SAK 10
“A Zeova gomdã ra piuugda zĩig fãa”
B yiisa a Pɩyɛɛr bãens roogẽ, la kiris-nebã ra ket n moonda koe-noogã baa ne b sẽn da namsd-bã
Tika Tʋʋma 12:1-25
1-4. A Pɩyɛɛr ra bee yel-bʋg pʋgẽ, la sã n da yaa yãmba, y manesem ra na n yɩɩ wãna?
A PƖYƐƐR ne sodaas n tũ bãensã roog kut kʋɩlen-kẽengã noor n kẽ, tɩ gũudbã wẽnemd n pag kʋɩlengã. B naaga a Pɩyɛɛr ne Rom sodaas a yiib n soge, tɩ b na n tall-a n tɩ kẽes ro-bil a yembr pʋgẽ, bãensã roogẽ. Beenẽ, a Pɩyɛɛr gũu lɛɛr-dãmba, tõe tɩ yɩɩ rasem wʋsg menga, n yaool n na n bãng bũmb ning sẽn na n paam-a wã. La a sẽn da be bãensã roogẽ wã, a sẽn da ne bal yaa bãensã roog lalsã, bãensã b sẽn tall n sẽb-a wã, la gũudbã sẽn da gũud-a wã.
2 A Pɩyɛɛr wa n bãnga bũmb ning sẽn na n paam-a wã. Ra pa koe-noog ye. Rĩm a Erood Agripa pipi soabã yãka yam n na n kʋ-a. a Sɩd me, a Erood da ratame tɩ Pakã poor bɩ a tall a Pɩyɛɛr n wa kʋʋngã taoore, la a kɩt tɩ b kʋ-a n noog kʋʋngã sũuri. A Erood sẽn yãk yam n na n maan bũmb ningã ra pa belgr ye. Bala sẽn da nan pa kaoose, a kʋʋ a Zak sẽn da yaa tẽn-tʋmd wa a Pɩyɛɛrã.
3 Mams-y y yamẽ, a Pɩyɛɛr sẽn da tagsd bũmb ning yell ne yʋngã, a kʋʋbã ket tɩ beoogã. Bõe yell la a ra tagsda, a sẽn wa n be ro-bilã pʋgẽ ne likã? Tõe t’a lebg n tẽega goam nins a Zeezi sẽn yeel-a yʋʋm a wãn sẽn deng rẽ wã. A ra yeel-a lame tɩ daar n wat tɩ b na n sẽb-a n tall-a n tɩ kʋ. (Zã 21:18, 19) Tõe t’a Pɩyɛɛr ra sokda a meng sã n pa daar-n-kãng n ta.
4 Yãmb sã n da be a Pɩyɛɛr zĩigẽ, y manesem ra na n yɩɩ wãna? Neb wʋsg sũy ra na n sãamame, tɩ b tagsdẽ tɩ sẽn maand kae ye. La sã n yaa ne kiris-ned hakɩɩka, yell beeme n pa tar tɩɩm bɩ? Yam-bʋg la d tõe n dɩk a Pɩyɛɛr ne a tẽed-n-taasã manesem sẽn yɩ to-to b sẽn wa n namsd-bã pʋgẽ? Bɩ d gom rẽ yelle.
“Tigingã neb ra pʋʋsda . . . ne b sũur fãa” (Tʋʋma 12:1-5)
5, 6. a) Bõe yĩng tɩ rĩm a Erood Agripa pipi soabã sɩng kiris-nebã namsgo, la wãn to la a maan rẽ? b) Bõe yĩng tɩ b sẽn kʋ a Zakã sãam tigingã neb sũyã?
5 Wa d sẽn yã sak ning sẽn loogã pʋgẽ wã, a Korney ne a zakã rãmb sẽn yaa bu-zẽms neb sẽn tuub n lebg kiris-nebã, yɩɩ bõn-kãseng sẽn maan kiris-nebã tiging pʋgẽ. La Zʋɩf-rãmb nins sẽn da yaa kiris-nebã sẽn da naagd bu-zẽmsã neb n tũud a Zeova tɩ gɩdgr kae wã, tõe tɩ sãama Zʋɩf-rãmb nins sẽn da pa kiris-nebã sũyã.
6 A Erood sẽn yaa politisiyẽ sẽn yaa sɩlem soabã yãame tɩ yaa segb a sẽn paam n na n ta Zʋɩf-rãmbã yam. Rẽ n so t’a sɩng kiris-nebã namsgo. Sãmbg kae t’a Erood ra miime tɩ tẽn-tʋmd a Zak ne a Zeezi Kirist ra kĩi ne taab ye. Rẽ n so t’a ‘kʋ a Zak sẽn yaa a Zã ba-biigã ne sʋʋga.’ (Tʋʋ. 12:2) Tigingã nebã sũy sãama wʋsgo! A Zak ra naaga neb a tãabã sẽn zĩnd a Zeezi tedgrã sasa wã, la a yel-soalem a taab sasa, tẽn-tʋmdb a taabã sẽn pa yã. (Mat. 17:1, 2; Mark 5:37-42) A Zeezi boola a Zak ne a yao a Zã tɩ “Sa-tãs kom-dibli,” bala b ra tara yẽesem wʋsgo. (Mark 3:17) Dẽnd b sẽn kʋ a Zakã, tigingã neb konga tẽn-tʋmd b sẽn da nong wʋsgo, la sẽn da maand sɩda.
7, 8. B sẽn kẽes a Pɩyɛɛr bãens roogã, bõe la tigingã neb maan-yã?
7 A Zak kʋʋbã yɩɩ Zʋɩf-rãmbã noogo. Yaa a Agripa sẽn da rat la woto. Rẽ kõ-a-la raood t’a ra rat n kʋ a Pɩyɛɛr me. Wa d sẽn yã pipi sullã pʋgẽ wã, a kɩtame tɩ b yõk a Pɩyɛɛr n tɩ page. Wa d sẽn yã sak a nu wã pʋgẽ wã, tõe t’a Agripa tẽegame tɩ b sã n kẽes tẽn-tʋmdbã bãens roogẽ, pa wakat fãa la baasd neer ye. A sẽn da pa rat tɩ tẽn-tʋmd a Pɩyɛɛr tõog n yɩ bãensã roogẽ wã, a naaga a Pɩyɛɛr ne gũudb a yiib n soge, tɩ gũudb bãmb 16 reesd taab wĩndg la yʋngo, n gũusd n get-a. Gũudbã sã n da bas t’a Pɩyɛɛr yi bãensã roogẽ, yaa bãmb mensã la b ra na n kʋ. Yel-kãngã pʋgẽ, bõe la a Pɩyɛɛr tẽed-n-taasã ra tõe n maan n sõng-a?
8 Tigingã nebã ra mii b sẽn segd n maanã vẽenega. Tʋʋm 12:5 wã yetame yaa: “Woto, b paga a Pɩyɛɛr bãens roogẽ wã, la tigingã neb ra pʋʋsda Wẽnnaam yẽ yĩng ne b sũur fãa.” Hakɩɩka, b sẽn pʋʋs n kos bũmb ning b tẽed-n-taagã b sẽn da nongã yĩngã ra yita b sũurẽ. A Zak kũumã pa kɩt tɩ b ra pa le tẽed a Zeova ye. B ra kell n kɩsa sɩd zãng-zãng t’a Zeova kelgda b pʋʋsgã. Pʋʋsgã tara yõod wʋsg a Zeova nifẽ. Tõnd sẽn pʋʋsd n kot bũmb ninsã sã n zemsa ne a raabã, a na n leoka d kosgã. (Ebre. 13:18, 19; Zak 5:16) Woto yaa bũmb sẽn tar yõod wʋsg kiris-nebã sẽn pa segd n yĩmi.
9. Pʋʋsgã wɛɛngẽ, yam-bʋg la d tõe n dɩk a Pɩyɛɛr tẽed-n-taasã sẽn maan bũmb ningã pʋgẽ?
9 Yãmb mii y tẽed-n-taas sẽn maood ne zu-loees bɩ? Tõe tɩ b namsd-b-la b tũudmã yĩnga, tõe tɩ yaa goosneema-rãmbã n gɩdg d tʋʋmdã, pa rẽ bɩ yaa sabab-wẽns n paam-ba. Yãmb tõe n pʋʋsa nin-kãensã yĩnga. Tõeeme me tɩ y mii y tẽed-n-taas kẽer sẽn maood ne zu-loees a taaba. Wala makre, zak pʋgẽ zu-loeese, raood komsgo, wall zu-loees b tẽebã yĩnga. Yãmb sã n deng n tags neer n yaool n pʋʋs a Zeova sẽn yaa “Soab ning sẽn wʋmd pʋʋsgã,” y na n tõog n tẽega nin-kãensã yelle, hal n pʋd b yʋyã menga. (Yɩɩn. 65:2) Sɩd me, yãmb sã n wa maood ne zu-loeese, y na n datame tɩ y tẽed-n-taasã pʋʋs y yĩnga.
D pʋʋsda d tẽed-n-taas nins b sẽn kẽes bãens roogẽ b tũudmã yĩngã yĩnga
“Pʋg maam” (Tʋʋma 12:6-11)
10, 11. Bilg-y-yã a Zeova malɛkã sẽn yiis a Pɩyɛɛr bãensã roogẽ to-to.
10 A Pɩyɛɛr ra maanda yɩɩr b sẽn da na n kʋ-a wã yĩng bɩ? D pa tõe n leok tɩ n-ye ye. La a kʋʋbã ket tɩ beoogo, ne yʋʋngã, a ra gõee gũudb a yiibã sẽn da gũud-a wã sʋka. Ra-kãngã sẽn da tar tẽebã ra mii vẽeneg tɩ baa ne yɛlã sẽn na n yɩ to-to vẽkembeoogã, a Zeova pa na n yĩm a yell ye. (Rom. 14:7, 8) La bũmb ning sẽn wa n maanã sɩd linga a Pɩyɛɛr wʋsgo. Zĩig pʋgẽ, roog ning pʋgẽ a Pɩyɛɛr sẽn da be wã lebga vẽenem. Malɛk n wa n yals be, n nek a Pɩyɛɛr n yeel-a t’a yik tao-tao. Yaa vẽeneg tɩ gũudbã ra pa ne malɛkã ye. Bãensã b sẽn da sẽb a nusã, tɩ wõnd pa tõe n kao wã yii a nusẽ wã n dʋʋge!
“B taa kutã kʋɩleng ning nebã sẽn tũud n yit bãensã roogẽ n kẽed tẽngã pʋgẽ wã. La kʋɩlengã paka a toor tɩ b looge.”—Tʋʋma 12:10
11 Malɛkã kõo a Pɩyɛɛr noy. A yeel-a lame yaa: “Yik tao-tao! . . . Yeelg f fuugã la f pid f neooda wã. . . . Yeelg f zugẽ fuugã.” A Pɩyɛɛr yɩɩ tao-tao n maan woto. Sẽn na n baase, a yeel-a lame yaa: “Pʋg maam.” A Pɩyɛɛr sɩd pʋg-a lame. B yii roog ning pʋgẽ a Pɩyɛɛr sẽn da beẽ wã, n soos n loog gũudbã zĩiga, n tees kutã kʋɩlen-kẽengã noore. B ra na n maana a wãn n yi? A Pɩyɛɛr sã n da sokda a meng woto, pa kaoos la a paam a sokrã leoor ye. B sẽn ta kʋɩlengã noorã, ‘kʋɩlengã paka a toore.’ Nand meng t’a Pɩyɛɛr bãng bũmb ning sẽn maanã, b tũu rignoorã n yi n dɩk sor n loogdẽ, tɩ malɛkã wa loog n bas-a. A Pɩyɛɛr ra yasa a yembr masã sorã zugu. Rẽ la a bãng tɩ bũmb nins fãa sẽn maanã ra yaa sɩda. Ra pa zãmsd ye. A paama a menga!—Tʋʋ. 12:7-11.
12. A Zeova sẽn fãag a Pɩyɛɛr to-to wã wɛɛngẽ, bõe yĩng tɩ d sã n maag d yĩng n bʋgs a zug bɩ tõe n keng d raoodo?
12 Rẽ yĩnga d sã n maag d yĩng n tags a Zeova sẽn tũnugd ne a pãn-kãsengã sẽn ka tar kõakã n sõngd a nin-buiidã yelle, pa kengd raood sɩda? Rĩm ning sẽn da yõk a Pɩyɛɛrã ra paamame tɩ dũni gill pãn-soaad teend-a. Baa ne rẽ, a Pɩyɛɛr tõog n tũu bãens roogã kʋɩlengã noor n yi! La yaa sɩd t’a Zeova pa maand yel-soalem a woto buud a nin-buiidã fãa yĩng ye. A pa maan yel-solemd n fãag a Zak ye. A Zeezi goam nins a sẽn da togs tẽn-tʋmd a Pɩyɛɛr wɛɛngẽ wã sẽn wa n pidsã, a Zeova pa maan yel-solemd ye. Rũndã-rũndã, kiris-nebã pa gũud t’a Zeova maan yel-solemd n fãag-b ye. La d miime t’a Zeova pa toeem ye. (Mal. 3:6) Ka la bilfu, ne a Bi-riblã maasem, a na n vʋʋga neb milyõ-rãmba, n yiis-b kũumã d sẽn tõe n dɩk n mak ne bãens roogã pʋgẽ, tɩ b paam b mense. (Zã 5:28, 29) D sã n wa maood ne zu-loeese, n bʋgs pʋlen-kãng zugu, d tõe n paama raood kengr meng-menga.
“B yã-a lame tɩ ling-b wʋsgo” (Tʋʋma 12:12-17)
13-15. a) Tigingã neb sẽn da tigim a Maari zakẽ wã manesem yɩɩ wãna, a Pɩyɛɛr sẽn ta beenẽ wã? b) Tʋʋm sebrã sags nins sẽn pʋgdã gomda bõe yell n tɩ yɩɩda, la bõe la a Pɩyɛɛr kell n maan a tẽed-n-taasã yĩnga?
13 A Pɩyɛɛr ra yasa sorã zug ne yʋngã, n sokd a meng a sẽn na n kẽngẽ. A wa n yãka yam n na n kẽng pag a yembr zak sẽn da pẽ be nengẽ, t’a yʋʋr boond t’a Maari. A ra yaa kiris-neda. Yaa vẽeneg t’a Maari ra yaa pʋg-kõor nug sẽn zãade. A ra tara zak sẽn yalem sõma tɩ tigingã neb ra tigimd taab beenẽ. A Maari ra yaa Zã ning b sẽn boond me t’a Markã ma. Yaa pipi la woto b sẽn gom a Mark yell Tʋʋm sebrã pʋgẽ. A Mark wa n lebga wa a Pɩyɛɛr biiga. (1 Pɩy. 5:13) Yʋn-kãngã, tigingã neb wʋsg ra tigma taab a Maari zakẽ wã, baa ne zĩigã sẽn da zʋʋgã, n pʋʋsd ne b sũur fãa. Sãmbg kae tɩ b ra pʋʋsda a Zeova n kot-a t’a yiis a Pɩyɛɛr bãens roogẽ wã ye. La b ra pa mi t’a Zeova leoka b pʋʋsgã ye!
14 A Pɩyɛɛr wẽe zakã noor kʋɩlengã sẽn pakd n kẽed zakã samandẽ wã, tɩ tʋm-tʋmd-poak yʋʋr sẽn boond t’a Rood wa na n ges yaa ãnda. A ra pa tẽed bũmb ning a sẽn wʋmã ye. Ra yaa a Pɩyɛɛr koɛɛgã! A pa pak kʋɩlengã ye. A sũurã sẽn da noom wʋsgã yĩnga, a basa a Pɩyɛɛr yɩnga, n wudg n kẽ roogã pʋgẽ, n na n tɩ togs tigingã neb a taabã tɩ yaa a Pɩyɛɛre. B yeel-a lame t’a zugã lebgame. La a pa sĩnd ye. A ra ket n pẽdgdame n yetẽ tɩ yaa sɩda. Bilf-bilfã, neb a taabã wa n sak n deegame tɩ tog n yaa sɩda, la tɩ tõe tɩ yaa malɛk n maan a meng wa a Pɩyɛɛre. (Tʋʋ. 12:12-15) Sasa kãng fãa, a Pɩyɛɛr ra ket n wẽeda kʋɩlengã. La b wa n baas n pakame.
15 B sẽn pakã, “b yã-a lame tɩ ling-b wʋsgo”! (Tʋʋ. 12:16) Yɩɩ tɩlɛ t’a Pɩyɛɛr kos-b tɩ b sĩndi, n kelg a sẽn tar n na n togs-bã. A yeel-b lame tɩ b tɩ taas karen-biig a Zak ne b tẽed-n-taas a taabã me kibarã. Rẽ poore, a loogame, sẽn na yɩl t’a Erood sodaasã ra wa paam-a ye. A Pɩyɛɛr kẽnga zĩig b sẽn da pa baood-a n na n yõke, n ket n tũud a Zeova ne a sũur fãa. Tʋʋm sak 15 wã pʋgẽ, b sẽn gom a Pɩyɛɛr sẽn kẽes a toog bãongã kõom zu-loɛɛgã welgr pʋgẽ wã poore, b pa le gom a yell ye. Tʋʋm sebrã sags nins sẽn pʋgdã gomda tẽn-tʋmd a Poll tʋʋmdã la a so-toakã yell n tɩ yɩɩda. La d tõe n basa d yam tɩ sẽn yaa zĩig ning fãa la a Pɩyɛɛr ra tɩ beẽ, a kenga a tẽed-n-taasã tẽebo. A sẽn wa n loogã, yaa vẽeneg tɩ neb nins sẽn da tigim a Maari zakẽ wã sũur yɩɩ noog wʋsgo.
16. Bõe yĩng tɩ d tõe n bas d yam zãng tɩ d na n wa paama bark zembal beoog sẽn wate?
16 Sasa ninga, a Zeova kõta a nin-buiidã tɩ yɩɩg bũmb nins b sẽn tẽedã, hal tɩ b sũ-noogã pa tõe n bãng n bilg ye. Yɩɩ woto ne a Pɩyɛɛr tẽed-n-taasã yʋn-kãnga. Yaa woto ne tõnd me rũndã-rũndã, d sã n wa paam t’a Zeova ning-d barka. (Yel. 10:22) D na n wa yãa a Zeova pʋlemsã fãa pidsg dũniyã gill zug beoog sẽn wate. Yaa vẽeneg tɩ bark nins d sẽn na n paam wakat kãngã buud zɩ n zĩnd ye. Rẽ wã, d sã n kell n maan sɩd ne a Zeova, bark zembal n gũud tõndo.
“A Zeova malɛkã wẽ-a lame” (Tʋʋma 12:18-25)
17, 18. Bõe n kɩt tɩ kʋʋngã kils a Eroode?
17 A Pɩyɛɛr sẽn tõog n yi bãensã roogẽ wã me linga a Eroode. La a sũurã puuga wʋsgo. Tao-tao bala, a Erood kõo noor tɩ b gẽes a Pɩyɛɛr zĩig fãa. Rẽ poore, a feesa a Pɩyɛɛr gũudbã. A kɩtame “tɩ b tall-b n tɩ sɩbge.” Wõnda a kɩtame tɩ b kʋ-ba. (Tʋʋ. 12:18-25) A Erood Agripa zɩ n kʋm a taabã nimbãanega, wall n maan-b neer ye. Nin-wẽn-kãngã pa tol n paam sɩbgr bɩ?
18 Tõe t’a Agripa gesame t’a sẽn pa tõog n kʋ a Pɩyɛɛrã, yɩɩ bũmb sẽn paoog-a. La pa yã n kaoos la a paam segb a to n na n wilg t’a yaa wuk-m-meng soab ye. A bɛɛb kẽer n wa n na n yẽs ne-a sẽn na yɩl tɩ laafɩ zĩnd b sʋka. A tũnuga ne rẽ n na n gom neb kʋʋng taoore. A Luk yeelame t’a “Erood yeelga a naam fuug” n yaool n na n gom neb kʋʋngã taoore. Kʋdemd yɛl-mit a Zozɛf sẽn yaa Zʋɩfã yeelame t’a Erood sẽn da yeelg fuug ningã ra naaga ne wanzuri, tɩ vẽenemã sã n tors-a bɩ pɩnda, tɩ nebã sã n get a Erood bɩ a yaa wa wẽnnaam. Nin-kãngã sẽn yaa wuk-m-meng soaba sɩnga goama. Kʋʋngã sẽn da kilsd-a wã zẽka b koees n yeel yaa: “Woto yaa wẽnnaam koɛɛga, pa ninsaal koɛɛg ye!”—Tʋʋ. 12:20-22.
19, 20. a) Bõe yĩng t’a Zeova sɩbg a Eroode? b) A Erood Agripa kũumã sẽn yɩ to-to wã wɛɛngẽ, bõe n tõe n keng tõnd raoodo?
19 Yaa Wẽnnaam bal n yaool n tog ne pẽgr a woto buudu! Sɩd me, a ra getame! A Erood ra tõe n põsa yel-beed ning sẽn da na n paam-a wã. A ra tõe n kɩtame tɩ kʋʋngã bas kilsgã, pa rẽ bɩ n yeel bal tɩ b sẽn yetã pa sɩd ye. La a manesmã sẽn yɩ to-to wã wilga vẽeneg tɩ Biiblã sẽn yetã yaa sɩda. Biiblã yetame yaa: “Wuk-m-meng n lʋɩt taoor tɩ yel-beed yaool n pʋgle.” (Yel. 16:18) “Zĩig pʋgẽ, a Zeova malɛkã wẽ-a lame,” tɩ nin-kãngã sẽn yaa wuk-m-meng soabã ki kũ-toaaga. “Zũnzũy n dɩ-a t’a ki.” (Tʋʋ. 12:23) A Zozɛf yeelame me tɩ bũmb n tiig n maan a Agripa, la a paas tɩ kɩtame tɩ rĩmã bãng t’a na n kiime, a sẽn da sak tɩ kʋʋngã kils-a wã yĩnga. A Zozɛf paasame me t’a namsa rasem a nu n yaool n ki. b
20 Wakat ninga, wõnda nin-wẽnsã tʋmda tʋʋm-wẽns n pa paamd sɩbgr ye. La rẽ pa segd n ling tõnd ye. Bala “dũniyã tõr bee wẽng soabã nugẽ.” (1 Zã 5:19) Baa ne rẽ, neb kẽer sẽn maand sɩd ne Wẽnnaam sũur mi n sãamame, sã n wa wõnd nin-wẽnsã pa paamd sɩbgr ye. Rẽ n so tɩ kibay a woto buudã kengd raoodã. Sɩd me, a Zeova kẽesa a toog yellã pʋgẽ, tɩ sõngd neb nins fãa sẽn tũud-a wã tɩ b bãng t’a yaa Wẽnnaam sẽn nong tɩrlem. (Yɩɩn. 33:5) Baa sẽn na n kaoos to-to fãa, a na n wa kɩtame tɩ tɩrlem zĩndi.
21. Tʋʋm sebrã sak 12 gomda bõe yell n tɩ yɩɩda, la bõe yĩng tɩ rẽ tõe n keng tõnd raood rũndã-rũndã?
21 Kibarã sẽn baas to-to wã kengda raoodo. Biiblã yetame yaa: “A Zeova gomdã ra piuugda zĩig fãa, tɩ neb wʋsg me lebgd tẽedba.” (Tʋʋ. 12:24) Biiblã sẽn yeel bũmb ningã wilgdame tɩ koɛɛgã mooneg tʋʋmdã kell n kẽnga taoore. Tõe tɩ rẽ tẽegda tõnd a Zeova sẽn ningd tõnd koe-moonegã tʋʋmdã bark to-to rũndã-rũndã wã. Yaa vẽeneg tɩ pa tẽn-tʋmd b sẽn kʋ, la a to sẽn paam n põs yell la b gomd n tɩ yɩɩd Tʋʋm sebrã sak 12 pʋgẽ ye. B gomda a Zeova yell n tɩ yɩɩda, la a sẽn maan bũmb ning n gɩdg a Sʋɩtãan t’a pa tõog n menes kiris-nebã, bɩ n kɩt tɩ b tʋʋmdã yalsã. A Sʋɩtãan sɩlmã pa tõog ye. Sɩlem buudã fãa pa na n tol n tõog n menes a Zeova nin-buiidã ye. (Eza. 54:17) Sẽn paase, neb nins sẽn tũud a Zeova la a Zeezi Kiristã tʋmda tʋʋmd sẽn pa na n tol n yalse. Rẽ yĩnga pa kengd raoodo sɩda? Tõnd sẽn paam n naag n sõngd t’a Zeova gomdã ‘piuugd zĩig fãa’ rũndã-rũndã wã yaa zu-zẽkre!
a Ges-y zĩ-gũbrã: “ A Erood Agripa pipi soabã.”
b Rao a ye sẽn yaa logtor-kãseng la seb-gʋlsd yeelame t’a Zozɛf ne a Luk sẽn bilg a Agripa kũumã sẽn yɩ to-to wã, tõe tɩ yaa zũnzũy n kẽ a yãadã, tɩ kɩt t’a ki. Naoor wʋsgo, ned sã n bẽed bãag a woto buudu, a wʋbda zũnzũy, wall a kaalmã poore, zũnzũy n yita. Sebr a yembr pʋgẽ, b yeelame yaa: “A Luk sẽn bilg a Erood kũumã sẽn yɩ to-to wã wilgdame t’a sɩd kii kũ-toaaga.”
