Yaa a Sʋɩtãan n yag ziri pipi, tɩ wẽnemã sɩng tẽngã zugu. A ra yaa malɛk sẽn zems zãnga, la ‘a ka pa sɩd pʋgẽ ye.’ (Zã 8:⁠44) A wa n datame tɩ b waoog-a wa Wẽnnaam, tɩ yaool n yaa Wẽnnaam bal n tog ne rẽ. A belga a Hawa, tɩ rẽ kɩt t’a bas Wẽnnaam sakr n sak yẽ. A Ãdem me maana wa a pagã, n kɩɩs Wẽnnaam. Rẽ n wa ne namsgã la kũumã.​—Karm-y Sɩngr 3:1-6, 19.

A Sʋɩtãan sẽn yeel a Hawa t’a kɩɩs Wẽnnaamã, rẽ tɩ yẽ mengã sɩngame n na n kɩɩs tɩ Wẽnnaam pa segd n yɩ yĩngr la tẽng naab ye. Ninsaalbã fãa la bal kẽe a Sʋɩtãana, n pa rat tɩ Wẽnnaam yɩ b naab ye. Woto, a Sʋɩtãan n lebg “dũniyã naaba.”​—Karm-y Zã 14:30; 1 Zã 5:19.

Wẽnnaam sẽn naanã fãa yaa sõma zãnga. Malɛgsã ne ninsaalbã ra tõe n sak-a-la zãng-zãnga. (Tõodo 32:4, 5) Wẽnnaam naana tõndo, tɩ d tõe n yãk yam n maan sẽn yaa sõma bɩ wẽnga. Woto kɩtame tɩ d tõe n wilg-a d nonglem.​—Karm-y Zak 1:13-15; 1 Zã 5:3.

A Zeova basame tɩ b tõdg a naam sẽn ka to wã hal tɩ ta rũndã. Bõe yĩnga? Yaa sẽn na yɩl n wilg nebã tɩ sã n pa yẽ naamã, naam kae sẽn tõe n naf-b ye. (Koɛɛg Soaba 7:29; 8:9) Ninsaalbã sẽn be tẽngã zug sẽn yɩɩd yʋʋm 6 000 masã tɩ yɛlã yaa to-to wã wilgda rẽ vẽenega. Nanambsã pa tol n tõog tɩ zabã, nin-kʋʋrã, wẽgbã la bãasã sa ye.​—Karm-y Yelbũn 20:24; Rom dãmb 9:17.

Wẽnnaam naamã pa wa ninsaalbã naam ye. A nafda neb nins sẽn sakd-a wã. (Ezai 48:17, 18) Ka la bilfu, a Zeova na n menesa goosneema rãmbã fãa. Yaa sẽn sak-b tɩ Wẽnnaam yaa b naabã bal n na n vɩɩmd tẽngã zugu.—Ezai 11:9.​—Karm-y Daniɛll 2:44.

Ges-y video wã Bõe yĩng tɩ Wẽnnaam bas tɩ namsgã beẽ?

A Sʋɩtãan yeelame tɩ ned pa na n sak a Zeova yamleoog yĩng bal ye. Yãmb pa rat n wilg t’a sẽn yeelã yaa ziri sɩda? Bãng-y tɩ y tõeeme. Wẽnnaam sẽn maand sũ-marã kɩtame tɩ ned fãa tõe n wilg sã n yaa yẽ naamã bɩ ninsaalbã naam la a rata. Yaa d sẽn vɩ to-to wã n wilgd d sẽn datã.​—Karm-y Zoob 1:8-12; Yelbũn 27:11.

Sẽn na yɩl n wilg tɩ d rata Wẽnnaam naamã, d tog n karemda Biiblã sẽn yaa a Gomdã, n bãng a sẽn dat tɩ d tũ-a to-to wã, la d sɩd tũ. (Zã 4:23) D sã n lak d mens me ne politikã la zabã wa a Zezi, d wilgdame tɩ d pa rat a Sʋɩtãan naamã ye.​—Karm-y Zã 17:14.

A Sʋɩtãan kɩtame tɩ nebã tʋmd tʋʋm-beed n tagsdẽ tɩ pa wẽng ye. Y sã n tõdg tɩ y kõn maan wa bãmba, y zo-rãmb la y roagdb kẽer tõe n yaand-y lame, wall b namsd-y. (1 Pɩɛɛr 4:3, 4) Y na n maana wãna? Y na n sak n naaga sẽn nong-b Wẽnnaamã bɩ? Y na n saka a noyã sẽn yaa sõma la wilgdẽ t’a nonga tõndã bɩ? Y sã n maan woto, y wilgdame t’a Sʋɩtãan sẽn yeel tɩ ned kõn sak Wẽnnaam namsg pʋgẽ wã yaa ziri fasɩ.​—Karm-y 1 Korẽnt dãmb 6:9, 10; 15:33.

Wẽnnaam sẽn nong ãdem-biisã yaa kaset tɩ wẽnemã la namsgã na n saame. Neb nins sẽn wilgd tɩ b tẽeda rẽ wã na n paam n vɩɩmda wakat sẽn kõn sa tẽngã zugu.​—Karm-y Zã 3:16.