1-3. Bõe la Wẽnnaam vẽneg a Pɩyɛɛr t’a yã, la bõe yĩng tɩ d segd n bao n wʋm vẽnegrã võore?

 YƲƲMD 36, daar a ye, a Pɩyɛɛr ra bee roog a ye zug ne wĩntoog n pʋʋsdẽ. Yaa roog sẽn da pẽ mogrã sẽn be Zope tẽngã. Rasem a wãn la woto b sẽn da reeg-a sãand zag-kãng pʋgẽ. A sẽn sak n zĩnd be wã wilgdame t’a ra pa bakd neb ye. Zakã soab ra yaa rao yʋʋr sẽn boond t’a Sɩmo. A ra yaa zapa. Zʋɩf baa a ye ra pa na n sak n zĩnd ne ned a woto ye. a La a Zeova ra rat n sõnga a Pɩyɛɛr t’a bãng bũmb sẽn tar yõod wʋsgo: Yaa t’a Zeova pa bakd ned ye.

² A Pɩyɛɛr sẽn wa n pʋʋsdẽ wã, a paama vẽnegre. Bũmb ning a sẽn yã vẽnegrã pʋgẽ wã ra pa sakd ne Zʋɩf baa a ye ye. A yãa laok buud sẽn yit saasẽ n sigda, tɩ rũms buud toor-toor a Moyiiz tõogã sẽn wilg tɩ b yaa rẽgd be a pʋgẽ. Koɛɛg n yeel a Pɩyɛɛr t’a yik n kʋ n wãbe. La a leokame yaa: “M zɩ n dɩ bũmb sẽn kisi, wall bũmb tõogã sẽn wilg tɩ yaa rẽgd ye.” Koɛɛgã yeela a Pɩyɛɛr hal naoor a tãab fãa yaa: “Da le bool bũmb nins Wẽnnaam sẽn yɩlgã tɩ rẽgd ye.” (Tʋʋ. 10:14-16) A Pɩyɛɛr yirbame, bũmb ning a sẽn yã wã yĩnga. La pa yã n kaoos la a Zeova sõng-a t’a wʋm bũmb ning a sẽn yã wã võor ye.

³ A Pɩyɛɛr sẽn yã bũmb ningã võor yaa bõe? Tara yõod tɩ d bao n wʋm a võore, bala vẽnegrã sõngdame tɩ d bãng a Zeova sẽn get ninsaalbã to-to. Tõnd sẽn yaa kiris-neb hakɩɩkã, d sã n pa get nebã wa a Zeova sẽn get-b to-to wã, d pa tõe n kõ kaset sõma Wẽnnaam Rĩungã wɛɛngẽ ye. Sẽn na yɩl n wʋm bũmb ning Wẽnnaam sẽn vẽneg a Pɩyɛɛr t’a yã wã võore, bɩ d reng n bao n bãng bũmb ning sẽn maan nand t’a Pɩyɛɛr paam vẽnegrã, la vẽnegrã poore.

4, 5. A Korney ra yaa ãnda, la a sẽn wa n pʋʋsdẽ wã, bõe n maane?

⁴ A Pɩyɛɛr da pa mi tɩ yellã yɩ tɩ zaamẽ, rao a ye yʋʋr sẽn boond t’a Korney me paama vẽnegr Sezaare sẽn be kilo 50 zĩigẽ ne a sẽn beẽ wã ye. A Korney  ra yaa sodaas koabg naaba, la “wẽn-tũuda.” b A leb n da geta a zakã rãmb yell neere, tɩ “yẽ ne a zakã rãmb fãa ra zoet Wẽnnaam.” A Korney ra pa Zʋɩf ye. A leb n da pa tuub n sak Zʋɩf-rãmbã tũudum ye. Baa ne rẽ, a ra kʋmda Zʋɩf-rãmb nins sẽn da yaa naong rãmbã nimbãanega, n kõt-b ligd la teed a taaba. Ra-kãngã sẽn da yaa pʋ-peelem soabã ra ‘yõkda Wẽnnaam sɛɛg wakat fãa.’—Tʋʋ. 10:2.

⁵ Zaabr wakat a 3 sẽnese, a Korney sẽn wa n pʋʋsdẽ wã, a paama vẽnegre, tɩ malɛk yeel-a vẽnegrã pʋgẽ yaa: “Fo pʋʋsgã ne f sẽn kõt naong rãmbã kũunã taa Wẽnnaam nengẽ, la a tẽra rẽ yelle.” (Tʋʋ. 10:4) Malɛkã yeela a Korney t’a tʋm neb tɩ b tɩ bool tẽn-tʋmd a Pɩyɛɛre. Bu-zẽmsã fãa sʋka, a Korney n da na n yɩ pipi n lebg kiris-neda.

6, 7. a) Togs-y kibar sẽn wilgd tɩ Wẽnnaam kelgda pʋ-peelem dãmb nins sẽn dat n bãng sɩdã a zugã pʋʋsgo. b) Kibay a woto buudã sõngda tõnd tɩ d bãng bõe?

⁶ Rẽ yĩnga rũndã-rũndã, Wẽnnaam kelgda pʋ-peelem dãmbã sẽn pʋʋsd-a n dat n bãng sɩdã a zugã pʋʋsg bɩ? Ad kibar a yembr sẽn wilgd rẽnda. Pag a ye sẽn be Albani n sak n deeg Gũusg Gasg sẽn gomd kambã wubr yelle. c A yeela saam-bi-poak ning sẽn kõ-a sebrã yaa: “Mam sã n yeel yãmb tɩ m da pʋʋsda Wẽnnaam n kot-a t’a sõng-m tɩ m tõog n wub m kom-pugli wã, y na n sak n deegame bɩ? Yaa yẽ n tʋm yãmba! Yãmb waoongã kell n zemsame. Sebrã sẽn gomd bũmb ning yellã kell n yaa mam sẽn datã bal kɛpɩ!” Pagã ne a kom-pugli wã sɩnga Biiblã zãmsgo, tɩ kaoosg zugẽ, a sɩdã me wa sɩng Biiblã zãmsgo.

⁷ Rẽ yĩnga kibay a woto buudã waeeme bɩ? N-ye! Naoor wʋsgo, d wʋmda kibay a woto buud dũniyã gill zugu. Dẽnd d tõe n yeelame tɩ yaa Wẽnnaam nugu. Woto wilgda tõnd bõe? Pipi, a Zeova leokda pʋ-peelem dãmb nins sẽn baood-a wã pʋʋsgo. (1 Rĩm. 8:41-43; Yɩɩn. 65:2) Yiibu, malɛgsã sõngda tõnd koɛɛgã mooneg pʋgẽ.—Vẽn. 14:6, 7.

8, 9. Bõe la Wẽnnaam yeel a Pɩyɛɛr t’a maane, la a manesem yɩɩ wãna?

⁸ A Pɩyɛɛr sẽn wa n ket roogã zug n “baood n na n wʋm bũmb ning a sẽn yã wã võorã,” wakat kãng tɩ koe-taasdbã a Korney sẽn tʋmã wa n yasa a Sɩmo zakã rignoorẽ. (Tʋʋ. 10:17) A Pɩyɛɛr da yeela hal naoor a tãab fãa t’a pa na n sak n dɩ rɩɩb tõogã sẽn wilg tɩ yaa rẽgd ye. Rẽ yĩnga a ra na n sak n tũu koe-taasdbã n kẽng bu-zẽng ned zakẽ sɩda? Wẽnnaam tũnuga ne a vʋʋsem sõngã n sõng a Pɩyɛɛr t’a bãng a sẽn dat t’a maan bũmb ninga. A yeela a Pɩyɛɛr yaa: “Ade! Rap a tãab n sokd fo yelle. Bɩ f yik n sig n tũ bãmb la f ra sãmb baa bilf ye. Bala yaa maam n tʋm-ba.” (Tʋʋ. 10:19, 20) Yaa vẽeneg tɩ bũmb ning a Pɩyɛɛr sẽn yã vẽnegrã pʋgẽ wã sõng-a lame t’a ra zoe n segl a meng n sa n na n tũ sor ning Wẽnnaam sẽn na n wilg-a ne a vʋʋsem sõngã maasmã.

⁹ A Pɩyɛɛr sẽn bãng tɩ yaa malɛk n yeel a Korney t’a tʋm rapã yẽ nengẽ wã, a basame tɩ b kẽ zakẽ wã, “t’a reeg-b sãando.” (Tʋʋ. 10:23a) Tẽn-tʋmd a Pɩyɛɛr sẽn da yaa sakdã sẽn bãng Wẽnnaam sẽn da rat t’a maanã, a sɩngame n toeemd a tagsa wã.

10. Wãn to la a Zeova wilgd a nin-buiidã sore, la sogs-bʋs la d segd n sok d menga?

¹⁰ Hal n tãag rũndã, a Zeova ket n sõngda a nin-buiidã tɩ b bãngd a raabã bilf-bilfu. (Yel. 4:18) Ne a vʋʋsem sõngã maasem, a wilgda “tʋm-tʋmd sẽn tũud sɩd la sẽn tar yamã” sore. (Mat. 24:45) Sasa ninga, b tõe n toeema d sẽn da wʋmd bũmb sẽn be Wẽnnaam Gomdã pʋgẽ võor to-to, pa rẽ bɩ d sẽn da maand bũmb kẽer to-to wã. Rẽ wɛɛngẽ, yɩta sõma tɩ d sok d meng yaa: ‘M sakd n toeemda m tagsgã tɩ zems ne toeengã bɩ? Toeengã wɛɛngẽ, m sakd n tũuda sor ning Wẽnnaam vʋʋsem sõngã sẽn wilgdã bɩ?’

11, 12. A Pɩyɛɛr sẽn ta Sezaare wã, bõe la a maan-yã, la bõe la a bãng-yã?

¹¹ Wẽnnaam sẽn vẽneg a Pɩyɛɛr t’a yã bũmb ningã poore, a Pɩyɛɛr ne neb a wɛ n kẽng Sezaare vẽkembeoogã. Yaa koe-taasdb a tãabã a Korney sẽn tʋmã, ne Zope ‘saam-biis bãmb b yoob sẽn da yaa Zʋɩf-rãmba.’ (Tʋʋ. 11:12) A Korney sẽn da gũud a Pɩyɛɛrã yĩnga, a boola a “roagdb ne a zo-rãmb n tigmi.” B fãa tog n da yaa bu-zẽms neba. (Tʋʋ. 10:24) A Pɩyɛɛr maana bũmb a sẽn zɩ n tags t’a na n wa sak n maaname ye. A kẽe bu-zẽng ned sẽn da pa kẽ bãong zakẽ! A Pɩyɛɛr yeelame yaa: “Yãmb mii vẽeneg tɩ pa zems ne tõogã tɩ Zʋɩf naag bu-zẽng ned bɩ n kolg-a ye. Baasg zãnga, Wẽnnaam wilga maam tɩ m pa segd n bool ned tɩ rẽgd ye.” (Tʋʋ. 10:28) Masã, a Pɩyɛɛr bãngame tɩ Wẽnnaam sẽn vẽneg-a t’a yã bũmb ningã, pa sẽn na yɩlẽ bal n wilg-a rɩɩb ning buud a sẽn segd n dɩ wã ye. La yaa sẽn na yɩlẽ n sõng-a t’a bãng t’a pa segd n “bool ned [baa yaa bu-zẽng neda] tɩ rẽgd ye.”

¹² Neb nins fãa sẽn da tigim a Korney zakẽ wã da ratame n kelg a Pɩyɛɛr  sẽn tar n na n togs-bã. A Korney yeelame yaa: “Tõnd fãa bee Wẽnnaam taoor n na n kelg bũmb nins fãa a Zeova sẽn kõ noor tɩ fo togsã.” (Tʋʋ. 10:33) Ned sẽn dat n bãng n paas a Zeova zug sã n togs yãmb gom-kãensã, y manesem na n yɩɩ wãna? A Pɩyɛɛr goamã sɩngrẽ, a yeela bũmb sẽn tar pãng wʋsgo. A yeelame yaa: “Masã, mam bãnga vẽeneg tɩ Wẽnnaam pa bakd neda, la tɩ buud fãa pʋgẽ, ned ning sẽn zoet-a la a maand sẽn yaa tɩrg tata a yam.” (Tʋʋ. 10:34, 35) A Pɩyɛɛr bãngame tɩ Wẽnnaam sẽn get ninsaalbã to-to wã pa be ne b yĩn-kõbgo, b sẽn yitẽ, wall bũmb a taab ye. A Pɩyɛɛr kell n goma a Zeezi koe-moonegã yelle, a kũumã, la a vʋʋgrã yell ne-ba.

13, 14. a) A Korney ne bu-zẽmsã neb a taabã sẽn tuub n lebg kiris-nebã yʋʋmd 36 wilga bõe? b) Bõe yĩng tɩ d pa segd n get nebã sẽn yaa to-to wã n tik rẽ n kaood-b bʋʋdo?

¹³ Rẽ poore, bũmb sẽn da zɩ n maan n maane. Biiblã yetame t’a “Pɩyɛɛr sẽn wa n ket n gomdã,” vʋʋsem sõngã siga ‘bu-zẽmsã neb zugu.’ (Tʋʋ. 10:44, 45) Wẽnnaam Gomdã pʋgẽ, yaa zĩ-kãngã bal la b wilg tɩ vʋʋsem sõngã siga neb zut nand tɩ b reeg lisgu. A Pɩyɛɛr bãngame tɩ yaa kaset sẽn wilgd tɩ Wẽnnaam sakame tɩ nin-kãensã sẽn yaa bu-zẽmsã na n naag a nin-buiidã. Rẽ n so t’a ‘kõ noor tɩ b lis-ba.’ (Tʋʋ. 10:48) Nin-kãensã sẽn da yaa bu-zẽmsã sẽn tuub n lebg kiris-nebã yʋʋmd 36 wilgame tɩ wakat ning Wẽnnaam sẽn da yãk Zʋɩf-rãmbã bal tɩ b yaa a nin-buiidã taa a tɛka. (Dãn. 9:24-27) Wakat kãnga, a Pɩyɛɛr lʋɩɩ taoor n tall ‘Rĩungã kʋɩlen-biig’ a tãab-n-soabã sẽn yaa yaoolem soabã n tʋme. (Mat. 16:19) Kʋɩlen-bi-kãng paka sor tɩ bu-zẽmsã neb sẽn pa kẽ bãongã lebg kiris-neb sẽn paam vʋʋsem sõngã zaeebo.

¹⁴ Tõnd sẽn yaa Rĩungã koe-moondbã, d miime tɩ “Wẽnnaam pa bakd ned ye.” (Rom. 2:11) A raabã yaa tɩ “nebã buud fãa paam fãagre.” (1 Tɩm. 2:4) Dẽnd d pa segd n get nebã sẽn yaa to-to wã, n tik rẽ n kaood-b bʋʋd ye. Tʋʋmd ning a Zeezi sẽn kõ tõndã yaa d kõt kaset sõma Wẽnnaam Rĩungã wɛɛngẽ. Rẽ baoodame tɩ d moon ned buud fãa koɛɛgã, n pa get a yĩn-kõbgo, a sẽn yitẽ, a sẽn yaa to-to, pa rẽ bɩ a tũudum ye.

15, 16. Bõe yĩng tɩ Zʋɩf-rãmb kẽer sẽn da yaa kiris-neb sũur sãam ne a Pɩyɛɛre, la bõe la a yeel n wilg a sẽn sak n lis bu-zẽmsã nebã võore?

¹⁵ Sãmbg kae t’a Pɩyɛɛr da rata ne a sũur fãa n tɩ togs bũmb ning sẽn maanã. Rẽ n so t’a rɩk Zerizalɛm sore. La yaa vẽeneg tɩ bu-zẽmsã neb sẽn ‘sak Wẽnnaam gomdã’ kibarã reng-a-la Zerizalɛm. A Pɩyɛɛr sẽn ta Zerizalɛmmã poor bilf bala, “neb nins sẽn yet tɩ bu-zẽmsã segd n kẽe bãongã sɩnga no-koeemd wẽeb ne-a.” B sũy ra sãama wʋsgo, tɩ bala a Pɩyɛɛr “kẽnga neb sẽn pa kẽ bãong zakẽ n dɩ ne-ba.” (Tʋʋ. 11:1-3) Pa bu-zẽmsã neb sẽn da tuub n lebg kiris-nebã la yellã ye. B ra tagsdame tɩ bu-zẽmsã neb me ra segd n tũu a Moyiiz tõogã. Rat n yeel tɩ b ra segd n kẽe bãongo, n yaool n lebg kiris-neba. Yaa vẽeneg tɩ ra yaa toog ne a Zeezi karen-biis kẽer sẽn da yaa Zʋɩf-rãmb tɩ b bas a Moyiiz tõogã tũubu.

 ¹⁶ Bõe la a Pɩyɛɛr yeel n na n wilg a sẽn sak n lis bu-zẽmsã nebã võore? Sẽn zems ne Tʋʋm 11:4-16, a sõdga bũmb a naas sẽn yɩ kaset tɩ ra yaa Wẽnnaam raab la woto: 1) Wẽnnaam sẽn vẽneg-a t’a yã bũmb ningã (Vɛrse a 4-10); 2) Wẽnnaam sẽn tũnug ne a vʋʋsem sõngã n yeel-a t’a maanã (Vɛrse 11, 12); 3) malɛkã sẽn kẽng a Korney nengẽ wã (Vɛrse 13, 14); la 4) vʋʋsem sõngã sẽn sig bu-zẽmsã neb zutã. (Vɛrse 15, 16) A Pɩyɛɛr soka sokr sẽn tar pãng wʋsg a goamã baasgẽ. A sokame yaa: “Woto yĩnga, Wẽnnaam sã n kõ bãmb me [bu-zẽmsã neb sẽn lebg tẽedbã] kũun ning [vʋʋsem sõngã] a sẽn kõ tõnd [Zʋɩf-rãmbã] sẽn tẽ Zu-soab a Zeezi Kiristã, mam yaa ãnda, n tõe n gɩdg Wẽnnaam?”—Tʋʋ. 11:17.

17, 18. a) Zʋɩf-rãmb kẽer sẽn da yaa kiris-nebã sẽn wʋm a Pɩyɛɛr sẽn yeelã poore, b ra segd n maana bõe? b) Bõe yĩng tɩ yɩl n kell n kogl zems-n-taar ning sẽn be d tigimsã pʋsẽ wã tõe n yɩ toogo, la yɩta sõma tɩ d sok d meng sogs-bʋse?

¹⁷ Zʋɩf-rãmb kãens sẽn wʋm a Pɩyɛɛr sẽn yeelã poore, b ra segd n yãka b sẽn na n maane. Rẽ yĩnga, b ra na n basa bu-zẽmsã neb sẽn lebg kiris-nebã bʋʋd kaoobo, la b reeg-b sãand bɩ? Kibarã pʋgẽ, b yetame yaa: “B [tẽn-tʋmdbã, la Zʋɩf-rãmb nins sẽn da yaa kiris-nebã] sẽn wʋm gom-kãensa wã, b pa le kɩɩs ye. La b ra pẽgda Wẽnnaam n yetẽ: ‘Dẽnd Wẽnnaam paka sor tɩ bu-zẽmsã me tõe n tek yam n kos sugr n wa paam vɩɩm.’” (Tʋʋ. 11:18) B sẽn sak n toeem b tagsa wã, sõngame tɩ b kell n kogl tigingã nebã zems-n-taarã.

¹⁸ Kiris-neb hakɩɩkã “sẽn yit tẽnsã fãa pʋsẽ, buud toɛy-toɛyã fãa pʋsẽ, la sẽn gomd buud-goamã fãa” wã yĩngã, yɩl n kell n kogl zems-n-taar ning sẽn be b sʋk rũndã-rũndã wã tõe n yɩɩ toogo. (Vẽn. 7:9) Rẽ n so tɩ tigims wʋsg pʋsẽ, neb yĩn-kõbgo, b minimd la b bũmb a taab sẽn yaa toor-toor n be be. Yɩta sõma tɩ d sok d meng yaa: ‘M sũurã pʋgẽ, m yɩta tao-tao n kao m taabã bʋʋdo, tɩ bala b yaa toor ne maam bɩ? Dũniyã pʋgẽ, ned fãa tagsdame t’a yɩɩda a to. Rẽ yĩnga, m yãka yam n pa na n tol n tall manesem a woto buud ne m tẽed-n-taasã bɩ?’ Tẽeg-y bũmb ning sẽn paam a Pɩyɛɛre (Sefaas), bu-zẽmsã neb nins sẽn yɩ pipi n tuub n lebg kiris-nebã poore. Neb a taabã sẽn da pa nand bu-zẽmsã neb sẽn lebg kiris-nebã yĩnga, a Pɩyɛɛr ‘welga a meng’ ne-ba, la a Poll remsa a tagsgã. (Gal. 2:11-14) D segd n maana gũusg wʋsgo, n da wa tagsdẽ tɩ d yɩɩda d taabã ye.

19. Zʋɩf-rãmb nins sẽn da yaa kiris-nebã sẽn be Ãntiyoosã sɩngame n moond ãnd-dãmb koɛɛgã, la baasa wãna?

¹⁹ A Zeezi karen-biisã sɩngame n moond bu-zẽmsã neb sẽn da pa kẽ bãongã koɛɛgã bɩ? Ad bũmb ning sẽn wa n maan kaoosg zugẽ, Ãntiyoos sẽn be Siiri wã. d Tẽn-kãng pʋgẽ, Zʋɩf-rãmb wʋsg n da be be, la Zʋɩf-rãmbã ne bu-zẽmsã neb sʋka, beemã ra pa waoog ye. Dẽnd Ãntiyoos soolmẽ wã, b ra tõe n moona bu-zẽmsã neb koɛɛgã sõma. Yɩɩ beenẽ la Zʋɩf-rãmb kẽer sẽn da yaa kiris-nebã sɩng “neb nins sẽn gomd Gɛrkã” moonego. (Tʋʋ. 11:20) Pa Zʋɩf-rãmb nins sẽn gomd Gɛrkã bal la b moon koɛɛgã ye. B moona bu-zẽmsã neb sẽn pa kẽ bãongã me koɛɛgã. A Zeova ninga tʋʋmdã barka. “Neb wʋsg lebga tẽedba.”—Tʋʋ. 11:21.

20, 21. Wãn to la a Barnabaas wilg t’a yaa sik-m-meng soaba, la wãn to la d tõe n dɩk a togs-n-taar koɛɛgã mooneg pʋgẽ?

²⁰ Sẽn na yɩl n taas nin-kãensã sẽn da wõnd b segl n saame wã koɛɛgã, Zerizalɛm tigingã neb tʋma a Barnabaas Ãntiyoose. Neb wʋsg sẽn da kegld koɛɛgã yĩnga, a Barnabaas a yembr ra pa na n tõog tʋʋmdã ye. A Barnabaas sẽn yãk a Soll t’a na n tɩ sõng-a n moon nin-kãensã koɛɛgã ra zemsame, bala a Soll ra na n wa lebga tẽn-tʋmd buud fãa neb yĩnga. (Tʋʋ. 9:15; Rom. 1:5) Rẽ yĩnga, a Barnabaas ra na n baoome n wags ne a Soll bɩ? A Barnabaas yɩɩ sik-m-meng soaba, n sak n deeg tɩ pa bũmba fãa la a tõe n maan ye. A yãka yam n na n kẽng Tars n tɩ gẽes a Solle. A sẽn yã-a wã, a tall-a lame n kẽng Ãntiyoos t’a na n tɩ sõng-a. B naaga taab n keng beenẽ tigingã neb tẽebo. B maana woto yʋʋmd tõre.—Tʋʋ. 11:19-26a.

²¹ Koɛɛgã mooneg pʋgẽ, wãn to la d tõe n dɩk a Barnabaas togs-n-taar sik-m-mengã wɛɛngẽ? D pãngã la d minimã yaa toor-toore. Wala makre, nina tõe n tara minim zak-zak moonegã wɛɛngẽ, wall n tõe n tũnug ne segb buud fãa n taas ned koɛɛgã. La sã n yaa lebg n tɩ kaag neda, bɩ n sɩng Biibl zãmsg ne ned yaa toog ne-a. Yãmb sã n dat n paam minim n paas koɛɛgã mooneg nens kẽer wɛɛngẽ, bɩ y kos neb a taabã sõngre. Y sã n maan woto, y koɛɛgã mooneg na n woma biisi, y sũ-noogã na n paasame me.—1 Kor. 9:26.

22, 23. Bõe la Ãntiyoos saam-biisã maan n wilg tɩ b nonga b tẽed-n-taasã, la wãn to la Wẽnnaam nin-buiidã rɩkd b togs-n-taar rũndã-rũndã?

²² Yɩɩ Ãntiyoos la b bool “karen-biisã tɩ kiris-neb pipi.” (Tʋʋ. 11:26b) Wẽnnaam sẽn kõ-b yʋʋr ningã kell n zemsa kɛpɩ, bala nin-kãens wilgame tɩ b rat n dɩka Kiristã togs-n-taare. Bu-zẽmsã neb sẽn lebg kiris-nebã, rẽ yĩnga bãmb ne Zʋɩf-rãmbã ra wʋmda taab bɩ? Ad bũmb ning sẽn maan kom-kãseng sẽn zĩnd yʋʋmd 46 sasa. e Pĩnd wẽndẽ wã, komã ra namsda  nin-talsã wʋsgo, b sẽn da pa tar ligd bɩ rɩɩb b sẽn bĩng kɛɛngã yĩnga. Komã sasa, Zʋɩf-rãmb nins sẽn da be Zide wã da rata sõngr rɩɩbã la bũmb a taab wɛɛngẽ, bala bãmb wʋsg ra yaa naong rãmba. D tẽed-n-taas nins sẽn da be Ãntiyoosã sẽn wʋm yellã, b ‘toola saam-biisã sẽn be Zide wã sõngre.’ Bu-zẽmsã neb sẽn da lebg kiris-nebã ra naaga d tẽed-n-taas nins sẽn da be Ãntiyoosã. (Tʋʋ. 11:29) B sɩd wilgame tɩ b nonga b tẽed-n-taasã wʋsgo!

²³ Yaa woto me rũndã-rũndã, a Zeova nin-buiidã sʋka. D sã n wʋm tɩ d tẽed-n-taasã rata sõngre, tɩ yaa tõnd tẽngẽ wã pa rẽ bɩ zĩig a to, d maanda d sẽn tõe fãa n na n sõng-ba. Filiyall-dãmbã taoor lʋɩtb sula wã yɩta tao-tao n lugl sula neb sõngr sabab-wẽng sasa yĩnga, tɩ b na n ges tɩ d tẽed-n-taas nins sabab-wẽns sẽn paamã paam sõngre. Wala makre, sob-kãseng sẽn naag ne saag sasa, tẽn-digimdg sasa, la sabab-wẽns a taab sasa. Bũmb nins fãa d sẽn maand n sõngd d tẽed-n-taasã wilgdame tɩ d sɩd nonga taaba.—Zã 13:34, 35; 1 Zã 3:17.

24. Wãn to la tõnd me tõe n wilg tɩ d wʋmda a Zeova sẽn vẽneg a Pɩyɛɛr t’a yã bũmb ningã võore?

²⁴ Tõnd sẽn yaa kiris-neb hakɩɩkã, d miime tɩ tara yõod tɩ d bao n wʋm Wẽnnaam sẽn vẽneg a Pɩyɛɛr t’a yã bũmb ning a sẽn wa n be roogã yĩngr Zope wã võore. Wẽnnaam ning d sẽn tũudã pa bakd ned ye. A raabã yaa d kõt kaset sõma a Rĩungã wɛɛngẽ. Rẽ baoodame tɩ d moond ned buud fãa koɛɛgã, n pa get a yĩn-kõbgo, a sẽn yitẽ, a tarem wall a ziir ye. Rẽ wã, bɩ d modg n taas ned buud fãa koɛɛgã. Woto, bãmb me na n paam n tũ a Zeova.—Rom. 10:11-13.