Yʋʋmd 32 wã, nand tɩ Pakã ta, tʋm-tʋmdbã le gilgame n moon koɛɛgã. B sẽn lebg n wa wã, b ra yɛɛme, t’a Zeezi kɩt tɩ b kẽ batayo n loog Betsayida n na n tɩ vʋʋse. La batayo wã sẽn wa n kolgd koomã noore, a Zeezi yãa neb tusa sẽn yas n gũud-ba. A da ratame tɩ yẽ ne a tʋm-tʋmdbã vʋʋse, la baa ne rẽ, a paa ne nebã, n sãoog bãad-rãmbã la a zãms-b bũmb wʋsgo. Daarã tõre, a Zeezi sõnga nebã tɩ b bãng Wẽnnaam Rĩungã. La zĩigã sẽn wa sɩng sobgre, tʋm-tʋmdbã yeela a Zeezi yaa: ‘Kom n tog n tar nebã. Yeel-b tɩ b kẽng n tɩ bao rɩɩb n dɩ.’

A Zeezi yeela tʋm-tʋmdbã yaa: ‘Pa tɩlɛ tɩ b loog ye. Yãmb meng bao rɩɩb n kõ-ba.’ La tʋm-tʋmdbã sokame: ‘Fo ratame tɩ d kẽng n tɩ ra rɩɩb n wa kõ-b bɩ?’ A Zeezi tʋm-tʋmd a Filip yeelame: ‘Baa tõnd sã n tar ligd wʋsgo, tõnd pa tõe n paam rɩɩb sẽn na n sek nebã fãa ye.’

A Zeezi sokame: ‘Bõe la yãmb tara?’ T’a Ãndere yeele: ‘Tõnd tara bur a nu, ne zĩm-bõones a yiibu. La paooda wʋsgo.’ La a Zeezi yeelame: ‘Tall-y n wa-y ne.’ A yeela nebã tɩ b tigim taab pis-nu-nu, la koabg-koabg n zĩndi. A Zeezi rɩka burã ne zĩmã, n zẽk a neng yĩngr n pʋʋse. Rẽ poore, a rɩk n kõo a tʋm-tʋmdbã tɩ b pʋɩ nebã. Rap 5 000, n paas pagbã ne kambã rɩɩme tɩ sek-ba. Tʋm-tʋmdbã wʋka rɩɩbã sẽn kellã tɩ ra sãam ye. Pida pet 12. Yɩɩ yel-solem-kãsengã, pa sɩda?

 Yɩɩ nebã noog hal tɩ b ra rat t’a Zeezi lebg b rĩma. La a Zeezi ra miime tɩ wakat ning a Zeova sẽn yãk t’a na n lebg rĩmã nan pa ta ye. Rẽ n so t’a yeel nebã tɩ b kuili, la a yeel a tʋm-tʋmdbã tɩ b kẽ batayo n pasg Galɩle mogrã n kẽng kɩreng a to wã. B sɩd kẽeme n looge, la a Zeezi rʋʋ tãng zug yẽ a ye. Bõe yĩnga? Bala a ra rat n pʋʋsa a Ba wã. Baa nebã sã n da yaa wʋsg n wat a Zeezi nengẽ, a baooda sẽk wakat fãa n pʋʋsdẽ.