SAK 23
“Kelg-y tɩ m wilg-y tɩ m pa tar taal ye”
A Poll goma a sẽn tẽedã yell neb kʋʋng sũy sẽn yik taoore, la Sãnedrẽ wã taoore
Tika Tʋʋma 21:18–23:10
1, 2. Bõe yĩng tɩ tẽn-tʋmd a Poll yãk yam n na n kẽng Zerizalɛm, la zu-loe-bʋs la a paam beenẽ?
A POLL ra bee Zerizalɛm n kẽnd sor zugu! Sorã ra yaa sẽka, neb wʋsg me n da kẽnd sorã zugu. Na maan yʋʋm kobse, yaa Zerizalɛm bal la tũudum hakɩɩkã ra be. Neb wʋsg sẽn da be Zerizalɛmmã sũur da yaa noog ne rẽ. A Poll ra miime tɩ kiris-neb nins sẽn da be Zerizalɛmmã ra ket n tũuda a Moyiiz Tõogã, la tɩ b pa rat n toeem b tagsa wã tɩ zems ne a Zeova sẽn dat tɩ b tũud-a to-to wã ye. Rẽ n so t’a sẽn wa n be Efɛɛzã, a yãka yam n na n kẽng Zerizalɛm, n tɩ sõng kiris-neb nins sẽn be be wã. A ra pa rat n tall ligdã bal n tɩ kõ-b ye. A ra ratame me n sõng-b tɩ b toeem b tagsa wã. (Tʋʋ. 19:21) A kẽnga beenẽ, baa ne a sẽn da tõe n paam yellã.
2 La zu-loe-bʋs la a Poll ra na n paam Zerizalɛm? Zu-loɛɛg a ye n da na n yi a tẽed-n-taasã nengẽ, bala kibay sẽn pa sɩd la b ra togsd a Poll zugu, tɩ bãmb kẽer kɩs sɩd ne rẽ. Kiristã bɛɛbã me ra na n namsa a Poll n tɩ yɩɩda. B rõda a Polle, b pãb-a lame, la b bao n na n kʋ-a. Zu-loe-kãensã fãa kõo a Poll weer t’a tõog n gom bũmb nins a sẽn tẽedã yelle. Zu-loe-kãensã fãa pʋgẽ, a Poll wilgame t’a yaa sik-m-meng soaba, ned sẽn tar raoodo, la tẽebo. Kɩtame t’a yaa mak-sõng n kõ rũndã-rũndã kiris-nebã. Bɩ d ges d sẽn tõe n dɩk a togs-n-taar to-to.
“B sɩnga Wẽnnaam pẽgre” (Tʋʋma 21:18-20a)
3-5. a) A Poll naaga ãnd dãmb n maan tigsgã Zerizalɛm, la b goma bõe yelle? b) Yam-bʋg la d tõe n dɩk tigsg ning a Poll ne Zerizalɛm kãsem-dãmbã sẽn maanã pʋgẽ?
3 A Poll ne a tũud-n-taasã sẽn ta Zerizalɛmmã vẽkembeoogo, b kẽngame n tɩ yã tigingã kãsem-dãmba. Kibarã pʋgẽ, b pa gom tẽn-tʋmdbã ned baa a yembr yell ye. Tõe tɩ b ra kẽngame n na n tɩ moon koɛɛgã dũniyã zĩis a taaba. La a Zak sẽn da yaa a Zeezi ma-biigã ra ket n bee beenẽ. (Gal. 2:9) Yaa vẽeneg tɩ tigsg ning b sẽn maan tɩ “kãsem-dãmbã fãa” la a Poll ra be beenẽ wã, yaa yẽ n lʋɩ taoore.—Tʋʋ. 21:18.
4 A Poll pʋʋsa kãsem-dãmbã, la a “sɩng n na n togs-b bũmb nins Wẽnnaam sẽn tũnug ne yẽ koe-moonegã tʋʋmdã n maan bu-zẽmsã sʋkã ball-balle.” (Tʋʋ. 21:19) D mams d yamẽ rẽ sẽn keng a tẽed-n-taasã raood to-to. Rũndã-rũndã me, tõnd me sã n wʋmd kiba-nood koɛɛgã mooneg wɛɛngẽ tẽns a taab pʋsẽ, noogda d sũur wʋsgo.—Yel. 25:25.
5 Tigsgã sasa, a Poll wa n goma ligdã a sẽn yi ne Erop n wa ne wã yelle. Nin-kãensã sũy yɩɩ noog wʋsgo, b sẽn bãng tɩ b yell paka b tẽed-n-taasã sẽn be zĩ-zãrsẽ wã. Biiblã yeelame tɩ kãsem-dãmbã sẽn wʋm a Poll sẽn togs bũmb ninsã, “b sɩnga Wẽnnaam pẽgre”! (Tʋʋ. 21:20a) Rũndã-rũndã me, d tẽed-n-taas nins sabab-wẽns sẽn paamdã, pa rẽ bɩ sẽn bẽed-b bã-kɛgengã sũy yaa noog wʋsgo, b tẽed-n-taasã sã n sõngd-ba, la b togsd-b goam sẽn kengd raoodo.
Neb wʋsg ra ket n “wɩngda ne Tõogã sakre” (Tʋʋma 21:20b, 21)
6. Zu-loe-bʋg yell la b gom ne a Polle?
6 Rẽ poore, kãsem-dãmbã yeela a Poll tɩ Zide saam-biisã wʋma bũmb yẽ mengã zugu, tɩ sãamd b sũuri. B yeelame yaa: “Fo neeme, d saam-biiga, Zʋɩf-rãmb tusa n lebg tẽedba, la b fãa wɩngda ne Tõogã sakre. La b wʋmdame tɩ b gomd fo yell n yetẽ tɩ fo zãmsda Zʋɩf-rãmb nins fãa sẽn be bu-zẽmsã sʋkã n yetẽ tɩ b bas a Moyiiz Tõogã, la tɩ b ra kẽes b kambã bãong la b ra tũ minundã ye.” a—Tʋʋ. 21:20b, 21.
7, 8. a) Kiris-neb wʋsg sẽn da be Zide wã ra ket n wɩngda ne bõe sakre, tɩ yaool n pa zemse? b) Bõe yĩng tɩ d pa tõe n yeel tɩ b sẽn da tar tagsa a woto wã kɩtame tɩ b lebg sɩdã kɩɩsdba?
7 Ra yaa sẽn yɩɩd yʋʋm 20 la woto Wẽnnaam sẽn wilg tɩ pa le yaa tɩlɛ tɩ b tũ a Moyiiz tõogã ye. La bõe yĩng tɩ kiris-neb wʋsg ra ket n wɩngd ne a Moyiiz tõogã sakre? (Kolo. 2:14) Yʋʋmd 49 tẽn-tʋmdbã la kãsem-dãmbã sẽn maan tigsgã Zerizalɛmmã poore, b toola tigimsã lɛta, n wilg tɩ pa le yaa tɩlɛ ne bu-zẽmsã neb nins sẽn da lebg tẽedbã tɩ b kẽ bãong n tũ a Moyiiz tõogã ye. (Tʋʋ. 15:23-29) La lɛtrã pʋgẽ, b pa gom Zʋɩf-rãmb nins sẽn da yaa tẽedbã yell ye. Bãmb wʋsg ra pa wʋmd kiris-nebã sẽn pa segd n le tũ a Moyiiz tõogã võor ye.
8 Rẽ yĩnga, b sẽn tudg n tagsd woto wã kɩtame tɩ b ra pa le yaa kiris-neb sẽn maand sɩd bɩ? Ayo. Nand tɩ b lebg kiris-neba, b ra pa tũud wẽn-faad ye. B sẽn lebg kiris-nebã poor me, b ra pa tũud ziri tũudmã minundu, wall b yel-maandɩ ye. Yaa a Zeova n kõ tõogã, hal t’a ra tar yõod wʋsg Zʋɩf-kãensã sẽn da lebg tẽedbã nifẽ. Bũmb ra pa be tõogã pʋgẽ n yaa wẽnga, pa rẽ bɩ n wilgd tɩ yaa zĩn-dãmbã n vẽneg tɩ b gʋls ye. La tõogã ra tika kaool-kʋdgã zugu, tɩ kiris-nebã yaool n da tũud kaool-paalgã masã. Dẽnd ra pa le yaa tɩlɛ ne-b tɩ b tũ tõogã, sẽn na yɩl n ta a Zeova yam ye. Kiris-neb nins sẽn da yaa Zʋɩf-rãmbã sẽn da pẽdgd b taabã n dat tɩ b ket n tũud tõogã ra pa kɩs sɩd t’a Zeova sẽn dat tɩ b tũ-a to-to masã wã yaa sõma ye. Ra yaa tɩlɛ tɩ b toeem b tagsa wã tɩ zems ne a Zeova sẽn da rat tɩ b tũ-a to-to masã wã. b—Zer. 31:31-34; Luk 22:20.
“B sẽn wʋmd tɩ b gomd bũmb ning fo zugã pa sɩd” ye (Tʋʋma 21:22-26)
9. Bõe la a Poll sõng nebã tɩ b bãng a Moyiiz tõogã tũub wɛɛngẽ?
9 Nebã ra wʋmdame tɩ b gomd t’a Poll zãmsda Zʋɩf-rãmb nins fãa sẽn be bu-zẽmsã sʋkã n yetẽ “tɩ b bas a Moyiiz Tõogã, la tɩ b ra kẽes b kambã bãong la b ra tũ minundã ye.” Bõe la d tõe n yeel rẽ wɛɛngẽ? A Poll moona bu-zẽmsã neb koe-noogã la a wilg-b tẽn-tʋmdbã la kãsem-dãmbã sẽn yãk yam n yeel tɩ pa le yaa tɩlɛ tɩ bu-zemsã neb tũ a Moyiiz tõogã. A wilg-b lame me tɩ b rãmb nins sẽn da pẽdgd n dat tɩ bu-zẽms neb kẽ bãong la b tũ a Moyiiz tõogã ka bʋʋm ye. (Gal. 5:1-7) Sẽn paase, tẽns nins pʋsẽ a Poll sẽn kẽngã, a moona Zʋɩf-rãmbã koe-noogã. Sãmbg kae t’a sõnga neb nins sẽn da sakd n kelgdã tɩ b bãng t’a Zeezi kũumã kɩtame tɩ tõogã tũub pa le yaa tɩlɛ, la tɩ yaa ne tẽeb la ned tõe n yɩ tɩrg Wẽnnaam nifẽ, pa a sẽn tũud tõogã yĩng ye.—Rom. 2:28, 29; 3:21-26.
10. Wãn to la a Poll wilg t’a ra tara tagsg sẽn zemse, tõogã tũub la bãongã kõom wɛɛngẽ?
10 A Poll pa sãbs neb nins sẽn da rat n kell n tũ Zʋɩf-rãmbã minund kẽerã ye. Wala makre, b ra pa tʋmd vʋʋsg daarã, pa rẽ bɩ rɩbd kẽer la b ra pa rɩte. (Rom. 14:1-6) A pa lugl noy me bãongã kõom wɛɛngẽ ye. A kɩtame tɩ b kẽes a Tɩmote bãongo, sẽn na yɩl tɩ Zʋɩf-rãmbã ra wa sãbs-a, bala a ba wã ra yaa Gɛrke. (Tʋʋ. 16:3) Bãongã kõom ra yaa ned fãa n yãkde. A Poll yeela Galat-rãmbã yaa: “Bãong kõom wall moonem pa tar yõod baa bilf ye. La yaa tẽeb sẽn womd biis nonglem maasem yĩngã n tar yõodo.” (Gal. 5:6) La ned sã n da tagsdẽ t’a segd n kẽe bãong sẽn na yɩl n tũ tõogã, pa rẽ bɩ n tõog n ta a Zeova yam, wilgdame t’a ka tar tẽeb ye.
11. Kãsem-dãmbã sagla a Poll t’a maan bõe, la bõe la a Poll ra pa na n sak n maane? (Ges-y Vẽnegrã.)
11 Dẽnd baa ne bũmb nins kiris-neb nins sẽn da yaa Zʋɩf-rãmbã sẽn wʋm a Poll zugã sẽn da pa sɩdã, ra ket n namsd-b lame. Rẽ n so tɩ kãsem-dãmbã wilg a Poll a sẽn segd n maane. B yeel-a lame yaa: “Tõnd tara rap a naas sẽn pʋlem Wẽnnaam bũmbu. Peeg nin-kãense, n tɩ yɩlg f meng wa Tõogã sẽn wilgã ne bãmb me, la f yao b zutã põngr ligdi. Woto, nebã fãa na n bãngame tɩ b sẽn wʋmd tɩ b gomd bũmb ning fo zugã pa sɩda, la tɩ fo zãada f meng sõma, n sakd Tõogã me.” c—Tʋʋ. 21:23, 24.
12. Wãn to la a Poll tũ kãsem-dãmbã sẽn yeel t’a maanã?
12 A Poll ra tõe n yeelame tɩ yellã meng-meng pa bũmb nins b sẽn yet yẽ zug tɩ pa sɩdã, la tɩ yaa kiris-neb nins sẽn yaa Zʋɩf-rãmbã sẽn pẽdgd n dat tɩ b ket n tũud a Moyiiz tõogã. La a sakame n maan bũmb ning kãsem-dãmbã sẽn yeel-a t’a maanã, sẽn mik tɩ ra pa kɩɩsd a Zeova noyã. Sẽn deng rẽ, a ra yeelame yaa: “Ne neb nins sẽn tũud tõogã, mam lebga wa ned sẽn tũud tõogã, baa mam mengã sẽn pa tũud tõogã, sẽn na yɩl n paam sẽn tũud-b tõogã.” (1 Kor. 9:20) Yel-kãngã pʋgẽ, a Poll sak n tũu Zerizalɛm kãsem-dãmbã sẽn da yeel-a t’a maanã, tɩ kɩt t’a lebg wa ned sẽn “tũud tõogã.” A sẽn maan woto wã, a kõo tõnd mak-sõngo, tɩ d segd n sak n tũ kãsem-dãmbã sẽn dat tɩ d maanã, la d ra pẽdgd n dat n maan yɛlã wa tõnd sẽn dat to-to wã ye.—Ebre. 13:17.
A Poll ra sakd n tũuda a taabã sẽn datã, sã n mik tɩ pa kɩɩsd a Zeova noor ye. Yãmb me maanda woto bɩ?
“A pa tog ne vɩɩm ye!” (Tʋʋma 21:27–22:30)
13. a) Bõe yĩng tɩ Zʋɩf-rãmb kẽer wa ne rãmbg wẽnd-doogẽ wã? b) Ãnd n sõng a Poll t’a põse?
13 Yɛlã pa baas neer wẽnd-doogẽ wã ye. Rapã mensã yɩlgrã ray sẽn wa n kolgd saabã, Zʋɩf-rãmb sẽn yit Aazi wã yãa a Polle, n dõd-a t’a talla bu-zẽms neb n wa wẽnd-doogẽ wã, la b pirs kʋʋngã n dat tɩ b maan-a wẽnga. Sodaas sull naabã sã n da pa kẽes a toogo, b ra na n pãba a Poll hal t’a ki. A yeela a sodaasã tɩ b yõk a Poll n tɩ page. Baraar tɛka, ra na n yɩɩga yʋʋm a naas t’a Poll le paam a menga. La yell n da ket n yɛgd a Polle. Sodaasã naab sẽn sok Zʋɩf-rãmbã n na n bãng b sẽn dat n kʋ a Pollã võorã, neb n da zẽkd b koees n yet bũmb a ye, tɩ sãnda yet bũmb a to. Bʋʋrã yĩnga, soda-naabã ra pa tõe n wʋm baa fʋɩ võor ye. Baasgo, sodaasã yiisa a Poll kʋʋngã sũy sẽn da yikã sʋka. Sodaasã sẽn wa n tall a Poll n dat n kẽes sodaasã zakẽ wã, a Poll yeela soda-naabã yaa: “M bõosd-y lame tɩ y kõ-m sor tɩ m gom ne nin-buiidã.” (Tʋʋ. 21:39) Soda-naabã kõ-a-la sore, t’a gom bũmb nins a sẽn tẽedã yell ne raoodo.
14, 15. a) Bõe la a Poll yeel Zʋɩf-rãmbã? b) Bõe la soda-naabã maane, sẽn na yɩl n bãng Zʋɩf-rãmbã sũy sẽn yik ne a Pollã võore?
14 A Poll yeelame yaa: “Kelg-y tɩ m wilg-y tɩ m pa tar taal ye.” (Tʋʋ. 22:1) A Poll goma ne kʋngã ne Ebre, tɩ kɩt tɩ b sĩndi. A bilg-b-la bũmb nins sẽn kɩt t’a lebg Kirist karen-biigã ball-balle. A Poll goma bũmb kẽer yelle, tɩ Zʋɩf-rãmbã ra tõe n bao n bãng sã n yaa sɩda, b sã n da rata. A wilgame tɩ yaa a Gamaliyɛll sẽn yaa karen-saam-kãsengã n zãms-a, la tɩ yẽ mengã namsa Kirist karen-biisã. Bãmb kẽer meng ra bee kʋʋngã sʋka. A Poll sẽn wa n be sorẽ n kolgd Damaasã, Wẽnnaam vẽneg-a lame t’a yã a Zeezi sẽn vʋʋge, n sõsd ne-a. Rap nins sẽn da be ne-a wã yãa vẽenem la b wʋm koɛɛg rãamde, la b ra pa wʋmd koɛɛgã sẽn da yet bũmb ningã võor ye. (Ges-y Tʋʋma 9:7; 22:9) Vẽenemã kɩtame t’a Poll lebg zoanga, tɩ neb nins sẽn da be ne-a wã gãd a nugã n tɛ-a n tɩ ta Damaase. Beenẽ a Ananiyaas sẽn yaa ned sẽn tar yʋ-noog Zʋɩf-rãmbã sʋkã maana yel-solemde, t’a le tõe n yã.
15 A Poll paasame me t’a sẽn leb Zerizalɛmmã poore, a Zeezi vẽnega a meng ne-a wẽnd-doogẽ wã. Zʋɩf-rãmbã sẽn wʋm dẽ wã, b sũyã yika wʋsgo, tɩ b zẽk b koees n yeel yaa: “Menes-y ra-kãngã tẽngã zugu, bala a pa tog ne vɩɩm ye.” (Tʋʋ. 22:22) Sẽn na yɩl n fãag a Polle, soda-naabã kɩtame tɩ b kẽes-a sodaasã zakẽ. A ra rata ne a sũur fãa n bãng Zʋɩf-rãmbã sũy sẽn yik ne a Pollã võore. Rẽ n so t’a yeel tɩ b pãb a Poll ne kalwaas la b sok-a sogsgo. Sodaasã sẽn wa n sẽb a Poll n na n pãb-a ne kalwaasã, a yeel-b lame tɩ yẽ yaa Rom neda, la a sok-b n ges tõogã sã n kõt-b-la sor tɩ b tõe n pãb-a. Rũndã-rũndã me, a Zeova Kaset rãmbã geta b tẽngã laloa wã sẽn yet bũmb ninsã, n tikd rẽ n gomd bũmb nins b sẽn tẽedã yelle. (Ges-y zĩ-gũbã: “ Rom soolmã laloa wã la a nebã” la “ Yɛl d sẽn tall n kẽng bʋ-kaoodb taoor n wilg tɩ d tara sor n moon koɛɛgã.”) Soda-naabã sẽn wʋm t’a Poll yaa Rom nedã, a bãngame t’a segd n tũnuga ne manesem a to, n paam kibay a taab n paase. Vẽkembeoogã, a talla a Poll n kẽng Sãnedrẽ wã taoore, Zʋɩf-rãmbã bʋ-kaoodb sull ning sẽn tar noor n yɩɩdã.
“Mam yaa Fariziyẽ” (Tʋʋma 23:1-10)
16, 17. a) A Poll sẽn wa n gomd Sãnedrẽ wã taoorã, bõe n maane? b) B sẽn wẽ a Pollã, wãn to la a wilg t’a yaa sik-m-meng soaba?
16 A Poll sẽn wa n be Sãnedrẽ wã taoor n gomd bũmb nins a sẽn tẽedã yellã, a yeelame yaa: “Rapa, m saam-biisi, mam zãa m meng Wẽnnaam taoor ne sũur-kaset sẽn yaa yɩlemd zãng n tãag rũndã.” (Tʋʋ. 23:1) A pa tõog n yeel goam a taab n paas ye. Biiblã yetame yaa: “Rẽ la maan-kʋʋdbã kãsem a Ananiyaas yeel neb nins sẽn yas a Poll sɛɛgẽ wã tɩ b wẽ a noorã.” (Tʋʋ. 23:2) Ad sɩd yɩɩ paoogre! Sẽn paase, maan-kʋʋdb kãsmã maana bũmb sẽn yaa kɛgre. A reng n kaoo a Poll bʋʋd n ning-a taale, n pa bas meng t’a gom ye. Rẽ n so t’a Poll yeel yaa: “Pʋ-lik soaba, Wẽnnaam na n wẽe foo. Fo zĩndame n na n kao mam bʋʋd wa sẽn zems Tõogã, la f wẽneg n kɩɩsd Tõogã n yetẽ tɩ b wẽ maam la?”—Tʋʋ. 23:3.
17 A Poll goamã linga neb kẽere. B sok-a lame yaa: “Fo tʋʋda Wẽnnaam maan-kʋʋdbã kãsem la?” Tao-tao bala, a Poll sika a menga, n wilg t’a tũuda tõogã. A yeelame yaa: “M saam-biisi, mam da pa mi tɩ yẽ n yaa maan-kʋʋdbã kãsem ye. Bala b gʋlsame yaa: ‘Fo pa segd n gom n paoog f buudã taoor soab ye.’” d (Tʋʋ. 23:4, 5; Yik. 22:28) Rẽ poore, a Poll toeema a sẽn da gomd bũmb ning yellã. A sẽn da mi tɩ Sãnedrẽ wã neb pʋɩ-sʋk yaa Sadiseyẽ-rãmb tɩ pʋɩ-sʋk yaa Fariziyẽ-rãmbã, a yeelame: “Rapa, m saam-biisi, mam yaa Fariziyẽ, n yaa Fariziyẽ-rãmb biiga. Yaa mam sẽn tẽed kũum vʋʋgrã yĩng la b sẽn kaood mam bʋʋdã.”—Tʋʋ. 23:6.
D sã n sõsd ne tũudum a taab neba, d baooda bũmb tõnd ne bãmb fãa sẽn tẽeda, n sõs rẽ zugu
18. Bõe yĩng t’a Poll yeel t’a yaa Fariziyẽ, la wãn to la d tõe n maan wa a Polle, d sã n wa sõsd ne neb kẽere?
18 Bõe yĩng t’a Poll yeel t’a yaa Fariziyẽ? Bala a ra yaa “Fariziyẽ-rãmb biiga.” A zakã rãmb ra bee Fariziyẽ-rãmbã tũudmã pʋgẽ. Dẽnd neb wʋsg ra ket n get-a-la wa Fariziyẽ. e Bõe yĩng t’a Poll yeel tɩ yẽ yaa Fariziyẽ, n yaool n mi tɩ Fariziyẽ-rãmbã sẽn tẽed bũmb nins kũum vʋʋgrã wɛɛngẽ wã pa sɩda? Fariziyẽ-rãmbã ra tẽedame tɩ ninsaal tara sɩɩg sẽn ket n vɩ a kũumã poore, la tɩ nin-tɩrsã sɩɩsã lebgd n wat n kẽe ninsaalb a taab yĩngẽ. A Poll ra pa tẽed bõn-kãensã ye. A ra tẽeda bũmb nins a Zeezi sẽn zãms nebã kũum vʋʋgrã wɛɛngẽ wã. (Tʋʋ. 23:6) La wa Fariziyẽ-rãmbã, a Poll me ra sak n deegame tɩ ned kaalem poore, saagr n be. Sadiseyẽ-rãmbã yaool n da pa tẽed woto ye. Tõnd me sã n wa sõsd ne Katolik-rãmb pa rẽ bɩ Merka-rãmba, d tõe n maana wa a Polle. D tõe n yeelame tɩ wa bãmba, tõnd me tẽeda Wẽnnaam. La yaa sɩd tɩ bãmb tẽedame tɩ Wẽnnaam yaa mens a tãabo, tɩ tõnd yaool n tẽed Wẽnnaam ning yell Biiblã sẽn gomdã. Dẽnd d fãa sak n deegame tɩ Wẽnnaam n be.
19. Bõe yĩng tɩ tigsg ning b sẽn maan Sãnedrẽ wã taoorã pa baas neere?
19 A Poll goamã welga Sãnedrẽ wã nebã ne taaba. Biiblã yetame yaa: “B wʋsg sɩnga kaasgo, la gʋlsdbã kẽer sẽn yaa Fariziyẽ-rãmbã sullã neb yikame n tãsd ne pãng n yetẽ: ‘Tõnd pa ne bũmb ra-kãngã sẽn maan tɩ yaa wẽng ye. Bala tõe tɩ yaa malɛk n gom ne-a.’” (Tʋʋ. 23:9) Fariziyẽ-rãmbã sẽn yeel tɩ tõe tɩ yaa malɛk n gom ne a Pollã, kɩtame tɩ Sadiseyẽ-rãmbã sũy maneg n yiki! (Ges-y zĩ-gũbrã: Sadiseyẽ-rãmbã la Fariziyẽ-rãmbã.”) La no-koɛɛmã sẽn wa n lebgd wʋsgã, Rom soda-naabã le fãaga a Polle, n kɩt tɩ b yiis-a kʋʋngã sʋka. (Tʋʋ. 23:10) La yell n da ket n yɛgd a Polle. Yaa bõe yelle? Sak ning sẽn pʋgdã gomda rẽ yelle.
a Kiris-neb nins sẽn da yaa Zʋɩf-rãmbã sõorã ra tolg n yaa wʋsgo. Dẽnd sãmbg kae tɩ tigiss wʋsg la b ra maand b tẽed-n-taasã zagsẽ.
b Yʋʋm a wãn poore, a Poll sẽn gʋls lɛtr ning n tool Ebre-rãmbã pʋgẽ, a wilgame tɩ kaool-paalgã sõmblem yɩɩda kʋdrã. Lɛtrã pʋgẽ, a wilgame tɩ kaool-paalgã ledga pĩnd soabã. A Poll goamã sõnga kiris-nebã tɩ b bãng b sẽn tõe n leok b bɛɛbã to-to. Sẽn paase, kenga kiris-neb kẽer raoodo, b rãmb nins sẽn da pẽdgd n dat tɩ b taabã tũ a Moyiiz tõogã.—Ebre. 8:7-13.
c Biibl-mitb n tagsd tɩ rapã ra pʋlma Wẽnnaam tɩ b na n yɩɩ Nazireyẽ-rãmba. (Sõd. 6:1-21) Yaa sɩd tɩ yaa a Moyiiz tõogã la ned ra tõe n tik n maan pʋleng a woto, la tõogã tũub ra pa le yaa tɩlɛ ye. Tõe t’a Poll tagsame tɩ pa wẽng tɩ nin-kãensã pids pʋleng b sẽn maan a Zeova ye. Dẽnd a sẽn yao b depãens-rãmbã ligd la a yãag-bã pa wẽng ye. D pa mi nin-kãensã sẽn pʋlem Wẽnnaam bũmb ningã ye. La sẽn yaa a soab fãa, sãmbg kae t’a Poll ra pa na n kõ ligd tɩ b kʋ rũms maando, (wa Nazireyẽ-rãmbã sẽn da maandã), n tagsdẽ tɩ rẽ n na n yẽes b yel-wẽnã ye. A Zeezi sẽn ki tɩ yɩ maoongã tɛka, rũms maand ra pa le tõe n yẽes yel-wẽnd ye. D pa mi a Poll sẽn maanã fãa ball-ball ye. La d kɩsa sɩd t’a pa na n sak n maan bũmb sẽn pa sakd ne a sũur-kasetã ye.
d Neb kẽer yeelame tɩ yaa a Poll sẽn da pa ne sõma wã la a sẽn pa bãng maan-kʋʋdb kãsmã, pa rẽ bɩ tõe t’a sẽn pa zĩnd Zerizalɛm tɩ kaoos yʋʋm wʋsgã kɩtame t’a ra pa mi ned ning sẽn da lebg maan-kʋʋdb kãsmã ye. Tõe me tɩ kʋʋngã yĩnga, a pa bãng sẽn yaa ned ning n kõ noor tɩ b wẽ-a wã ye.
e Yʋʋmd 49 wã sẽnese, tẽn-tʋmdbã la kãsem-dãmbã sẽn wa n tigim taab n na n bao n bãng bu-zẽmsã neb sã n segd n tũu a Moyiiz tõogã, kiris-neb nins sẽn da be be wã sʋka, kẽer da yaa “Fariziyẽ-rãmbã sullã neb kẽer sẽn lebg tẽedbã.” (Tʋʋ. 15:5) Wõnda b ra boond-b-la woto, bala nand tɩ b lebg kiris-neba, b ra yaa Fariziyẽ-rãmbã sull neba.
