Israyɛll nebã sẽn yi Ezɩpt kiis a yiib poore, b taa Sinayi tãngẽ wã, n tilg b fu-rotã. A Zeova yeela a Moyiiz t’a rʋ tãngã. Be, a yeel-a lame yaa: ‘Mam fãaga Israyɛll nebã. B sã n sak maam la b kell n tũ mam noyã, mam na n yãk-b lame tɩ b lebg buud sẽn welg toore.’ A Moyiiz sigame n togs Israyɛll nebã a Zeova sẽn yeelã. B yeelame tɩ bõe? B yeelame yaa: ‘Tõnd na n maana bũmb nins fãa a Zeova sẽn yeel tõnd tɩ d maanã.’

A Moyiiz le rʋʋ tãngã. A Zeova yeel-a lame yaa: ‘Ka la rasem a tã, m na n goma ne foo. Yeel nebã tɩ b ra kolg tãngã ye.’ A Moyiiz sigame n yeel nebã t’a Zeova na n goma ne-ba, la tɩ b tog n segla b mense.

Rasem a tãabã daare, Israyɛll nebã yãa sawad-sablga, ne sa-yãgb tãngã zugu. B leb n wʋma saagã sẽn kelemde, la baorg peebgo. Rẽ poore, a Zeova siga tãngã zug bugum pʋgẽ. Israyɛll nebã yɛɛsame n digda. Tãngã fãa rigimdame, tɩ bug-zõos yita. Baorgã bʋʋrã ra tara yãngre. Wẽnnaam yeelame: ‘Mam yaa a Zeova. Yãmb pa tog n tũ wẽnnaam-dãmb a taab ye.’

A Moyiiz rʋʋ tãngã, t’a Zeova kõ-a noy nebã yĩnga, sẽn na yɩl tɩ b bãng b sẽn tog n tũ yẽ to-to, la b sẽn tog n vɩɩmd to-to. A Moyiiz gʋlsa noyã fãa, n wa karem tɩ Israyɛll nebã kelge. B yeelame: ‘Tõnd na n maana bũmb nins fãa a Zeova sẽn yeel tõnd tɩ d maanã.’ B yeela a Zeova tɩ b na n maana a raabã. La rẽ yĩnga, b na n sɩd maana woto bɩ?