A Zeova yeelame: ‘Yãbre, sũ-sãanga, bãas la kũum pa na n le zĩnd ye. Mam na n yẽesa nintãmã fãa sẽn be nebã ninẽ wã. Bũmb nins sẽn da maand pĩnd tɩ pa sõma wã fãa na n saame.’

A Zeova ra ninga a Ãdem ne a Awa Edɛn zẽedã zĩigẽ, sẽn na yɩl tɩ b zĩnd ne laafɩ la sũ-noogo. B ra tog n saka b saasẽ Ba wã bala, la b rog kamb n pid dũniyã. La a Ãdem ne a Awa kɩɩsa a Zeova. Baa ne rẽ, a Zeova sẽn da rat bũmb ningã pa toeem ye. Seb-kãngã pʋgẽ, tõnd yãame tɩ bũmb ning fãa a Zeova sẽn yeel pidsdame. A Rĩungã na n wa kɩtame tɩ ninsaalbã paam barka, wa a sẽn da pʋlem a Abrahaamã.

Ka la bilfu, a Sʋɩtãan ne a zĩn-dãmbã la nin-wẽnsã fãa na n menemame. Neb nins fãa sẽn ketã na n tũu a Zeova. Ned pa na n le lʋɩ bãaga, ned pa na n ki ye. Daar fãa yibeoogo, d na n  nekame n tar laafɩ, tɩ d sũy noomẽ. Tẽngã gill na n lebga arzãna. Nebã na n paama zagse, la rɩ-noodo. Nebã fãa na n yɩɩ nin-sõma, n pa maand wẽng ye. We-rũmsã pa na n le zoe tõndo, tõnd me pa na n le zoe-b ye.

A Zeova sã n wa sɩng n vʋʋgd neb nins sẽn ki wã, na n yɩɩ sũ-noog tɛkẽ. Tõnd na n paam n yãa pĩnd neba, wala makre a Abɛll, a Nowe, a Abrahaam, a Saara, a Moyiiz, a Rut, a Ɛstɛɛr ne a Davɩɩde. B na n sõnga tõnd tɩ d maneg tẽngã gill t’a lebg arzãna. Tʋʋmã na n yɩɩ wʋsgo, la na n yɩɩ tʋʋm sẽn na n kõ tõnd sũ-noogo.

A Zeova ratame tɩ fo wa paam n zĩnd arzãnã pʋgẽ. Fo na n paam n bãng-a-la sõma n yɩɩd rũndã. Rẽ wã, bɩ d modg tɩ d zoodã ne a Zeova paamd pãnga, masã la wakat sẽn kõn sa.