Malɛgsã a Zeova sẽn naanã fãa ra yaa sõma. La a ye n wa n lebg tõata. Yẽ la b sẽn boond t’a Sʋɩtãanã. A ra ratame tɩ nebã sẽn be dũniyã zʋgã bas a Zeova sakre, n maan yẽ raabo. D gom a kɩɩsgã yelle.

A Zeova ra kɩtame tɩ tɩɩs wʋsg yi Edɛn zẽedã zĩigẽ, tɩɩs sẽn womd biis tɩ b tõe n dɩ, hal tɩ noome. A yeela a Ãdem ne a pag a Hawa tɩ b tõe n yãgsa tɩɩsã biis n dɩ. La tɩɩg a ye la a yeel tɩ b ra saag n dɩ a biisã ye. A yeel-b lame tɩ b sã n dɩ, b na n kiime.—Sɩngre 2:9, 16, 17.

Daar a ye, waaf n wa n gom ne a Hawa. Rẽ t’a Hawa yaa a ye. La pa waafã n sɩd da gomd ye. Yaa a Sʋɩtãan n maan tɩ yaa wa a gomdame. A Sʋɩtãan yeela a Hawa t’a sã n dɩ tɩɩgã biis b sẽn yeel tɩ b ra rɩ wã, a na n lebga wa Wẽnnaam n tar yam wʋsgo. A yeelame me t’a sã n dɩ a pa na n ki ye. A gom-kãensã fãa yaa ziri. La baa ne rẽ, a Hawa tẽe a Sʋɩtãana, n dɩ tɩɩgã biiga. A yãkame n tɩ kõ a Ãdem, tɩ yẽ me rɩ.—Sɩngre 3:1-6.

Kiba-kãngã yaa bũmb sẽn sɩd zĩndi. A sõngda tõnd tɩ d bãng t’a Sʋɩtãan yaa tõat la ziri yagda. A yeela a Hawa t’a sã n kɩɩs Wẽnnaam, a pa na n ki ye. Yaa ziri, bala a Hawa kiime, a Ãdem me kiime. Yaa sɩd t’a Sʋɩtãan yẽ pa ki ye. La sẽn mik t’a sẽn maanã yaa yel-wẽndã, a na n wa kiime. Baasgo, a ket n vɩɩme, n tudgd ninsaalbã. A ket n yaa ziri yagda, n pirsd nebã n dat tɩ b kɩɩs Wẽnnaam noyã.—Zã 8:44.

Malɛgs a taab me n wa n lebg wẽnse. B gesa pʋg-neeb sẽn be tẽngã zugu, n tʋlg-ba. Rẽ kɩtame tɩ b sig n tedg b mens n lebg rapa, n dɩgs b sẽn dat-b rãmbã n maan b pagba. Wẽnnaam nifẽ, yaa kisgu.—Sɩngre 6:1, 2; Ziid 6.

B sẽn maanã kɩtame tɩ wẽnemã lebg wʋsg tẽngã zugu. Bala b sẽn dɩgs pagb ninsã roga kamba, la b kambã ra pa wa kamb a taabã ye. B ra yaa nin-wobdo, n nong wẽnemã la nen-kɛglmã tɩ loog nugu. Bilf-bilfã, wẽnemã wa n pida dũniyã, hal t’a Zeova yeel t’a na n kɩtame tɩ sa-kẽeng ni n sãam nin-wẽnsã. Yaa nin-tɩrg a Nowe ne a zakã rãmb bal n põse.—Sɩngre 6:4, 11; 7:23.

Malɛg-wẽnsã pa ki ye. B tedga b mense, n mak n na n leb saasẽ. La Wẽnnaam a Zeova pa bas-b ye. A sɩbg-b lame, bala a pa sak tɩ b le naag a malɛg-sõma wã ye. Sẽn paase, a kɩtame tɩ b pa le tõe n tedg b mens n lebg ninsaalb ye. Bʋ-kaoorã raar sẽn watã, a na n tolg n sãam-b-la zãnga.—2 Pɩɛɛr 2:4; Ziid 6.

Yʋʋmd 1914, zabr n zĩnd saasẽ. Wilgr sebrã sẽn be Biiblã pʋgẽ wã bilgda sẽn yɩ to-to. B yeela woto: “La zabr  zĩnda arzãn pʋgẽ [saasẽ]. A Misɛll [a Zezi Kirist sẽn vʋʋg n be saasẽ wã] ne bãmb malɛk rãmbã [malɛg-sõma wã] zaba ne dargõ wã [a Sʋɩtãan], la dargõ wã ne yẽ malɛk rãmbã [malɛg-wẽnsã] me zaba ne bãmba. La dargõ wã ne a poorẽ dãmbã ka tõog ye, la b ka le yã bãmb zĩig arzãn pʋgẽ [saasẽ] ye. La b riga dargõ-kãsengã sẽn yaa wag-kʋdr sẽn boond tɩ diabl la Sʋɩtãanã sẽn belgd dũniyã fãa wã. B riga yẽnda t’a kẽng dũniyã zugu, la b riga yẽ malɛk rãmbã [malɛg-wẽnsã] me tɩ b tũ yẽnda.”

Rẽ poore, bõe n maane? Wilgr sebrã paasame: “Yaa woto yĩnga arzãna [saasẽ] la yãmb dãmb sẽn be be, bɩ y maan sũ-noogo.” Malɛg-sõma wã ra tara bʋʋm n na n maan sũ-noogo, bala a Sʋɩtãan ne a malɛg-wẽnsã pa na n le zĩnd saasẽ ye. La ninsaalbã sẽn be tẽngã zugã yẽ? Biiblã yeelame: “Toog bee ne neb nins sẽn be dũniyã zug la ko-kãsengã pʋgẽ wã. Tɩ bõe, Sʋɩtãanã sigame n wa yãmb nengẽ, la a sũ-puugrã yaa kãsenga, a sẽn bãng t’a wakat yaa bilfã yĩnga.”—Wilgri 12:7-9, 12.

Sɩd-sɩda, a Sʋɩtãan ne malɛg-wẽnsã sẽn yaa a poorẽ dãmbã belgda dũniyã neba, la b kɩtdẽ tɩ b paamd toog sẽn pa tõe n bãng n bilgi. Malɛg-wẽnsã la b sẽn boond tɩ zĩn-dãmbã. Yaa Wẽnnaam bɛɛba. Zĩn-dãmbã fãa yaa wẽnse.