1. Yãmb sẽn zãms seb-kãngã wã, tõe tɩ masã y sokda y meng bõe?

YÃMB sẽn zãms seb-kãngã wã, y bãnga bũmb wʋsg Biiblã pʋgẽ. Wala makre y bãngame tɩ Wẽnnaam pʋlma tõnd vɩɩm sẽn kõn sa. Y bãnga bũmb ning sẽn maand ned kũum poore, la tɩ sẽn ki-bã na n wa vʋʋgame. (Koɛɛg soaba 9:5; Luk 23:43, MN; Zã 5:28, 29; Vẽnegre 21:3, 4) Tõe tɩ y sɩngame n kẽnd a Zeova Kaset rãmbã tigissã, n kɩs sɩd tɩ yaa bãmb tũudmã la tũudum hakɩɩka. (Zã 13:35) Tõe tɩ  y sɩngame n baood Wẽnnaam zoodo. Tõe me tɩ y yãka yam n dat n maan a raabã. La tõe tɩ masã, y sokda y meng yaa: ‘Bõe la m segd n maan n tũ Wẽnnaam sõma?’

2. Bõe yĩng tɩ Etiopi raoã yãk yam n na n deeg lisgu?

² Yaa sok-kãngã buud la Etiopi rao sok-yã. A zĩnda pipi kiris-nebã wakatẽ. A Zeezi vʋʋgrã poor bilfu, a Filip sẽn yɩ a Zeezi karen-biigã moona Etiopi raoã koɛɛgã, n sõng-a t’a bãng t’a Zeezi la Mesi wã. Raoã sũur yɩɩ noog wʋsg ne a sẽn bãng bũmb ninsã, hal t’a yeel zĩig pʋgẽ yaa: “Ad koom, bõe n gɩdg maam ne koom lisgu?”—Tʋʋmã 8:26-36.

3. a) A Zeezi kõo a karen-biisã noor tɩ b maan bõe? b) Wãn to la b lisd neda?

³ Biiblã wilgda vẽeneg tɩ d sã n dat n tũ a Zeova, d segd n deega lisgu. A Zeezi yeela a karen-biisã yaa: “Bɩ y kẽng n maan nebã buud fãa tɩ yɩ mam karen-biisi, n lis bãmb.” (Matye 28:19) A Zeezi mengã reega lisgu, n kõ mak-sõngo. B pa yãk koomã n mes a zugã ye. B lis-a-la koomã pʋgẽ zãnga. (Matye 3:16) Rũndã-rũndã me, ned sã n dat n lebg kiris-neda, b lisd-a-la koomã pʋgẽ zãnga.

4. Y sã n deeg lisgu, bõe la y wilgd neb a taabã?

⁴ Ned sã n deeg koom lisgu, a wilga nebã taoor t’a sɩd ratame n yɩ Wẽnnaam zoa, n maan a raabã. (Yɩɩn-sõamyã 40:8, 9) La tõe tɩ y sokda y meng yaa: “Bõe la m segd n maan n tõog n deeg lisgu?”

5. a) Bõe la y segd n deng n maan n tõog n deeg lisgu? b) Bõe yĩng tɩ y tog n kẽnd a Zeova Kaset rãmbã tigissã?

⁵ Nand tɩ y tõog n deeg lisgu, y segd n deng n  bao n bãnga a Zeova ne a Zeezi sõma. Y sẽn zãmsd Biiblã, y zoe n sɩnga rẽ maanego. (Karm-y Zã 17:3.) La rẽ bal pa sek ye. Biiblã yetame tɩ y segd n ‘pidsa y sũyã ne bãmb daabã bãngre.’ (Koloos-rãmbã 1:9) A Zeova Kaset rãmbã tigissã na n sõng-y lame tɩ y zoodã ne a Zeova pãng paase. Woto yaa bʋʋm sẽn kɩt tɩ y tog n kẽnd tigissã n pa vaandẽ ye.—Ebre-rãmbã 10:24, 25.

6. Y sã n dat n deeg lisgu, y Biiblã bãngr tog n taa zĩ-bʋgo?

⁶ A Zeova pa baood tɩ y bãng sẽn be Biiblã pʋgẽ wã fãa n yaool n deeg lisg ye. A pa bao tɩ Etiopi raoã bãng bũmb fãa n yaool n deeg lisg ye. (Tʋʋmã 8:30, 31) Tõnd pa tol n tõe n bãng Wẽnnaam n sa ye. (Koɛɛg soaba 3:11) La y sã n dat n deeg lisgu, bũmb kẽer n be Biiblã pʋgẽ tɩ y tog n deng n bãng la y sak n deeg tɩ yaa sɩda.—Ebre-rãmbã 5:12.

7. Yãmb sẽn zãmsd Biiblã, wãn to la sõng-yã?

⁷ Biiblã yetame: “Tẽeb sã n kaẽ, ned ka tõe n ta Wẽnnaam yam ye.” (Ebre-rãmbã 11:6) Dẽnd d sã n dat n deeg lisgu, tẽeb yaa tɩlɛ. Biiblã yeelame tɩ Korẽnt tẽngã neb kẽer sẽn wʋm a Zeezi karen-biisã sẽn zãmsd nebã bũmb ninsã, b “tẽeme n paam koom lisgu.” (Tʋʋmã 18:8) Biiblã zãmsgã sõnga yãmb me tɩ y tẽed Wẽnnaam pʋlemsã, la kɩt tɩ y kɩs sɩd t’a Zeezi sẽn ki tɩ yɩ maoongã, d tõe n paama d meng ne yel-wẽnã la kũumã.—Zozoe 23:14; Tʋʋmã 4:12; 2 Tɩmote 3:16, 17.

8. Bõe n na n kɩt tɩ y rat n togs neb a taabã bũmb ning y sẽn bãngã?

⁸ Yãmb sã n wɩng ne Biiblã zãmsgo, n yã rẽ sẽn  sõngd yãmb to-to wã, y tẽebã pãng na n paasame. Rẽ na n kɩtame tɩ y rat n togs neb a taabã bũmb ning y sẽn bãngã. (Zeremi 20:9; 2 Korẽnt-rãmbã 4:13) Ãnd dãmb la y na n togse?

9, 10. a) Ãnd dãmb la y tõe n togs y sẽn zãms n bãng bũmb ningã? b) Y sã n dat n naagd tigingã neb n moondẽ, bõe la y segd n maane?

⁹ Tõe tɩ y ratame tɩ y zakã rãmba, y zo-rãmba, y yags la y tʋmd-n-taas bãng yãmb sẽn mi wã. Woto yaa yam-sõngo, la y segd n maana rẽ ne waoogr la nonglem. Tarẽ-n-tarẽ, y na n wa tõog n naagda tigingã neb n moondẽ. Yãmb sã n wa tagsd tɩ y seglame n sa, bɩ y togs sẽn zãmsd-a yãmb Biiblã tɩ y ratame n naag tigingã neb n moone. A sã n tagsd tɩ y sɩd tõeeme, la tɩ y tũuda Biiblã noyã, tigingã kãsem-dãmb a yiib n na n wa sõs ne yãmb y yiibã n gese.

¹⁰ Bõe yell la kãsem-dãmb a yiibã na n wa sõs ne-yã? B na n bao n bãnga yãmb sã n wʋmda Biiblã zãmsg kẽer võor sõma, la y sã n sak n deegame. B leb n na n bao n bãnga y sã n tũuda Biiblã sẽn yetã, la y sã n sɩd ratame n lebg a Zeova Kaset soaba. Tẽeg-y tɩ kãsem-dãmbã geta tigingã neb fãa yelle. Yãmb me naagame. Y segd n goma ne-b n da yɛɛs ye. (Tʋʋmã 20:28; 1 Pɩyɛɛr 5:2, 3) Sõsgã poore, b na n wa togsa yãmb y sã n tõe n naagda tigingã neb masã n moondẽ.

11. Bõe yĩng tɩ y segd n toeem bũmb kẽer n yaool n tõog n naag tigingã neb n moondẽ?

¹¹ La tõe tɩ kãsem-dãmbã na n wa yeel-y lame tɩ bũmb kẽer la y segd n maneg n paase, n yaool n  tõog n yit ne tigingã neb n moondẽ. Bõe yĩng tɩ y segd n maan wa b sẽn na n yeel-yã? Bala ned sã n gomd a Zeova yell ne neb a taabã, a yaa a Zeova Kaset soaba, tɩ rẽ kɩt t’a segd n modg t’a vɩɩmã ta a Zeova yam.—1 Korẽnt-rãmbã 6:9, 10; Galat-rãmbã 5:19-21.

12. Bõe yĩng tɩ ned buud fãa tog n tek yam n kos Wẽnnaam sugri?

¹² Bũmb a to me la y segd n maan n yaool n tõog n deeg lisgu. Tʋm-tʋmd a Pɩyɛɛr yeelame yaa: ‘Tek-y yam n kos sugri tɩ Wẽnnaam tõe n yẽes y yel-wẽnã.’ (Tʋʋmã 3:19) Tek yam n kos sugr rat n yeelame tɩ bõe? Rat n yeelame tɩ f sũur sãama wʋsgo, yel-wẽn nins f sẽn da maanã yĩnga. Wala makre, ned sã n da yoodame, yaa tɩlɛ t’a tek yam n kos sugri. La baa ned sã n da modgdame n maand sẽn yaa tɩrga, yẽ me tog n teka yam n kos Wẽnnaam sugri, bala ned buud fãa maanda yel-wẽna.—Rom-dãmbã 3:23; 5:12.

13. “Tek-y yamã” rat n yeelame me tɩ bõe?

¹³ Y sũur sã n sãam ne yel-wẽn y sẽn da maan bala sekame bɩ? Ayo. A Pɩyɛɛr sẽn yeel tɩ ‘tek-y yamã’ rat n yeelame me tɩ d bas minund la manesem-wẽnsã d sẽn tare, la d maan sẽn yaa tɩrga. Wala makre, yãmb sã n dɩk sor n debd zĩig y sẽn zɩ n kẽnge, n wa bãng tɩ y bʋdgame n bas so-sõngã, bõe la y na n maane? Y na n lebgame n tɩ rɩk so-sõngã. Woto me, y sẽn zãmsd Biiblã, tõe tɩ y wa n yãame tɩ bũmb kẽer la y segd n base. Y segd n sak n ‘teka yam,’ rat n yeel tɩ n toeeme, n bas rẽ fãa la y maan sẽn yaa tɩrga.

14. Rɩk f meng n kõ Wẽnnaam rat n yeelame tɩ bõe?

¹⁴ Bũmb a to me sẽn tar yõod la y segd n maan n yaool n deeg lisgu. Y tog n dɩka y meng n kõ a Zeova. Woto rat n yeelame tɩ y segd n pʋʋsa a Zeova, n yeel-a tɩ masã tɛka, y na n tũu yẽ a ye tãa, la y lʋɩɩs a raabã taoor y vɩɩmã pʋgẽ.—Tõodo 6:15.

15, 16. Bõe n kɩtd tɩ ned rɩk a meng n kõ a Zeova?

¹⁵ Yãmb sã n pʋlem tɩ y na n tũu a Zeova, yaa wa y sẽn pʋlem ned y sẽn nong tɩ y na n zĩnda ne-a y yõor tɛka. Yaa wa rao ne pag sẽn magd n dat n kẽ kãadem. Raoã sã n yã tɩ pagã tara zʋg-sõma, a na n nong-a lame n dat n kẽ kãadem ne-a. Yaa sɩd tɩ kãadem pa reem yell ye. La a sẽn nong pagã yĩnga, a na n sakame.

¹⁶ Yãmb sã n bãng a Zeova sõma, y na n nong-a lame, n dat n maan y sẽn tõe fãa n tũ-a. Woto na n kɩtame tɩ y yeel-a pʋʋsg pʋgẽ tɩ y na n maana a raabã. Biiblã yeelame tɩ ned sã n dat n tũ a Zeezi, a segd n ‘kɩɩsa a mengã raabo.’ (Mark 8:34) Woto rat n yeelame tɩ bõe? Rat n yeelame tɩ y vɩɩmã pʋgẽ, a Zeova la y tog n sak n yɩɩda. A Zeova sẽn datã n tar yõod n yɩɩd yãmb raabã la y magbã fãa.—Karm-y 1 Pɩyɛɛr 4:2.

17. Bõe yĩng tɩ neb kẽer yɛɛsd n pa rat n dɩk b meng n kõ a Zeova?

¹⁷ Neb kẽer yɛɛsdame n pa rat n dɩk b meng n kõ a Zeova ye. B tagsdame tɩ b pa na n tõog n tũ-a wa b sẽn pʋlmã ye. Tõe tɩ yaa b sẽn yɛɛsd b na n wa pa tõog tɩ sãam a Zeova sũurã. Tõeeme me tɩ b  tagsdame tɩ b sã n pa rɩk b meng n kõ a Zeova, a pa tõe n ning-b taal b tʋʋm-tʋmdɩ wã yĩng ye.

18. Y sã n yɛɛsd y na n wa maan bũmb n sãam a Zeova sũuri, bõe n na n sõng-yã?

¹⁸ Y sã n nong a Zeova, y pa na n yɛɛsd y na n wa maan bũmb tɩ sãam a sũur ye. Yãmb sẽn nong-a wã yĩnga, y na n maana y sẽn tõe fãa n pids y pʋlengã. (Koɛɛg-soaba 5:3; Koloos-rãmbã 1:10) Y pa na n tags t’a Zeova raabã maaneg yaa toog ye. Tʋm-tʋmd a Zã yeelame: “Nong Wẽnnaam yaa tɩ sak bãmb tõodã. La bãmb tõodã ka toog ye.”—1 Zã 5:3.

19. Bõe yĩng tɩ y segd n dɩk y meng n kõ a Zeova n da zoe rabeem?

¹⁹ A Zeova pa gũud tɩ y zems zãng n yaool n dɩk y meng n kõ-a ye. A zɩ n kos tõnd d sẽn pa tõe ye. (Yɩɩn-sõamyã 103:14) A na n sõng-y lame tɩ y tõog n maan sẽn yaa tɩrga. (Ezayi 41:10) Teeg-y-yã a Zeova ne y sũur fãa, t’a ‘na n manega y soayã.’—Yel-bũnã 3:5, 6.

20. Yãmb sã n dɩk y meng n kõ a Zeova, bõe n pʋgde?

²⁰ Yãmb tagsdame tɩ y segl n saame n na n dɩk y meng n kõ a Zeova bɩ? Yãmb sã n dɩk y meng n kõ a Zeova, bũmb a to la y tog n maan rẽ poore. Y tog n deega koom lisgu.

21, 22. Wãn to la y tõe n kõ kaset zãma wã taoor tɩ y tara tẽebo?

²¹ Togs-y y tigingã kãsem-dãmbã sull yel-gɛtã tɩ y rɩka y meng n kõ a Zeova, la y rat n deega lisgu. A na n gesame tɩ kãsem-dãmb wa sõs ne-yã. Y na n sõsa Biiblã zãmsg kẽer zugu. B sã n mik tɩ yell ka be, b na n togs-y lame tɩ y tõe n deega lisg a Zeova  Kaset rãmbã tigs-kãseng ning sẽn watã sasa. Tigs-kãsengã sasa, b na n wɛgsa sõsg sẽn gomd lisgã yelle. Sõsdã na n wa kosa sẽn dat-b n deeg lisgã fãa tɩ b leok sogsg a yiibu. Yãmb sã n leoke, y kõo kaset zãma wã taoor tɩ y tara tẽebo.—Rom-dãmbã 10:10.

²² Rẽ poor masã la yãmb na n deeg  lisgã. B na n lisa yãmb koom pʋgẽ zãnga. Woto na n kɩtame tɩ nebã fãa bãng tɩ y rɩka y meng n kõ a Zeova, la tɩ rẽ tɛka, y lebga a Zeova Kaset soaba.

23. Reeg lisg “ne Ba, la Bi-ribla, la Sɩɩg-sõng yʋʋr” rat n yeelame tɩ bõe?

²³ A Zeezi yeelame tɩ yẽ karen-biisã na n deega lisg “ne Ba, la Bi-ribla, la Sɩɩg-sõng yʋʋre.” (Karm-y Matye 28:19.) Woto rat n yeelame tɩ bõe? Rat n yeelame tɩ y sak n deegame t’a Zeova la yĩngr la tẽng naaba, tɩ y mii tʋʋmd ning a Zeezi sẽn tar Wẽnnaam daabã pidsg pʋgẽ wã, la Wẽnnaam sẽn pidsd a raabã ne a vʋʋsem sõngã maasem to-to.—Yɩɩn-sõamyã 83:19; Matye 28:18; Galat-rãmbã 5:22, 23; 2 Pɩyɛɛr 1:21.

24, 25. a) Lisgã makda bõe? b) Yaoolem sakã pʋgẽ, bõe yell la d na n gome?

²⁴ Lisgã makda bũmb sẽn tar yõod wʋsgo. B sã n lis yãmb koomẽ wã, makda y sẽn ki, y pĩnd tʋʋmã yĩnga, rat n yeel tɩ y basa y pĩnd tʋʋmã. Y sã n puki, yaa y sẽn lebg n na n vɩɩmd tɩ zems ne Wẽnnaam raabã. Wilgdame tɩ rẽ tɛka y na n tũu a Zeova. Tẽeg-y me tɩ yaa a Zeova la y sẽn dɩk y meng n kõ wã, pa ninsaal bɩ siglg wall tʋʋmd ye.

²⁵ Yãmb sã n deeg lisgu, na n sõng-y lame tɩ y zoodã ne a Zeova pãng paase. (Yɩɩn-sõamyã 25:14) La ned sã n deeg lisgu, pa wilgd tɩlɛ t’a na n paama fãagr ye. Tʋm-tʋmd a Poll yeelame: “Bɩ y tʋm fãagrã tʋʋm ne rabeem la rigbu.” (Filip-rãmbã 2:12) Lisgã yaa sɩngr bala. La y na n maana wãn tɩ yãmb ne a Zeova zoodã kell n tall pãng wakat fãa? Yaoolem sakã pʋgẽ la d na n leok sok-kãngã.