1, 2. a) Sogs-bʋs sẽn tar yõod wʋsg la siglgã taoor lʋɩtb sullã sẽn da be Zerizalɛmmã ra segd n sõng nebã tɩ b paam b leoore? b) Bõe n sõng siglgã taoor lʋɩtb sullã t’a bãng n yãk yam?

 NEBÃ fãa ra yãgdame n na n bãng yam ning b sẽn na n yãkã. Tẽn-tʋmdbã la kãsem-dãmbã tigma taab roog a yembr pʋgẽ Zerizalɛm n get taaba, n miẽ tɩ b sẽn na n yãk yam ningã tara yõod wʋsgo. Bãongã kõom yellã waa ne sogsg wʋsgo. Rẽ yĩnga, yaa tɩlɛ tɩ kiris-nebã ket n tũud a Moyiiz tõogã bɩ? A Zeova nifẽ, welgr n be kiris-neb nins sẽn yaa Zʋɩf-rãmbã ne bu-zẽmsã neb sʋk bɩ?

² Taoor lʋɩtbã maaga b yĩng n kelg kibay toor-toore. B goma Biiblã bãngr-goam toor-toor yelle, la b kelg neb kibay toor-toor sẽn yaa kaset t’a Zeova ningda bu-zẽmsã neb sẽn lebgd kiris-nebã barka. Ned fãa togsa bũmb nins a sẽn mi yellã wɛɛngẽ. B ra paama kaset buud toor-toor sẽn na n sõng-b tɩ b yãk yam. B bãnga a Zeova sẽn da rat tɩ b yãk yam ningã vẽenega. Taoor lʋɩtbã ra na n sak n tũu a Zeova sẽn dat tɩ b maanã bɩ?

3. Tʋʋm sak 15 kibarã vaeesgã na n sõnga tõnd tɩ d bãng bõe?

³ Siglgã taoor lʋɩtb sullã neb ra segd n talla tẽeb la raoodo, n sak n tũ sor ning vʋʋsem sõngã sẽn da wilgd-bã. B sẽn na n yãk yam ningã ra tõe n kɩtame tɩ Zʋɩf-rãmbã tũudmã taoor dãmb maneg n kisg-ba. Sẽn paase, tigingã neb kẽer sẽn da rat tɩ Wẽnnaam nin-buiidã ket n tũud a Moyiiz tõogã ra tõeeme n pa sak n tũ b yam-yãkrã ye. Bõe la siglgã taoor lʋɩtb sullã ra na n maane? Bɩ d gom rẽ yelle. D na n yãame tɩ rũndã-rũndã, a Zeova Kaset rãmbã siglgã taoor lʋɩtb sullã rɩkda pĩnd wẽndẽ siglgã taoor lʋɩtb sullã togs-n-taare. Tõnd me sẽn yaa kiris-nebã, d segd n dɩka b togs-n-taare, d sã n wa na n yãk yam, pa rẽ bɩ d sã n wa maood ne zu-loeese.

4, 5. Wẽnnaam Gomdã vɛrse-bʋs la a Zak lebg n togse?

⁴ Karen-biig a Zak sẽn da yaa a Zeezi ma-biigã sɩnga goama. a Wõnda yẽ n da yaa tigis-kãng taoor lʋɩta. A sẽn togs goam ninsã kʋmsa siglgã taoor  lʋɩtb sullã sẽn da yãk yam ningã. A yeela nebã sẽn da tigim taabã yaa: “A Sɩmeyõ maaga a yĩng n wilg Wẽnnaam sẽn sɩng bu-zẽmsã yell gesg to-to, sẽn na yɩl n yãk neb bãmb sʋk tɩ b yɩ nin-buiid a yʋʋrã yĩnga. La gom-kãensã zemsa ne No-rɛɛsdbã sɛbã sẽn yeelã.”—Tʋʋ. 15:14, 15.

⁵ A Zak ra kelga a Sɩmeyõ, b sẽn da boond me t’a Sɩmo-Pɩyɛɛrã, la kibay nins a Poll ne a Barnabaas sẽn togsã. Sãmbg kae tɩ rẽ kɩtame t’a tẽeg Gʋls-sõamyã vɛrse kẽer sẽn sõng sullã neb tɩ b bãng a Zeova sẽn da rat tɩ b rɩk sor ningã. (Zã 14:26) A Zak sẽn yeel tɩ “gom-kãensã zemsa ne No-rɛɛsdbã sɛbã sẽn yeelã” poore, a lebg n togsa goam nins sẽn be Amos 9:11, 12 pʋgẽ wã. Seb-kãng naaga Biiblã babg ning b sẽn da gʋls ne Ebre wã, tɩ b wae n boondẽ tɩ “no-rɛɛsdbã goamã.” (Mat. 22:40; Tʋʋ. 15:16-18) Goam nins a Zak sẽn lebg n togsã yaa toor bilf ne goam nins sẽn be Amos sebrã pʋgẽ rũndã-rũndã wã. Wõnda a Zak sẽn togs goam ninsã yita Sɛptãntã sẽn yaa Biiblã babg ning b sẽn da gʋls ne Ebre wã b sẽn lebg ne Gɛrk buud-gomdã.

6. Wãn to la Gʋls-sõamyã sõng siglgã taoor lʋɩtb sullã tɩ b bãng Wẽnnaam sẽn da rat tɩ b maane?

⁶ A Zeova tũnuga ne no-rɛɛs a Amos n pĩnd n togs tɩ wakat n wat t’a na n lebs n tilg a “Davɩɩd zãndã,” rat n yeel tɩ buud ning pʋgẽ Mesi wã sẽn da na n wa lebg Wẽnnaam Rĩungã rĩmã sẽn na n yi wã. (Eze. 21:26, 27) Rẽ yĩnga, a Zeova ra na n le yãka Israyɛll nebã bal tɩ b yaa a nin-buiid bɩ? Ayo. Bãngr-gomdã pʋgẽ, b paasame tɩ b na n tigma ‘buud toɛy-toɛyã fãa neb sẽn zãad [Wẽnnaam] yʋʋrã.’ Tẽeg-y tɩ sẽn da nan pa kaoose, a Pɩyɛɛr yeelame tɩ “Wẽnnaam pa geelg baa bilf tɩ bu-zẽmsã [Bu-zẽmsã neb nins sẽn lebg tẽedbã] yaa toor ne tõnd [Zʋɩf-rãmb nins sẽn lebg kiris-nebã] ye. La a yɩlga b sũyã b tẽebã yĩnga.” (Tʋʋ. 15:9) Dẽnd Wẽnnaam ratame tɩ Zʋɩf-rãmb la bu-zẽms neb fãa wa paam rogem-pʋɩɩr ning a sẽn kõ wã, n tɩ naag Kiristã a Rĩungã pʋgẽ n dɩ naam. (Rom. 8:17; Efɛɛ. 2:17-19) Bãngr-goamã pʋgẽ, b pa wilg zĩig baa a ye tɩ yaa tɩlɛ tɩ bu-zẽmsã neb sẽn lebg tẽedbã reng n kẽ bãongo, pa rẽ bɩ n tuub n sak Zʋɩf-rãmbã tũudmã, n yaool n paam n tɩ naag Kiristã a Rĩungã pʋgẽ n dɩ naam ye.

7, 8. a) Bõe la a Zak yeel-yã? b) Rẽ yĩnga, a Zak tika zu-sobend ning a sẽn tarã n na n modg a taabã tɩ b tũ yẽ sẽn datã bɩ? Wilg-y y leoorã võore.

⁷ Bãngr-goamã sẽn da yaa vẽenega, n paas kibay nins a Pɩyɛɛr ne a Barnabaas la a Poll sẽn togs tɩ yaa kasetã yĩnga, a Zak yeelame yaa: “Woto wã, mam tagsdame tɩ d pa segd n sãam bu-zẽmsã neb nins sẽn dat n tũ Wẽnnaamã sũy ye. La bɩ d gʋls sebr n tool-b n yeel tɩ b lak b mens ne bũmb b sẽn maan maoong n kõ bõn-naandse, ne yoobo, ne rũng sẽn sãre, la ne zɩɩm. Bala sẽn sɩng hal tẽn-kʋdemd wẽndẽ n tãag rũndã, a Moyiiz tara neb sẽn moond a goamã tẽng fãa pʋgẽ, bala vʋʋsg daar fãa b zẽkda b koees n karemd a sɛbã tigsg rotã pʋsẽ tɩ nebã kelgdẽ.”—Tʋʋ. 15:19-21.

⁸ Rẽ yĩnga, a Zak sẽn da yaa tigsgã taoor lʋɩtã tika zu-sobend ning a sẽn tarã n na n modg a taabã tɩ b tũ yẽ sẽn datã bɩ? A bada! A Zak sẽn yeel tɩ  mam tagsdame tɩ wã wilgdame t’a ra pa rat n modg siglgã taoor lʋɩtb sullã tɩ b tũ yẽ sẽn datã ye. A ra togsd-b-la a tagsg bala, sẽn zems ne kibay buud toor-toor b sẽn wʋm tɩ yaa kasetã, la Gʋls-sõamyã sẽn da yeel bũmb ning yellã wɛɛngẽ wã.

9. A Zak yam-yãkrã waa ne nafa bʋse?

⁹ A Zak yam-yãkrã ra yaa sõma bɩ? N-ye. Bala tẽn-tʋmdbã ne kãsem-dãmbã wa n tũu rẽ. B yam-yãkrã waa ne nafa bʋse? Bũmb a ye yaa tɩ b yam-yãkrã ra pa na n ‘sãam bu-zẽmsã neb nins sẽn dat n tũ Wẽnnaamã sũy ye.’ Bala ra pa na n le yɩ tɩlɛ ne-b tɩ b tũ a Moyiiz tõogã ye. (Tʋʋ. 15:19) Bũmb a to yaa tɩ b yam-yãkrã ra na n wilgame tɩ b pa maand b toog kae ne Zʋɩf-rãmb nins sẽn lebg kiris-nebã sũur-kasetã, bala na maan yʋʋm wʋsgo, vʋʋsg daar fãa, nin-kãens ra wʋmda a Moyiiz goamã b sẽn zẽkd b koees n karemd “tigsg rotã pʋsẽ tɩ nebã kelgdẽ” wã. b (Tʋʋ. 15:21) Hakɩɩka, tẽn-tʋmdbã ne kãsem-dãmbã yam-yãkrã ra na n sõngame tɩ kiris-neb nins sẽn da yaa Zʋɩf-rãmbã la bu-zẽmsã neb zems-n-taarã pãng paase. Sẽn yɩɩd fãa, ra na n taa Wẽnnaam a Zeova yam, bala b yam-yãkrã ra zemsa ne a raabã. B sẽn welg yell sẽn da tõe n sãam tigimsã neb laafɩ la b zems-n-taarã woto wã sɩd yaa mak-sõng tɛkẽ, rũndã-rũndã kiris-nebã tigimsã yĩnga.

10. Wãn to la rũndã-rũndã siglgã taoor lʋɩtb sullã rɩkd pĩnd wẽndẽ siglgã taoor lʋɩtb sullã togs-n-taare?

¹⁰ Wa d sẽn yã sak ning sẽn loogã pʋgẽ wã, rũndã-rũndã siglgã taoor lʋɩtb sullã me rɩkda pĩnd wẽndẽ siglgã taoor lʋɩtb sullã togs-n-taare, n teegd a Zeova sẽn yaa yĩngr la tẽng naabã, la a Zeezi Kirist sẽn yaa tigingã Zu-soabã, tɩ b wilgd-b sor bũmb fãa pʋgẽ. c (1 Kor. 11:3) Wãn to la b maand rẽ? A Albert Schroeder, sẽn yɩ siglgã taoor lʋɩtb sull ned yʋʋmd 1974 tɛk n tãag a sẽn wa n maan kaalem yʋʋmd 2006 tʋʋlg kiuugã yeelame yaa: “Siglgã taoor lʋɩtb sull neb tigimda taab Arb daar fãa. B sɩngda tigsgã ne pʋʋsgo, n kot a Zeova t’a wilg-b sor ne a vʋʋsem sõngã maasem. B modgda wakat fãa tɩ bũmb nins yell b sẽn gomdã la b yam-yãkr fãa zems  ne Biiblã sẽn yaa Wẽnnaam Gomdã sẽn yetã.” A Milton Henschel me sẽn yɩ siglgã taoor lʋɩtb sull ned n tãag a sẽn wa n maan kaalem yʋʋmd 2003 tʋʋlg kiuugã soka Galaad lekoll 101 soabã karen-biisã sokr sẽn tar yõod wʋsgo. A sok-b lame yaa: “Rẽ yĩnga, siglg le bee tẽngã zug ka, t’a taoor lʋɩtbã baood n bãngd sẽn be Biiblã sẽn yaa Wẽnnaam Gomdã pʋgẽ n yaool n yãk yam bũmb fãa pʋgẽ bɩ?” Yaa vẽeneg tɩ yaa ayo.

11. Wãn to la b taas tigimsã siglgã taoor lʋɩtb sullã yam-yãkrã?

¹¹ Siglgã taoor lʋɩtb sullã sẽn da be Zerizalɛmmã tõog n yãka yam bãongã kõom wɛɛngẽ. La sẽn na yɩl tɩ zems-n-taar kell n zĩnd tigimsã neb sʋka, ra yaa tɩlɛ tɩ b sẽn na n taas-b yam-yãkr ningã yɩ vẽenega, la keng b raoodo. Wãn to la b ra tõe n maan dẽ? Biiblã yetame yaa: “Tẽn-tʋmdbã ne kãsem-dãmbã la tigingã fãa rɩka sard n na n yãk rap bãmb sʋkã tɩ b tũ a Poll ne a Barnabaas n kẽng Ãntiyoose. B tʋma a Zida b sẽn boond me t’a Barsabaasã ne a Sɩlaase. Yaa rap sẽn da lʋɩt taoor b saam-biisã sʋka.” Sẽn paase, b gʋlsa lɛtr n tũnug ne rapã n toole. Woto b ra tõe n karm-a-la Ãntiyoose, Siiri la Silisi tigimsã fãa pʋgẽ.—Tʋʋ. 15:22-26.

12, 13. Siglgã taoor lʋɩtb sullã sẽn tʋm a Zida ne a Sɩlaas la b tool lɛtr me wã waa ne nafa bʋse?

¹² A Zida ne a Sɩlaas ra naaga rap nins ‘sẽn da lʋɩt taoor b saam-biisã sʋkã.’ Dẽnd siglgã taoor lʋɩtb sullã neb sẽn yãk-b tɩ b na n tɩ gom b yʋʋr yĩngã ra zemsame. Rap a naasã ra na n sõnga tigimsã nebã tɩ b bãng vẽeneg tɩ koɛɛg ning b sẽn tʋm-b tɩ b wa taasã na n sõngame tɩ b welg bãongã kõom yellã. La pa rẽ bal ye. B ra na n bãngame tɩ yaa no-paalg sẽn yit siglgã taoor lʋɩtb sullã nengẽ. Rapã b sẽn yãkã ra na n sõngame tɩ Zʋɩf-rãmb nins sẽn da lebg kiris-nebã, ne bu-zẽmsã neb sẽn da lebg kiris-nebã zems-n-taar pãng paase. Rapã b sẽn tʋmã ra yaa yam tʋʋmde, leb n wilgame tɩ b ra nonga b tẽed-n-taasã. Sãmbg kae tɩ sõngame tɩ b kogl laafɩ la zems-n-taar ning sẽn da be Wẽnnaam nin-buiidã sʋkã ye.

¹³ Lɛtrã pa wilg bu-zẽmsã neb sẽn da lebg kiris-nebã b sẽn da segd n maan bãongã kõom wɛɛngẽ bal ye. Sõng-b lame tɩ b bãng b sẽn da segd n maan me n paam n ta a Zeova yam la b paam a barkã. Ad lɛtrã goam nins sẽn tar yõod n tɩ yɩɩdã: “Vʋʋsem sõngã ne tõnd mens tagsame tɩ zemsame tɩ d ra paas yãmb zɩɩb a to n zʋʋg bõn-kãensã sẽn yaa tɩlɛ wã ye: Lak-y y mens ne bũmb b sẽn maan maoong n kõ bõn-naandse, ne zɩɩm, ne rũng sẽn sãre, la ne yoobo. Yãmb sã n lak y mens fasɩ ne bõn-kãense, y vɩɩmã na n yɩɩ sõma. Wẽnd na zĩnig-y laafɩ!”—Tʋʋ. 15:28, 29.

14. Bõe n kɩt tɩ laafɩ la zems-n-taar be a Zeova nin-buiidã sʋka, baa ne welg taab la zũnd-zãndã sẽn pid dũniyã pʋgẽ wã?

¹⁴ Rũndã-rũndã, a Zeova Kaset rãmbã sẽn tẽed bũmb ninsã yaa a yembre, b zemsda taab me. Dũniyã gill zugu, b sõorã yɩɩda milyõ a nii.  B bee sẽn yɩɩd tigims bãmb tus-koabg pʋsẽ. La bõe n kɩt tɩ zems-n-taar a woto be b sʋka, baa ne welg taab la zũnd-zãndã sẽn pid dũniyã pʋgẽ wã? Sẽn yɩɩd fãa, laafɩ la zems-n-taar bee d sʋka, bala d paamdame t’a Zeezi sẽn yaa tigingã Zu-soabã wilgd tõnd sor vẽeneg ne “tʋm-tʋmd sẽn tũud sɩd la sẽn tar yamã,” sẽn yaa siglgã taoor lʋɩtb sullã maasem. (Mat. 24:45-47) Sẽn paase, yaa d tẽed-n-taasã sẽn be dũniyã gill zugã sẽn sakd n tũud sor ning siglgã taoor lʋɩtb sullã sẽn wilgd tõndã yĩnga.

15, 16. Tigimsã neb manesem yɩɩ wãn ne siglgã taoor lʋɩtb sullã yam-yãkrã, la bõe yĩnga?

¹⁵ Tʋʋm sebrã wilgdame tɩ rap a naasã sẽn da yi Zerizalɛmmã sẽn ta Ãntiyoosã, b tigma “sullã neb fãa n kõ-b sebrã.” Saam-biisã manesem yɩɩ wãn ne siglgã taoor lʋɩtb sullã yam-yãkrã? Biiblã yetame yaa: “B sẽn karem sebrã n sa wã, b sũy yɩɩ noog wʋsg b sẽn paam raood kengrã yĩnga.” (Tʋʋ. 15:30, 31) Sẽn paase, a Zida ne a Sɩlaas “goma naoor wʋsg n keng saam-biisã raood la b paas-b pãnga.” Nin-kãensã sẽn vẽneg Wẽnnaam raabã n togs nebã yĩnga, b bool-b lame tɩ no-rɛɛsdba, wa a Poll ne a Barnabaase, la neb a taaba.—Tʋʋ. 13:1; 15:32; Yik. 7:1, 2.

¹⁶ A Zeova ninga siglgã taoor lʋɩtb sullã yam-yãkrã barka. Kɩtame tɩ tigimsã fãa neb paam raood kengre. Bõe yĩng tɩ tigimsã neb paam raood kengre? Bala, siglgã taoor lʋɩtb sullã yam-yãkrã ra yaa vẽenega, ra zemsa a wakate, ra zemsa ne Wẽnnaam Gomdã, leb n da yaa ne vʋʋsem sõngã sõngr la b sẽn tõog n yãk yamã. Sẽn paase, siglgã taoor lʋɩtb sullã tʋma rap tɩ b tɩ taas tigimsã koɛɛgã ne nonglem.

17. Wãn to la tigims sull yel-gɛtbã rɩkd a Polle, a Barnabaase, a Zida ne a Sɩlaas togs-n-taar rũndã-rũndã?

¹⁷ Rũndã-rũndã siglgã taoor lʋɩtb sullã rɩkda pĩnd wẽndẽ siglgã taoor lʋɩtb sullã togs-n-taare, n wilgd d tẽed-n-taasã sẽn be dũniyã gill zugã sore, tɩ zemsd a wakate. Siglgã taoor lʋɩtb sullã sã n wa yãk yam, b taasda tigimsã b yam-yãkrã vẽenega. Sasa ninga, b tũnugda ne tigims sull yel-gɛtbã. D tẽed-n-ta-kãensã sẽn sakd n mongd b mensã togda soay n tɩ kaagd tigimsã, n taasd-b siglgã taoor lʋɩtb sullã noyã, la b kengd-b raoodo. Wa a Poll ne a Barnabaase, b naagda b tẽed-n-taasã n “zãmsd nebã la b moond koe-noogã sẽn yaa a Zeova gomdã.” (Tʋʋ. 15:35) Wa a Zida ne a Sɩlaase, b ‘gomda naoor wʋsg n kengd saam-biisã raood la b paasd-b pãnga.’

18. Bõe la a Zeova nin-buiidã segd n maan n ket n paamdẽ t’a ningd-b barka?

¹⁸ Bõe n na n sõng tigimsã sẽn be dũniyã gill zugã tɩ b ket n paamdẽ tɩ laafɩ la zems-n-taar be b pʋsẽ, baa ne welg taabã sẽn pid dũniyã pʋgẽ wã? Tẽeg-y tɩ yaa karen-biig a Zak n wa n yeel yaa: “Yam ning sẽn yit yĩngrã rengd n kɩtame tɩ ned yɩ yɩlemde, tɩ rẽ poor bɩ a kɩt t’a yɩ ned sẽn baood  laafɩ, sẽn maand bũmb fãa ne yam, sẽn sakd nana . . . Sẽn paase, b bʋta tɩrlem bilã laafɩ pʋgẽ neb nins sẽn baood laafɩ wã yĩnga.” (Zak 3:17, 18) D pa mi a Zak sã n da tagsda tigsgã sẽn zĩnd Zerizalɛmmã yelle, a sẽn wa n gʋlsd gom-kãensã ye. La d sẽn vaees bũmb nins sẽn be Tʋʋm sak 15 pʋgẽ wã sõnga tõnd tɩ d bãng tɩ sẽn na yɩl n paam a Zeova barkã, yaa tɩlɛ tɩ laafɩ la zems-n-taar be d sʋka, la d tũud taoor lʋɩtbã noy la b saglsã me.

19, 20. a) Bõe n da wilgd tɩ laafɩ la zems-n-taar bee Ãntiyoos tigingã pʋgẽ? b) Bõe la a Poll ne a Barnabaas ra tõe n maan masã?

¹⁹ Ãntiyoos tigingã pʋgẽ, ra yaa vẽeneg masã tɩ laafɩ la zems-n-taar bee nebã sʋka. Ãntiyoos tigingã neb pa gɩdg b tẽed-n-taas nins sẽn da yit Zerizalɛmmã tɩ b ra wa kaag-b ye. B pʋd n wilgame tɩ b sũur yɩɩ noog ne a Zida la a Sɩlaas kaagrã. Biiblã yetame yaa: “B sẽn pa be n kaoos bilfu, saam-biisã pʋʋs-b-la wẽnd-na-taase, la b bas-b tɩ b leb neb nins sẽn tʋm bãmbã nengẽ,” rat n yeel tɩ Zerizalɛm. d (Tʋʋ. 15:33) Sãmbg kae tɩ siglgã taoor lʋɩtb sullã neb sẽn da be Zerizalɛmmã sũur yɩɩ noogo, b sẽn wʋm nin-kãensã a yiibã sẽn togs bũmb nins b so-toakã wɛɛngẽ wã ye. Ne a Zeova barkã, b tõogame n tʋm b tʋʋmdã n baase!

²⁰ B sẽn welg bãongã kõom yellã poore, a Poll ne a Barnabaas kell n paa Ãntiyoose. B ra kẽesa b toog zãng n lʋɩt taoor koɛɛgã mooneg pʋgẽ. Rũndã-rũndã, yaa woto me la tigims sull yel-gɛtbã maanda, b sã n wa kaagd tigimsã. (Tʋʋ. 13:2, 3) Tigims sull yel-gɛtbã sẽn be a Zeova nin-buiidã sʋkã sɩd yaa bark tɛkẽ! Bõe la a Zeova ra na n wa tũnug ne a Poll ne a Barnabaas sẽn da yaa koe-moondb sẽn tar yẽesmã n maane, la wãn to la a ning-b barka? D na n goma rẽ yell sak ning sẽn pʋgdã pʋgẽ.