A Zeova yeela a Zakoob t’a na n sõng-a lame, wa a sẽn sõng a Abrahaam ne a Izaakã. A Zakoob tɩ zĩnda tẽng b sẽn boond tɩ Haarã. A paama pagba, n dog kamb wʋsgo, la a lebg rakãagre.

A Zeova wa n yeela a Zakoob yaa: ‘Yik n kuil f ba-yirã.’ A Zakoob ne a zakã rãmb yikame n dɩk sore. Zĩigã zãra wʋsgo. Sorã zugu, neb n wa n yeel-a yaa: ‘Fo kinkir-taag a Ezayu n paas neb 400 n wate.’ A Zakoob yɛɛsame t’a Ezayu wat n na n zaba ne yẽ la ne a zakã rãmba. A pʋʋsa a Zeova n yeel yaa: ‘Zeova, m bõos tɩ f fãag-ma.’ Vẽkembeoogã, a Zakoob tʋma a tʋm-tʋmdb tɩ b tɩ kõ a Ezayu piisi, bʋʋse, niisi, yʋgma la bõense.

Baraar yʋngo, a Zakoob yãa malɛka. Yẽ ne malɛkã sɩnga maoore. B maoo ne taab hal tɩ beoogã vẽege. A Zakoob wa n poglame, la baa ne rẽ a kell n maoome. Malɛkã yeel-a lame yaa: ‘Bas maam tɩ m looge.’ T’a a Zakoob yeel-a yaa: ‘Ayo. Fo sã n ka ning maam barka, m pa na n bas-f ye.’

Malɛkã sɩd ninga a Zakoob barka. Kɩtame t’a Zakoob bãng t’a Zeova pa na n bas t’a Ezayu wa zab ne-a ye.

A Zakoob wa n tool n nee a Ezayu ne neb 400 sẽn wate. A Zakoob lʋɩɩ taoor t’a zakã rãmb pʋgda. A yĩgimda tẽng  naoor a yopoe n yaool n ta a Ezayu taoore. A Ezayu wudgame n sɛg-a, n mobg-a. B fãa yãbame, la b kõ taab sugri. Fo pa tagsd t’a Zakoob sẽn maanã yɩɩ a Zeova noog sɩda?

A Ezayu wa n kuilame, t’a Zakoob me rɩk a ba-yir sore. A Zakoob kom-dibli wã yaa bãmb 12. Yaa a Rubɛn, a Sɩmyõ, a Leevi, a Zida, a Dan, a Neftali, a Gaad, a Azɛɛr, a Isakaar, a Zabulõ, a Zozɛf la a Bẽnzame. A Zeova wa n tũnuga ne a Zakoob bi-ribl a ye n fãag a nebã. Yaa a Zozɛfe. Fo mii sẽn yɩ to-to bɩ? D na n bãnga rẽ taoore.