YƖƖR tõe n namsa ned buud fãa, baa sẽn tũud-b a Zeova wã. Yɩɩn-gʋlsdã ra yeelame tɩ wakat ninga, yɛl wʋsg n be yẽ pʋgẽ, n namsd-a. (Yɩɩn-sõamyã 94:19) A Zeezi me ra yeelame tɩ yaoolem wakatã, “vɩɩmã yɛl yɩɩr” tõe n zɩsga ned sũuri, hal t’a Zeova tũub lebg toogo. (Luk 21:34) Rẽ yĩnga ligdã zu-loees wall laafɩ kaalem bɩ zakã pʋgẽ zu-loees mi n kɩtame tɩ f maand yɩɩr bɩ? Wãn to la a Zeova tõe n sõng foo?

Tõnd pa tõe n tõog yɩɩrã ne d meng pãng ye. Tʋm-tʋmd a Poll ra yeelame tɩ “tõnd paamda namsg buud toor-toore,” tɩ ‘tõnd dag n ka mi d sẽn na n maanega,’ la tɩ “b pãbda tõnd n lubdẽ.” La a yeelame me tɩ ‘b ka kʋʋd tõndo,’ la tɩ ‘tõnd ka boogd raoodo,’ la ‘d ka kiid ye.’ Bõe n sõngd tõnd tɩ d tõogd toogo? Yaa pãn-kãseng sẽn yaa Wẽnnaam dẽnda, rat n yeel tɩ pãng sẽn yit Wẽnnaam a Zeova sẽn tõe fãa wã nengẽ.—2 Korẽnt-rãmbã 4:7-9.

Tẽeg a Zeova sẽn da tũnugd ne bũmb nins pĩndã n kõt foo pãngã. Fo tẽra sõsg sẽn da sõng foo tɩ f kɩs sɩd t’a Zeova nonglmã pa sɛt bɩ? Fo sã n da mi n moond koɛɛgã n gomd arzãnã a Zeova sẽn pʋlmã yell ne nebã, pa kɩtd tɩ f maneg n kɩs sɩd ne a Zeova pʋlemsã sɩda? D sã n kẽnd tigissã, la d wilgd neb a taabã d sẽn tẽed bũmb ninsã, d paamda pãng n maood ne vɩɩmã yɩɩre, d paamdame me tɩ d yamã gãe bãane, tɩ d tõe n tũ a Zeova ne sũ-noogo.

Hakɩɩka, wakat ninga f sẽn segd n maanã waoogame tɩ yaa wa f na n pʋɩɩ f meng zĩis ka tɛka. Wala makre, a Zeova ratame tɩ bũmb fãa pʋgẽ bɩ d reng n bao a Rĩungã, la d modg me n maand bũmb nins sẽn paasd d tẽebã pãngã n pa vaandẽ ye. (Matye 6:33; Luk 13:24) La sã n mik tɩ b namsda foo f tũudmã yĩnga, wall f bẽedame, pa rẽ bɩ yaa zakã pʋgẽ zu-loees n namsd foo tɩ f pa le tõe n maan wa pĩndã? Tõe me tɩ f tʋʋmdã yaa yaamse, la rɩt sẽka, tɩ f pa le tõe n naag f tẽed-n-taasã n maan yɛl kẽer wa pĩndã ye. F sẽkã la f pãngã sã n paoodẽ, tɩ f sẽn segd n maan bũmb ninsã yaool n waoogẽ, f tõeeme n wa pa le mi f sẽn maand ye. Tõe meng tɩ f zoe n tagsame t’a Zeova sẽn dat tɩ f maanã yaa n looga nugu.

A Zeova yaa wʋmda. A zɩ n kos tõnd tɩ d maan sẽn yɩɩd d pãng ye. A miime me tɩ yaams la sũ-sãams sã n loog-do, pa tõe n sa zĩig pʋgẽ ye.—Yɩɩn-sõamyã 103:13, 14.

Tẽeg a Zeova sẽn maan bũmb ning n sõng no-rɛɛs a Eli wã. A Eli sẽn wa n koms raoodo, tɩ rabeem me yõk-a t’a zoe n kẽng we-raoogẽ wã, rẽ yĩnga a Zeova zab-a lame, la a yeel-a t’a lebg n tɩ tʋm tʋʋmdã a sẽn kõ-a wã bɩ? Ayo. Naoor a  yiibu, a Zeova tʋma malɛk t’a wa maag a yĩng n nek a Eli, n kõ-a rɩɩbo. Ne rẽ fãa, rasem 40 loogame t’a Eli ket n maand yɩɩr la rabeem. Bõe la a Zeova maan n paase? Pipi, a maana bũmb n wilg t’a tara pãng n tõe n kogl a Eli. Yiib-n-soaba, a Zeova kɩtame t’a wʋm koɛɛg sẽn yaa wa ned n walemde, tɩ keng a raoodo. Sẽn na n baase, a Zeova kɩtame t’a bãng tɩ neb tusa n ket n tũud yẽ, la t’a pa a yembr ye. Tao-tao bala, a Eli paama pãnga, n le lebg no-rɛɛs sẽn tar yẽesem. (1 Rĩm-dãmbã 19:1-19) Bõe la rẽ wilgd tõndo? Yɩɩrã sẽn wa n loog a Eli wã, a Zeova talla sũ-mar ne-a, la a zoe a nimbãanega. A Zeova pa toeem ye. A na n sõnga tõnd me woto.

Fo sã n na n yãk bũmb f sẽn na n maan a Zeova tũubã pʋgẽ, ra yãk sẽn yɩɩd f pãng ye. Ra rɩk f sẽn da tõe n maan bũmb nins pĩndã n mak ne masã wã ye. Wala makre, ned sẽn zoet sõma sã n maan kiis bɩ yʋʋm n pa le zoetẽ, pa tõe tɩ zĩig pʋgẽ bɩ a zoeesã le yɩ wa pĩndã ye. Yaa tɩlɛ t’a le sɩng bilf-bilfu, t’a tõogã tar paasgo. Kiris-nebã yaa wa neb sẽn zoete. La zoeesã pʋgẽ, kiris-ned fãa yãkda bũmb takɩ a sẽn dat n modg n maane. (1 Korẽnt-rãmbã 9:24-27) Bõe yĩng tɩ f pa na n yãk bũmb f sẽn ne tɩ f tõe n maana masã menga? Fo tõe n yãka yam n na n modg n kẽnd tigsg a ye. Kos a Zeova t’a sõng-f tɩ f tõog n maan wa f sẽn yãk yam ningã. F tẽebã sã n le wa paamd pãnga, na n yɩɩ wa fo lembame n gese, n bãng t’a Zeova yaa noogo. (Yɩɩn-sõamyã 34:9) Tẽeg tɩ sẽn yaa bũmb ning fãa la f maan n na n wilg a Zeova tɩ f nong-a lame, baa pa bõn-kãsenga a nandame.—Luk 21:1-4.

Bõe la a Zeova maan n sõng a June t’a paam pãng n lebg n wa a nengẽ? Ad a June sẽn yeele: “M da ket n pʋʋsda a Zeova n kot a sõngre. Daar a ye, m bi-pag n togs maam tɩ tigis-kãseng n na n zĩnd mam sẽn be tẽng ningã. M yãka yam n na n tɩ kelg daar a yembr bala. Mam sẽn paam n le tɩ tigim ne a Zeova nin-buiidã, m sũ-noogã ra pa tõe n bãng n bilg ye! Rẽ bal la m da rat sẽn na yɩl n yẽege. Masã, m le wɩngda ne a Zeova tũubu, n tar sũ-noogo. M vɩɩmã tara bark n yɩɩd pĩndã. M mii vẽeneg masã tɩ m pa tõe n tũ a Zeova m yembr ye. Yaa tɩlɛ tɩ m sak tɩ m saam-biisã sõng-ma. M pʋʋsda a Zeova bark a sẽn maan sũ-mar tɩ m tõog n lebg n wa wã.”