Ned fãa tog n yãka a sã n na n maana a Zeova raab bɩ a na n maana a Sʋɩtãan ne a zĩn-dãmbã raabo. D pa tõe n maand a Zeova raab la d maand a Sʋɩtãan daab me ye. A Zeova raabã maaneg n yaa sõma.

Wa d sẽn yã seb-kãngã pʋgẽ wã, zĩn-dãmbã sẽn nong yaa nebã namsg la b belgre. A Zeova yẽ pa woto ye. A nonga ãdem-biisã wa ba sẽn nong a kamb to-to wã. Yẽ n kõt “bark sõma fãa la kũun-sõma fãa.” (Zak 1:17) A pa mongd tõnd bũmb sẽn tõe n naf-d ye. A sakame meng t’a Zezi wa ki tõnd yĩnga.—Efɛɛz rãmba 2:4-7.

Tags-y n ges-y bũmb nins fãa Wẽnnaam Biig a Zezi sẽn maan a sẽn wa n be tẽngã zugã. A kɩtame tɩ mugs zɛlma lake, tɩ zoens nin puki. A sãooga wãoob la wobse. A riga zĩn-dãmba, la a maag bãas buud toor-toore. Ne Wẽnnaam pãnga, a Zezi vʋʋga neb sẽn da ki menga.—Matɩe 9:32-35; 15:30, 31; Luk 7:11-15.

Wẽnnaam togsda tõnd sɩd wakat fãa. A pa na n tol n yag ziri n belg tõnd ye. A zɩ n belg ned baa a ye.—Sõdbo 23:19.

Wa zõaag sẽn be sʋlg gaam-gaam pʋgẽ n pa tõe n yi wã, yɛl kẽer sẽn yaa ziri gaama neb wʋsg tɩ yɩl n paam b mens yaa toogo. Kɩtame tɩ b zoet sẽn ki-bã, la b zoet zĩn-dãmbã. B zoeta ned na n wa kãab-b wẽnga, bɩ n maan-b tɩɩm. B baooda tɩt n na n kogl b mense, la b baood n na n bãng beoog yɛla, rabeemã yĩnga. B tẽeda ziri la yel-maandɩ nins a Sʋɩtãan sẽn yelgdã, hal tɩ lebg wa yembdo. La yel-kãensã baa a ye pa tõe n belg wẽn-tũudb hakɩkã ye.

A Zeova pãng yɩɩda a Sʋɩtãan zĩig sẽn zãre. Yãmb sã n maand a Zeova raabã, a na n kogla yãmb tɩ zĩn-dãmbã ra paam-y ye. (Zak 4:7) Ned pa na n tõog n maan yãmb tɩɩm ye. Wala makre, Nizeriya tẽngẽ wã, tɩɩm-dãmb a tãab n maan tɩɩm n na n kʋ a Zeova kaset soaba, a sẽn zãgs t’a pa na n yi tẽngã yĩnga. Tɩɩmã sẽn pa yãk nengã, b nin-yend pɛleng n yɩke, t’a tɩ bõos a Zeova Kaset soabã sugri.

Zĩn-dãmbã sã n namsda yãmba, y tõe n boola a Zeova yʋʋrã, n kos-a sõngre, t’a na n kogl-y lame. (Yelbũna 18:10) La y sã n dat t’a Zeova kogend-y wakat fãa, y tog n zãaga y meng fasɩ ne bũmb nins fãa sẽn kẽesd yãmb zĩn-dãmbã yɛlẽ, la y ra le maan b sẽn datã ye. Yaa woto la pĩnd wẽndẽ Efɛɛz kiris-nebã maan-yã. B tigsa b tɩtã sɛbã fãa n yõog bugum. (Tʋʋma 19:19, 20) Rũndã-rũndã me, wẽn-tũudb hakɩkã tog n maana wa bãmba.  Y sã n tara bũmb y sẽn tẽed tɩ kogend-y lame, yaa nug-bĩnga, zũuri, kĩndfu, sebre, zʋʋre, sẽn yaa a soab fãa bɩ y lob-a wall y sãam-a.

D yãame tɩ y sã n dat n ta Wẽnnaam yam, y tog n basa ziri tũudmã la y zãag y meng ne sẽn pa sõma. La rẽ bal pa sek ye. Y tog n lebga tũudum hakɩkã neda. Biiblã tõe n sõng-y lame tɩ y bãng y sẽn segd n maanega, n lebg tũudum hakɩkã neda.

Tẽngã zugu, a Sʋɩtãan ne zĩn-dãmbã tara nin-buiid sẽn zãmsd neb a taabã sẽn yaa ziri, la b maand sẽn pa sõma. La a Zeova me tara a nin-buiidu. Yaa a Zeova Kaset rãmbã. (Ezai 43:10) Dũniyã gill zugu, b sõorã kolga milyõ a nii. B fãa modgdame n maand sẽn yaa sõma, la b zãmsd neb a taabã sẽn yaa sɩda. Tẽns wʋsg pʋgẽ, b tigimda taab Rĩung rotẽ. Y sã n kẽng Rĩungã roogẽ, b na n deeg-y-la sõma.

B tʋʋmd yaa sõng neb a taabã tɩ b tõog n tũ Wẽnnaam sõma. Y sã n data, b tõe n wata yãmb zakẽ wã, n sõng-y tɩ y wʋm Biiblã goam võor n paas la y tõog n tũ a Zeova wa a sẽn datã. Zãmsgã yaa zaalem. A Zeova Kaset rãmbã sũy yaa noog b sẽn zãmsd nebã Biiblã, bala b nonga a Zeova la b nong nebã.