SAK 26
“Ned baa a ye pa na n ki ye”
A Poll kẽe koom-koglg tɩ tek n sãame, la a wilgame t’a tẽebã tara pãng wʋsgo, la t’a nonga nebã
Tika Tʋʋma 27:1–28:10
1, 2. A Poll so-toakã ra na n yɩɩ wãn to, la tõe t’a ra maanda yɩɩr bõe wɛɛngẽ?
GUVƐRNEER a Fɛstus yeela a Poll yaa: “A Sezaar n na n kao fo bʋʋdã.” A Poll sẽn wʋm gom-kãensã poore, sãmbg kae t’a ra tagsda bũmb ning sẽn na n wa paam-a wã yelle, a sã n wa be a Sezaar taoore. A Poll ra zĩnda bãens roog yʋʋm a yiibu. Dẽnd a sẽn na n tog so-wok n kẽng Rommã ra na n yɩɩ sabab t’a toeem zĩiga. (Tʋʋ. 25:12) A ra kẽe koom-koglg n tog sor naoor wʋsgo. La pa so-toak fãa n baas neer ye. Tõeeme meng t’a Poll ra sokda a meng sogsgo, a sẽn na n tog sor n kẽng a Sezaar nengẽ wã wɛɛngẽ.
2 A Poll paama “zu-loees mogrã zug” naoor wʋsgo. Wala makre, naoor a tãab la koom-koglg sãam t’a ra be a pʋgẽ, la a paam n põsame. A paa mogrã zug wĩndg la yʋng tõr me. (2 Kor. 11:25, 26) Sẽn paase, so-toak kãngã ra na n yɩɩ toor fasɩ ne a sẽn da gilgd n kaagd a tẽed-n-taasã, bala sasa kãng tɩ b ra pa sog-a ne bãens ye. B ra soga a Poll ne bãense, t’a na n tog so-wok n yi Sezaare n kẽng Rom. Yaa sẽn yɩɩd kilo 3000. A na n taa a sẽn dabdẽ wã tɩ bũmb pa maan-a bɩ? Baa a sã n da ta Rom tɩ bũmb pa maan-a, rẽ yĩnga b pa na n kao a bʋʋd n wilg t’a segda ne kũum sɩda? D tẽeg tɩ yaa a Sʋɩtãan goosneema ning sẽn da tar pãng wʋsg n yɩɩd wakat kãng n da na n kao a bʋʋdo.
3. Bõe la a Poll da rat ne a sũur fãa n maane, la bõe yell la d na n gom sag-kãngã pʋgẽ?
3 Bũmb nins fãa yãmb sẽn mi a Poll zugã wɛɛngẽ, yãmb tagsdame t’a sẽn wa n tagsd bũmb nins sẽn da tõe n wa paam-a wã yellã, kɩtame t’a ra pa le tẽed manegr bɩ? Ayo! A ra miime t’a na n wa maoo ne zu-loeese, la a ra pa mi sẽn yaa zu-loees nins takɩ ye. A Poll ra miime t’a sã n maand yɩɩr bũmb nins sẽn yɩɩd a pãng wɛɛngẽ, pa na n naf-a ye. A ra miime me t’a sã n maand yɩɩr tɩ loog noore, a pa na n le tar sũ-noogo, a sã n wa moond koɛɛgã ye. (Mat. 6:27, 34) A Poll ra miime t’a Zeova raabã yaa a tũnug ne segb buud fãa n taas ned buud fãa Rĩungã koe-noogã, baa rĩm-dãmbã. (Tʋʋ. 9:15) A ra rata ne a sũur fãa n tʋm tʋʋmd ning Wẽnnaam sẽn bobl-a wã, baa ne zu-loeesã. Rẽ yĩnga, pa tõnd me bõn-daab la rẽ sɩda? Masã, bɩ d gom a Poll sẽn tog sor n kẽng Rommã yelle, la a mak-sõngã sẽn tõe n naf tõnd to-to.
“Sobgã ra segda tõndo” (Tʋʋma 27:1-7a)
4. A Poll kẽe koom-kogl-bʋg buud pʋgẽ, la ãnd dãmb n da tũud-a?
4 B rɩka a Poll ne neb a taab b sẽn da balg ne bãens n gũnug Rom soda-naab a ye yʋʋr sẽn boond t’a Zilyuus. A Zilyuus kɩtame tɩ b kẽ leebg koom-koglg sẽn da wa Sezaare. Koom-koglgã ra yii Adarmisiom sẽn be Aazimineer koom-kogendã yalsg zĩigẽ wã nin-taoore, la sẽn tees Mitilɛn tẽngã sẽn be Lesbos sẽn yaa ko-sʋk tẽngã. Koom-koglgã na n teesa rɩtg sẽnesã. Rẽ poore, a na n teesa nin-taoor n tek n yals n sik teedo, la a wʋk teed a taaba. B pa maan koom-kogend kãensã buudã tɩ b tõe n dɩk neba, sẽn yɩɩd fãa neb b sẽn balg ne bãens ye. (Ges-y zĩ-gũbrã: “ Mogrã zug so-toaka, la soay nins nebã sẽn da tũud n tɩ koosd b teedã.”) Zu-noogo, pa a Poll la kiris-ned bal sẽn da be bi-be-kãensã sʋk ye. A tẽed-n-taas a yiib bɩ sẽn yɩɩd rẽ n da be ne-a. Yaa a Aristark la a Luk. Sɩd me, yaa a Luk n gʋls kibarã. D pa mi a Poll tũud-n-ta-kãensã a yiibã sẽn da maand sɩd ne-a wã sã n yaoo ligd n paam n kẽ koom-koglgã pʋgẽ, bɩ b sã n basame tɩ b kẽ zaalem b sẽn da sõngd a Pollã yĩng ye.—Tʋʋ. 27:1, 2.
5. Ãnd dãmb la a Poll paam n yã Sɩdõ, la rẽ sõngda tõnd tɩ d bãng bõe?
5 B sẽn sɩng b so-toakã mogrã zugã, vẽkembeoogã, koom-koglgã tek n yalsa Sɩdõ sẽn be Siiri mogrã noorã. Rẽ tɩ b maana kilo 110. Wõnda a Zilyuus ra pa get a Poll wa bi-bees a taabã b sẽn da balg ne bãensã ye. Tõe tɩ yaa a Poll sẽn da yaa Rom tẽng-n-biig tɩ b pa kao a bʋʋd n wilg t’a tara taalã yĩnga. (Tʋʋ. 22:27, 28; 26:31, 32) A Zilyuus sakame t’a Poll na n sig n tɩ yãnd a tẽed-n-taas a taabã. Saam-biisã la saam-bi-pogsã sũy tog n yɩɩ noog wʋsgo, b sẽn paam n sõng a Polle, sẽn mik t’a zĩnda bãens roog n kaoos yʋʋm wʋsgã! Rẽ yĩnga, yãmb me pa tõe n tũnug ne segb buud toor-toor n deeg y tẽed-n-taasã sãando, tɩ wilg tɩ y nong-b lame sɩda? Y sã n maan woto, na n kenga yãmb mengã raoodo.—Tʋʋ. 27:3.
6-8. A Poll dãmb koom-koglgã sẽn yi Sɩdõ wã poore, yɛ ne yɛ la b tek n yalse, la segb bʋs la a Poll paam n na n taas koe-noogã?
6 Koom-koglgã sẽn yi Sɩdõ wã, b yɛga mogrã n sãag n ta Silisi sẽn pẽ Tars sẽn yaa a Poll ba-yirã. A Luk pa gom zĩis a taab koom-koglgã sẽn tek n yals yell ye. La a wilgame tɩ yell n da yɛgd-ba. A yeelame tɩ sobgã ra segd-b lame. (Tʋʋ. 27:4, 5) Baa ne so-toakã zu-loees toor-toorã, a Poll ra tũnugda ne segb buud fãa a sẽn paam n taasd nebã koe-noogã. Sãmbg kae t’a taasa neb nins b sẽn da balg ne bãensã me koɛɛgã, neb a taab sẽn da be koom-koglgã pʋgẽ, koom-koglgã tʋm-tʋmdbã, sodaasã, la neb nins sẽn da be zĩig ning fãa koom-koglgã sẽn yalsdã. Wa a Polle, tõnd me tõe n tũnuga ne segb buud fãa n moon koɛɛgã.
7 Koom-koglgã wa n taa Miir sẽn yaa koom-kogend yals zĩig sẽn be Aazimineer nug-goabgã. Beenẽ, a Poll ne neb a taab kẽe koom-koglg a to pʋgẽ n na n kẽng Rom, zĩig ning b sẽn da rabdã. (Tʋʋ. 27:6) Wakat kãnga, kood biis nins Rom nebã sẽn da paamdã ra yita Ezɩpt. Koom-kogend nins sẽn da zɩlgd kood biis sẽn yit Ezɩptã ra yalsda Miir. Yaa koom-koglg a woto buud pʋgẽ la a Zilyuus kẽes sodaasã, la neb nins b sẽn da balg ne bãensã. Koom-koglg kãng bedrmã yɩɩda pipi soabã. Bala a ra wʋka bɩle wʋsgo, la neb 276, rat n yeel tɩ neb nins sẽn da tʋmd koglgã pʋgẽ, sodaasã, neb nins b sẽn da balg ne bãensã, la neb a taab sẽn da rabd Rom. Yaa vẽeneg tɩ b sẽn kẽes a Poll dãmb koom-koglg a to pʋgẽ wã, a Poll paama segb n na n moon neb a taab koe-noogã. Sãmbg kae t’a sɩd maana woto ye.
8 Rẽ poore, koom-koglgã yalsa Kiniidi, Aazimineer nug-goabg sẽnese. Sobgã sã n da fugd n teesd b sẽn dabdẽ wã, so-toakã ra tõe n kaoosa daar a ye bala. La a Luk yeelame yaa: “Tõnd sẽn kẽng bilf-bilf n kaoos rasem wʋsg poore, d namsame n yaool n ta Kiniidi.” (Tʋʋ. 27:7a) Sobgã sẽn da fugd n segd-bã kɩtame tɩ so-toakã lebg toogo. (Ges-y zĩ-gũbrã: “ Sobgã ra kɩtame tɩ Mediterane mogrã zug kẽnd yaa toogo.”) Tags-y n ges-y neb nins sẽn da be koom-koglgã pʋgẽ wã sẽn nams to-to, sobgã sẽn da fugd ne pãng tɩ koglgã lengdẽ, tɩ ko-pɛmã me ra wẽed-a ne pãngã.
“Sobgã ra lengda tõnd ne pãnga” (Tʋʋma 27:7b-26)
9, 10. Zu-loe-bʋs la a Poll dãmb sege, b sẽn wa n be Kɛrɛt sɛɛgẽ wã?
9 Koom-koglgã taoor soab ra ratame n kell n tees Kiniid nin-taoor sẽnese, la a Luk sẽn maan kaset ne bũmb ning sẽn maanã yeelame tɩ sobgã kɩtame tɩ b ra pa tõe n kẽng taoor ye. (Tʋʋ. 27:7b) Koom-koglgã sẽn wa n tolg n zãag ne Kiniid tẽngã, sobg sẽn fugd ne pãng n yi nug-rɩtg sẽnesã n peng koom-koglgã n tees nug-goabg sẽnese. Pĩndã, sob-kãsems n fug n tees koom-koglg a Poll sẽn da be a pʋgẽ, la yɩɩ Sɩpr sẽn yaa ko-sʋk tẽngã la b paam koglgo. La so-kãnga, yɩɩ Kɛrɛt sẽn yaa ko-sʋk tẽngã pʋgẽ. Koom-koglgã sẽn yõsg Salmone sẽn be Kɛrɛt yãang sẽnesã, sobgã pãng boogame. Bõe yĩnga? Bala koom-koglgã ra bee ko-sʋk tẽngã nug-goabg sẽnese. Beenẽ wã, sobgã ra pa fugd ne pãng ye. Mams-y n ges-y neb nins sẽn da be koom-koglgã pʋgẽ wã yɩɩrã sẽn boog to-to, sobgã sẽn da fugd ne pãngã sẽn yõk wakat bilg pʋgẽ wã. Koom-koglgã tʋm-tʋmdbã ra miime tɩ pa na n kaoos la waoodã sasa ta ye. Sasa kãnga, mogrã zug so-toakã tõe n waa ne zu-loees buud toor-toore. Woto kɩtame tɩ b ra maand yɩɩre.
10 A Luk yeela bũmb sẽn yaa vẽenega. A yeelame yaa: “Tõnd namsa ne koom-koglgã n yɛg [Kɛrɛt] mogrã noore, n ta zĩig b sẽn boond tɩ Bo-poor.” Baa ne koom-koglgã sẽn da pẽ mogrã noor tɩ kɩt tɩ sobgã sẽn da fugd ne pãngã pa le tat-bã, koom-koglgã wẽneb ra yaa toogo. Koom-koglgã tʋm-tʋmdb wa n paama zĩig b sẽn da tõe n lob koglgã baarã. D tagsdame tɩ yaa zĩig sẽn da be mogrã noore, rɩtg sẽnesã. B paa be n kaoos wakat a wãna? A Luk yeelame tɩ “kaoosa wʋsgo.” La rẽ pa sõng-b ye. Bala bõn-bɩʋʋng ne zĩ-likr kiisã sasa, mogrã zug so-toak ra yaa yell meng-menga.—Tʋʋ. 27:8, 9.
11. Sagl-bʋg la a Poll kõ neb nins sẽn da be koglgã pʋgẽ wã, la b yãka yam n maan bõe?
11 Neb kẽer sẽn da be koom-koglgã pʋgẽ kosa a Poll saglse, bala a ra zoe n toga sor Mediterane mogrã zugu. A sagl-b lame tɩ b ra kẽng taoor ne so-toakã ye. B sã n da kẽng taoore, ra na n waa ne “sãoong la bõn wʋsgo.” Ra tõe n yɩɩ sabab meng tɩ neb yõor yãke. La sẽn da wẽnd-a koglgã ne koglgã taoor soab da ratame n kell n kẽng taoor ne so-toakã, bala b ra tagsdame tɩ b na n wa taa zĩig sẽn yaa sõma, n paam koglgo. B tõogame t’a Zilyuus sake, tɩ b fãa la bal ra tagsdẽ tɩ b segd n modgame n ta Fenigs sẽn yaa koom-kogend yalsg zĩig sẽn yɛgd mogrã. Ra yaa koom-kogend yalsg zĩig sẽn yaa sõma, la sẽn yalem tɩ b tõe n pa be waoodã sasa. La sobg sẽn wa n yit nug-goabg n fugd bilf-bilfã, b kẽnga taoor ne b so-toakã.—Tʋʋ. 27:10-13.
12. Koom-koglgã sẽn yi Kɛrɛtã poore, bõe n paam-a, la bõe la koglgã tʋm-tʋmdbã maane?
12 Rẽ poore, bũmb a to n maane. “Sob-kãseng” n yiki. B paama soondg zĩig “ko-sʋk tẽn-bil b sẽn boond tɩ Koda” wakat a wãna. Yaa tẽng sẽn be kilo 65 zĩigẽ ne Bo-poore. La yell n d ket n yɛgd-ba. Sobgã ra tõe n talla koom-koglgã n tees goabg sẽnesã, hal t’a wa tɩ sãam mogrã noor Afirik sẽnese. Sẽn na yɩl n gil yel-kãnga, tao-tao bala koglgã tʋm-tʋmdbã baoome n na n dʋʋg koom-koglg bilã koom-koglgã pʋgẽ, la yɩɩ toogo, bala ra pida ne koom. Rẽ poore, b sẽba koglgã ne wĩy la bãense, sẽn na yɩl n paas a pãngã. B logsa peendã wĩy la b maan b sẽn tõe fãa sẽn na yɩl n põse. Mams-y n ges-y rabeem-kãseng ning sẽn yõk-bã. La baa ne b modgrã fãa, sobgã ra ket n lengda koglgã ne pãnga. Rasem a tãab-n-soabã daare, b loba koglgã teedã fãa sẽn na yɩl t’a ra bõr ye.—Tʋʋ. 27:14-19.
13. Yɛlã ra yaa wãn to sob-kãsengã sẽn wa n fugd mogrã zug n lengd koom-koglg ning a Poll ne neb a taabã sẽn da be a pʋgẽ wã?
13 Rabeem-kãseng n yõk neb nins sẽn da be koglgã pʋgẽ wã. La a Poll ne a tũud-n-taasã ra kɩsa sɩd tɩ b na n põsame. Bala sẽn deng rẽ, Zu-soabã ra yeela tẽn-tʋmd a Poll t’a bas a yam t’a na n tɩ kõo kaset Rom. Malɛk me n wa n yeel-a tɩ na n sɩd yɩɩ woto. (Tʋʋ. 19:21; 23:11) La sob-kãsengã sẽn da fugd mogrã zug n lengd koom-koglgã kaoosa semen a yiibu. Saagã sẽn da ket n niidã, la sawad-toakã sẽn da lud wĩntoogã la ãdsã kɩtame tɩ ra yaa toog ne ned ning sẽn da wẽnd koglgã t’a bãng koglgã sẽn da beẽ, la b sẽn da rabdẽ wã. Ned baa a ye ra pa tõe n dɩ ye. Waoodã, saagã, la rabeemã yĩnga, ned baa a ye ra pa tagsd rɩɩb yell ye.
14, 15. a) A Poll sẽn wa n gomd ne neb nins sẽn da be koom-koglgã pʋgẽ wã, bõe yĩng la a sẽn tẽeg-b saglg ning a sẽn da kõ-bã? b) Saagr koɛɛg ning a Poll sẽn taas-bã sõngda tõnd tɩ d bãng bõe?
14 A Poll yik n yalsame. A tẽeg-b-la a sẽn da pĩnd n keoog-bã, la pa sẽn na n ning-b taal ye. Yɛlã sẽn yɩ to-to wã wilgdame t’a Poll sẽn da yeel-b tɩ b maan bũmb ningã ra yaa yam tʋʋmde. Rẽ poore, a yeel-b lame yaa: “Mam yeta yãmb masã tɩ y keng y pelse, bala yãmb ned baa a ye pa na n ki ye. Yaa koglgã bal n na n sãame.” (Tʋʋ. 27:21, 22) A Poll gom-kãensã kenga a kɛlgdbã raoodo. A sũur tog n yɩɩ noog wʋsg me, a sẽn paam t’a Zeova kɩt t’a taas neb a taabã koe-no-kãnga wã. Yaa tɩlɛ tɩ d kɩs sɩd tɩ ninsaal buudã fãa vɩɩm tara yõod wʋsg a Zeova nifẽ. Ned kam fãa yell pak-a lame. Tẽn-tʋmd a Pɩyɛɛr yeelame yaa: “A Zeova . . . pa rat tɩ ned baa a ye sãam ye. A ratame tɩ nebã fãa tek yam n kos sugri.” (2 Pɩy. 3:9) Dẽnd d segd n maana d sẽn tõe fãa n taas neb wʋsg a Zeova koɛɛgã sẽn wilgd tɩ manegr n watã ne yãgbo. Yaa yõor yelle.
15 Sãmbg kae t’a Poll taasa neb wʋsg sẽn da be koom-koglgã pʋgẽ ‘pʋleng ning Wẽnnaam sẽn pʋlmã.’ (Tʋʋ. 26:6; Kolo. 1:5) La sẽn da wõnd pa na n kaoos la koom-koglgã sãamã, kõo a Poll weer t’a tõog n sõng-b tɩ b kɩs sɩd tɩ b na n põsame. A yeelame yaa: “Yʋngẽ, . . Wẽnnaam ning mam sẽn sakd ne m sũur fãa wã malɛk n wa n yals mam sɛɛgẽ n yeele: ‘Polle, ra zoe rabeem ye. Fo segd n yalsa a Sezaar taoore. La ade! Wẽnnaam rɩka neb nins fãa sẽn togd sor ne foo koglgã pʋgẽ wã n ning fo nugẽ.’ Woto yĩnga, rapa, keng-y y pelse. Bala mam kɩsa sɩd ne Wẽnnaam tɩ na n yɩɩ wa malɛkã sẽn yeel maamã bal kɛpɩ. La tõnd koglgã na n sãama ko-sʋk tẽng a ye sɛɛgẽ.”—Tʋʋ. 27:23-26.
“Nebã fãa taa tẽn-koɛɛngẽ wã ne laafɩ” (Tʋʋma 27:27-44)
‘A pʋʋsa Wẽnnaam bark b fãa taoore.’—Tʋʋma 27:35
16, 17. a) A Poll tũnuga ne segb-bʋg n pʋʋse, la rẽ woma bi-bʋse? b) Wãn to la a Poll sẽn da keoog nebã ne bũmb ningã pids-yã?
16 Sob-kãsengã sẽn leng koom-koglgã tɩ kẽes nebã rabeem semen a yiib tõrã poore, sẽn da tʋmd-b koglgã pʋgẽ wã wa n bãngame tɩ b kolga mogrã noore, bala tõe tɩ b ra wʋmda mogrã noor ko-pɛmã rãamde. Sobgã lenga koom-koglgã na maan kilo 870. B losa koom-koglgã baar koomã pʋgẽ, sẽn na yɩl t’a ra bõre, la t’a tees mogrã noore, t’a sã n na n sãam me bɩ yɩ tẽn-koɛɛngẽ. B sẽn maan rẽ wã poore, b baoome n na n yi n bas koglgã. La sodaasã gɩdg-b lame. A Poll yeela sodaas koabg naabã ne sodaasã yaa: “Nin-kãensã sã n pa kell n pa koglgã pʋgẽ, y pa tõe n põs ye.” Koglgã sẽn da yas zĩ-yend masã wã, a Poll yeela nebã tɩ b bao rɩɩb n dɩ, la a le tẽeg-b tɩ b na n põsame. Rẽ poore, a Poll ‘pʋʋsa Wẽnnaam bark b fãa taoore.’ (Tʋʋ. 27:31, 35) A sẽn pʋʋs Wẽnnaam bark a pʋʋsgã pʋgẽ wã, a kõo a Luk ne a Aristark la rũndã-rũndã kiris-nebã mak-sõngo. Rẽ yĩnga, pʋʋsg nins y sẽn pʋʋsd zãma taoorã kengda raood la belsd nebã bɩ?
17 A Poll pʋʋsgã poore, “b fãa paama raoodo, n sɩng rɩɩbo.” (Tʋʋ. 27:36) B loba bɩle wã sẽn da be koglgã pʋgẽ wã mogrã pʋgẽ, sẽn na yɩl tɩ koglgã lebg faasga, n pa mogrã koom zugu, b sã n wa n kolgd mogrã noore. Beoogã sẽn wa n vẽege, koglgã tʋm-tʋmdbã wãa bũmb nins sẽn da tar n yalsd koglgã wĩyã, n logs wẽnemdgã wĩyã, la b rʋʋs koglgã taoor peendã sẽn na yɩl n tõog n wẽn koglgã tɩ sobgã peeg-a n kẽng mogrã noore. Rẽ poore, koglgã taoor sũdame t’a pa le tõe n yẽrg ye. Tõe tɩ yaa bĩis-rʋr pʋgẽ la a sud-yã. Ko-pɛmã sẽn da wat n wẽed koglgã ne pãngã, a wesa pees-peese. Sodaas kẽer n da rat n kʋ neb nins b sẽn da balg ne bãensã, sẽn na yɩl tɩ b baa a ye ra põs ye. La a Zilyuus yeela bũmb tɩ gɩdg-b tɩ b pa maan woto ye. A yeela nebã fãa tɩ b yɩg n lʋɩ mogrã pʋgẽ, n dug n ta tẽn-koɛɛngẽ wã. A Poll sẽn da pĩnd n togs bũmb ningã pidsame. Neb 276 fãa põsame. Hakɩɩka, “nebã fãa taa tẽn-koɛɛngẽ wã ne laafɩ.” La b ra bee yɛ?—Tʋʋ. 27:44.
“B maana tõnd neer wʋsgo” (Tʋʋma 28:1-10)
18-20. Wãn to la Malt nebã maan a Poll dãmb “neer wʋsgo,” la yel-solemd bʋg n maane?
18 Neb nins sẽn põsã ra bee Malt sẽn yaa ko-sʋk tẽng sẽn be Silisi nug-goabg sẽnesã. (Ges-y zĩ-gũbrã: “ Malt tẽngã ra bee yɛ?”) Ko-sʋk tẽngã neb sẽn da gomd buud-gom-zẽngã maan-b-la “neer wʋsgo.” (Tʋʋ. 28:2) B tugla bugum nin-kãensã sẽn da rigd waoodã yĩnga. Baa ne saagã sẽn da niid tɩ yaa waoodã, bugmã sõngame tɩ b waoodã yi. Yɩɩ sabab me tɩ yel-solemd maane.
19 A Poll da rat n maana bũmb n sõnge. A wʋka ra-kill n na n ning bugmẽ wã. A sẽn wa n ningd raadã, põeer n yi raadẽ wã n kɛ a nugã n pa be. Malt nebã tagsame tɩ wẽnnaam-dãmbã n sɩbgd a Polle. a
20 Tẽngã nebã sẽn yã tɩ põeer n kɛ a Poll nugã, b tagsame t’a nugã na n “modame.” Sã n yaa ne sebr a yembre, gom-bil ning meng-meng b sẽn lebg ka wã yaa “logtoɛɛmb gom-bila.” “Logtor a Luk b sẽn da nong wʋsgã” sẽn pʋd gom-bi-kãngã wã pa lingr ye. (Tʋʋ. 28:6; Kolo. 4:14) A Poll mesga põeerã t’a lʋɩ, la baa fʋɩ pa maan yẽ mengã ye.
21. a) Kiba-bʋs n wilgd t’a Luk sẽn yeel bũmb ning a kibarã pʋgẽ zemsa kɛpɩ? b) Yel-solem-bʋg la a Poll maan-yã, la Malt tẽngã neb manesem yɩɩ wãna?
21 A Pibilyuus ra yaa ned sẽn tar pʋto, la arzɛk soaba. A ra vɩɩ beenẽ. Tõe tɩ yaa yẽ n da yaa Rom sodaag ning yʋʋr sẽn yi n yɩɩd Malt tẽngẽ wã. A Luk sẽn yeel t’a yaa “ko-sʋk tẽngã taoor soabã” sɩd zemsame, bala yaa yʋ-kãng la b yã kug-wals a yiib sẽn be Malt zugu. Rasem a tãab pʋgẽ, a Pibilyuus reega a Poll ne a tũud-n-taasã sãando. La a ba wã ra pa keem ye. Ka me yɛsa, a Luk sẽn bilg yɛlã to-to wã zemsa kɛpɩ. A yeelame tɩ raoã “ra gãee ne yĩn-wɩngr la sãb-noaadga.” A tũnuga ne logtoɛɛmb gom-biis n bilg bãagã sẽn da yaa to-to. A Poll pʋʋsame, n tik-a ne a nus n sãoog-a. Yel-solemdã yɩɩ ko-sʋk tẽngã neb noog wʋsgo, tɩ b tɩ tall bãad a taab n wa tɩ b sãoog-ba, la b wa ne kũun buud toor-toor sẽn na n sõng a Poll ne a tũud-n-taasã.—Tʋʋ. 28:7-10.
22. a) Bõe la karen-saam-kãseng a ye yeel n pẽg a Luki, kibarã a sẽn togs Rom so-toakã wɛɛngẽ wã? b) Bõe yell la d na n gom sak ning sẽn pʋgdã pʋgẽ?
22 A Poll so-toakã kibar tõnd sẽn gom a yellã zemsa kɛpɩ, leb n yaa sɩda. Karen-saam-kãseng a ye yeelame yaa: “A Luk kibarã naaga Biiblã kibay nins b sẽn bilg tɩ yaa vẽenegã sʋka. A sẽn yeel bũmb ning mogrã zug so-toakã sẽn da yaa to-to wakat kãnga wã zemsa kɛpɩ. A sẽn bilg yɛlã sẽn da yaa to-to Mediterane mogrã yaang sẽnesã yaa sɩda.” Yaa vẽeneg t’a kibarã tika sebr b sẽn da gʋls n bĩng zugu. Tõe tɩ yaa a Luk mengã n gʋls kiba-kãense, a sẽn wa n togd soay ne tẽn-tʋmd a Pollã. Sã n yaa woto, b so-toak ning sẽn pʋglã sasa, a paam n gʋlsa bũmb wʋsg rẽ zugu. A Poll ne a tũud-n-taasã sã n wa ta Rom, bõe n na n paam a Polle? Bɩ d gom rẽ yell masã.
a Nebã sẽn bãng sẽn yaa põy ning buudã wilgdame tɩ põy a woto buud n da be ko-sʋk tẽngẽ wã wakat kãnga. Rũndã-rũndã, põy a woto buud pa be Malt ye. Tõe tɩ yaa zĩigã sẽn wa n toeemã, pa rẽ bɩ yaa ko-sʋk tẽngã neb sõor sẽn paasã n kɩt tɩ põyã menemã.
