D koe-moond-taase:

Mams-y y yamẽ tɩ yãmb yaa tẽn-tʋmdbã nin-yende, n zĩ Oliiv tɩɩs tãngã zugu, t’a Zeezi wa puk y taoore. La bilf nand t’a leb saasẽ, a yeelame yaa: “Vʋʋsem sõngã sã n wa sig yãmb zutu, yãmb na n paama pãnga. Yãmb na n yɩɩ mam kaset rãmb Zerizalɛm ne Zide soolmã fãa pʋgẽ la Samari, la hal n tãag dũniyã zĩig ning sẽn zãr n yɩɩdã.” (Tʋʋ. 1:8) Yãmb sẽn wʋm rẽ wã, y manesem na n yɩɩ wãna?

Tõe tɩ rabeem na n yõk-y lame, y sã n tags tʋʋmdã sẽn yaa tʋʋm-kẽengã yĩnga. Tõe tɩ y na n soka y meng yaa: ‘D sõorã sẽn pa waoogã, d yɩta wãn n moon koɛɛgã hal n tãag “dũniyã zĩig ning sẽn zãr n yɩɩdã”?’ Tõe tɩ y na n lebg n tẽega goam nins a Zeezi sẽn togs yʋng ning sẽn deng a kũumã. A ra yeelame yaa: “Yamb pa yɩɩd a zu-soab ye. B sã n namsa maam, b na n namsa yãmb me. B sã n tũu mam goamã, b na n tũu yãmb me goamã. La b na n maana yãmb bõn-kãensã fãa mam yʋʋrã yĩnga, b sẽn pa mi Soab ning sẽn tʋm maamã yĩnga.” (Zã 15:20, 21) Y sã n bʋgs gom-kãensã zugu, y tõe n soka y meng yaa: ‘M yɩta wãn n tõog n kõ kaset sõma baa ne namsgã?’

Rũndã-rũndã, d sokda d mens sogs-kãensã buudu. Tõnd sẽn yaa a Zeova kaset rãmbã, tõnd tʋʋmd yaa d kõ kaset sõma “hal n tãag dũniyã zĩig ning sẽn zãr n yɩɩdã,” n ‘sõng buud toɛy-toɛyã fãa neba.’ (Mat. 28:19, 20) Wãn to la d na n tõog n tʋm tʋʋm-kãngã, sẽn yɩɩd fãa, b sẽn pĩnd n togs tɩ b na n namsa tõnd rẽ yĩngã?

Tʋʋm sebrã wilgda tõnd a Zeova sẽn sõng tẽn-tʋmdbã la pipi kiris-neb a taabã to-to tɩ b tõog n tʋm tʋʋmdã. B yiisa seb-kãngã yãmb sẽn zãmsd masã wã n na n sõng yãmb tɩ y bãng bũmb toor-toor pipi kiris-nebã sẽn maane, la b sũy sẽn da noom to-to b sẽn da ne tɩ koe-noogã mooneg kẽngda taoor tʋʋl-tʋʋllã. Y na n yãame tɩ bũmb kẽer wɛɛngẽ, wõneg n be pipi kiris-nebã ne rũndã-rũndã kiris-nebã sʋka, tɩ yɩ-y noogo. Y na n yãame tɩ wõnegã pa d tʋʋmdã wɛɛngẽ bal ye. Yaa d sẽn sigl tʋʋmdã to-to wã me wɛɛngẽ. Y sã n kell n bʋgs yel-kãensã zugu, sãmbg kae tɩ na n kɩtame tɩ y maneg n kɩs sɩd tɩ Wẽnnaam a Zeova ket n wilgda a siglgã babg ning sẽn be tẽngã zugã sore.

D pʋʋsda a Zeova n kotẽ tɩ Tʋʋm sebrã vaeesgã sõng-y tɩ y bas y yam zãng-zãng t’a Zeova na n sõng-y-la ne a vʋʋsem sõngã maasem tɩ y tõog toogo. Y sã n tũ seb-kãngã saglsã, na n sõng-y lame tɩ y kell n “kõ kaset sõma Wẽnnaam Rĩungã wɛɛngẽ,” la y tõog n sõng neb a taabã me tɩ b wa paam vɩɩm sẽn kõn sa wã.—Tʋʋ. 28:23; 1 Tɩm. 4:16.