A Zeova na n kɩtame t’a Sʋɩtãan sẽn wa ne namsg ningã fãa sa. A kɩtame t’a Zezi lebg Rĩm sẽn na n wa rɩ naam dũniyã gill zugu. A naamã sã n wa ta dũniyã zugu, tẽngã gill na n lebga arzãna.—Daniɛll 7:13, 14; Luk 23:43.

Ad a Zeova sẽn pʋlme:

• RƖƖBÃ NA N GALAME: “Tẽngã bõn-koaadlã womda biisi. Wẽnnaam sẽn yaa tõnd Wẽnnaamã ningda tõnd zut barka.” “Ki wʋsg na n zĩnda soolmã pʋgẽ. A na n miima tãens zutu, a biisã na n yɩɩ wa Libã dẽnda. La tẽngã nebã na n fɩɩga wa mood sẽn be pʋt pʋsẽ.”—Yɩɩl Sõamyã 67:7; 72:16.

• ZAB PA NA N LE ZĨND YE: “Wa n ges-y Zu-soabã tʋʋma, yaa bãmb n wat ne sãoong dũniyã pʋgẽ. Bãmb kɩtdame tɩ zabr sɛ hal dũniyã tɛk fãa. Bãmb kaooda tãbdo la b kʋʋsda kãnã, la b yõogda saar dãmb bugum.”—Yɩɩl Sõamyã 46:9, 10.

• NIN-WẼNS PA NA N LE ZĨND YE: “Tɩ bõe, tʋʋm-wẽns  maandbã na n sãamame . . . A keta bilf bala, tɩ nin-wẽng kõn tol n zĩnd ye. Yãmb na bao tɩ bãng a zĩiga, la a ka be ye.”—Yɩɩl Sõamyã 37:9, 10.

• BÃASE, SŨ-SÃANG LA KŨUM KÕN LE ZĨND YE: “Dẽ, zoens nin na n pukame, la wʋms tʋb na n yoosame. Dẽ, wobs na n yɩgame n tĩims wa yãgse, la mugs zɛlma na n laka ne sũ-noog yɩɩla.”—Ezai 35:5, 6.

  “Wẽnnaam . . . mengã na n paa ne bãmba [nebã]. Bãmb na n yẽesa nintãmã fãa t’a ra le zĩnd bãmb [nebã] ninẽ ye, la kũum ka na n le zĩnd ye, la sũ-sãoong bɩ yãbr wall toog kõn le zĩnd yɛs ye, tɩ bõe, dẽenem bũmb fãa loogame.”—Wilgri 21:3, 4.

A Sʋɩtãan ne zĩn-dãmbã yagda ziri. La a Zeova pa tõe n yag ziri ye. A sẽn pʋlem fãa pidsdame. (Luk 1:36, 37) A Zeova nonga yãmba, la a rat tɩ y vɩɩmd arzãnã a sẽn pʋlmã pʋgẽ. Bɩ y yã a Zeova Kaset rãmbã, tɩ b na n sõng-y lame tɩ y bãng Biiblã sẽn yetã. Y sã n tũ Biiblã sẽn yetã, y na n paama y meng ne zɩɩlem la ziri buud fãa a Sʋɩtãan ne zĩn-dãmbã sẽn yelgdã. Y na n wa paama y meng fasɩ ne yel-wẽndã la kũumã yembdo. A Zezi meng ra yeela woto: “Yãmb na bãng sɩdã, la sɩdã na kõ yãmb lohorem.”—Zã 8:32.