng tɩ b nan pa naan saasã la tẽngã ye. Ad b segd n sɩd ra nonga taab sõma! (Zã 3:35; 14:31) Biribl nongrã ra wõnda a Ba wã kɛpɩ. Yaa rẽ yĩng la Biiblã sẽn yet tɩ Biriblã yaa ‘Wẽnnaam sẽn ka tõe n yã wẽnegã.’ (Kolos rãmbã 1:15) N-ye, wa biribl sẽn tõe n wõnd a ba zĩis toɛy-toɛy pʋsẽ wã, Wẽnnaam saasẽ Biriblã talla a Ba wã zʋg la a manesem.

14. Wãn to la a Zeova Biribl yɛng sẽn ka to wã wa n lebg ninsaal pag sẽn doge?

¹⁴ A Zeova Biribl sẽn ka to wã sakame n yi saasẽ n wa tẽng zug n vɩɩmd wa ninsaala. La tõe tɩ y soke: ‘Wãn to la malɛk tõe n dog n yaa ninsaala?’ Sẽn na yɩl tɩ bõn-kãngã tõog n yɩ, a Zeova maana yel-solemde. A rɩka a Biribl kãsengã sẽn da be saasẽ wã vɩɩm n tɩ ning Zʋɩf poak a Maari sẽn da pa mi raoã pʋgẽ. A Maari pa kẽ ne rao n na n dɩk pʋga ye. Yaa woto la a Maari rog biribl sẽn zems zãng tɩ b pʋd a yʋʋr t’a Zezi.—Luk 1:30-35.

15. Bõe yĩng tɩ d tõe n yeel tɩ ne a Zezi maasem, d tõe n wa bãnga a Zeova sõma n paase?

¹⁵ A Zezi sẽn da wa n be tẽng zugã, a sẽn yeel la a maan bũmb ningã sõngda tõnd tɩ d bãng-a sõma. La  sẽn yɩɩd woto menga, ne a Zezi maasem, d tõe n wa bãnga a Zeova n paase. Bõe yĩnga? Tẽeg-y tɩ Biribl kãngã wõnda a Ba wã kɛpɩ. Yaa rẽ yĩng la a Zezi sẽn yeel a karen-biig a yembr woto wã: “Ned ninga sẽn yã maam, a yãa m Ba.” (Zã 14:9) Biiblã sɛb a naasã b sẽn boond tɩ Evãnzill dãmbã, sẽn yaa Matɩe, Mark, Luk la Zã wã togsda tõnd yɛl wʋsg sẽn tɩ loe ne a Zezi Kirist vɩɩmã, a tʋʋmã la a zʋgã.

16. Sẽn tɩ yɩɩd fãa, a Zezi moona koe-bʋgo, la yɛ la a zãmsgã ra yita?

¹⁶ B ra nong n boonda a Zezi tɩ “karen-saamba.” (Zã 1:38; 13:13) Yaa bõe la a zãms nebã? Sẽn tɩ yɩɩd fãa, a ra moonda ‘Wẽnnaam soolem koe-noogã.’ Soolem kãng yaa Wẽnnaam Rĩungã bɩ saasẽ goosneema sẽn na n dɩ naam tẽngã gill zug n wa ne bark sẽn ka saab n kõ wẽn-sakdbã. (Matɩe 4:23) Ra yaa ãnd koɛɛga? A Zezi mengã yeelame: “Mam karenga ka mam dẽnd ye, yaa sẽn tʋm-a maamã rẽnda,” sẽn dat n yeel t’a Zeova rẽnda. (Zã 7:16) A Zezi ra miime t’a Ba wã ratame tɩ ninsaalbã wʋm Rĩungã koe-noogo. Sak a 8 wã pʋgẽ, d na n bãnga yɛl wʋsg n paas Wẽnnaam Rĩungã zugu, la a sẽn na n maan bũmb ninsã.

17. Zĩ-bʋs la a Zezi saag n zãms nebã, la bõe yĩng t’a modg wʋsg ne tʋʋm-kãngã?

¹⁷ Yɛ la a Zezi zãms nebã? Yaa zĩig ning fãa a sẽn yãẽ nebã, wala makre, tẽn-bɛdẽ, tẽn-bõonesẽ, tẽn-kɩremsẽ, raasẽ wã la nebã yiya. A Zezi ra pa gũud tɩ nebã wa a nengẽ ye. A ra bʋʋgd-b lame. (Mark 6:56; Luk 19:5, 6) Bõe yĩng t’a Zezi modg wʋsg woto la a rɩk sẽk wʋsg woto n moon la a zãms nebã? Yaa bũmb ning Wẽnnaam sẽn da rat t’a maanã la woto. Wakat fãa, a Zezi maana a Ba wã raabo. (Zã 8:28, 29) La bũmb a to me yĩng n kɩt t’a moon koe-noogã. A sã n da yã kʋʋngã a ra zoeta b nimbãanega. (Matɩe 9:35, 36) Tũudmã taoor dãmb n da segd n zãms nebã sɩdã Wẽnnaam la a raabã  zugu, la b ra pa maand rẽ ye. La a Zezi ra miime tɩ yaa tɩlae tɩ nebã wʋm Rĩungã koɛɛgã.

18. A Zezi zʋg-sõma bʋs la y yã tɩ bee yamleoogo?

¹⁸ A Zezi ra yaa ned sẽn da tar sũ-bʋgsem la nonglem wʋsgo. Yaa rẽ n so tɩ neb a taabã ra yã t’a pẽnegr da yaa nana, la t’a yaa nin-sõngo. Kamb meng ra nonga a zĩigẽ. (Mark 10:13-16) A Zezi ra pa bakd neb ye. A ra kisa zãmb la kɛgre. (Matɩe 21:12, 13) Rẽ wẽnd b sẽn da pa waoogd pagbã n weoogd-b wʋsgã, yẽnda yẽ ra waoogd-b lame. (Zã 4:9, 27) A Zezi sɩd ra yaa sik-m-meng soaba. Vugri, a waasa a tʋm-tʋmdbã naoa, la yaa yamb bal n da segd n tʋm tʋʋm-kãngã buudu.

19. Bõe n wilgd tɩ neb a taabã yell da paka a Zezi?

¹⁹ Neb a taabã yell da paka a Zezi. Rẽ ra pukda vẽenega, a sẽn da maagd nebã bãas ne Wẽnnaam vʋʋsem sõngã pãngã. (Matɩe 14:14) Wala makre, rao wãood sẽn da tar n wa a Zezi nengẽ n yeele: “Yãmb  sã n data yãmb tõe n maaga maam tɩ m yɩ yɩlemde.” Ra-kãngã toogã la a namsgã ra reeg n namsda a Zezi mengã. Raoã nimbãaneg yõka a Zezi t’a tẽeg a nugã n sɩɩs-a n yeele: “Mam datame. Bɩ f paam f meng n yɩ yɩlemde.” Tɩ raoã wãood be sãoogrẽ. (Mark 1:40-42) Tags-y n ges-y ra-kãngã sũurã sẽn da segd n yɩ noog to-to.

20, 21. Wãn to la a Zezi kõ mak-sõng Wẽnnaam sakrã wɛɛngẽ?

²⁰ A Zezi kõo mak-sõng sẽn ka to Wẽnnaamã sakr wɛɛngẽ. A kell n saka a saasẽ Ba wã yɛl buud toor-toor pʋgẽ, la baa ne bɛɛbã kɩɩsg la namsgã fãa. A Zezi tõog n yalsa kãn-kãe a Sʋɩtãan sẽn wa n bao n na n kʋɩɩb-a wã. (Matɩe 4:1-11) Wakat n zĩnd t’a Zezi meng roagdb kẽer da pa tẽed-a ye. B ra pʋd n yeelame meng t’a “zʋbsdame.” (Mark 3:21) La a Zezi pa kelg rẽ ye, a kell n tʋma Wẽnnaam tʋʋmdã. Baa ne tʋyã la namsgã, a Zezi  kell n yõka a menga, n pa tol n bao n na n dol a bɛɛbã wẽng ye.—1 Pɩɛɛr 2:21-23.

²¹ A Zezi kell n yɩɩ wẽn-sakd n tɩ tãag a kũumã sẽn yɩ kũ-toaag a bɛɛbã nusẽ wã. (Filip rãmba 2:8) Tags-y n ges-y toog ning a sẽn deeg a yaoolem daarã tẽng zugã. B yõk-a lame, tɩ zãmb dãmb kõ kaset ziri n dõd-a, tɩ bʋ-kaoodb sẽn yaa zãmb rãmb ning-a taale, tɩ kʋʋngã yaal-a, tɩ sodaasã nams-a ne wẽnem. B ka-a-la namsg ra-luk zugu, la a sẽn wa n na n ki wã a zẽka a koɛɛg n yeel woto: “Fãa pidsame.” (Zã 19:30, Sebr Sõngo) La a Zezi kũumã rasem a tãab-n-soaba, a saasẽ Ba wã vʋʋg-a lame t’a tõe n tɩ vɩɩmd saasẽ. (1 Korẽnt dãmba 15:44) Rasem 40 poore, a leba saasẽ, n tɩ zĩ ‘Wẽnnaam dɩtgo,’ n gũud n na n deeg Rĩungã naam.—Hebre dãmba 10:12, 13.

22. A Zezi sẽn kell n yɩ wẽn-sakd hal tɩ ta a kũumã, a paka so-bʋgo?

²² A Zezi sẽn kell n yɩ wẽn-sakd hal tɩ ta a kũumã, a paka so-bʋgo? A Zezi kũumã sɩd kɩtame tɩ d tõe n paam vɩɩm sẽn pa sat tẽng zug arzãnã pʋgẽ, wa a Zeova sẽn da rat sɩngrẽ wã. D na n goma rẽ sẽn tõe n yɩ to-to wã yell sak ning sẽn pʋgdã pʋgẽ.