1, 2. a) Yel-bʋg pʋgẽ la a Poll ra be-yã? b) A Poll sẽn kos t’a Sezaar meng ges a yellã wata ne sok-bʋgo?

 SODAAS n da gũud a Poll a sẽn wa n be Sezaare wã. Yʋʋm a yiib sẽn deng rẽ, a sẽn wa n lebg n wa Zide wã, rasem a wãn pʋgẽ, Zʋɩf-rãmbã baoo hal naoor a tãab bɩ sẽn yɩɩd rẽ n na n kʋ-a. (Tʋʋ. 21:27-36; 23:10, 12-15, 27) Hal n tãag masã, a bɛɛbã pa tõog n kʋ-a ye. La b pa koms raood n bas ye. A Poll sẽn wa n bãng tɩ b tõe n le ning-a-la a bɛɛbã nusẽ wã, a yeela Rom guvɛrneer a Fɛstus yaa: “Mam kotame t’a Sezaar meng ges yel-kãngã yelle!”—Tʋʋ. 25:11.

² A Poll sẽn kos tɩ Rom naabã ges a yellã ra zemsa ne a Zeova raabã bɩ? Sokrã leoor tara yõod ne tõndo, bala d kõta kaset Wẽnnaam Rĩungã wɛɛngẽ yaoolem wakat kãensã. D ratame n bãng a Poll sã n kõo tõnd mak-sõng d sẽn tõe n tũ, d sã n wa ‘gomd n teend koe-noogã, la d sã n wa gomd bʋ-kaoodb taoor sẽn na yɩl n paam sor n moon koe-noogã.’—Fili. 1:7.

3, 4. a) Bõe yĩng tɩ Zʋɩf-rãmbã kos tɩ b tall a Poll n wa Zerizalɛm, la wãn to la a Poll põse? b) Wãn to la a Zeova sõngd a nin-buiidã rũndã-rũndã, wa a sẽn sõng a Pollã?

³ A Fɛstus sẽn wa n lebg Zide guvɛrneerã, rasem a tãab poore, a kẽnga Zerizalɛm. a Beenẽ, a wʋma maan-kʋʋdbã taoor dãmb ne Zʋɩf-rãmbã nin-kãsemsã sẽn dõd a Poll t’a tʋma tʋʋm-beedã. B ra miime tɩ Rom nebã ratame t’a Fɛstus modg tɩ laafɩ kell n zĩnd bãmb ne Rom nebã sʋka, la ne Zʋɩf-rãmbã fãa sʋka. Rẽ n so tɩ b kos a Fɛstus t’a maan bũmb n kõ-ba. B kos-a lame t’a kɩt tɩ b tall a Poll n wa Zerizalɛm t’a kao a bʋʋdo. La b sẽn kos a Fɛstus bũmb ningã pa yɩ ne yam-sõng ye. B ra magdame n na n solg n gũ a Poll n kʋ, sor ning sẽn yit Sezaare n debd Zerizlɛmmã zugu. A Fɛstus pa sak b kosgã ye. A yeel-b lame yaa: “Woto wã, bɩ neb nins sẽn yaa taoor dãmb yãmb sʋkã . . . tũ maam [n kẽng Sezaare] tɩ sã n mikame t’a sɩd maana bũmb sẽn yaa wẽng bɩ b togs a taoore.” (Tʋʋ. 25:5) So-kãngã yɛsa, a Poll põsame.

 ⁴ A Poll zu-loeesã fãa sasa, a Zeova tũnuga ne Zu-soab a Zeezi Kirist n sõng-a. D tẽeg tɩ vẽnegr pʋgẽ, a Zeezi yeela a Poll yaa: “Keng f pɛlga!” (Tʋʋ. 23:11) Rũndã-rũndã, Wẽnnaam nin-buiidã maooda ne zu-loees buud toor-toore, b namsd-b lame me. A Zeova pa kogend tõnd ne zu-loɛɛg buudã fãa ye. La a kõt-d-la yam la pãng tɩ d tõogd toogo. D tõe n basa d yam tɩ d Wẽnnaamã sẽn nong-dã na n kell n kõo tõnd “pãng ning sẽn yɩɩd ninsaal rẽndã.”—2 Kor. 4:7.

5. Wãn to la a Fɛstus kao a Poll bʋʋdo?

⁵ Rasem a wãn poore, a Fɛstus “zĩnda bʋʋdã kaoob geer zug” Sezaare. b A Poll ne a rõatbã ra yasa a taoore. Bɛɛbã rõda a Poll t’a tʋma tʋʋm-beedo. Rẽ n so t’a Poll leok-b yaa: “Mam pa maan bũmb n kɩɩs Zʋɩf-rãmbã Tõogã, wall n paoog wẽnd-doogã, bɩ n kɩɩs a Sezaar ye.” Tẽn-tʋmdã ra pa tar taale, b ra segd n yiis-a-la bãensã roogẽ me. Bõe la a Fɛstus maane? A sẽn da rat n noog Zʋɩf-rãmbã sũurã yĩnga, a soka a Poll yaa: “Fo rat n kẽnga Zerizalɛm tɩ b tɩ kao fo bʋʋd yel-kãensã wɛɛngẽ mam taoor bɩ?” (Tʋʋ. 25:6-9) A sẽn da rat t’a Poll maan bũmb ningã pa yam tʋʋmd ye! A Poll sã n da sak n leb Zerizalɛm tɩ b tɩ kao a bʋʋdo, yaa a rõatbã n da na n lebg a bʋ-kaoodba. La yaa vẽeneg tɩ b ra na n kʋ-a lame. Sẽn da pak a Fɛstus n tɩ yɩɩd yaa a noog nin-buiidã sũuri, la pa a maan sẽn yaa tɩrg ye. Yʋʋm a wãn sẽn deng rẽ, guvɛrneer a Põns Pɩlat ra maana a Zeezi bũmb a woto buudu. (Zã 19:12-16) Rũndã-rũndã me, bʋ-kaoodb tõe n kaoo bʋʋd kɛgre, sẽn na yɩl n noog  nin-buiidã sũuri. Dẽnd bʋ-kaoodb sẽn mi n kao Wẽnnaam nin-buiidã bʋʋd kɛgrã pa lingr ye.

6, 7. Bõe yĩng t’a Poll kos t’a Sezaar meng ges a yellã, la rẽ sõngda kiris-neb hakɩɩkã tɩ b bãng bõe?

⁶ A Fɛstus sẽn da rat n noog Zʋɩf-rãmbã sũurã, ra tõe n yɩɩ sabab tɩ b kʋ a Polle. Rẽ n so t’a Poll tik dʋrwa nins a sẽn tar a sẽn yaa Rom tẽng-n-biigã yĩngã n yeel a Fɛstus yaa: “Mam yasa a Sezaar bʋ-kaoor geerã taoore, zĩig ning b sẽn segd n kao mam bʋʋdã. Mam pa maan Zʋɩf-rãmbã wẽng ye. Yãmb meng bãnga bõn-kãng vẽeneg masã. . . . Mam kotame t’a Sezaar meng ges yel-kãngã yelle!” Naoor wʋsg ned sã n da kos bũmb a woto buudu, a pa tõe n lebs a noorã poorẽ ye. A Fɛstus yeel-a-la vẽeneg yaa: “Fo sẽn dat t’a Sezaar kao fo bʋʋdã, yaa a Sezaar n na n kao fo bʋʋdã.” (Tʋʋ. 25:10-12) A Poll sẽn kos t’a Sezaar meng ges a yellã, a wilga kiris-neb hakɩɩkã b sẽn segd n maane, b sã n wa be yell a woto buud taoore. Bɛɛbã sã n wa rat n “tũnug ne tõogã n wa ne zu-loeese,” tõnd a Zeova Kaset rãmbã baooda bʋ-kaoodbã sõngre, sẽn na yɩl n ket n moond koɛɛgã. c—Yɩɩn. 94:20.

⁷ B paga a Poll bãens roog yʋʋm a yiibu, baa ne a sẽn da pa tar taalã. Rẽ poore, b kõ-a-la sor t’a na n kẽng Rom n tɩ gom n wilg t’a pa tar taal ye. La nand t’a kẽnge, rĩm a to n da rat n yã-a.

8, 9. Bõe yĩng tɩ rĩm a Agripa kẽng Sezaare n na n tɩ pʋʋs a Fɛstusi?

⁸ A Fɛstus sẽn wʋm a Poll sẽn kos t’a Sezaar meng ges a yellã, rasem a wãn poore, rĩm a Agripa ne a tão a Berenis waame “n na n pʋʋs” guvɛrneer-paallã. d Rom nebã wakatẽ, b sã n da yãk ned t’a lebg guvɛrneere, tẽngã taoor dãmb ra wae n kẽnd n kaagd-a lame. A Agripa sẽn kẽng n tɩ pʋʋs a Fɛstus b sẽn da yãk t’a lebg guvɛrneerã yĩnga, a ra baoodame n na n yõg zood ne-a tɩ wa naf-a kaoosg zugẽ.—Tʋʋ. 25:13.

⁹ A Fɛstus goma a Poll yell ne a Agripa, tɩ kɩt t’a Agripa rat n sõs ne a Polle. Vẽkembeoogã, nanambs a yiibã zĩnda bʋʋdã kaoob geer zug n na n kao a Poll bʋʋdo. La a Poll goamã yɩɩ nin-buiidã noog wʋsg n yɩɩd a Fɛstus ne a Agripa sẽn nag ne wilg-m-meng n wa kẽ bʋʋdã kaoob roogẽ wã.—Tʋʋ. 25:22-27.

10, 11. Wãn to la a Poll wilg t’a nanda rĩm a Agripa, la bõe la a yeel tʋʋm nins a sẽn tʋm pĩndã wɛɛngẽ?

¹⁰ A Poll pʋʋsa rĩm a Agripa barka, a sẽn paam tɩ yaa yẽ taoor la a na n gom n wilg t’a pa tar taalã. Bala a ra miime tɩ rĩmã mii Zʋɩf-rãmbã minimdã la b no-koɛɛmã sõma. Rẽ poore, a Poll goma a sẽn yaa ned ningã yelle. A yeelame yaa: “Mam da yaa Fariziyẽ, la d sẽn segd n tũ Wẽnnaam  to-to wã wɛɛngẽ, Fariziyẽ-rãmbã n yaa dem-dem n yɩɩd Zʋɩf-rãmb a taabã.” (Tʋʋ. 26:5) A Poll sẽn wa n yaa Fariziyẽ wã, a ra gũuda Mesi wã waoongo. A sẽn lebg kiris-ned masã wã, a talla raood n wilg tɩ yaa a Zeezi Kirist la Mesi ning b sẽn da gũudã. Dẽnd a Poll yeela a Agripa tɩ yaa a sẽn moond pʋleng Wẽnnaam sẽn da pʋlem tɩ paam pidsgã yĩng la b sẽn kaood a bʋʋdã. Yaool n da yaa pʋleng yẽ ne a roatbã fãa sẽn tẽede. A Agripa sẽn kelg a Pollã poore, a ra ratame n maneg n kelg a Poll sẽn da tar n na n togse. e

¹¹ A Poll tẽega a sẽn wa n namsd kiris-nebã ne toolmã yell n yeel yaa: “Sã n yaa ne maam, mam da kɩsa sɩd tɩ m segd n maana m sẽn tõe fãa n kɩɩs Nazarɛt rao a Zeezi. . . . Mam sũurã sẽn da kãbd ne-bã [a Zeezi karen-biisã] yĩnga, m kẽnga hal baa tẽns a taab pʋsẽ n tɩ nams-ba.” (Tʋʋ. 26:9-11) A Poll pa zẽn yɛlã ye. Neb wʋsg ra miime t’a namsa Kiris-nebã ne toolem. (Gal. 1:13, 23) Tõe t’a Agripa soka a meng yaa: ‘Bõe n kɩt tɩ ned a woto toeem n lebg kiris-neda?’

12, 13. a) Bõe la a Poll yeel a sẽn tuub n lebg kiris-nedã wɛɛngẽ? b) A Poll sẽn yeel t’a ra yaa wa ned sẽn “tãood bãngã” võor yaa bõe?

¹² A Poll goam nins sẽn pʋgdã leokda sok-kãnga: “Mam wa n dabda Damaase, maan-kʋʋdbã taoor dãmb sẽn kõ maam tõog la b tʋm maam tɩ m tɩ maan woto be wã yĩnga. M Dĩma, m sẽn wa n be sorẽ wĩnto-sʋk sẽnese, m yãa vẽenem pãng sẽn yɩɩd wĩntoogã vẽenem sẽn yi saasẽ, n yãg n bui maam ne neb nins sẽn da togd sor ne maamã. La tõnd fãa sẽn wa n lʋɩ  tẽngã, m wʋma koɛɛg sẽn yet maam ne Ebre buud-gomdã yaa: ‘Solle, Solle, bõe yĩng tɩ fo namsd maam? Fo sẽn zabd ne maamã, fo pogenda f menga.’ La mam sokame: ‘Zu-soaba, yãmb yaa ãnda?’ Tɩ Zu-soabã yeele: ‘Mam yaa a Zeezi, fo sẽn namsd a soabã.’” f—Tʋʋ. 26:12-15.

¹³ Nand tɩ vẽenemã yi saasẽ n yãg n bʋɩ a Pollã, a ra yaa wa ned sẽn “tãood bãnga.” We-rũng sã n tãood bãn-sɩleng noore, a na n pogla a menga. Woto me, a Poll ra pogla a meng tẽebã wɛɛngẽ, a sẽn da namsd kiris-nebã n pa rat tɩ b maan Wẽnnaam daabã yĩnga. A Zeezi sẽn vʋʋg n vẽneg a meng ne a Poll Damaas sorã zugã kɩtame tɩ nin-kãngã sẽn da yaa pʋ-peelem soabã la ned sẽn be zɩɩlem pʋgẽ wã toeem a tagsa wã.—Zã 16:1, 2.

14, 15. Bõe la a Poll yeel a sẽn toeem a sẽn da vɩ to-to wã wɛɛngẽ?

¹⁴ Sɩd me, a Poll toeema a sẽn da vɩ to-to wã. A yeela a Agripa yaa: “Mam pa kɩɩs vẽnegrã sẽn yi saasẽ wã ye, rĩm a Agripa. La mam sɩnga ne sẽn be-b Damaasã, n yaool n ta sẽn be-b Zerizalɛmmã nengẽ, la Zide soolmã tõre, n paas bu-zẽmsã sʋk me, n da taasd koɛɛg ning sẽn yet tɩ b segd n teka yam n kos sugri, la b tũ Wẽnnaam, n tʋm tʋʋm sẽn wilgd tɩ b teka yam n kos sugrã.” (Tʋʋ. 26:19, 20) Na maan yʋʋma, a Poll ra tʋmda tʋʋmd ning a Zeezi Kirist sẽn kõ-a wã, a sẽn wa n vẽneg a meng ne-a t’a yã-a Damaas sorã zugã. Rẽ woma bi-bʋse?  Neb nins sẽn da sakd n kelgd koe-noogã a Poll sẽn da moondã ra tekda yam n kot sugri, n basd b manesem-wẽnsã la b sɩngd Wẽnnaam raabã maanego. Nin-kãensã ra sakda tẽngã laloa wã, la b modgdẽ tɩ laafɩ zĩnd zĩig ning fãa b sẽn beẽ.

¹⁵ A Poll bɛɛbã toog ra kae ne koe-noogã sẽn da nafd nebã ye. A Poll yeelame yaa: “Yaa rẽ yĩng la Zʋɩf-rãmbã sẽn yõk maam wẽnd-doogẽ wã, n mak n na n kʋ maamã. La mam sẽn paam Wẽnnaam sõngrã yĩnga, hal n tãag rũndã m ket n kõta nin-bõones la nin-kãsems kaseto.”—Tʋʋ. 26:21, 22.

16. Wãn to la d tõe n dɩk a Poll togs-n-taare, d sã n wa gomd bũmb nins d sẽn tẽedã yell bʋ-kaoodb la nanambs taoore?

¹⁶ Tõnd sẽn yaa kiris-nebã, d ‘segd n segla d mens wakat fãa tɩ ned sã n sok tõnd d sẽn tẽed bũmb ningã võor bɩ d tõog n leok-a.’ (1 Pɩy. 3:15) D sã n segd n goma tõnd sẽn tẽed bũmb ninsã yell bʋ-kaoodb pa rẽ bɩ nanambs taoore, a Poll sẽn gom to-to a Agripa la a Fɛstus taoorã tõe n sõnga tõnd tɩ d bãng d sẽn na n gom to-to. Tõnd tõe n wilg-b-la Biiblã sẽn sõng tõnd la neb a taab to-to tɩ d lebg neb sẽn tat Wẽnnaam yamã ne waoogre. Rẽ tõe n sõngame tɩ bʋ-kaoodb wall nanambsã kao d bʋʋd tɩ zemse.

17. A Fɛstus manesem yɩɩ wãn ne a Poll sẽn yeel bũmb ninsã, la wãn to la neb wʋsg wilgd rũndã-rũndã tɩ b manesmã yaa wa a Fɛstusi?

¹⁷ A Fɛstus ne a Agripa ra pa tõe n maan b toog kae ne a Poll sẽn da yet bũmb ninsã ye. Ad Biiblã sẽn yete: “A Poll sẽn wa n gomd bõn-kãensã yell n na n wilg t’a pa tar taalã, a Fɛstus zẽka a koɛɛg n yeele: ‘Fo zugã lebgame, Polle! Fo bãngrã sẽn yaa wʋsgã kɩtame tɩ fo zugã lebge.’” (Tʋʋ. 26:24) A Fɛstus manesem sẽn yɩ to-to wã kell n zemsa ne neb wʋsg manesem sẽn yaa to-to rũndã-rũndã wã. B tagsdame tɩ neb nins sẽn sõngd b taabã tɩ b bãngd Biiblã sẽn yet bũmb ninsã zutã lebgame. Naoor wʋsgo, yaa toog ne dũni-kãngã bãngdbã tɩ b sak n deeg bũmb nins Biiblã sẽn yet kũum vʋʋgrã wɛɛngẽ wã.

18. A Poll leoka a Fɛstus tɩ bõe, la a Agripa tagsg yɩɩ wãn rẽ poore?

¹⁸ A Poll leoka guvɛrneerã n yeel yaa: “Nin-kãseng a Fɛstusi, mam zugã pa lebg ye. Mam togsda goam sẽn yaa sɩda, la yam-vẽenem goama. Bala mam sẽn gomd ne bas-m-yam woto ne rĩm ningã mii bõn-kãensã fãa sõma . . . Rĩm a Agripa, yãmb tẽeda No-rɛɛsdbã bɩ? Mam miime tɩ yãmb tẽedame.” A Agripa yeela a Poll yaa: “Kellẽ-la bilf bal tɩ fo kɩt tɩ m lebg kiris-neda.” (Tʋʋ. 26:25-28) A Agripa sẽn togs goam ninsã yita a sũurẽ tɩ pa yit a sũurẽ me, wilgdame t’a tagsa a Poll goamã zug neere.

19. Bõe la a Fɛstus ne a Agripa yeel a Poll bʋʋdã kaoob sasa?

¹⁹ Rẽ poore, a Agripa ne a Fɛstus yikame tɩ wilgdẽ tɩ bʋʋdã kaoob saame. Biiblã yetame yaa: “B sẽn wa n loogdẽ wã, b ra gomda ne taab n yetẽ yaa: “Ra-kãngã pa maan baa fʋɩ sẽn segd ne kũum, bɩ bãens roog ye.” Rẽ la a Agripa yeel a Fɛstus yaa: “A sã n da pa yeel t’a ratame t’a Sezaar kao a bʋʋdo, b ra tõe n bas-a lame.” (Tʋʋ. 26:31, 32) B ra miime t’a Poll pa tar taal ye. Tõe tɩ rẽ ra na n sõng-b lame tɩ b maneg n wʋm kiris-nebã yɛlã võore, n maan-b neere.

20. A Poll sẽn paam n gom a Fɛstus ne a Agripa taoor n wilg t’a pa tar taalã woma bi-bʋse?

²⁰ Biiblã pa wilgd t’a Poll sẽn moon a Fɛstus bɩ a Agripa Rĩungã koe-noogã poore, b lebga kiris-neb ye. B sẽn tall a Poll n kẽng a Fɛstus ne a Agripa taoor t’a na n gom n wilg t’a pa tar taalã woma biis bɩ? N-ye. Bala a Poll tõog n taasa Zide “rĩm-dãmb la guvɛrneer-dãmb” koe-noogã. Tõe tɩ nin-kãens ra pa na n wʋm koe-noogã, sã n da pa tũ ne a Poll maasem ye. (Luk 21:12, 13) Sẽn paase, a sẽn mao ne zu-loees ninsã la a sẽn maan sɩd ne a Zeova wã kenga a tẽed-n-taasã raoodo.—Fili. 1:12-14.

21. D sã n kell n wɩng ne koɛɛgã mooneg baa ne zu-loeesã, tõe n woma bi-bʋse?

²¹ Yaa woto me rũndã-rũndã. D sã n kell n wɩng ne Rĩungã koɛɛgã moonego, baa nebã sã n namsda tõnd wall baa ne zu-loeesã, rẽ tõe n woma biisi. D tõe n paam n taasa neb sẽn pa wae n be b zagsẽ wã koɛɛgã. Wala makre, nanambs bɩ tẽng taoor dãmba. D sã n kell n maan sɩd ne a Zeova n tõog toogo, kengda d tẽed-n-taasã raoodo. Na n sõng-b lame me tɩ b kell n paam yẽesem n paase, n kõ kaset Wẽnnaam Rĩungã wɛɛngẽ.