Neb n be, tɩ tõnd pa tõe n yã-b ne nif ye! Bãmb me tara zĩig n vɩ. B kẽer rata tõnd neere, la b sãnda rata tõnd ne wẽnga. La rẽ yĩnga, yaa neb sẽn deng n vɩɩmd tẽngã zugu, n ki bɩ?

Ayo. B pa reng n vɩɩmd tẽngã zug ye. Neb wʋsg sẽn tagsd tɩ sẽn ki-bã tɩ vɩɩ zĩig a to wã pa sɩd ye. Bõe n wilgd rẽ? Yaa Biiblã. Biiblã yaa sebr sẽn togsd sɩda. Yaa a Zeova sẽn yaa Wẽnnaam sɩd-sɩdã n kɩt tɩ b gʋls-a. A Zeova n naan ninsaalbã. A mii bũmb ning sẽn maand ned kũum poore.—2 Tɩmote 3:16.

Biiblã yeelame tɩ Wẽnnaam “yãka tẽngã tom n naan” d yaab a Ãdem. (Sɩngre 2:7) Wẽnnaam ning-a-la zĩ-neer pʋgẽ, tɩ b boond tɩ Edɛn zẽed zĩiga. A Ãdem sã n da pa kɩɩs a Zeova noorã, a ra pa na n ki ye. A ra na n ket n vɩɩ tẽngã zug hal ne rũndã. La a sẽn wa n yãk yam n kɩɩs Wẽnnaam noorã, Wẽnnaam yeel-a lame: ‘Fo na n lebga tẽngã tom fo sẽn yi a pʋgẽ wã. Tɩ bõe, fo yaa tẽng tom, la fo na n le lebga tẽng tom yɛsa.’—Sɩngre 3:19.

D bao n wʋm gom-kãensã võore. Yãmb tagsdame t’a Ãdem ra bee yɛ nand t’a Zeova yãk tẽngã tom n naan-a? A ra pa be saasẽ ye. A ra pa be zĩig baa a ye. A pʋd n da ka be ye. Dẽnd a Zeova sẽn yeel t’a Ãdem na n “le lebga tẽng tom yɛsã,” rat n yeelame t’a na n kiime. A pa na n kẽng zĩig a to n tɩ vɩ ye. A Ãdem sẽn ki wã,  a pa le vɩ ye. Sẽn ki pa le vɩ ye.

La neb a taabã sẽn ki wã yẽ? B tɩ vɩɩ zĩig a to bɩ? Ad Biiblã sẽn yete:

• “Bãmb fãa [ninsaalbã ne rũmsã] rabda zĩ-yende. Fãa maana ne tẽng tom, la fãa leb n lebgda tẽng tom.”—Koɛɛg Soaba 3:20.

• “Kũum ka mi bũmb ye.”—Koɛɛg Soaba 9:5.

• “Bãmb nonglmã ne b kisgrã la b sũ-kiirã me fãa sɛɛme.”—Koɛɛg Soaba 9:6.

• “Tʋʋmd ne tagsg la yam ne bãngr ka be kɩɩm-kulg [yaoogẽ] fo sẽn dabd zĩig ningã ye.”—Koɛɛg Soaba 9:10.

• “Bãmb na n maana yõore, n leb n leb tẽngã tomẽ. Baraar bala, bãmb tagsg na n sɛɛme.”—Yɩɩl Sõamyã 146:4.

Yaa toog tɩ y sak vɛrse kãensã goamã bɩ? Sã n yaa rẽ,  bɩ y tags n gese: Zak-sobend dãmbã tʋmda wʋsg sẽn na yɩl n paam ligd n ges b zagsã rãmb yelle. B sã n wa maan kaalem, naoor wʋsgo, zakã rãmb vɩɩm lebgda toogo. Wakat ninga, yɩl tɩ pagã ne kambã paam dɩɩb yaa nimbãanega. Tõe meng tɩ zakã soab bɛɛb tar-b n namsdẽ. Sok-y y meng woto: ‘Sã n mik tɩ zakã soab tɩ vɩɩ zĩig a to, bõe yĩng t’a pa ket n get a zakã rãmb yelle? Bõe yĩng t’a pa kogend-b tɩ nin-wẽnsã ra paam-b n namse?’ Yaa kiidã sẽn pa le tõe n maan baa fʋɩ wã yĩnga. Biiblã sẽn yetã yaa sɩda. A sɩd pa le vɩ ye.—Yɩɩl Sõamyã 115:17.

La woto rat n yeelame tɩ sẽn ki-bã pa tol n tõe n vʋʋg bɩ? Ayo. D na n wa goma sẽn ki-bã vʋʋgrã yelle. La nananda, d bãng bal tɩ rat n yeelame tɩ sẽn ki-bã pa ne yãmba, b pa mi y sẽn maande, b pa le wʋmd yãmb sẽn yete, b pa le tõe n gom ne-yã. Y pa tar bʋʋm n na n zoe sẽn ki-bã ye. B pa tõe n sõng yãmba, b pa tõe n maan-y wẽnga.—Koɛɛg Soaba 9:4; Ezai 26:14.