Y SẼN TÕE N SƖNG SÕSG TO-TO
SAK A 5
Gomd-y ne gũusgu
Biiblã sẽn yete: “Bɩ y goamã tall yamleoog wakat fãa.”—Kolo. 4:6.
A Poll sẽn maan to-to
1. Ges-y VIDEO wã, wall y karem Tʋʋm 17:22, 23. Rẽ poor bɩ y leok sogsgã:
-
A Poll sẽn yã ziri tũudmã yel-maandɩ Atɛnnã, a manesem yɩɩ wãna?—Ges-y Tʋʋm 17:16.
-
A Poll pa ning Atɛn nebã taal ye. La wãn to la a tũnug ne bũmb nins b sẽn da tẽedã n taas-b koe-noogã ne waoogre?
A Poll sẽn maan to-to wã wilgda tõnd bõe?
2. D sã n maag d yĩng n tags d sẽn dat n yeelã zugu, d sẽn na n yeel rẽ to-to wã, la wakat ning d sẽn na n yeel rẽ wã, sõngdame tɩ nebã sak n kelg-do.
Maan-y wa a Poll
3. Yãkd-y y gom-biisã ne gũusgu. Wala makre, y sã n wa sõsd ne ned sẽn pa kiris-neda, tõe n yɩɩ tɩlɛ tɩ y toeem gom-biis nins y sẽn na n tũnug ne n gom Biiblã yellã, pa rẽ bɩ a Zeezi yellã.
4. Ra yɩ-y yãg-yãg n dems ned tagsg ye. Bas-y-yã-a t’a togs sẽn be a sũurẽ. A sã n yeel bũmb sẽn pa zems ne Biiblã, bɩ y ra wẽ no-koeemd ne-a ye. (Zak 1:19) Y sã n maag y yĩng n kelg-a, y na n tõog n bãnga bũmb nins a sẽn tẽedã, la a sẽn tẽed rẽ wã võore.—Yel. 20:5.
5. Sã n tõe bɩ y sak n deeg a sẽn yeelã la y pẽg-a. Tõe t’a kɩsa sɩd ne a sũur fãa t’a tũudmã sẽn zãmsd-a bũmb ninsã la sɩda. Sõs-y bũmb yãmb y yiibã fãa sẽn sak n deeg tɩ yaa sɩda, la y sõng-a bilf-bilf t’a wa bãng bũmb nins Biiblã sẽn yetã.
