1, 2. Bõe la y segd n sok y menga, la bõe yĩng tɩ rẽ tar yõodo?

BIIBLÃ zãmsgã sõnga yãmb tɩ y bãng tɩ neb wʋsg yetame tɩ b tũuda Wẽnnaam, la b tʋʋmã ne b zãmsgã yaool n pa noom-a ye. (2 Korẽnt-rãmbã 6:17) Rẽ n so t’a Zeova yeel tɩ d yi n bas ziri tũudmã, bɩ “Babilond kãsengã.” (Vẽnegre 18:2, 4) Bõe la yãmb na n maane? Ned fãa n yãkde. Y tog n soka y meng yaa: ‘Mam dat n tũu a Zeova wa a sẽn datã bɩ, bɩ m na n kell n maanda wa m sẽn sɩng n maandẽ wã?’

² Yãmb sã n basa y pĩnd tũudmã, bɩ y gʋlsa lɛtr n wilg tɩ y pa le be be, y segda ne pẽgre. La tõeeme tɩ tũudmã yel-maandɩ pa rẽ bɩ a bũmb kẽer n ket n noom yãmba. Bɩ d gom yel-maandɩ a wãn yelle, la d ges bũmb ning sẽn kɩt t’a Zeova rat tɩ d zãag d mens ne rẽ wã.

3. a) Bõe yĩng tɩ yaa toog ne neb kẽer tɩ b bas yimaas-rãmbã tall n pʋʋsã? b) Bõe la Biiblã yet yimaas-rãmbã tall n pʋʋsã wɛɛngẽ?

³ Na maan yʋʋma, neb kẽer tũnuga ne yimaas-rãmb n pʋʋsdẽ, bɩ b tar tẽn-kug b zagsẽ n kʋʋd maando. Yãmb sã n da maanda woto, tõe tɩ y tagsdame tɩ y sẽn pa le tũnugd ne rẽ n pʋʋsdẽ wã pa zems ye. La tẽeg-y tɩ yaa a Zeova n wilgd tõnd a sẽn dat tɩ d tũ-a to-to. Biiblã yeta tõnd vẽeneg tɩ Wẽnnaam pa rat tɩ d tall yimaas-rãmb n pʋʋs-a ye. —Karm-y Yikr 20:4, 5; Yɩɩn-sõamyã 115:4-8; Ezayi 42:8; 1 Zã 5:21.

4. a) Bõe yĩng tɩ d pa segd n waoog d yaab-rãmbã sẽn ki wã wa Wẽnnaam? b) Bõe yĩng t’a Zeova yeel a nin-buiidã tɩ b ra bao n na n gom ne sẽn ki-bã?

⁴ Neb kẽer rɩkda b pãngã, b sẽk la b ligd n maand bũmb wʋsg n dat n noog b yaab-rãmbã sẽn ki wã sũyã. Sãnda pʋd n waoogd-b-la wa Wẽnnaam. D yãame tɩ sẽn ki-bã pa tõe n sõng tõnd bɩ n maan-d wẽng ye. B pa tɩ vɩ zĩig a to ye. Y sã n bao n na n gom ne yaab-rãmbã yaa yelle, bala yaa zĩn-dãmb yɛla. Yaa rẽ n kɩt t’a Zeova ra gɩdg Israyɛll nebã tɩ b ra bao n gom ne sẽn ki-bã, bɩ n maan bũmb sẽn na n kẽes-b zĩn-dãmb yɛlẽ wã.—Tõodo 18:10-12; ges-y Vẽnegr 25 ne 30 wã.

5. Bõe n tõe n sõng yãmb tɩ y bas yimaas-rãmbã tall n pʋʋsã, la rog-n-mik tũudmã yɛla?

⁵ Bõe n tõe n sõng yãmb tɩ y bas yimaas-rãmbã tall n pʋʋsã, la rog-n-mik tũudmã yɛla? Yaa y sẽn na n karem Biiblã la y tags a Zeova sẽn yeel bõn-kãens wɛɛngẽ wã. A Zeova yeelame tɩ yaa bũmb a sẽn kisi. (Tõodo 27:15) Pʋʋs-y-yã a Zeova daar fãa n kos-a t’a sõng-y tɩ y kisg bũmb nins a sẽn kisã, n tõog n tũ-a wa a sẽn datã. (Ezayi 55:9) Y tõe n kɩsa sɩd t’a Zeova na n kõo yãmb pãng tɩ y tõog n zãag y meng fasɩ ne bũmb nins fãa tũudum nins sẽn pa tat a yamã sẽn maandã.

6. Bõe yĩng tɩ b yãk yʋʋm-sar kiuug rasem 25 wã n tẽegd a Zeezi rogmã?

⁶ Nowɛllã yaa kibs nebã fãa la bal sẽn mi. B tagsdame tɩ yaa a Zeezi rogmã tẽegr kibsa. Yaool n  yaa ziri tũudum kibsa. Sebr a yembr wilgame tɩ Rom tẽngã neb nins sẽn da pʋʋsd wẽn-naandsã ra maanda wĩntoogã rogem daar tẽegr kibs yʋʋm-sar kiuugã rasem 25 wã. Egiliizã taoor dãmb ra ratame tɩ neb wʋsg sẽn da pʋʋsd wẽn-naands tuub n lebg kiris-neba. Rẽ n so tɩ b kell n yãk yʋʋm-sar kiuugã rasem 25 wã n tẽegd a Zeezi rogmã, baa sẽn pa a rogem daarã. (Luk 2:8-12) A Zeezi karen-biisã pa maan Nowɛll ye. Sebr a yembr yeelame tɩ “yʋʋm 200 wã sẽn pʋgl Kiris rogmã, ned baa a ye ra pa mi a Zeezi sẽn dog daar ningã, wʋsg toog meng ra kae ne rẽ ye.” Yaa yʋʋm kobs a Zeezi sẽn loog saasẽ wã poor la nebã yaool n sɩng n maand Nowɛllã.

7. Bõe yĩng tɩ kiris-neb hakɩɩkã pa maand Nowɛllã?

⁷ Neb wʋsg miime tɩ nebã sẽn noogd b yõor la b kõt taab kũun Nowɛllã sasa wã, n paas a yel-maandɩ a taabã yita sẽn da pʋʋsd-b wẽn-naandsã nengẽ. Rẽ n so tɩ Ãngeletɛɛr tẽngã ne Amerik tẽns sãnda pʋsẽ, b ra tolg n gɩdga Nowɛllã. Ned sã n da kɩɩs n maan Nowɛllã, b sɩbgda a soaba. La tarẽ-n-tarẽ, nebã le wa n sɩngame. Bõe yĩng tɩ kiris-neb hakɩɩkã pa maand Nowɛllã? Bala b ratame tɩ b sẽn maandã fãa ta Wẽnnaam yam.

8, 9. Bõe yĩng tɩ pipi kiris-nebã pa maan rogem tẽegr kibsa?

⁸ Kibs a to neb wʋsg sẽn maand yaa rogem tẽegr kibsã. Kiris-ned tog n maanda rẽ bɩ? Biiblã goma neb sẽn maan kibs n tẽeg b rogem daare, la yaa neb sẽn da pa tũud a Zeova. (Sɩngre 40:20; Mark 6:21) Nebã ra maanda rogem tẽegr kibsa, n na n pʋʋs wẽn- faado. Sebr a yembr pʋgẽ, b yeelame tɩ pipi kiris-nebã “ra miime tɩ ned rogem tẽegr kibs yaa minung sẽn yit sẽn tũud-b wẽn-faadã nengẽ.”

⁹ Pĩnd wẽndẽ wã, Rom-dãmbã ne Gɛrk-rãmbã ra tẽedame tɩ kinkirg n wat biig fãa rogmẽ, n na n gũ biigã a yõor tɛka. Sẽn da pa-b kiris-nebã ra maanda rogem tẽegr kibsa, bala b ra tẽedame tɩ na n kɩtame tɩ kinkirgã gũ a soabã.

10. Bõe yĩng tɩ kiris-nebã pa maand rogem tẽegr kibsa?

¹⁰ Yaa vẽeneg t’a Zeova pa nong kibsa, sẽn da pʋʋsd-b wẽn-faadã sẽn da maand ye. (Ezayi 65:11, 12) Rẽ n so tɩ tõnd me pa maand rogem tẽegr kibsa, bɩ kibs buud fãa sẽn pʋʋsd-b wẽn-faadã sẽn da maand ye.

11. Bõe yĩng tɩ neb kẽer maand tiga? Bõe n segd n tall yõod ne yãmb n yɩɩda?

¹¹ Neb kẽer miime tɩ Nowɛllã ne tig a taab sɩnga ne sẽn da pʋʋsd-b wẽn-faadã, la b ket n maandẽ. B tagsdame tɩ yaa segb bal b sẽn paamd n tõe n tigim ne b zakã rãmba. Yãmb me tagsda woto bɩ? Zak rãmb sã n dat n mi n tigimd taaba, pa wẽng ye. Yaa a Zeova n lugl zaka. Yẽ meng ratame tɩ zems-n-taar zĩnd zakã neb sʋka. La d sẽn na n modg n bao zood sõma ne a Zeova n tar yõod n yɩɩd d sẽn na n maand kibs sẽn pa tat a yam, d sẽn dat n noog d zakã neb sũy yĩnga. Rẽ n so tɩ tʋm-tʋmd a Poll yeele: “Mak-y n bãng-y bũmb nins sẽn tat Zu-soabã yam.”—Efɛɛs-rãmbã 5:10.

12. Kibs-bʋs buud la a Zeova kisa?

 ¹² Neb wʋsg tagsdame tɩ pa tar yõod tɩ d bao n bãng kibs fãa sẽn sɩng to-to ye. La ne a Zeova tara yõodo. A kisa kibs nins fãa sẽn tik pĩnd wẽndẽ ziri tũudmã yɛl zutã, bɩ kibs b sẽn maand n kilsd ninsaal wall tẽngã. Wala makre, Ezɩpt nebã ra maanda kibs ka tɛk b wẽn-faadã yĩnga. Israyɛll nebã sẽn wa n yi Ezɩptã, Ezɩpt nebã kibs a ye la b togs n maane, n pʋd-a tɩ “tigr Sẽn-Ka-Saab waoogr yĩnga.” La a Zeova sɩbg-b-la rẽ yĩnga. (Yikri 32:2-10) Wa no-rɛɛs a Ezayi sẽn yeelã, tõnd pa segd n ‘sɩɩs bũmb sẽn yaa rẽgd ye.’—Karm-y Ezayi 52:11.

13. Y sã n yãk yam n pa na n le maan tigri, tõe tɩ y sok y meng bõe?

¹³ Y sã n yãk yam n pa na n le maan tigri, tõe tɩ y na n soka y meng yaa: M tʋmd-n-taasã sã n sok maam m sẽn pa maand Nowɛllã võore, m na n leokame tɩ bõe? Ned sã n kõ maam kũun Nowɛllã yĩnga, m maanda wãna? M pagã bɩ m sɩdã sã n dat tɩ m maan kibs sẽn pa noom Wẽnnaam, m maanda wãna? M kambã sã n wa neẽ tɩ b taabã maanda tigr bɩ rogem tẽegr kibsa, bõe la m tõe n maan n sõng-b tɩ b sũy ra sãame?

14, 15. Ned sã n pʋʋs-y ne y taab wall a kõ-y kũun kibs yĩnga, y maanda wãna?

¹⁴ Rẽnda ned fãa tall yam n bãng a sẽn na n leok nebã to-to, la a sẽn na n maaneg yel-kãensã fãa pʋsẽ. Wala makre, ned sã n pʋʋs-y ne y taabo, y pa segd n maan y toog kae ye. Y tõeeme bal n pʋʋs-a barka. La ned sã n wa rat n bãng bũmb ning sẽn kɩt tɩ y pa maand kibsa, y tõe n maaga y yĩng n wilg-a.  Gũus-y ne y goamã, n da wa paoog ned ye. Biiblã yetame: “Kɩt-y tɩ yãmb goam tall bark wakat fãa n tar yamsem noom, tɩ yãmb na bãng y sẽn tog n leok ned kam fãa to-to tɩ zemse.” (Koloos-rãmbã 4:6) Y tõe n wilga vẽeneg tɩ y mi n tigma ne neb n maan sũ-noogo, y mi n kõta nebã kũun me, la y pa rat n maand rẽ kibs yĩng ye.

¹⁵ Ned sã n kõ-y kũun kibs yĩnga, y na n maana wãna? Biiblã pʋgẽ, b pa wilg noy d sẽn segd n tũ rẽ wɛɛngẽ ye. La d tog n modgame n tall sũur-kaset sẽn yaa sõma. (1 Tɩmote 1:18, 19) Tõeeme tɩ sẽn kõ-a yãmb kũunã pa mi tɩ yãmb pa maand kibsã ye. Bɩ tõe t’a yeele: “Mam miime tɩ fo pa maand kibsã, la m datame bal n kõ-f kũuni.” Sẽn yaa a soab fãa, yãmb n yãkd y sã n na n saka kũunã bɩ y na n zãgsame. La y yãkrã poore, y sũurã pa tog n ning-y taal ye. D pa rat n maan bũmb sẽn na n sãam d zoodã ne a Zeova ye.

16. Y zakã rãmb sã n dat n maan tigri, bõe la y segd n maane?

¹⁶ Y zakã rãmb sã n dat n maan tigri, bõe la y segd n maane? Y pa segd n maan tɩ lebg zabr ye. Tẽeg-y tɩ b tara sor n na n yãk b sẽn date. Waoog-y-ba, wa yãmb me sẽn dat tɩ b waoog-yã. (Karm-y Matye 7:12.) La y zakã rãmb sã n dat tɩ y wa naag-b tigrã sasa, y maanda wãna? Nand tɩ y yãk y sẽn na n maanega, pʋʋs-y-yã a Zeova, n kos-a t’a sõng-y tɩ y maan sẽn segde. Tags-y yellã zug neere, la y gẽes d sɛbã pʋgẽ tɩ y na n bãnga y sẽn tõe n maane. Y pa segd n yĩm tɩ y sẽn dat yaa y maan sẽn tat a Zeova yam ye.

17. Y kambã sã n wa neẽ tɩ b taabã maanda tiga, bõe la y tõe n maan n sõng-b tɩ b sũy ra sãame?

 ¹⁷ Bõe la y tõe n maan n sõng y kambã, b sã n wa neẽ tɩ b taabã maanda tig tɩ bãmb pa maandẽ? Y tõe n mi n yãka wakat n maan kibs buud y kambã yĩnga. Y tõeeme me n mi n kõ-b kũuni. La y sẽn tõe n kõ y kambã tɩ naf-b n yɩɩd kũun buud fãa, yaa y sẽn na n baood sẽk n sõsd ne-ba, la y wilgd-b tɩ y nong-b lame.

18. Bõe yĩng tɩ d tog n kẽnd tigissã?

¹⁸ D sã n dat n ta a Zeova yam, d tog n laka d mens ne ziri tũudmã, a minundã la a tigã fãa. D togame me n sak tũudum hakɩɩkã. Rẽ baoodame tɩ d maan bõe? Pipi, d tog n kẽnda a Zeova Kaset rãmbã tigissã n pa vaandẽ ye. (Karm-y Ebre-rãmb 10:24, 25.) Tigissã tara yõod wʋsg tũudum hakɩɩkã pʋgẽ. (Yɩɩn-sõamyã 22:23; 122:1) D sã n tigimd taaba, d paamd n kenga taab raoodo.—Rom-dãmbã 1:12.

19. Bõe yĩng tɩ y segd n wilg neb a taabã bũmb nins y sẽn zãms Biiblã pʋgẽ wã?

¹⁹ Bũmb a to me y sẽn na n maan n wilg tɩ y lebga tũudum hakɩɩkã ned yaa y sẽn na n wilgd neb a taabã y sẽn zãms bũmb ning Biiblã pʋgẽ wã. Dũniyã sẽn pid ne tʋʋm-wẽnsã sãamda neb wʋsg sũyã. Tõe tɩ yãmb meng mii neb sũy sẽn sãam rẽ yĩnga. Wilg-y-b tɩ beoog na n yɩɩ neere. Y sã n kẽnd tigissã, la y wilgd neb a taabã Biiblã sẽn yetã, y yam pa na n le be ziri tũudmã yɛl ye. Y sã n yãk yam n tũ a Zeova neere, y tõe n kɩsa sɩd tɩ y na n paama sũ-noogo, la t’a na n ninga y modgrã barka.—Malasɩ 3:10.