Pakã poore, a Zeezi ne a karen-biisã wa n dɩka sor n debd Galɩle. B tũu Samaari. B wa n kolga tẽng b sẽn boond tɩ Sɩkaar. A Zeezi tɩ zĩnda bulg noor n na n vʋʋse. B boonda bulgã t’a Zakoob bulga. A karen-biisã kẽe tẽngã pʋg n na n da rɩɩbo.

Pag n wa bulgẽ wã n na n yãk koom. A Zeezi yeel-a lame yaa: ‘M bõos koom n yũ.’ Tɩ pagã yeel-a yaa: ‘Bõe yĩng tɩ fo gomd ne maam? Mam yaa Samaari neda. Zʋɩf-rãmbã pa gomd ne Samaari nebã ye.’ La a Zeezi leokame: ‘Fo sã n da mi mam sẽn yaa ned ninga, fo na n kosa maam tɩ m kõ-f vɩɩm koom.’ Dẽ, pagã sok-a lame: ‘Fo gomdã rat n yeelame tɩ bõe? Bala fo pa tar bũmb n na n yãk koomã ye.’ T’a Zeezi yeele: ‘Ned ning sẽn na n yũ koom ning mam sẽn kõtã, ko-yũud kõn le yõk-a ye.’ Pagã yeelame: ‘M Zu-soaba, m bõos ko-kãng wɛ.’

A Zeezi yeela pagã yaa: ‘Tɩ bool f sɩdã t’a wa.’ La pagã leokame: ‘Mam pa tar sɩd ye.’ T’a Zeezi yeele: ‘Fo sẽn yeelã yaa sɩda. Fo mara naoor a nu. La fo sẽn be ne rao ningã pa fo sɩd ye.’ La pagã yeelame: ‘Fo yaa no-rɛɛsa. Mam buudã neb yetame tɩ tõnd tog n pʋʋsa Wẽnnaam tãn-kãngã zugu. La zʋɩf-rãmbã yetame tɩ yaa Zerizalɛm bal la d tog n tɩ pʋʋs Wẽnnaam. Mam miime tɩ Mesi wã sã n wa, a na n wilga tõnd d sẽn tog n pʋʋs Wẽnnaam to-to.’ Dẽ, a Zeezi yeela pagã bũmb a sẽn da zɩ n yeel ned a to. A yeel-a lame yaa: ‘Yaa maam la Mesi wã.’

 Pagã kẽnga tẽngã pʋgẽ n tɩ togs Samaari nebã yaa: ‘M tagsdame tɩ mam yãa Mesi wã. A togsa bũmb wʋsg mam vɩɩmã zugu. Wa-y n ges-y-yã.’ B tũu pagã n wa bulgẽ wã, la a Zeezi zãms-b-la bũmb wʋsgo.

Samaari nebã kosa a Zeezi t’a pa b tẽngẽ wã. A paa be rasem a yiibu, n zãms nebã, hal tɩ wʋsg tẽ a goamã. B yeela pagã yaa: ‘Tõnd sẽn kelg raoã, d bãngame tɩ yaa yẽ n na n fãag ninsaalbã.’