BABG A NU

Lebg n wa f pe-kɩɩm la f gũudã nengẽ

ÉCOUTER EN

Bũmb a tãab sẽn kɩt t’a Zeova tũub lebg toog ne neb kẽer la d sẽn yã wã. Tõe t’a ye bɩ a yiib n yaa fo zu-loɛɛga. Bãng tɩ fo pa f yembr ye. Wẽn-sakdb wʋsg maoo ne zu-loe-kãens buud pĩnd wẽndẽ wã la tõnd wakatã. B paamame t’a Zeova sõng-ba. Dẽnd a na n sõnga fo me.

F sã n lebg n wa a Zeova nengẽ, a na n deeg-f lame

BAS f yam. F sã n lebg n wa a Zeova nengẽ, a na n deeg-f lame. Sã n yaa yɩɩre, a na n sõng-f lame tɩ f tõoge. Sã n yaa yell sẽn zabd foo, a na n sõngame tɩ welge. Sã n yaa f sũurã n ningd-f taale, a na n sõng-f lame tɩ f yam gãande. Rẽ, f na n tõogame n le naag f tẽed-n-taasã n tũ a Zeova. Pipi kiris-neb kẽer me ra maana a buudu, t’a Pɩyɛɛr gom b yelle. Ad a sẽn yeele: “Yãmb dag n wẽnda piis sẽn meneme, la moasã, yãmb lebgame n wa y sɩɩsã pe-kɩɩmã la b gũudã nengẽ.”—1 Pɩyɛɛre 2:25.

Hakɩɩka, sẽn são yaa f sẽn na n lebg n wa a Zeova nengẽ. Bõe yĩnga? Bala rẽ na n nooga a Zeova sũur wʋsgo. (Yel-bũnã 27:11) Wa fo meng sẽn mi wã, d sẽn maand bũmb ningã tõe n sãama a Zeova sũur wall noog a sũuri. La a pa modgd tõnd tɩ d nong-a, a pa modgd tõnd tɩ d tũ-a. (Tõodo 30:19, 20) Bãngd a ye rɩka makr n bilg rẽ. A yeelame tɩ “ninsaal sũurã yaa wa kʋɩleng b sẽn pa tõe n pa yɩng n pake, sã n pa pʋgẽ bala.” A Zeova ratame tɩ tõnd mengã pak d sũurã, rat n yeel tɩ d yãk yam d toor n tũ-a d sẽn nong-a yĩnga. D sã n maan woto, yaa wa d sẽn kõt-a kũun sẽn ka to, tɩ rẽ noogd a sũur wʋsgo. Tõnd kũunã yaa d wẽn-sakrã. Sɩd-sɩdã, bũmb kae n kõt ned sũ-noog n ta a sẽn na n tũ a Zeova, a sẽn segd ne rẽ wã yĩng ye.—Tʋʋmã 20:35; Vẽnegre 4:11.

F sã n lebg n wa a Zeova nengẽ, f na n le paam n wʋmda a goamã la f sakdẽ. (Luk 11:28) Neb wʋsg sokda b mens bõe yĩng la Wẽnnaam sẽn naan ninsaalbã. B rata ne b sũy fãa n bãng ninsaal vɩɩmã yõodo. Ad yaa a Zeova n naan ninsaal woto. A naana tõnd tɩ d tõe n tũ-a, n paam tɩ d vɩɩmã tall barka. D sã n miẽ tɩ d tũuda a Zeova d sẽn nong-a wã yĩnga, kõt-d-la sũ-noog hakɩɩka. Bũmb a to kae n tõe n kõ tõnd sũ-noog a woto buud ye.—Yɩɩn-sõamyã 63:2-6.

Bãng t’a Zeova ratame tɩ f lebg n wa a nengẽ. Bõe n wilgd rẽ? Tags n gese! Sẽn na yɩl n bãng d sẽn na n gʋls bũmb ning seb-kãngã pʋgẽ wã, d pʋʋsa a Zeova sõma. Masã sebrã taa fo nugẽ. Tõe tɩ yaa tigingã kãsem-soab bɩ f tẽed-n-taag a to n kõ-fo. Fo karm-a lame t’a goamã kẽ-fo, tɩ f rat n tũ. Woto fãa yaa kaset t’a Zeova pa yĩm f yell ye. A pʋd n sõngda foo ne bʋgsem, n dat tɩ f lebg n wa a nengẽ.—Zã 6:44.

D sẽn mi t’a Zeova pa tol n yĩmd a neb nins sẽn bʋdgã sɩd kengda d raoodo. Saam-bi-poak yʋʋr sẽn boond t’a Donna wilgame t’a wa n sɩd bãnga rẽ yõodo. A yeelame: “Sɩnga bilf-bilf tɩ m wa zãag ne sɩdã sore. La yɩɩn-gʋlsdã sẽn yeel bũmb ning Yɩɩn-sõamyã 139:23, 24 ra nong n wata m yamẽ. Be a yeela woto: ‘Mam Wẽnnaam, fees-y maam n bãng m sũ-zulmã. Fees-y maam n bãng m tagsgã. Ges-y tɩ mam sã n dɩka so-wẽnga, bɩ y tall maam sor sẽn paad wakat sẽn ka sɛtã zugu!’ M da miime tɩ maam ne dũniyã neb pa yembr ye. Ra yaa vẽeneg tɩ ka m zĩig la be ye. M da miime tɩ yaa a Zeova siglgã pʋgẽ la m zĩiga. M wa n bãnga vẽeneg t’a Zeova pa tol n bas maam ye. Sẽn da ket bal yaa m lebg n wa a nengẽ. M sẽn lebg n wa wã, m sũ-noogã pa tõe n bãng n bilg ye!”

“M wa n bãnga vẽeneg t’a Zeova pa tol n bas maam ye. Sẽn da ket bal yaa m lebg n wa a nengẽ”

D kota a Zeova ne d sũur fãa tɩ f tõog n lebg n wa, n le paam sũ-noog ning sẽn yit a nengẽ wã. (Neemi 8:10) Fo sã n lebg n wa a nengẽ, f kõn tol n maan f bãngẽ ye.

Sogsg neb sẽn da sokd b mense

M SƖNGDA WÃN N TÕOG N LEBG N WA?

Ned yĩns sã n zab n kaoose, yaa bilf-bilf la a wat n tõe n maan a sẽn da minim n maandẽ wã. Woto me, yaa bilf-bilf la f na n tõog tɩ f tẽebã le paam pãnga. Daar fãa bɩ f modg n maan baa yaa bũmb bilf sẽn na n keng f tẽebã, la f ra tags tɩ f na n tõoga zĩig pʋgẽ n le maan bũmbã fãa ye. Wala makre, f tõe n baoo minit a wãn daar fãa n karem Biiblã, wall f kelg a karengã, pa rẽ bɩ f maag f yĩng n zãms d sebr a ye, wall f kẽ sɩtã pʋgẽ n karem bũmb bɩ n ges video. Sẽn paase, f sã n wa tõe bal bɩ f modg n kẽng tigsg la f ra bas tɩ kaoos ye. Sẽn yɩɩd fãa, pʋʋs a Zeova n kos a sõngre. Biiblã meng sagenda tõnd woto: “Sik-y yãmb yɩɩrã fãa n bas ne bãmba, bala, bãmb n get yãmb yelle.”—1 Pɩyɛɛre 5:7.

Pag yʋʋr sẽn boond t’a Eeva yeelame: “Mam sẽn wa n pa le naagd tigingã neb n tũud Wẽnnaamã, baa pʋʋsgã meng ra lebga yãnd ne-ma. Mam sẽn wa n paam raood n pʋʋsã poore, m sega tigingã kãsem-soab a ye t’a sõs ne maam. A sõnga maam tɩ m bãng t’a Zeova pa bas-m ye. A sagla maam tɩ m modg n sɩng ne Biiblã kareng daar fãa. M sẽn tũ a saglgã, m paama raood n le sɩng tigissã kẽnde. M wa n tõog n le yita koe-moonegã. Mam sũur nooma wʋsgo, a Zeova sẽn pa tol n bas maamã.”

TIGINGÃ NEB MANESEM NA N YƖƖ WÃN NE MAAM?

F tõe n basa f yam tɩ tigingã neb na n deeg-f-la ne sũ-noogo. B pa na n wɩt foo, bɩ n kaood f bʋʋd ye. B pʋd n na n wilgame tɩ b nonga foo, la b keng f raood wa b sẽn tõe.—Ebre-rãmbã 10:24, 25.

Rao yʋʋr sẽn boond t’a Javier yeelame: “Mam da zoeta yãnd n pa rat n kẽng tigissã ye. M da sokda m meng m zo-rãmbã manesem sẽn na n yɩ to-to ne-ma. Pʋg-yãang a ye sẽn da sɩng n be tigingã pʋgẽ yʋʋm 30 sẽn loog yeela maam woto: ‘Ne f waoongo, m biig sõngo!’ A gomdã kẽe maam sõma. Sɩd yaa wa m lebg n waa yiri.”

A Marco me yeela woto: “Mam sẽn kẽng tigsgã, m tɩ zĩnda poorẽ-poorẽ, sẽn na yɩl tɩ ned da bãng-m ye. La neb wʋsg bãnga maam, bala m da wata tigissã m sẽn wa n yaa yãagã. B sũy yɩɩ noogo, tɩ b mobg maam sõma n wilg tɩ b nong-m lame. Kɩtame tɩ m yam gãande. Ra yaa wa m lebg n waa yiri.”

KÃSEM-DÃMBÃ NA N MAANA WÃN N SÕNG MAAM?

Kãsem-dãmbã na n maana sũ-mar ne-fo. B na n pẽga foo, f sẽn dat n modg n le nong Wẽnnaam wa pĩndã. (Vẽnegre 2:4) B na n zoee f nimbãanega, n sõng-f tɩ f rems bũmb nins f sẽn da maan tɩ pa zemsã. La na n yɩɩ ne “sũ-bʋgsem.” (Galat-rãmbã 6:1; Yel-bũnã 28:13) Tõe tɩ kãsem-dãmbã yãk ned t’a zãms Biiblã ne-fo, ne Kell-y n pa-y “Wẽnnaam nonglmã pʋgẽ” sebrã. Bãng tɩ bũmb fãa pʋgẽ, kãsem-dãmbã na n belsa foo la b sõng-fo.—Ezayi 32:1, 2.

A Victor yeelame: “Mam maana yʋʋm a nii n da pa le wat tigissã ye. La kãsem-dãmbã ra ket n sõngda maam. Daar a ye, kãsem-soab n wilg maam fot-rãmb d sẽn da naag taab n yõke. Kɩtame tɩ m lebg n tẽeg sũ-noog ning m sẽn da tare, m sẽn wa n wɩngd ne a Zeova tũubã. Kãsem-dãmbã sõnga maam tɩ m le tõog n maand bũmb nins m sẽn da maand m tẽebã kengr yĩngã.”

“A Zeova na n kõo foo pãnga”

Tõnd yɩɩlã sebr gom-zug sẽn yet tɩ Yɩɩl-y n pẽg a Zeova wã pʋgẽ, yɩɩn-nood n be be, n tõe n bels foo la keng f raood tɩ f le wɩng ne a Zeova tũubu. Wala makre, yɩɩl 60 soabã. A goamã yita 1 Pɩyɛɛr 5:10. Yɩɩllã yetame yaa: “A Zeova na n kõo foo pãnga.”

Wẽnnaam sõnga foo tɩ f bãng sɩdã la a yiis foo

likã pʋgẽ n kẽes-f vẽenem pʋgẽ.

Yaa Wẽnd sẽn yã tɩ fo sũurã sɩd ratame

n bãng yẽnda la f maan sẽn yaa tɩrgã.

Fo pʋlma yẽ tɩ f na n maana a raabã.

A sõnga foo, n na n kell n sõng foo.
Wẽnnaam kõo yẽ Biigã fo meng fãagr yĩnga.

Yaa a sẽn dat tɩ fo paam barkã yĩnga.

A sẽn sak tɩ yẽ meng Biigã ki fo yĩngã,

bɩ f bãng t’a na n sak n kõo foo pãnga.

A kõn yĩm tẽeb ning fo sẽn tallã ye.

A sɩd geta a nebã fãa yell sõma.

(REESGO)

Ne a Zezi maoongã maasem, fo lebga Wẽnd neda.

A na n kõo foo pãnga, a na n kenga f raoodo.

A na n wilga foo sore, a meng na n kogla foo.

A na n kõo foo pãnga, a na n kenga f raoodo.

F sã n dat n kelg yɩɩn-kãngã bɩ Rĩungã yɩɩl a taaba, bɩ f kẽ www.pr418.com pʋgẽ, n kilik PUBLICATIONS > MUSIQUE.

Découvrez aussi…

KIBAY TÕND ZUGU

Kos-y t’a Zeova Kaset soab wa kaag-yã

Bao-y n bãng-y bũmb Biiblã zug wall a Zeova Kaset rãmbã zug n paase.

LEBG N WA A ZEOVA NENGẼ