SAK 24
“Keng f pɛlga!”
A Poll põsga bɛɛb sẽn soos n dat n maan-a wẽng nusẽ, la a tɩ gom a Feligs taoor n wilg t’a pa tar taal ye
Tika Tʋʋma 23:11–24:27
1, 2. Bõe yĩng tɩ b sẽn nams a Poll Zerizalɛmmã pa ling-a?
B SẼN tak a Poll n yiis neb kʋʋng sũy sẽn da yikã sʋk Zerizalɛmmã poore, b le tɩ kẽes-a-la bãens roogo. B sẽn da namsd tẽn-tʋmdã sẽn da tar yẽesem woto Zerizalɛmmã pa ling-a ye. B ra wilg-a lame tɩ “bãens roog ne tood” n gũud-a tẽn-kãngã pʋgẽ. (Tʋʋ. 20:22, 23) Baa ne a Poll sẽn da pa mi zu-loees nins takɩ sẽn da na n wa paam-a wã, a ra miime t’a na n kell n namsa a Zeezi yʋʋrã yĩnga.—Tʋʋ. 9:16.
2 Baa kiris-neb sẽn yaa no-rɛɛsdb n keoog a Poll n wilg-a tɩ b na n sẽb-a lame n “ning-a bu-zẽmsã neb nusẽ.” (Tʋʋ. 21:4, 10, 11) Sẽn nan pa kaoose, neb kʋʋng sẽn yaa Zʋɩf-rãmb n da rat n kʋ-a, tɩ rẽ poor bilfu, wõnda Sãnedrẽ wã neb sẽn da wẽed no-koɛɛmã ra rat n ‘tɛ-a lame n tõse.’ La masã, a bee bãens roogo, tɩ Rom sodaas ra gũud-a. Sẽn paase, b na n wa tall-a lame n kẽng bʋ-kaoodb a taab taoore, tɩ yɩ tɩlɛ t’a gom n wilg t’a pa tar taal ye. (Tʋʋ. 21:31; 23:10) Hakɩɩka, tẽn-tʋmdã ra rata raood kengre!
3. Tʋm-tʋmd sẽn tũud sɩd la sẽn tar yamã tũnugda ne bõe n kengd tõnd raood tɩ d ket n wɩngd ne koɛɛgã moonego?
3 Tõnd sẽn vɩ yaoolem wakatã, d miime tɩ “neb nins fãa sẽn dat n tũ Kirist Zeezi n vɩɩmd wẽn-sakr pʋgẽ wã me na n paama namsgo.” (2 Tɩm. 3:12) Sasa ninga, d rata raood kengre, sẽn na yɩl n wɩng ne koɛɛgã moonego. D sũur yaa noog wʋsgo, “tʋm-tʋmd sẽn tũud sɩd la sẽn tar yamã” sẽn tũnugd ne sɛbã b sẽn yiisdã la tigissã n taasd tõnd goam sẽn kengd raoodo, la sẽn zems b wakatã! (Mat. 24:45) A Zeova pʋlma tõnd tɩ bɛɛbã pa na n tõog n menes a nin-buiidã zãnga, la tɩ b pa na n tõog me tɩ koɛɛgã mooneg tʋʋmdã yals ye. (Eza. 54:17; Zer. 1:19) La bõe n paam tẽn-tʋmd a Polle? Rẽ yĩnga, a paama raood kengr n na n kell n moon koɛɛgã, baa ne namsgã bɩ? Sã n yaa rẽ, wãn to la a paam raood kengre, la a manesem yɩɩ wãna?
B sẽn sed taab n na n maan bũmb ningã pa tõog ye (Tʋʋma 23:11-34)
4, 5. Bõe la a Zeezi yeel n keng a Poll raoodo, la bõe yĩng tɩ ra yaa goam sẽn zems b wakate?
4 B sẽn yiis tẽn-tʋmd a Poll Sãnedrẽ wã taoorã vẽkembeoog yʋngo, a paama raood kengr wa a sẽn da ratã. Biiblã yeelame yaa: “Zu-soabã yalsa a Poll sɛɛgẽ n yeele: ‘Keng f pɛlga! Bala fo segd n kõo kaset Rom me wa fo sẽn kõ kaset n gom mam yell sõma Zerizalɛmmã.’” (Tʋʋ. 23:11) A Poll sẽn wʋm a Zeezi gom-kãensã sẽn keng a raoodã, a basa a yam t’a na n põsame. A ra miime t’a na n taa Rom, hal n kõ kaset a Zeezi zugu.
“Rap pis-naas la zak n solg n gũud n na n maan-a wẽnga.”—Tʋʋma 23:21
5 A Poll sẽn paam raood kengr ningã zemsa a wakate. Vẽkembeoogã bala, rap pis-naas ne zak “seda ne taab n wẽen n yeel tɩ b sã n pa kʋ a Poll n yaool n dɩ wall b yũ, bɩ kãab-wẽng zĩnd b zutu.” Zʋɩf-kãensã sẽn “sed ne taab n wẽen” n na n maan bũmb ningã wilgdame tɩ b sẽn da rat bal yaa b kʋ tẽn-tʋmd a Polle. B ra tẽedame tɩ b sã n pa tõog n pids b raabã, kãab-wẽng na n zĩnda b zugu. (Tʋʋ. 23:12-15) Maan-kʋʋdbã ne kãsem-dãmbã kõ-b-la sor tɩ b na n maan b sẽn yãk yam n na n maanã. La b raabã ra yaa b le tall a Poll n wa Sãnedrẽ wã taoore, n sok-a sogsg a taab n fees-a. B sẽn wa n tall-a n debd Sãnedrẽ wã taoorã, bɛɛb n soos n gũud-a n na n yõk-a n kʋ.
6. Ãnd n togs a Poll tɩ b rat n kʋ-a lame, la wãn to la rũndã-rũndã kom-bɩɩsã tõe n dɩk a Poll tãoã biigã togs-n-taare?
6 A Poll tãoã biigã wʋma bɛɛbã sẽn da magd n na n maan bũmb ningã, n tɩ togs a Polle. Tao-tao bala, a Poll yeela bi-bɩɩgã t’a tɩ togs Rom soda-naab a Kolood Lisiyas. (Tʋʋ. 23:16-22) Yaa vẽeneg t’a Zeova nonga kom-bɩɩs nins fãa sẽn tar raood n lʋɩɩsd a nin-buiidã raabã taoorã, la sẽn maand b sẽn tõe n fãa n teend Rĩungã tʋʋmã, wa a Poll tãoã biigã Biiblã sẽn pa vẽneg a yʋʋrã sẽn maanã.
7, 8. Bõe la a Kolood Lisiyas maan sẽn na yɩl n fãag a Polle?
7 A Kolood Lisiyas ra yaa sodaas tusr naaba. A sẽn wʋm tɩ neb n magd n na n kʋ a Pollã, a kõo noor tɩ b segl sodaas 470, rap sẽn zãad kãna, la wed-rʋʋdba, tɩ b na n tall a Poll ne yʋngã n yi Zerizalɛm n kẽng Sezaare. B sẽn ta Sezaare wã, sodaasã talla a Poll n kẽng guvɛrneer a Feligs taoore. a Sezaare ra yaa Zide sẽn yaa Rom soolmã n so wã na-tẽnga. Baa ne Zʋɩf-rãmb wʋsg sẽn da be be wã, bu-zẽmsã neb sõor n da yɩɩda. Bãan ning sẽn da be Sezaare wã ra yaa toor fasɩ. Zerizalɛm yaool n da pida ne zũnd-zãnde. Nebã ra kisa taaba, la b zabd taab tũudmã yĩnga. Zide sẽn da yaa Rom soolmã n so wã sodaasã biru-kãsengã ra bee Sezaare.
8 A Lisiyas gʋlsa lɛtr n bilg yɛlã sẽn yaa to-to n tool a Feligsi, wa sẽn zems Rom soolmã laloa wã. A Lisiyas wilga lɛtrã pʋgẽ t’a sẽn wa n bãng t’a Poll ra yaa Rom nedã, Zʋɩf-rãmbã sẽn da “segend n na n kʋ-a” wã, a fãag-a lame. A Lisiyas yeelame t’a pa yã bũmb a Poll nengẽ sẽn kɩt t’a “segd ne kũum wall bãens roog ye.” La tɩ Zʋɩf-rãmbã sẽn sed taab n dat n kʋ a Pollã yĩnga, a kɩtame tɩ b tall-a n kẽng guvɛrneer a Feligs taoore, tɩ yẽ me tõe n paam n kelg sẽn dõt-b a Pollã, la a kao bʋʋdã tɩ zemse.—Tʋʋ. 23:25-30.
9. a) Bõe n wilgd tɩ b maana b toog kae ne a Poll sẽn da yaa Rom tẽng-n-biig n tar dʋrwa-rãmba? b) Bõe yĩng tɩ d segd n tũnug ne dʋrwa nins d sẽn tarã tẽng ning pʋgẽ d sẽn be wã?
9 Bũmb nins fãa a Lisiyas sẽn gʋlsã ra yaa sɩd bɩ? Pa fãa n da yaa sɩd ye. Wõnda a ra rata yʋ-noog guvɛrneerã nifẽ. Pa a sẽn bãng t’a Poll yaa Rom nedã yĩng n kɩt t’a fãag-a ye. Sẽn paase, a Lisiyas pa togs a lɛtrã pʋgẽ t’a kɩtame tɩ b ‘sẽb a Poll ne bãens a yiibu,’ la t’a kõo noor tɩ b ‘pãb-a ne kalwaas n sok-a sogsg ye.’ (Tʋʋ. 21:30-34; 22:24-29) A Lisiyas sẽn maan woto wã, a maana a toog kae ne a Poll sẽn da yaa Rom ned n tar dʋrwa-rãmbã. Rũndã-rũndã me, a Sʋɩtãan tũnugda ne neb sẽn tar yẽesem wʋsg ziri tũudmã pʋgẽ n namsd Wẽnnaam nin-buiidã. B tõe n gɩdg-d lame meng tɩ d pa le tar sor n tũud Wẽnnaam ye. La wa a Polle, naoor wʋsgo, Wẽnnaam nin-buiidã tũnugda ne dʋrwa nins b sẽn tarã n paam koglgo, tẽng ning pʋgẽ b sẽn be wã.
‘M sũur nooma m sẽn na n gom yãmb taoor n paam n wilg tɩ m pa tar taalã’ (Tʋʋma 23:35–24:21)
10. B rõda a Poll t’a maana bõe?
10 B sẽn ta Sezaare wã, “b paga a Poll a Erood na-yirã,” n gũudẽ t’a rõatbã yi Zerizalɛm n wa. (Tʋʋ. 23:35) Rasem a nu poore, b waame. Ra yaa maan-kʋʋdb kãsem a Ananiyaas, gom-minim soab yʋʋr sẽn boond t’a Tɛrtull, la kãsem-dãmb sulli. A Tɛrtull sɩnga goam n pẽg a Feligs bũmb nins a sẽn da maand Zʋɩf-rãmbã yĩngã. A pẽg-a-la a sẽn da rat t’a sũur yɩ noog ne-a wã yĩnga. b Rẽ poore, a Tɛrtull sɩnga a Poll yell goama, n yeel t’a yaa wa “bã-loangdga, n wat ne tẽn-dãmbg buud toor-toor Zʋɩf-rãmbã fãa sẽn be dũniyã gill zugã sʋka. Sẽn paase, a yaa Nazarɛt nebã tũudum-paallã taoor soaba. A makame me n na n dẽgem wẽnd-doogã. Yaa rẽ la tõnd sẽn yõk-a wã.” Zʋɩf-rãmb a taabã me ra “naag n ningd a Poll taale, n yetẽ tɩ bõn-kãensã yaa sɩda.” (Tʋʋ. 24:5, 6, 9) B sẽn dõd a Poll bũmb ninsã ra tõe n kɩtame tɩ b kʋ-a. B yeelame t’a wata ne tẽn-dãmbgo, t’a yaa tũudum-paallã taoor soaba, la t’a rẽgemda wẽnd-doogã.
11, 12. Wãn to la a Poll wilg t’a pa tar taale, bũmb nins b sẽn da rõt-a wã wɛɛngẽ?
11 B waa n kõo a Poll sor t’a gome. A Poll goamã sɩngrẽ, a yeelame yaa: ‘M sũur nooma m sẽn na n gom yãmb taoor n wilg tɩ m pa tar taalã.’ A wilga vẽeneg t’a pa tar taal ye. Tẽn-tʋmd a Poll wilgame t’a pa rẽgem wẽnd-doogã, a leb n pa wat ne tẽn-dãmbg me ye. A yeelame tɩ yẽ yii Zerizalɛm, la tɩ yaa “yʋʋm wʋsg” loogr poor la a lebg n wa ne “kũun” n na n kõ kiris-neb nins sẽn da lebg naong rãmb komã yĩnga, la b sẽn da namsd-b b tũudmã yĩngã. A Poll wilga vẽeneg tɩ nand t’a kẽ wẽnd-doogã pʋgẽ, a ‘yɩlga a meng wa tõogã sẽn wilgã,’ la t’a ra modgdame “n dat n kell n tall sũur-kaset sẽn yaa sõma Wẽnnaam taoore, la ninsaalbã taoore.”—Tʋʋ. 24:10-13, 16-18.
12 La a Poll sak n deegame t’a tũuda sor ning bãmb sẽn boond tɩ tũudum-paallã, “n waoogd a yaab-rãmbã Wẽnnaam.” A wilgame n yɩlem me t’a tẽeda “bũmb nins fãa sẽn gʋls Tõogã pʋgẽ la No-rɛɛsdbã sɛbã pʋsẽ wã.” La wa a rõtbã, a ra tẽedame tɩ Wẽnnaam na n “vʋʋga nin-tɩrsã ne sẽn pa-b nin-tɩrsã me.” Rẽ poore, a Poll kosa a rõtbã tɩ b wilg kaset buud toor-toor sẽn wilgd t’a tara taale. A yeel-b lame yaa: “Bɩ neb nins sẽn be ka wã mens wilg b sã n yãa bũmb mam sẽn maan tɩ yaa wẽnga, m sẽn wa n yas Sãnedrẽ wã taoorã, sã n pa bõn-yɛngã mam sẽn zẽk m koɛɛg n togs mam sẽn wa n yas b sʋkã. M yeelame: ‘Yaa kũum vʋʋgrã yĩng la m sẽn yas yãmb taoor tɩ y kaood m bʋʋd rũndã wã!’”—Tʋʋ. 24:14, 15, 20, 21.
13-15. B sã n wa tall tõnd n kẽng tẽngã taoor dãmb taoor tɩ d na n gom d sẽn tẽedã yelle, bõe yĩng tɩ d tõe n yeel t’a Poll kõo tõnd mak-sõngo?
13 A Poll kõo tõnd mak-sõng d sẽn tõe n tũ, b sã n wa tall tõnd n kẽng tẽngã taoor dãmb taoor d tũudmã yĩnga, pa rẽ bɩ b sẽn rõt tõnd tɩ d wata ne tẽn-dãmbg wall tɩ d kɩɩsda goosneema wã noyã, bɩ tɩ d yaa tũudum-paall nebã yĩnga. A Poll pa gom no-noom goam n na n noog guvɛrneerã sũuri, wa a Tɛrtull ye. A kell n paa sɩɩ. A wilgame me t’a nanda a Feligs. A goma bũmb nins a sẽn tẽedã yell ne waoogre, la yɩɩ vẽeneg me. A Poll wilgame tɩ “Zʋɩf-rãmb sẽn yit Aazi soolmẽ wã” sẽn dõd-a t’a rẽgma wẽnd-doogã ra pa be, la tɩ b ra segd n kõ-a-la sor t’a yals b taoore, n kelg bũmb nins wɛɛngẽ b sẽn dõt-a wã.—Tʋʋ. 24:18, 19.
14 La sẽn tar yõod n yɩɩda, a Poll pa zoe rabeem n bas n pa gom bũmb nins a sẽn tẽedã yell ye. A talla raood n gom kũum vʋʋgrã yelle. Yaool n da yaa bõn-kãng n wa ne no-koɛɛm la bʋʋr wʋsg Sãnedrẽ wã neb sʋkã. (Tʋʋ. 23:6-10) A Poll sẽn wa n gomd bũmb nins a sẽn tẽedã yellã, a goma kũum vʋʋgrã yelle. Bõe yĩnga? Bala a Poll ra kõta kaset a Zeezi la a vʋʋgrã wɛɛngẽ. Neb nins sẽn da rõt-a wã yaool n da pa tẽed rẽ ye. (Tʋʋ. 26:6-8, 22, 23) Sãmbg kae tɩ b sẽn da namsd a Pollã, yaa a sẽn da tẽed kũum vʋʋgrã. Sẽn yɩɩd fãa, yaa a sẽn da tẽed t’a Zeezi vʋʋgame wã yĩnga.
15 Wa a Polle, tõnd me tõe n talla raood n kõ kasetã, la d paam me t’a Zeezi sẽn togs a karen-biisã goam ninsã kõ-d pãnga. A yeel-b lame yaa: “Nebã fãa na n kisga yãmb mam yʋʋrã yĩnga. La ned ning sẽn na n tõog toog hal n tãag saabã, a na n paama fãagre.” Rẽ yĩnga, d segd n maanda yɩɩr bũmb nins d sẽn na n yeelã wɛɛngẽ bɩ? Ayo. Bala a Zeezi pʋlma tõnd yaa: “B sã n wa tar yãmb n dabd bʋʋd zĩigẽ, bɩ y ra yãg n maand yɩɩr ne yãmb sẽn na n yeel bũmb ningã ye. Vʋʋsem sõngã sẽn na n wilg yãmb bũmb ning wakat kãngã, bɩ y togs rẽ. Bala pa yãmb mensã n gomd ye. Yaa vʋʋsem sõngã n gomda.”—Mark 13:9-13.
“Rabeem yõka a Feligs” (Tʋʋma 24:22-27)
16, 17. a) Bõe la a Feligs yeel a Poll bʋ-kaoorã sasa? b) Tõe tɩ yaa bõe yĩng la rabeem sẽn yõk a Feligsã, la bõe yĩng t’a ra kɩtdẽ tɩ b tallda a Poll n wat a nengẽ?
16 Pa pipi la woto guvɛrneer a Feligs sẽn wʋm kiris-nebã sẽn gomd b sẽn tẽed bũmb ninsã yell ye. Biiblã yetame yaa: “A Feligs sẽn mi bũmb wʋsg So-kãngã wɛɛngẽ wã [B sẽn gomd Sorã yellã, yaa pipi kiris-neb yell la b gomda], a kõ-b-la sor tɩ b looge, la a yeele: ‘Sodaas naab a Lisiyas sã n wa wa, m na wilg m sẽn yãk yam ning y yel-kãensã wɛɛngẽ.’ Rẽ poore, a yeela sodaas koabg naabã t’a kell n bas a Poll bãensã roogẽ, la a kõ-a lohorem bilfu, la t’a kõ a Poll nebã sor tɩ b sõng-a.”—Tʋʋ. 24:22, 23.
17 Rasem a wãn poore, a Feligs ne a pag a Dursill sẽn yaa Zʋɩf poakã tʋmame tɩ b tɩ bool a Polle, t’a wa gom “tẽ Kirist Zeezi wã sẽn dat n yɛɛlgã yell” tɩ b kelge. (Tʋʋ. 24:24) La a Poll sẽn wa n gomd “tɩrlem ne yõk-m-meng la bʋ-kaoorã sẽn watã yellã, rabeem yõka a Feligs,” bala tõe t’a Poll sẽn gom bũmb nins yellã kɩtame t’a sũur-kasetã ra ningd-a taale, tʋʋm-wẽns nins a sẽn maanã yĩnga. Rẽ n so t’a kɩt tɩ b yiis a Polle, n yeel-a yaa: “Loog masã, tɩ m sã n wa paam weere, m na le tʋm tɩ b bool-fo.” Rẽ poore, a Poll ne a Feligs le yãa taab naoor wʋsgo, la pa a Feligs sẽn da rat n bãng n paas sɩdã zug yĩng ye. A ra tẽedame t’a Poll na n kõ-a-la bũmb n madg a noorã.—Tʋʋ. 24:25, 26.
18. Bõe yĩng t’a Poll gom “tɩrlem ne yõk-m-meng la bʋ-kaoorã sẽn watã yellã” yell ne a Feligs la a pagã?
18 Bõe yĩng t’a Poll gom “tɩrlem ne yõk-m-meng la bʋ-kaoorã sẽn watã yellã” yell ne a Feligs la a pagã? D tẽeg tɩ b ra rat n bãnga “tẽ Kirist Zeezi” sẽn dat n yɛɛlga. A Poll sẽn da mi t’a Feligs ne a pagã ra tʋmda tʋʋm-wẽnsã, la tɩ b yaa nen-kɛglem la zãmb dãmbã yĩnga, a wilg-b-la Wẽnnaam sẽn baood tɩ ned sẽn dat n lebg a Zeezi karen-biig maan vẽenega. A Poll sẽn togs goam ninsã wilgdame t’a Feligs ne a pagã sẽn da vɩ to-to wã pa zems ne Wẽnnaam noyã sẽn yaa tɩrsã ye. Rẽ ra segd n sõng-b lame tɩ b bãng tɩ Wẽnnaam na n kaoo ninsaal buudã fãa bʋʋdo, sẽn zems ne a tagsa wã, a goamã la a tʋʋm-tʋmdɩ wã, la tɩ yaa bʋ-kaoor-kãng n tar yõod n yɩɩd b sẽn na n kao a Poll bʋʋdã. Dẽnd pa lingr la “rabeem” sẽn yõk a Feligsã ye!
19, 20. a) Koɛɛgã mooneg sasa, d manesem segd n yɩɩ wãn ne neb nins sẽn maand wa b rat n bãnga sɩdã, n yaool n pa rat n bas tʋʋm-wẽnsã? b) Bõe n wilgd t’a Feligs ra pa a Poll zoa hakɩɩka?
19 Koɛɛgã mooneg sasa, d tõe n sega neb sẽn yaa wa a Feligs. Sɩngrẽ wã, b tõe n maana wa b rat n bãnga sɩdã n paase, n yaool n pa rat n sak Wẽnnaam n toeem b sẽn vɩ to-to wã ye. D segd n kell n maana gũusgu, d sã n wa sõngd neb a woto buudu. La wa a Polle, d tõe n sõng-b lame tɩ b bãng Wẽnnaam noyã sẽn yaa tɩrsã ne waoogre. Tõe tɩ bũmb nins b sẽn na n bãng Biiblã pʋgẽ wã na n kɩtame tɩ b toeeme. La sã n wa lebg vẽeneg tɩ b pa rat n bas bũmb nins a Zeova sẽn kisã maanego, d pa na n modg-b tɩ b toeem ye. D na n ket n baooda neb nins sẽn sɩd rat n bãng sɩdã.
20 Biiblã sõngda tõnd tɩ d bãng bũmb nins sẽn sɩd da be a Feligs sũurẽ wã. A yetame yaa: “Yʋʋm a yiib loogr poore, a Feligs sigame t’a Porsius Fɛstus ledg-a. La a Feligs sẽn da rat n noog Zʋɩf-rãmbã sũurã yĩnga, a basa a Poll bãensã roogẽ.” (Tʋʋ. 24:27) A Feligs ra pa a Poll zoa hakɩɩk ye. A Feligs ra miime tɩ neb nins sẽn da tũud “Sorã” pa neb sẽn wat ne tẽn-dãmbgo, pa rẽ bɩ sẽn dat tɩ b taabã maan wa bãmb ye. (Tʋʋ. 19:23) A Feligs ra miime me t’a Poll pa kɩɩs Rom soolmã laloa baa a yembr ye. La a kell n basa tẽn-tʋmdã bãens roogẽ, a “sẽn da rat n noog Zʋɩf-rãmbã sũurã yĩnga.”
21. A Porsius Fɛstus sẽn wa n lebg guvɛrneerã, bõe n paam a Polle, la gom-bʋs n da ket n kõt-a pãnga?
21 Wa d sẽn yã Tʋʋm sak 24 yaoolem vɛrse wã pʋgẽ wã, a Porsius Fɛstus sẽn wa n ledg a Feligs n lebg guvɛrneerã, a Poll ra ket n bee bãens roogẽ. Rẽ tɛka, b talla a Poll n kẽng nanambs toor-toor taoore. Hakɩɩka, b talla tẽn-tʋmdã sẽn da tar raoodã n kẽng “rĩm-dãmb la guvɛrneer-dãmb” taoore. (Luk 21:12) Wa d sẽn na n yã wã, kaoosg zugẽ, a Poll wa n kõo kaset a wakatẽ rĩm ning sẽn da tar pãng n yɩɩdã taoore. Zu-loe-kãensã fãa sasa, a Poll tẽebã pãng zɩ n boog ye. Sãmbg kae t’a Zeezi sẽn da togs a Poll goam ninsã ra ket n kõt-a-la pãnga. A Zeezi ra yeel-a lame yaa: “Keng f pɛlga!”
a Ges-y zĩ-gũbrã: “ A Feligs: Zide tẽngã guvɛrneere.”
b A Tɛrtull pẽga a Feligs a sẽn kɩt tɩ “bãan hakɩɩkã” be soolmã pʋgẽ wã. La togs sɩdã, a Feligs sẽn wa n yaa Zide guvɛrneerã, nen-kɛglmã yɩɩ wʋsg n yɩɩg guvɛrneer-dãmb a taabã sẽn deng-a wã sasa, hal n tãag wakat ning Zʋɩf-rãmbã sẽn yik n zab ne Rom soolmã nebã. Sẽn paase, a sẽn yeel tɩ Zʋɩf-rãmbã pʋʋsda a Feligs “bark wʋsg” ne bũmb nins a sẽn maan n kõ-bã pa sɩd ye. La sɩd-sɩda, Zʋɩf-rãmbã fãa la bal ra kisa a Feligsi, a sẽn da yaa na-toaagã yĩnga, tɩ b sã n da wilg b sũ-pa-noaang me, a ra kɩtdame tɩ b sɩbg-b ne toolem.—Tʋʋ. 24:2, 3.
