1, 2. Ne yãmba, bõe yĩng tɩ d sẽn paam n tõe n pʋʋs a Zeova wã yaa bark menga? Bõe yĩng tɩ d segd n bãng Biiblã sẽn yet pʋʋsgã wɛɛngẽ?

A ZEOVA sẽn yaa bũmb fãa Naandã sã n get ninsaalbã fãa sẽn naag taabã, yaa wa koom sẽn tosge. (Yɩɩn-sõamyã 115:15; Ezayi 40:15) La baa ne tõnd sẽn pa zem baa fʋɩ wã, Yɩɩn-sõamyã 145:18, 19 yetame: “Sẽn-Ka-Saab pẽe ne neb nins sẽn boond bãmbã, b pẽe neb nins sẽn boond bãmb ne sɩdã. Sẽn-Ka-Saab pidsda sẽn zoet-b bãmbã ratem. B sã n bool-b n kos sõngre, bãmb wʋmdame n wa sõng-ba.” Ad yaa zu-zẽkr tɛkẽ! A Zeova sẽn yaa bũmb fãa naanda, la a yaa pãng sẽn ka to soabã ratame n pẽneg tõndo, la a rat me n kelg d pʋʋsgo. D sẽn paam n tõe n pʋʋs a Zeova wã yaa bark meng-menga. Yaa wa kũun a sẽn kõ tõnd ned kam fãa.

² La yaa d sã n pʋʋs a Zeova wa a sẽn datã bal la a na n sak n kelg-do. Wãn to la d segd n pʋʋs-a? D ges Biiblã sẽn yet bũmb ning pʋʋsgã wɛɛngẽ.

3. Bõe yĩng tɩ y segd n pʋʋs a Zeova?

³ A Zeova ratame tɩ y gomd ne-a, n pʋʋsd-a. Bõe n wilgd rẽ? Karm-y Filip-rãmb 4:6, 7. Maag-y y yĩng n tags gomdã zugu. Yãmb yell paka ãndũniyã fãa  Naandã, t’a rat tɩ y togsd-a y zu-loeesã, la bũmb nins sẽn be y sũurẽ wã.

4. Yãmb sã n minim n pʋʋsd a Zeova, a yõodã yaa bõe?

⁴ Pʋʋsgã sõngda tõnd tɩ d lebg a Zeova zoa meng-menga. Neb sẽn yaa zood sã n nong n sõsda, tɩ ned fãa togsd a to wã a sẽn tagsde, a yel-pakre, a sũ-sãang la a sũ-noogo, b zoodã pãng paasdame. Pʋʋsgã me paasda tõnd ne a Zeova zoodã pãnga. Ne Biiblã maasem, a Zeova togsda yãmb a raabã, sẽn noom-a la sẽn pa noom-a, la a sẽn na n wa maane. Y tõe n goma ne-a, n pelg y pʋg n togs-a sẽn be y sũurẽ wakat buud fãa. Rẽ, yãmb zoodã ne-a na n talla pãng wʋsgo.—Zak 4:8.

5. Bõe n wilgd t’a Zeova pa kelgd pʋʋsg fãa?

⁵ A Zeova kelgda pʋʋsg fãa bɩ? Ayo. No-rɛɛs a Ezayi wakatẽ wã, a Zeova yeela Israyɛll nebã yaa:  “Baa ne yãmb sẽn pʋʋsd n yɩlemdẽ wã, mam ka kelgd ye. Yãmb nusã pida ne zɩɩm.” (Ezayi 1:15) Dẽnd d sã n pa gũusi, d tõe n wa maana yɛl kẽer sẽn na n kɩt tɩ d zãagd d mens ne a Zeova.

6. Bõe yĩng tɩ d segd n tẽ a Zeova? Bõe la d tõe n maan n wilg tɩ d tẽeda a Zeova?

⁶ D sã n dat t’a Zeova kelgd d pʋʋsgo, d segd n talla tẽeb ne-a. (Mark 11:24) Tʋm-tʋmd a Poll yeelame: “Tẽeb sã n kaẽ, ned ka tõe n ta Wẽnnaam yam ye. Ned ning sẽn wat Wẽnnaam nengẽ tog n tẽeme tɩ b beeme, la tɩ b ronda neb nins sẽn baood bãmbã.” (Ebre-rãmbã 11:6) La d sã n yeel tɩ d tẽeda a Zeova, pa sek ye. D segd n sakd-a-la daar fãa. Rẽ n wilgd tɩ d sɩd tẽed-a lame.—Karm-y Zak 2:26.

7. a) Bõe yĩng tɩ d segd n pʋʋsd a Zeova ne sik-m-meng la waoogre? b) D sã n pʋʋsdẽ, bõe la d tõe n maan n wilg tɩ d pelga d pʋg ne a Zeova?

⁷ D segd n pʋʋsda a Zeova ne sik-m-meng la waoogre. Bõe yĩnga? D sã n gomd ne naab bɩ perzidã, d gomda ne waoogre. A Zeova n yaa Wẽnnaam sẽn ka to. Dẽ wã, d sã n wa gomd ne-a, pa segd n yɩ ne sik-m-meng la ne waoogr n yɩɩd sɩda? (Sɩngre 17:1; Yɩɩn-sõamyã 138:6) D segdame me n pelg d pʋs n togs a Zeova sẽn be d sũurẽ. D pa segd n togsd gom-yɛng n yɩlemdẽ ye.—Matye 6:7, 8.

8. D sã n pʋʋsd n kot bũmbu, tõnd me segd n maana bõe?

⁸ Sẽn na n baase, d sã n kot bũmbu, d tʋʋm-tʋmdɩ wã segd n wilgame tɩ d sɩd rata d sẽn pʋʋsd n kotẽ wã. Wala makre, d sã n kot a Zeova t’a kõ tõnd d daarã rɩɩbo, d pa segd n kalemd d nus n zĩẽ n gũudẽ, n yaool n tõe n tʋm n paam ye. D segd n wɩsga d meng n tʋme, la d sak tʋʋm ning fãa d sẽn tõe n  tʋme. (Matye 6:11; 2 Tesalonik-rãmbã 3:10) D sã n kot a Zeova t’a sõng-d tɩ d bas wẽng maanego, d segd n zãaga d meng ne bũmb ning fãa sẽn tõe n kɩt tɩ basgã yaa toogã. (Koloos-rãmbã 3:5) Masã, d ges sogsg kẽer nebã sẽn sokd pʋʋsgã wɛɛngẽ.

9. Ãnd bal la d segd n pʋʋse? Pʋʋsgã wɛɛngẽ, bõe la Zã 14:6 wilgd tõndo?

⁹ Ãnda la d segd n pʋʋse? A Zeezi zãmsa a karen-biisã tɩ b pʋʋs “tõnd ba sẽn be arzãna [“saasẽ,” MN]” wã. (Matye 6:9) A paasame: “Maam la sore, la sɩda, la vɩɩm. Ned baa a yembr ka tõe n wa m ba nengẽ tɩ ka tũ ne maam ye.” (Zã 14:6) Dẽnd d segd n pʋʋsda a Zeova bala, la tog n yɩɩ ne a Zeezi yʋʋre. Pʋʋs ne a Zeezi yʋʋr rat n yeelame tɩ bõe? D sã n dat t’a Zeova kelg d pʋʋsgã, d segd n wilgame tɩ d nanda tʋʋmd ning a Zeova sẽn kõ a Zeezi wã. Wa d sẽn zoe n yã wã, a Zeezi waa tẽngã zug n na n fãag-d ne yel-wẽnã la kũumã. (Zã 3:16; Rom-dãmbã 5:12) Sẽn paase, a Zeova yãka a Zeezi t’a lebg maan-kʋʋdb kãsma, la bʋ-kaooda.—Zã 5:22; Ebre-rãmbã 6:20.

10. Yaa tɩlɛ tɩ d yĩgimdi, n zĩnd bɩ n yals yĩngr n pʋʋs bɩ?

¹⁰ Yaa tɩlɛ tɩ d yĩgimdi, n zĩnd bɩ n yals yĩngr n pʋʋs bɩ? Ayo, a Zeova pa togs rẽ n bak ye. Biiblã wilgdame tɩ d tõe n zĩndame, n yĩgimdi bɩ n yals yĩngr n pʋʋse. (1 Kibayã 17:16; Neemi 8:6; Dãniyɛll 6:11; Mark 11:25) A Zeova sẽn dat n yɩɩd yaa d tall manesem sõng pʋʋsgã sasa. D sẽn be zĩig ning fãa, yaa yʋng tɩ yaa wĩndga, d tõe n zẽka d koɛɛg n pʋʋs a Zeova, pa rẽ bɩ d pʋʋs-a d sũurẽ. D sã n wa pʋʋsd a  Zeova, d tõe n kɩsa sɩd t’a na n kelg-d lame, baa neb a taabã pa wʋmde.—Neemi 2:1-6.

11. Bõe la d tõe n kos a Zeova d pʋʋsg pʋgẽ?

¹¹ Bõe la d tõe n pʋʋs n kose? D tõe n kosa bũmb ning fãa sẽn tat a Zeova raabo. Biiblã yetame: “Tõnd sã n kos bũmb sẽn zems ne bãmb daabo, b kelgda tõndo.” (1 Zã 5:14) D tõe n pʋʋsame n togs yɛl sẽn pak tõnd mengã bɩ? N-ye. D sã n pʋʋsd a Zeova, segd n yɩɩ wa d gomda ne d zo-nongre. D tõe n togsa a Zeova sẽn be d sũurẽ wã fãa. (Yɩɩn-sõamyã 62:9) D tõe n kos-a lame t’a kõ-d a vʋʋsem sõngã tɩ d tõog n maan sẽn yaa tɩrga. (Luk 11:13) D leb n tõe n kosa a Zeova yam, n tõog n yãk yam-sõngo. D tõe n kos-a-la pãng me, sẽn na yɩl n mao ne zu-loeesã. (Zak 1:5) D segd n kosa a Zeova d yel-wẽna sugri. (Efɛɛs-rãmbã 1:3, 7) D leb n tog n pʋʋsa neb a taabã yĩnga, wala makre d zakã rãmb la d tẽed-n-taasã.—Tʋʋmã 12:5; Koloos-rãmbã 4:12.

12. D pʋʋsg pʋgẽ, bõe n segd n pak tõnd n yɩɩda?

¹² D pʋʋsg pʋgẽ, bõe n segd n pak tõnd n yɩɩda? Yaa a Zeova, la a raabã. D segd n pʋʋs-a-la bark ne d sũur fãa, bũmb nins fãa a sẽn maan n kõ-dã yĩnga. (1 Kibayã 29:10-13) A Zeezi sẽn da be tẽngã zugã, a wilga a karen-biisã b sẽn segd n pʋʋs to-to. (Karm-y Matye 6:9-13.) A yeelame tɩ b segd n deng n kosame tɩ Wẽnnaam yʋʋrã paam waoogre, rat n yeel tɩ nebã bãng t’a yʋʋrã yaa sõngo. Rẽ poore, a Zeezi wilgame tɩ d segd n kosame t’a Zeova Rĩungã wa, t’a raabã maan dũniyã gill zugu. Yaa d sã n pʋʋs n kos rẽ fãa poor la d tõe masã n kos bũmb nins d sẽn datã. D pʋʋsg pʋgẽ tɩ d sã n deng n lʋɩɩs a Zeova la a raabã  taoore, d wilgda sẽn yaa bũmb ning n pak tõnd n yɩɩdã.

13. D pʋʋsg segd n yɩɩ wok bɩ koɛɛga?

¹³ Pʋʋsg segd n yɩɩ wok bɩ koɛɛga? Biiblã pa togs ye. Pʋʋsg tõe n yɩɩ woko, tõe n yɩɩ koɛɛg me. Bee ne yɛlã sẽn yaa to-to. Wala makre, d sã n wa rat n dɩ, pʋʋsgã tõe n yɩɩ koɛɛga. La d sã n wa rat n pʋʋs a Zeova bark bɩ n togs-a d zu-loeese, pʋʋsgã tõe n yɩɩ  woko. (1 Sãmwɛll 1:12, 15) D pa rat n pʋʋsd pʋʋs-wogd sẽn na yɩl tɩ nebã pẽg-d ye. A Zeezi wakatẽ wã, neb kẽer da maanda woto. (Luk 20:46, 47) Pa d gom-wogdã n na n kɩt t’a Zeova kelg-d ye. A sẽn dat yaa d togs-a sẽn be d sũurẽ wã.

14. Naoor a wãn la d segd n pʋʋs a Zeova? Bõe la rẽ wilgd tõnd a Zeova zugu?

¹⁴ Naoor a wãn la d segd n pʋʋs a Zeova? A Zeova ratame tɩ d pʋʋsd-a wakat fãa. Biiblã yetame tɩ d ‘pʋʋs n da base,’ la d ‘wɩng ne pʋʋsgo.’ (Matye 26:41; Rom-dãmbã 12:12; 1 Tesalonik-rãmbã 5:17) Woto wilgdame t’a Zeova kelgda d pʋʋsgã wakat buud fãa. Tõnd tõe n pʋʋs-a-la bark daar fãa, a sẽn nong tõnd la a kõt-d bũmb fãa wã yĩnga. D leb n  tõe n kos-a lame t’a wilg-d sore, t’a kõ-d pãnga, la a keng d pɛlga. D sã n getẽ tɩ d sẽn tõe n paam n pʋʋs a Zeova wã yaa bark meng-menga, d na n pʋʋsd-a-la d sẽn paam segb buud fãa.

15. Bõe yĩng tɩ pʋʋsg fãa poor bɩ d tog n yeel tɩ “ãmiinã”?

¹⁵ Bõe yĩng tɩ pʋʋsg fãa poor bɩ d tog n yeel tɩ “ãmiinã”? Ãmiina wã rat n yeelame tɩ “bɩ a sɩd yɩ woto.” Wilgdame tɩ d sẽn togs d pʋʋsgã pʋgẽ wã yaa ne pʋ-peelem. (Yɩɩn-sõamyã 41:14) Biiblã wilgdame tɩ ned sã n lʋɩ zãma taoor n pʋʋse, yaa sõma tɩ d yeel tɩ ãmiina, d sũur pʋgẽ, wall d yeel tɩ yi. Woto wilgdame tɩ d saka bũmb ning a soabã sẽn yeelã.—1 Kibayã 16:36; 1 Korẽnt-rãmbã 14:16.

16. Bõe n wilgd t’a Zeova sɩd leokda d pʋʋsgo?

¹⁶ Rẽ yĩnga, a Zeova sɩd leokda tõnd pʋʋsg bɩ? N-ye. Biiblã yetame t’a Zeova ‘kelgda pʋʋsgo.’ (Yɩɩn-sõamyã 65:3) A Zeova kelgda neb milyõ-rãmb sẽn pʋʋsd-a ne b sũy fãa, la a leokda b pʋʋsgã ne manesem buud toor-toore.

17. Wãn to la a Zeova tũnugd ne malɛgsã la neb nins sẽn tũud-a wã n leokd tõnd pʋʋsgo?

¹⁷ A Zeova tũnugda ne a malɛgsã, bɩ neb nins sẽn tũud-a wã n leokd tõnd pʋʋsgã. (Ebre-rãmbã 1:13, 14) Wala makre, neb n pʋʋs Wẽnnaam n kos t’a sõng-b tɩ b wʋm Biiblã goam võore, la rẽ poor bilf bala, a Zeova Kaset soab n wa b nengẽ. Biiblã wilgdame tɩ malɛgsã me sõngdame n moond ‘koe-noogã’ dũniyã gill zugu. (Karm-y Vẽnegr 14:6.) Sẽn paase, tõnd sʋkã neb wʋsg pʋʋsa a Zeova n togs-a b  zu-loɛɛg bɩ b raabo, tɩ rẽ poor bɩ b tẽed-n-taag wa sõng-ba.—Yel-bũnã 12:25; Zak 2:16.

18. Wãn to la a Zeova leokd tõnd pʋʋsgã ne vʋʋsem sõngã la Biiblã maasem?

¹⁸ A Zeova leokda d pʋʋsgã ne a vʋʋsem sõngã maasem me. D sã n kos-a sõngr sẽn na yɩl n mao ne zu-loɛɛga, ne a vʋʋsem sõngã maasem, a tõe n kõo tõnd yam la pãnga. (2 Korẽnt-rãmbã 4:7) Ne Biiblã maasem me, a Zeova leokda d pʋʋsgã, la a sõngd tõnd tɩ d tõe n yãk yam-sõngo. Sɩd me, d sã n karem Biiblã, d tõe n yãa sagls sẽn na n sõng-do. A Zeova leb n tõe n kɩtame tɩ ned yeel bũmb tigissã sasa tɩ kell n zems ne tõnd yellã bal kɛpɩ, bɩ a kɩt tɩ tigingã kãsem-soab sõs Biiblã gomd ning zug ne-do.—Galat-rãmbã 6:1.

19. Bõe n tõe n kɩt tɩ wõnd a Zeova pa leok d pʋʋsgo?

¹⁹ La wakat ninga, d mi n soka d meng yaa: ‘Bõe yĩng t’a Zeova nan pa leok maam?’ D tẽeg t’a mii wakat ning a sẽn na n leok-do, la a sẽn na n leok-d to-to me. A mii bũmb nins sẽn yaa tɩlɛ ne-dã. D segd n kell n pẽdga ne pʋʋsgo, n wilg tɩ d sɩd rata d sẽn kot bũmb ningã, la tɩ d kɩsa a Zeova sɩd zãng-zãnga. (Luk 11:5-10) Wakat ninga, a Zeova tõe n leoka d pʋʋsgã tɩ pa yɩ wa d sẽn da ratã ye. Wala makre, d tõe n togs-a-la d zu-loɛɛg n dat t’a sõng-d tɩ d welge, t’a yaool n pa welg ye. La a tõe n kõ-d-la pãng tɩ d tõog toogo.—Karm-y Ezayi 40:29.

20. D sã n nong n pʋʋsd a Zeova, a nafa wã yaa bõe?

²⁰ Hakɩɩka, d sẽn paam n tõe n pʋʋs a Zeova wã yaa bark menga! D tõe n kɩsa sɩd t’a wʋmdame. (Yɩɩn-sõamyã 145:18) D sã n nong n pʋʋsd a Zeova ne d sũur fãa, tõnd ne yẽ zoodã pãng na n paasdame.