1. Bilg-y yɛlã sẽn da yaa to-to Pãntekotã tigr daare.

 BŨMB toor-toor la nebã ra maand Zerizalɛm, tɩ yaa sũ-noogo. a Bug-zõos n da rukd wẽnd-doogã tẽn-kugrã zĩigẽ, tɩ Levi buudã neb kẽer yɩɩndẽ, (Yɩɩn-sõamyã 113 n tãag 118) t’a taab reesdẽ. Sãamb wʋsg n da wa Zerizalɛm, n gilgd n get tẽngã. B yii zĩ-zãrsẽ n wa. Wala makre, Elam, Mezopotami, Kapadose, Põ, Ezɩpt la Rom. b B waa bõe yĩnga? Yaa Pãntekotã tigr b sẽn boond me tɩ “dẽenem kood biis kũunã” yĩnga. (Sõd. 28:26) Tig-kãng b sẽn da maand yʋʋmd-yʋʋmdã sɩngda orzã kẽebgã baasgẽ, la bɩle wã kẽebgã sɩngrẽ. Ra yaa sũ-noog daare.

2. Bõe n maan yʋʋmd 33 Pãntekotã daare, tɩ ra yaa yel-solemde?

² Yʋʋmd 33 Pãntekotã daar yibeoog wakat a 9 wã sẽnese, yel-solemd n maane, tɩ nebã ra na n ket n gomd a yell hal n tãag rũndã. Zĩig pʋgẽ, “bʋrg sẽn wõnd sobg sẽn fugd ne pãng n yi yĩngri, n wa.” (Tʋʋ. 2:2) Bʋrgã pida roog ning pʋgẽ a Zeezi karen-biis na maan bãmb 120 sẽn da tigim taabã. Rẽ poore, yel-solemd n maane. Zɩlma sẽn wõnd bugum sẽn weel n sig karen-biisã ned kam fãa zugu. c Karen-biisã fãa “pida ne vʋʋsem sõngo,” n sɩng buud-goam toɛy-toɛy goam. Karen-biisã sẽn yi roogã pʋgẽ wã, b ra sõsda ne sãamb nins b sẽn segd Zerizalɛm pʋgẽ wã bãmb mengã buud-gomdã pʋgẽ. La rẽ linga sãambã. Sɩd me, b ned kam fãa ra wʋmda karen-biisã sẽn “gomd yẽ mengã buud-gomdã pʋgẽ.”—Tʋʋ. 2:1-6.

3. a) Bõe yĩng tɩ d tõe n yeel tɩ bũmb nins sẽn maan yʋʋmd 33 Pãntekotã daarã yɩɩ bũmb sẽn tar yõod wʋsg a Zeova tũubã wɛɛngẽ? b) A Pɩyɛɛr sẽn wa n gomd ne neb kʋʋngã Pãntekotã daarã, yɩɩ ‘saasẽ Rĩungã kʋɩlen-bi-bʋg’ la a tʋm ne?

³ Bũmb ning sẽn maanã yɩɩ bũmb sẽn tall yõod wʋsg a Zeova tũubã wɛɛngẽ. Yɩɩ Israyɛll sẽn yaa Wẽnnaam dẽndã, rat n yeel tɩ kiris-neb nins  sẽn paam vʋʋsem sõng zaeebã tigingã luglgu. (Gal. 6:16) La bõn-kãsems a taab me n maane. A Pɩyɛɛr sẽn wa n gomd ne kʋʋngã badaarã, a tʋma ne “saasẽ Rĩungã kʋɩlen-biis” a tãabã pipi soabã. Kʋɩlen-biig fãa ra na n paka sore, tɩ buud toɛy-toɛyã fãa neb tõe n wa paam bark toor-toore. (Mat. 16:18, 19) Ne pipi kʋɩlen-biigã maasem, Zʋɩf-rãmba, la neb nins sẽn da tuub n sak Zʋɩf-rãmbã tũudmã tõog n saka koe-noogã, la b paam Wẽnnaam vʋʋsem sõngã zaeebo. d Woto, b lebga Israyɛll sẽn yaa Wẽnnaam dẽndã neba, n da saagdẽ n na n wa yɩ rĩm-dãmb la maan-kʋʋdb Mesi wã Rĩungã pʋgẽ. (Vẽn. 5:9, 10) Kaoosg zugẽ, Samari neb la bu-zẽmsã neb ra na n wa paam n naaga nin-kãensã. Yam-bʋg la rũndã-rũndã kiris-nebã tõe n dɩk yel-kãsems nins sẽn maan yʋʋmd 33 Pãntekotã daarã pʋgẽ?

4. Wãn to la rũndã-rũndã kiris-nebã ket n tʋmd tʋʋmd ning sẽn sɩng yʋʋmd 33 kiris-nebã tigingã luglg sasa wã?

⁴ Kiris-nebã tigingã sɩnga ne karen-biis na maan bãmb 120, sẽn da “tigim taab zĩig a yembre,” yĩngr doog a ye pʋgẽ, la sẽn da paam vʋʋsem sõngã zaeebo. (Tʋʋ. 2:1) Daar-n-kãnga, neb tusa n deeg lisgu. La tigingã nebã sõor kell n talla paasgo, hal n tãag rũndã. Hakɩɩka, ne rũndã-rũndã kiris-nebã tigingã, rat n yeel tɩ pagb la rap sẽn yaa wẽn-zoɛtb maasem, b moonda “Rĩungã koe-noogã” dũniyã tɛk fãa tɩ yaa “kaset buud toɛy-toɛyã fãa yĩnga,” nand tɩ dũniyã saab ta.—Mat. 24:14.

5. Wãn to la tigissã naf pipi kiris-nebã? Wãn to la tigissã nafd tõnd rũndã-rũndã?

⁵ Sẽn paase, kiris-nebã tigingã luglgã ra na n sõnga sẽn paam-b vʋʋsem sõngã zaeebã, tɩ b paam raood kengre, la b wa sõng “piis a taabã” neb me  kaoosg zugẽ tɩ bãmb me paam raood kengre. (Zã 10:16) Lɛtr ning a Poll sẽn gʋls n tool Rom kiris-nebã pʋgẽ, a wilgame t’a sũur nooma ne b sẽn teend taabã. A yeelame yaa: “Mam data ne m sũur fãa n yã yãmba, n kõ-y kũun sẽn yit Wẽnnaam nengẽ tɩ y tẽebã paam pãnga. Mam sẽn dat n yeelã yaa tɩ ned kam fãa tẽeb na n kenga a to raoodo. Yãmb tẽebã keng mam daoodo, tɩ ma-me tẽebã keng yãmb raoodo.”—Rom. 1:11, 12.

6, 7. Wãn to la rũndã-rũndã kiris-nebã tũud noor ning a Zeezi sẽn kõ-bã, rat n yeel tɩ n moond buud toɛy-toɛyã fãa neb koɛɛgã?

⁶ Rũndã-rũndã, kiris-nebã tʋmda tʋʋmd ning pipi kiris-nebã me sẽn da tʋmdã. A Zeezi kõo a karen-biisã tʋʋmd sẽn pa nana, la sẽn yaool n kõt sũ-noog wʋsgo. A yeel-b lame yaa: “Bɩ y kẽng n tɩ sõng buud toɛy-toɛyã fãa neb tɩ b yɩ mam karen-biisi, n lis bãmb ne Ba wã la Biigã la vʋʋsem sõngã yʋʋre, la y zãms bãmb tɩ b tũ bũmb nins fãa mam sẽn yeel yãmbã.”—Mat. 28:19, 20.

⁷ A Zeova tũnugda ne kiris-neb tigingã n tʋmd tʋʋm-kãng rũndã-rũndã. Yaa sɩd tɩ sẽn na yɩl n moon neb sẽn gomd buud-goam toɛy-toɛy koɛɛgã pa nana ye. La a Zeova Kaset rãmbã yiisda sɛb sẽn tik Biiblã zugu, sẽn yɩɩd buud-goam 1000 pʋgẽ. Y sã n kẽnda tigissã n pa vaandẽ, n moond Rĩungã koe-noogã la y sõngd nebã tɩ b lebgd a Zeezi karen-biisi, yaa bʋʋm sẽn sek y na maan sũ-noogo. Bala yãmb naaga neb sõor sẽn pa waoog sẽn be tẽngã zugu, n kõt kaset sõma a Zeova yʋʋrã wɛɛngẽ.

8. Wãn to la tigissã nafd tõnd ned kam fãa yembr-yembre?

⁸ Sẽn na yɩl n sõng-d tɩ d tõog toog ne sũ-noog sasa kãensã sẽn yaa toog wakatã, Wẽnnaam a Zeova kɩtame tɩ d tar tẽed-n-taas dũniyã gill zugu. A Poll gʋlsa kiris-neb nins sẽn da yaa Ebre-rãmbã n yeel-b yaa: “Bɩ d tẽegd taab yelle, sẽn na yɩl n sõng taab tɩ d bɩɩs nonglem la d tʋm tʋʋm-sõma. Bɩ d ra bas taab tiging wa neb kẽer sẽn minim n maandẽ wã ye. La bɩ d kengd taab raoodo, sẽn yɩɩd fãa, d sẽn ne tɩ daarã kolgdame wã yĩnga.” (Ebre. 10:24, 25)  Kiris-nebã tigingã yaa kũun sẽn yit a Zeova nengẽ, sẽn na yɩl tɩ d tõog n keng d taabã raoodo, la d paam tɩ bãmb me keng d raoodo. Rẽ wã, ra zãag-y y meng ne y tẽed-n-taasã ye. Da bas-y n pa le kẽnd tigissã ye.

9, 10. Bõe la neb kẽer maan-yã, sẽn na yɩl n tõog n taas buud-goam toɛy-toɛy neb koɛɛgã?

⁹ Mams-y y yamẽ Zʋɩf-rãmbã ne neb nins sẽn tuub n sak Zʋɩf-rãmbã tũudmã sẽn da naag taabã sũur sẽn da noom to-to, yʋʋmd 33 Pãntekotã tigr daarã. Neb wʋsg sẽn da be be ra gomda buud-gomd neb wʋsg sẽn wʋmde. Tõe tɩ ra yaa Gɛrkã bɩ Ebre wã. La masã, “b ned kam fãa ra wʋmda karen-biisã sẽn gomd yẽ mengã buud-gomdã pʋgẽ.” (Tʋʋ. 2:6) Yaa vẽeneg tɩ b sũy yɩɩ noogo, b sẽn wʋm koe-noogã b mengã buud-gomdã pʋgẽ wã. Yaa sɩd tɩ rũndã-rũndã, kiris-nebã pa tar tõog n tõe n tiig n gom buud-gom-zẽms ye. La b wʋsgã kẽesa b toog n moond buud toɛy-toɛyã fãa neb Rĩungã koɛɛgã. Wãn to? Kẽer zãmsa buud-gomd a to, sẽn na yɩl n tɩ sõng buud-gom-zẽng tiging sẽn be bãmb babgẽ wã, pa rẽ bɩ n yik n kẽng tẽng a to. Naoor wʋsgo, neb nins b sẽn moond koɛɛgã sũur nooma wʋsg ne b modgrã.

¹⁰ D gom a Kiristine yelle. Yẽ ne a Zeova Kaset rãmb a yopoe naaga taab n zãms Gujarati buud-gomdã. A wa n sega a tʋmd-n-taag sẽn yaa pag sẽn gomd buud-gom-kãnga, n pʋʋs-a buud-gomdã pʋgẽ. Pagã sũur yɩɩ noogo, t’a ra rat n bãng bũmb ning sẽn kɩt t’a Kiristine maan modgr a woto n zãms Gujarati buud-gomdã sẽn yaa toogã. A Kiristine tõog n taas-a-la koɛɛgã. Pagã yeela a Kiristine yaa: “Yãmb sẽn dat n taas nebã koɛɛg ningã tog n tara yõod wʋsgo.”

11. Bõe la d tõe n maan n tõog n moon buud a taabã neb Rĩungã koe-noogã?

 ¹¹ Yaa sɩd tɩ pa d fãa n tõe n zãms buud-gomd a to ye. La d tõe n segla d mense, sẽn na yɩl n tõog n taas buud toɛy-toɛy neb Rĩungã koɛɛgã. Wãn to? Bũmb a ye d sẽn tõe n maane, yaa d sẽn na n tũnug ne JW Language^® aplikasiyõ wã n zãms d sẽn tõe n pʋʋs ned to-to ne buud-gomd b sẽn wae n gomd tõnd sẽn beẽ wã. Y tõeeme me n zãms buud-gomdã gom-biis a wãna. Rẽ tõe n kɩtame tɩ sẽn gomd-b buud-gomdã rat n bãng bũmb kẽer Biiblã zug n paase. Wilg-y-b tõnd sɩtã sẽn yaa jw.org, la y wilg-b video-rãmbã la sɛb nins fãa sẽn be b buud-gomdã pʋgẽ wã. D sã n tʋmd ne tʋʋm-te-kãensã koɛɛgã mooneg sasa, d tõe n paama sũ-noog ning pipi kiris-nebã sẽn paamã, buud a taabã nebã sẽn wʋm koe-noogã b ‘meng buud-gomdã pʋgẽ’ tɩ ling-bã.

12. a) Bõe la a Zowɛll yeel tɩ paam pidsg yʋʋmd 33 Pãntekotã tigrã daare? b) Bõe yĩng t’a Zeezi karen-biisã ra gũud tɩ bãngr-gomd ning a Zowɛll sẽn da togsã paam pidsgu?

¹² ‘A Pɩyɛɛr yikame’ n gom ne kʋʋngã sẽn da yaa buud toɛy-toɛy nebã. (Tʋʋ. 2:14) A wilgame tɩ yaa Wẽnnaam n maan yel-solemdã tɩ karen-biisã tõe n gom buud-goam toɛy-toɛyã, sẽn na yɩl n pids bãngr-gomd ning a Zowɛll sẽn da togsã. A ra yeelame yaa: “Mam na n pʋdga m vʋʋsmã neb buud fãa zutu.” (Zow. 2:28) Nand t’a Zeezi leb saasẽ, a yeela a karen-biisã yaa: “Mam na n kosa Ba wã, t’a kõ yãmb sõangd a to.” A Zeezi wilgame tɩ sõangd a to wã yaa “vʋʋsem sõngã.”—Zã 14:16, 17.

13, 14. Bõe la a Pɩyɛɛr maan t’a goamã kẽ a kɛlgdbã sũyã, la wãn to la d tõe n dɩk a togs-n-taare?

¹³ A Pɩyɛɛr sẽn togs kʋʋngã goam nins yaoolmã tara yõod wʋsgo. A yeel-b lame yaa: “Bɩ Israyɛll buudã neb fãa bãng vẽeneg tɩ Wẽnnaam kɩtame tɩ Zeezi-kãng yãmb sẽn kʋ ra-luk zugã lebg Zu-soab la Kirist.” (Tʋʋ. 2:36) Yaa sɩd tɩ b sẽn wa n ka a Zeezi kũum ra-lukã zugã, neb nins sẽn da kelgd a Pɩyɛɛrã sʋka, wʋsg pa zĩnd be ye. La b sẽn da yaa buud ning sẽn kʋ  a Zeezi wã nebã yĩnga, b ra tara taale. A Pɩyɛɛr goma ne a Zʋɩf-taasã ne waoogre, hal t’a goamã kẽ-ba. A Pɩyɛɛr da pa ningd a kɛlgdbã taal ye. A ra ratame tɩ b tek yam n kos sugri. Kʋʋngã sẽn kelg a Pɩyɛɛr goamã, b sũy yikame bɩ? A bada. A Pɩyɛɛr goamã “kẽe b sũyã sõma.” B sok-a lame yaa: “Bõe la d segd n maane?” A Pɩyɛɛr sẽn gom to-to wã kɩtame t’a goamã kẽ neb wʋsg sũyã, tɩ b tek yam n kos sugri.—Tʋʋ. 2:37.

¹⁴ D tõe n dɩka a Pɩyɛɛr togs-n-taare, n modgdẽ tɩ d goamã kẽed nebã sũyã. Y sã n wa taasd nebã koɛɛgã, tɩ ned yeel bũmb sẽn pa zems ne Biiblã sẽn yetã, pa tɩlɛ tɩ y wẽ no-koɛɛm ne a soab ye. Yɩta sõma tɩ y sõs bũmb yãmb y yiibã fãa sẽn sak n deeg zugu. Y sã n maan woto, tõe n sõng-a lame t’a wʋm Wẽnnaam Gomdã võore. Naoor wʋsgo, d sã n gom bũmb nins sẽn be Biiblã pʋgẽ wã yell ne waoogre, sũ-tɩrs rãmbã sakd n kelgame.

15. a) Bõe la a Pɩyɛɛr yeel-yã, la nebã manesem yɩɩ wãna? b) Bõe yĩng tɩ neb kʋʋngã sẽn kelg koe-noogã Pãntekotã tigr daarã ra segl n sa n tõe n deeg lisg daar-n-kãnga?

¹⁵ A Pɩyɛɛr yeela Zʋɩf-rãmbã ne neb nins sẽn tuub n sak Zʋɩf-rãmbã tũudmã yʋʋmd 33 Pãntekotã tigrã sẽn yɩ sũ-noog daarã yaa: “Bɩ y tek yam n kos sugri, la bɩ y ned kam fãa reeg lisgu.” (Tʋʋ. 2:38) Baraare, sẽn ta neb 3000 n deeg lisgu. Tog n yɩɩ bãgs sẽn be Zerizalɛm pʋgẽ wall sẽn pẽ beenẽ. e Rẽ yĩnga, b reega lisgã n yaool n da nan pa segl b mens n sa bɩ? Woto rat n yeelame tɩ Biibl karen-biisã, la a Zeova Kaset rãmbã kamb pa tog n deng n segl b mens n sa n yaool n deeg lisg bɩ? Ayo. D tẽeg tɩ Zʋɩf-rãmbã, la sẽn tuub-b n sak Zʋɩf-rãmbã tũudum Pãntekotã tigrã daarã ra yaa neb sẽn nong Wẽnnaam Gomdã zãmsgo, la tɩ b ra naaga buud ning a Zeova sẽn yãk tɩ b yaa a nin-buiidã.  Sẽn paase, b ra zoe n wilgame tɩ b tara yẽesem. Wala makre, b yii zĩ-zãrsẽ n wa naag n maan tig-kãngã b sẽn da maand yʋʋmd fãa wã. B sẽn sak n deeg t’a Zeezi Kirist tʋmda tʋʋmd sẽn tar yõod wʋsg Wẽnnaam daabã pidsg yĩngã poore, b ra segl n saame masã n na n deeg lisg n lebg Kiristã karen-biis n kell n tũ Wẽnnaam.

16. Bõe la pipi kiris-nebã maan n wilg tɩ b tara mong-m-meng yam?

¹⁶ Yɩɩ vẽeneg t’a Zeova ra ningda sul-kãng barka. Kibarã pʋgẽ, b yeelame yaa: “Neb nins sẽn lebg tẽedbã fãa ra tigimda taaba, n da naagd b bũmbã fãa taaba, la b ra koosd b pʋt la bũmb nins fãa b sẽn so wã, n pʋɩt ligdã tɩ ned kam fãa paamd wa sẽn zems a raab sẽn yaa a soaba.” f (Tʋʋ. 2:44, 45) Yaa vẽeneg tɩ kiris-neb hakɩɩkã fãa rat n talla nonglem la mong-m-meng yam a woto buudu.

17. Bõe la ned segd n maan n yaool n wa tõog n deeg lisgu?

¹⁷ Biiblã wilgda bũmb nins ned sẽn tog n deng n maane, n yaool n wa tõog n dɩk a meng n kõ a Zeova n deeg lisgu. A soabã segd n bao n bãnga Wẽnnaam Gomdã sẽn yetã. (Zã 17:3) A segd n tẽe a Zeova ne a Zeezi, la a tek yam n kos sugri, tɩ wilg t’a sũur sɩd sãama ne a pĩnd tʋʋm-wẽnsã. (Tʋʋ. 3:19) Rẽ poore, a segd n tuubame, pa rẽ bɩ n wẽnemd n bas bũmb nins a sẽn da maandã, la a sɩng bũmb nins Wẽnnaam sẽn datã maanego. (Rom. 12:2; Efɛɛ. 4:23, 24) Bõn-kãensã maaneg poore, a na n pʋʋsa a Zeova n dɩk a meng n kõ-a, n wa reeg lisgu.—Mat. 16:24; 1 Pɩy. 3:21.

18. Bark bʋg la neb nins sẽn deeg lisg n lebg Kiristã karen-biisã tõe n paame?

¹⁸ Yãmb dɩka y meng n kõ a Zeova n deeg lisg n lebg a Zeezi Kirist karen-biig bɩ? Sã n yaa rẽ, bɩ y pʋʋs Wẽnnaam bark tɩ woto yaa zu-zẽkre. Wa pipi kiris-nebã sẽn da pid ne vʋʋsem sõngã, a Zeova me tõe n tũnuga ne yãmb n kõ kaset sõma, la a sõng-y tɩ y maan a raabã.