1-3. a) Bõe yĩng tɩ b tall tẽn-tʋmdbã n kẽng Sãnedrẽ wã taoore, la Sãnedrẽ wã neb raab ra yaa bõe? b) Bõe yĩng tɩ tẽn-tʋmdbã sẽn tall manesem ningã sɩd pak tõndo?

 SÃNEDRẼ WÃ bʋ-kaoodbã sũy ra puuga wʋsgo! B rõda a Zeezi tẽn-tʋmdbã, n tall-b n kẽng Sãnedrẽ wã sẽn da yaa Zʋɩf-rãmbã bʋ-kaoodb sull ning sẽn tar noor n yɩɩdã taoore. Bõe yĩnga? A Zozɛf Kayif sẽn da yaa maan-kʋʋdb kãsmã la Sãnedrẽ wã taoor soabã tãs-b lame n yeel yaa: “Tõnd sõoga yãmb nug n yeel-y tɩ y ra le zãms nebã n gom yʋ-kãngã yell ye.” Sãnedrẽ wã taoor soabã sũur sẽn da yikã, a ra pa rat n pʋd a Zeezi yʋʋrã meng ye. A Kayif paasame yaa: “Yãmb kɩtame tɩ y zãmsgã pid Zerizalɛm, la y rat n ning ra-kãng zɩɩmã taal tõnd zutu.” (Tʋʋ. 5:28) B raabã ra yaa vẽenega: Yaa tɩ tẽn-tʋmdbã bas koɛɛgã moonego, sã n pa rẽ, b na n sɩbg-b lame!

² Tẽn-tʋmdbã ra na n maana a wãna? Yaa a Zeezi sẽn yaa soab ning Wẽnnaam sẽn kõ noor t’a ges bũmb fãa yellã n kõ-b noor tɩ b moon koɛɛgã. (Mat. 28:18-20) Rẽ yĩnga, tẽn-tʋmdbã ra na n basame tɩ ninsaal zoeesã kɩt tɩ b bas koɛɛgã mooneg bɩ? Bɩ b ra na n talla raoodo, n yals kãn-kãe n ket n moond koɛɛgã? B ra segd n yãka b sẽn na n sak ned ningã: Yaa Wẽnnaam bɩ, bɩ yaa ninsaala? Zĩig pʋgẽ, a Pɩyɛɛr talla raoodo, n gom tẽn-tʋmdbã fãa yʋʋr yĩnga.

³ Tõnd sẽn yaa kiris-neb hakɩɩkã, tẽn-tʋmdbã manesem sẽn yɩ to-to Sãnedrẽ wã nebã taoorã sɩd paka tõndo. A Zeezi kõo tõnd me noor tɩ d moon koɛɛgã. D sã n wa moond koɛɛgã, tõnd me tõe n paama namsgo. (Mat. 10:22) Bɛɛbã tõe n baoome n na n gɩdg d tʋʋmdã. Sã n wa yaa woto, bõe la d na n maane? D sã n bʋgsd tẽn-tʋmdbã sẽn yãk yam ningã zugu, bũmb ning sẽn sõng-b tɩ b tall raoodã, la bũmb ning sẽn yɩ sabab tɩ b tall-b n kẽng Sãnedrẽ wã taoorã, na n naf-d lame. a

4, 5. Bõe yĩng t’a Kayif la Sadiseyẽ-rãmb a taabã ra maand “sũ-kiir wʋsgo”?

⁴ D tẽeg tɩ b sẽn wa n yeel tẽn-tʋmdbã pipi tɩ b ra le moon koɛɛgã, a  Pɩyɛɛr ne a Zã yeelame yaa: “Tõnd pa tõe n bas n pa gom bũmb nins tõnd sẽn yã la d wʋmã yell ye.” (Tʋʋ. 4:20) B sẽn tall-b n kẽng Sãnedrẽ wã taoor pipi wã poore, a Pɩyɛɛr ne a Zã n paas tẽn-tʋmdb a taabã ra ket n moonda koɛɛgã wẽnd-doogẽ wã. Tẽn-tʋmdbã maana yel-solem-kãsemse. Wala makre, b sãooga bãad-rãmba, la b rig zĩn-dãmba. B maana rẽ a “Salomo zãndẽ wã,” sẽn da yaa zĩ-yaleng sẽn be wẽnd-doogã yaang sẽnesã, tɩ Zʋɩf-rãmb wʋsg ra tigimd taab be wã. Wõnda a Pɩyɛɛr sulunsukã meng maaga bãad-rãmba. Bãad-rãmb wʋsg b sẽn sãoogã sak n kelga koe-noogã. Woto yĩnga, “neb nins sẽn tẽed Zu-soabã sõor da paasdame, hal tɩ lebg pagb la rap kʋʋngo.”—Tʋʋ. 5:12-15.

⁵ A Kayif sẽn da yaa Sadiseyẽ wã, ne Sadiseyẽ-rãmb a taabã maana “sũ-kiir wʋsgo,” n kɩt tɩ b kẽes tẽn-tʋmdbã bãens roogo. Sadiseyẽ-rãmbã yaa Zʋɩf-rãmbã tũudum sull kãseng a ye neba. (Tʋʋ. 5:17, 18) Bõe yĩng tɩ Sadiseyẽ-rãmbã ra maand sũ-kiir wʋsgo? Bala tẽn-tʋmdbã ra zãmsda nebã t’a Zeezi vʋʋgame, tɩ Sadiseyẽ-rãmbã yaool n da pa tẽed kũum vʋʋgrã ye. Tẽn-tʋmdbã ra yetame tɩ nebã sã n tẽ a Zeezi bala, b tõe n paama fãagre. La Sadiseyẽ-rãmbã ra yɛɛsda Rom goosneema wã neb na wa n sɩbg-ba, nin-buiidã sã n da sak n deeg tɩ yaa a Zeezi la b taoor lʋɩtã. (Zã 11:48) Rẽ n so tɩ Sadiseyẽ-rãmbã ra rat ne b sũur fãa n kɩt tɩ tẽn-tʋmdbã bas koɛɛgã moonego!

6. Yaa ãnd dãmb n kɩtd tɩ b namsd a Zeova nin-buiidã rũndã-rũndã, la bõe yĩng tɩ rẽ pa segd n ling tõndo?

⁶ Rũndã-rũndã me, yaa ziri tũudmã taoor dãmb n kɩtd tɩ b namsd a Zeova nin-buiidã n tɩ yɩɩda. Naoor wʋsgo, tũudum taoor dãmb kãensã tũnugda ne b naamã n pirsd goosneema-rãmb la kiba-kɩtba, n na n kɩt tɩ d koe-moonegã yalse. Woto segd n linga tõnd bɩ? Ayo. Koɛɛg ning tõnd sẽn moondã sõngda nebã tɩ b bãng tɩ ziri tũudmã taoor dãmb sẽn zãmsd nebã bũmb ninsã yaa ziri. Sũ-tɩrs rãmbã sẽn sakd sɩdã sẽn be Biiblã pʋgẽ wã yĩnga, b paamda b mens ne bũmb toor-toor b sẽn zãmsd-b tɩ pa sɩda, la minund kẽere. (Zã 8:32) Rẽ n so tɩ tũudmã taoor dãmb kis tõndo, la b namsd tõndo.

7, 8. Sãmbg kae tɩ noor ning malɛkã sẽn kõ tẽn-tʋmdbã sõng-b lame tɩ b bãng bõe, la sok-bʋg la d segd n sok d menga?

⁷ Tẽn-tʋmdbã sẽn wa n be bãens roogẽ wã n gũudẽ tɩ b wa kao b bʋʋdã, tõe tɩ b ra sokda b meng b bɛɛbã sã n pa na n wa kʋ-b b tẽebã yĩnga. (Mat. 24:9) La ne yʋngã, yel-solemd n maane. A ‘Zeova malɛk n wa n pak bãens roogã kʋɩlense.’ b (Tʋʋ. 5:19) Malɛkã kõ-b-la noor takɩ n yeel-b yaa: “Kẽng-y n tɩ yaas-y wẽnd-doogẽ wã n kell n togs nebã vɩ-kãngã goamã fãa.” (Tʋʋ. 5:20) Sãmbg kae tɩ noor ning malɛkã sẽn kõ tẽn-tʋmdbã sõng-b lame tɩ b bas b yam tɩ b ra maanda sẽn segde. Malɛkã goamã kenga b raood me, tɩ b kell n moon koɛɛgã baa yɛlã sẽn na n yɩ to-to. Ne tẽeb-kãseng la ne raoodo, tẽn-tʋmdbã “kẽe wẽnd-doogẽ wã yibeoogã pĩnda, n sɩng nebã zãmsgo.”—Tʋʋ. 5:21.

⁸ Tõnd ned kam fãa segd n soka a meng yaa: ‘M sã n wa maood ne zu-loees  a woto buudu, m na n talla tẽeb la raood n ket n moond koɛɛgã bɩ?’ D sẽn mi tɩ “kõ kaset Wẽnnaam Rĩungã wɛɛngẽ wã” yaa tʋʋmd malɛgsã sẽn teendã, yaa bũmb sẽn tõe n keng d raoodo.—Tʋʋ. 28:23; Vẽn. 14:6, 7.

9-11. Sãnedrẽ wã rãmb sẽn yeel tẽn-tʋmdbã tɩ b ra le moon koɛɛgã, b leok-b lame tɩ bõe, la mak-sõng bʋg la b kõ kiris-neb hakɩɩkã?

⁹ A Kayif la Sãnedrẽ wã bʋ-kaoodb a taabã ra segl n saame masã n na n kao tẽn-tʋmdbã bʋʋdo, n sɩbg-ba. B sẽn da pa mi tɩ malɛk n pak bãensã roog kʋɩlensã tɩ tẽn-tʋmdbã yi wã yĩnga, b tʋma gũudbã tɩ b tɩ tall-b n wa. B taame n mik tɩ bãensã roog paga sõma, tɩ “gũudbã yas rignoyẽ wã.” La b pa yã ned baa a ye a pʋgẽ ye. Mams-y n ges-y rẽ sẽn ling-b to-to. (Tʋʋ. 5:23) Pa yã n kaoos la wẽnd-doogã gũudbã naabã bãng tɩ tẽn-tʋmdbã lebg n waa wẽnd-doogẽ wã, n gomd a Zeezi yelle. Yaool n da yaa tʋʋm-kãng poorẽ la b sẽn kẽes-b bãens roogã. Wẽnd-doogã gũudbã naabã la a tʋm-tʋmdbã kẽnga wẽnd-doogẽ wã tao-tao, n na n tɩ yõg tẽn-tʋmdbã n tall-b n wa Sãnedrẽ wã taoore.

¹⁰ Wa d sẽn yã sag-kãngã sɩngrẽ wã, tũudmã taoor dãmb sũy sẽn da puugã yeela tẽn-tʋmdbã vẽeneg tɩ b ra le moon koɛɛgã ye. Tẽn-tʋmdbã leokame tɩ bõe? A Pɩyɛɛr goma b fãa yʋʋr yĩng n yeel yaa: “Wẽnnaam la naab ning tõnd sẽn segd n sakã, pa ninsaalbã ye.” (Tʋʋ. 5:29) Tẽn-tʋmdbã kõo kiris-neb hakɩɩkã mak-sõngo, tɩ b tũud rẽ hal n tãag rũndã. A Zeova yeelame tɩ d sak nanambsã, la b pa tar sor n na n gɩdg tõnd tɩ d ra maan Wẽnnaam raabã ye. Dẽnd rũndã-rũndã, “nanambsã” sã n gɩdg tõnd tɩ d ra le moon koe-noogã, tõnd segd n ket n tũuda Wẽnnaam noorã, n moond koe-noogã. (Rom. 13:1) D na n ket n soosdame n kõt kaset Wẽnnaam Rĩungã wɛɛngẽ.

¹¹ Dẽnd pa lingr la bʋ-kaoodbã sũy sẽn puug wʋsg ne tẽn-tʋmdbã, b sẽn tall raood n leok-b to-to wã yĩnga. B ra ratame n “kʋ tẽn-tʋmdbã.” (Tʋʋ. 5:33) Tẽn-tʋmdbã ra tagsdame tɩ b na n kʋ-b lame, la a Zeova maana bũmb n sõng-ba, hal tɩ yɩ lingri!

12, 13. a) Sagl-bʋg la a Gamaliyɛll kõ a tʋmd-n-taasã, la bõe la b maan-yã? b) Bõe la a Zeova tõe n maan n sõng a nin-buiidã rũndã-rũndã, la a sã n bas tɩ b nams tõnd “tɩrlmã yĩnga,” d tõe n kɩsa sɩd ne bõe?

¹² A Gamaliyɛll sẽn da yaa Tõogã karen-saamb nin-buiidã sẽn nand wʋsgã gomame n sõng tẽn-tʋmdbã. c A Gamaliyɛll tʋmd-n-taasã tog n da nand-a-la wʋsgo. A sẽn kõ noor ‘tɩ b yiis [tẽn-tʋmdbã] yɩng tɩ yɩ bilfã,’ b fãa sakame. (Tʋʋ. 5:34) A Gamaliyɛll goma neb sẽn yik pĩndã n na n zab ne Rom soolmã neb yelle. A yeelame tɩ nin-kãens taoor dãmbã sẽn wa n maan kaalmã, b poorẽ-dãmbã kell n paa sɩɩ. Rẽ n so t’a yeel bʋ-kaoodbã tɩ b maan sũ-mar ne tẽn-tʋmdbã, la tɩ b pa segd n gɩdg-b tɩ b ra moon koe-noogã ye. Sẽn yɩɩd fãa, b taoor lʋɩt a Zeezi ra kii sẽn nan pa kaoose. La a Gamaliyɛll yeel-b-la bũmb sẽn kẽ b sũyã sõma. A yeel-b lame yaa: ‘Ra kẽes-y y toog nin-kãensã yellẽ wã ye. Yãmb we n bas-b sɩɩ. Bala mag-kãngã wall tʋʋm-kãngã sã n yita ninsaalb nengẽ, a na n lʋɩɩme. La a sã n yita Wẽnnaam nengẽ, yãmb pa na n tõog n lub bãmb ye. Bɩ y gũusi, bala y tõe n wa mikame tɩ y zabda ne Wẽnnaam mengã.’ (Tʋʋ. 5:38, 39) Bʋ-kaoodbã kelga a saglgã. Baasgo, b kɩtame tɩ b pãb tẽn-tʋmdbã la b yeel-b ‘tɩ b ra le gom ne a Zeezi yʋʋr’ ye.—Tʋʋ. 5:40.

¹³ Rũndã-rũndã me, a Zeova tõe n tũnuga ne neb sẽn tar naam wa a Gamaliyɛll n sõng a nin-buiidã. (Yel. 21:1) A Zeova tõe n tũnuga ne a vʋʋsem sõngã n kɩt tɩ nanambs sẽn tar pãnga, bʋ-kaoodba, wall noy-lugundb maan yẽ sẽn date. (Nee. 2:4-8) La a sã n bas tɩ b namsd tõnd “tɩrlmã yĩnga,” d tõe n kɩsa sɩd ne bũmb a yiibu. (1 Pɩy. 3:14) Pipi, a tõe n kõo tõnd pãng tɩ d tõog toogo. (1 Kor. 10:13) Yiibu, bɛɛbã “pa na n tõog” tɩ Wẽnnaam tʋʋmdã yals ye.—Eza. 54:17.

14, 15. a) B sẽn pãb tẽn-tʋmdbã, b manesem yɩɩ wãna, la bõe yĩnga? b) Togs-y kibar sẽn wilgd t’a Zeova nin-buiidã tõogda toog ne sũ-noogo.

¹⁴ Rẽ yĩnga, b sẽn pãb tẽn-tʋmdbã komsa b raood bɩ, bɩ booga b yẽesmã? A bada! B “yii Sãnedrẽ wã taoor n loog ne sũ-noogo.” (Tʋʋ. 5:41) Yaa vẽeneg tɩ pa pãbrã zabdmã n kɩt tɩ b sũyã ra yaa noog ye. B maana sũ-noogo, bala b ra miime tɩ yaa b sẽn maand sɩd ne a Zeova wã, la b rɩkd a Zeezi togs-n-taarã n kɩt tɩ b nams-bã.—Mat. 5:11, 12.

¹⁵ Wa pipi kiris-nebã, d maanda sũ-noogo, b sã n wa namsd tõnd koe-noogã yĩnga. (1 Pɩy. 4:12-14) Pa rat n yeel tɩ d ratame tɩ b bugs-du, tɩ b nams-do, pa rẽ bɩ n kẽes tõnd bãens roogẽ ye. La d sã n kell n maan sɩd ne a Zeova, d paamda sũ-noogo. Wala makre, d gom a Henryk Dornik yelle. Goosneema-toos n nams-a hal tɩ pa yɩ nana ne-a ye. A yeelame tɩ yʋʋmd 1944 sa-sik kiuugã, tẽngã taoor dãmb kɩtame tɩ b tall yẽ ne a yaoã n tɩ kẽes kã de kõnsãntrasiõ pʋgẽ. Bɛɛbã yeelame yaa: “D pa tol n tõe n modg-b tɩ b maan b sẽn pa rat ye. B sẽn mi tɩ b tõe n kʋ-b-la b tũudmã yĩnga, kõt-b-la sũ-noogo.” Saam-biig a Dornik paasame yaa: “M da pa rat n ki ye. La b sẽn wa n namsd maamã  sasa, m tõogame n kell n maan sɩd ne a Zeova n pa koms raood ye. Yaa rẽ n kõ maam sũ-noogo.”—Zak 1:2-4.

16. Bõe la tẽn-tʋmdbã maan n wilg tɩ b ra rata ne b sũur fãa n kõ kasetã, la wãn to la tõnd dɩkd tẽn-tʋmdbã togs-n-taar rũndã-rũndã?

¹⁶ Tao-tao bala, tẽn-tʋmdbã lebg n sɩnga koɛɛgã moonego. “Daar fãa, b ra ket n zãmsda nebã la b moond a Zeezi sẽn yaa Kiristã koe-noogã wẽnd-doogẽ wã la zak-zaka.” d (Tʋʋ. 5:42) Koe-moondb kãensã sẽn da tar yẽesmã ra rata ne b sũur fãa n kõ kasetã. Bãng-y tɩ b ra kẽnda nebã zagsẽ n taasd-b koe-noogã, wa a Zeezi sẽn da yeel-b tɩ b maan to-to wã. (Mat. 10:7, 11-14) Sãmbg kae tɩ yɩɩ woto la b ra maanda, tɩ kɩt tɩ b zãmsgã pid Zerizalɛmmã. Rũndã-rũndã, nebã miime t’a Zeova Kaset rãmbã sẽn moond koɛɛgã to-to wã yaa wa tẽn-tʋmdbã sẽn da moond to-to pĩndã. Tõnd sẽn kẽed zak-zak d koɛɛgã mooneg zĩigẽ wã wilgda vẽeneg tɩ tõnd me rat n kõo kaseto, sẽn na yɩl tɩ ned buud fãa paam n wʋm koe-noogã. A Zeova ningda tõnd sẽn moond koɛɛgã zak-zakã bark bɩ? N-ye. Neb milyõ-rãmb n sakd n kelgd Rĩungã koɛɛgã yaoolem da-kãensã. Sẽn paase, b sʋkã, wʋsg sẽn wʋm koe-noogã pipi yɩɩ a Zeova Kaset soab sẽn wa n wẽ b kʋɩlengã n na n taas-b koɛɛgã.

17-19. Zu-loe-bʋg n da be kiris-nebã tigingã pʋgẽ, la bõe la tẽn-tʋmdbã yãk yam n na n maane, sẽn na yɩl n welg yellã?

¹⁷ Tigingã b sẽn da nan lugl paalmã ra tara zu-loe-kɛgeng a to. Tigingã nebã ra welga taaba. Neb wʋsg sẽn deeg lisg n lebg a Zeezi karen-biis ra yaa sãamb sẽn wa Zerizalɛm, n da rat n bãng n paas a Zeova zugu, n yaool n leb b zagsẽ. Karen-biis nins sẽn da be Zerizalɛmmã sakame n kõ ligdi, tɩ b na n da rɩɩb la teed a taab n kõ b tẽed-n-taasã. (Tʋʋ. 2:44-46; 4:34-37) La sasa kãnga, yell n da be, tɩ tẽn-tʋmdbã ra segd n welg-a tao-tao sẽn na yɩl tɩ zems-n-taar kell n zĩnd tigingã neb sʋka. “Rɩɩbã pʋɩɩb sasa,” pʋg-kõap nins sẽn da yaa Zʋɩf-rãmb sẽn  gomd Gɛrkã “ra pa paamd tɩ b get b yell sõma ye.” (Tʋʋ. 6:1) La pʋg-kõap nins sẽn da yaa Zʋɩf-rãmb sẽn gomd Ebre wã ra paamdame tɩ b get b yell sõma. Wõnda rɩɩbã pʋɩɩb wɛɛngẽ, zãmb la bak n sõng n da be tʋʋmdẽ wã.

¹⁸ Yel-kãensã a yiibã ra tõe n yɩɩ sabab tɩ tigin-paallã neb welg taab nana-nana. Tẽn-tʋmdbã sẽn da yaa Siglgã taoor lʋɩtb Sull wakat kãnga gesame tɩ pa zems tɩ b “bas Wẽnnaam gomdã n na n pʋɩ rɩɩb ye.” (Tʋʋ. 6:2) Sẽn na yɩl n welg yellã, tẽn-tʋmdbã yeela karen-biisã tɩ b yãk rap a yopoe “sẽn pid ne vʋʋsem sõng la sẽn tar yam,” tɩ b “kõ-b tʋʋm-kãngã sẽn yaa tɩlɛ wã.” (Tʋʋ. 6:3) Ra yaa tɩlɛ tɩ b paam rap sẽn tar minim, bala tʋʋmdã ra pa rɩɩb pʋɩɩb bal ye. B ra segd n gesa ligdã yelle, n daad teed buud toor-toore, la b gʋlsd bũmb nins b sẽn maandã n bĩngdẽ. Rapã b sẽn yãkã fãa ra tara Gɛrk yʋya. Tõe tɩ rẽ kɩtame tɩ pʋg-kõapã sũy sẽn da sãamã maneg n kɩs-b sɩda. Tẽn-tʋmdbã sẽn pʋʋs yel-kãngã yĩngã poore, b yãka rap a yopoe tɩ b na n ges “tʋʋm-kãngã sẽn yaa tɩlɛ wã” yelle. e

¹⁹ Rẽ yĩnga, b sẽn yãk rap a yopoe wã tɩ b na n ges rɩɩbã pʋɩɩb yellã, rat n yeelame tɩ b ra pa segd n le moon koe-noogã bɩ? Ayo. A Etɩɛn da naaga rap a yopoe wã. A wa n lebga ned sẽn tar yẽesem la raoodo, koe-noogã mooneg pʋgẽ. (Tʋʋ. 6:8-10) A Filip me ra yaa rap a yopoe wã nin-yende. B ra boond-a lame tɩ “koe-moonda.” (Tʋʋ. 21:8) Yaa vẽeneg tɩ rap a yopoe wã kell n moona Rĩungã koɛɛgã ne yẽesem.

20. Wãn to la Zeova nin-buiidã tũud tẽn-tʋmdbã mak-sõngã rũndã-rũndã?

²⁰ Rũndã-rũndã, a Zeova nin-buiidã me tũuda tẽn-tʋmdbã mak-sõngã. Rap  nins b sẽn kõ tʋʋmd tigingã pʋgẽ wã segd n wilgame tɩ b tara yam ning sẽn yit Wẽnnaam nengẽ wã, la tɩ b bɩɩsda vʋʋsem sõngã bɩɩsã b vɩɩmã pʋgẽ. Rap nins sẽn bɩɩsd zʋg-sõma nins kãsem-dãmbã la kãsem-sõngdbã sẽn segd bɩɩsã paamdame tɩ b yãk-ba, tɩ b lebg kãsem-dãmb pa rẽ bɩ kãsem-sõngdba. f (1 Tɩm. 3:1-9, 12, 13) Sẽn mik tɩ yaa ne a vʋʋsem sõngã maasem la Wẽnnaam vẽneg tɩ b gʋls zʋg-sõma kãensã a Gomdã pʋgẽ wã, d tõe n yeelame tɩ yaa vʋʋsem sõngã n yãkd nin-kãensã. Nin-kãensã sẽn tʋmd wʋsgã geta bũmb toor-toor sẽn yaa tɩlɛ yelle. Wala makre, kãsem-dãmbã getame tɩ b tẽed-n-taas nins sẽn kʋʋlã paamd sõngr ning b sẽn datã. (Zak 1:27) Kãsem-dãmb kẽer tʋmda Rĩungã rot meeb pʋgẽ, segenda rasem a tãab tigis-kãsemsã, pa rẽ bɩ b naaga sull ning sẽn get logtor-yirẽ tɩbsg yellã. Kãsem-sõngdbã sõngda ne tʋʋm wʋsg tigingã pʋgẽ, tɩ kãsem-dãmbã lʋɩt taoor n get b tẽed-n-taasã tẽebã kengr la b zãmsgã yelle. Baa ne kãsem-dãmbã la kãsem-sõngdbã sẽn tʋmd tʋʋm wʋsg tigingã pʋgẽ wã, b segd n ket n moonda Rĩungã koe-noogã.—1 Kor. 9:16.

21, 22. Bõe n wilgd t’a Zeova ra ningda kiris-nebã tigingã sẽn da lugl paalmã barka?

²¹ Ne a Zeova sõngre, kiris-nebã tigingã sẽn da lugl paalmã tõog n põsame, baa ne bɛɛbã namsgã, la yell sẽn da tõe n kɩt tɩ tigingã nebã welg taabã. Ra yaa vẽeneg t’a Zeova ningda tigingã neb barka. Biiblã yetame yaa: “Wẽnnaam gomdã ra ket n piuugdame, tɩ karen-biisã sõor ket n paasd wʋsg Zerizalɛm. Maan-kʋʋdb wʋsg me lebga tẽedba.” (Tʋʋ. 6:7) Woto yaa Tʋʋm sebrã kibar a yembr bal sẽn wilgd a Zeova sẽn ning tigingã neb bark to-to. (Tʋʋ. 9:31; 12:24; 16:5; 19:20; 28:31) Rũndã-rũndã, d sã n wʋm kibay sẽn wilgd Rĩungã tʋʋmdã sẽn kẽngd taoor to-to dũniyã zĩis a taabã pʋsẽ wã, pa kengd raood sɩda?

²² D sã n lebg n wa pipi kiris-nebã wakatẽ, d yãta vẽeneg tɩ tũudmã taoor dãmb pa bas kiris-nebã namsg ye. Pa yã n kaoos la pipi kiris-nebã namsgã paam pãng ye. Wa d sẽn na n yã sak ning sẽn pʋgdã pʋgẽ wã, b namsa a Etɩɛn ne nams-toaaga.